1. Dikon nos tur mester di konsuelo?

NOS tur mester di konsuelo. Kisas nos bida ta yen di preokupashon, desepshon i sufrimentu. Òf podisé nos ta sufri pasobra nos tin ku lucha ku edat avansá, malesa òf morto di un ser kerí. Ademas, algun di nos tin ku enfrentá oposishon severo. I mundu ta bira kada bes mas i mas violento. Sí, nos ta konvensí ku e ‘tempunan krítiko i difísil pa trata kuné’ akí ta prueba ku nos ta bibando “den e último dianan” i ku kada dia ku pasa nos ta un dia mas serka di e mundu nobo. (2 Tim. 3:1) Asina mes, algun di nos tin hopi tempu ta warda pa e promesanan di Yehova kumpli. I ta parse ku nos difikultatnan ta sigui oumentá. Pues, unda nos por haña konsuelo?

2, 3. (a) Kiko nos sa tokante Habakuk? (b) Dikon ta bon pa nos studia e buki di Habakuk?

² Pa kontestá e pregunta ei, laga nos analisá e buki di Habakuk. Beibel no ta duna nos detaye spesífiko tokante Habakuk su bida, pero e buki ku ta karga su nòmber ta un fuente di animashon pa nos. Habakuk su nòmber probablemente ta  nifiká “Abraso Fuerte.” Esaki kisas ta referí na e manera ku Yehova ta konsolá nos. Ta komo si fuera e ta duna nos un brasa. Òf e por referí na e manera ku nos ta tene duru na Yehova. Habakuk a hasi Yehova vários pregunta. I Yehova a inspirá Habakuk pa skirbi e kòmbersashon akí, pasobra e tabata sa ku nos lo benefisiá di dje awe.—Hab. 2:2.

³ E kòmbersashon íntimo akí entre Yehova i e profeta afligí ta tur loke Beibel ta bisa di Habakuk. Su buki ta parti di “tur loke a ser skirbí anteriormente” i ku a keda preservá den e Palabra di Dios “pa asina mediante nos perseveransia i e konsuelo for di e Skritura nos por tin speransa.” (Rom. 15:4) Dikon ta bon pa nos studia e buki di Habakuk? Wèl, e por siña nos kon pa konfia den Yehova. Ademas, e profesia di Habakuk ta sigurá nos ku nos por tin pas mental sin importá e problema- i difikultatnan ku nos ta enfrentá. Ku esei na mente, laga nos analisá e buki di Habakuk.

4. Dikon Habakuk tabata sintié asina angustiá?

⁴ Lesa Habakuk 1:2, 3. Habakuk a biba durante un tempu hopi difísil. E tabata masha tristu pasobra e israelitanan tabata malbado i violento. Tur rònt di dje tabatin inhustisia i opreshon. P’esei Habakuk tabata puntra su mes: ‘Ki ora e maldat akí lo a kaba? Dikon Yehova tabata tarda pa hasi algu?’ E no tabata sa kiko pa hasi. Durante e tempu difísil akí, el a pidi Yehova pa intervení. Kisas Habakuk a pensa ku Yehova no tabata preokupá ku nada. I tabata parse ku Dios tabata tarda pa hasi algu. Abo tambe a yega di sinti asina?

5. Ki lès importante e buki di Habakuk ta siña nos? (Wak e promé plachi.)

⁵ Akaso Habakuk a pèrdè konfiansa den Yehova? El a pèrdè fe den Dios su promesanan? Klaru ku nò! E solo echo ku el a bai serka Yehova ku su problemanan i no serka hende ta mustra ku e no a pèrdè konfiansa den Yehova. Habakuk tabata preokupá i konfundí pasobra e no tabata komprondé pakiko Yehova tabata tarda asina tantu pa tuma akshon òf dikon Yehova tabata permitié sufri. Yehova a inspirá Habakuk pa skirbi su sintimentunan. Esei ta siña nos un lès importante: Nos no mester tin miedu di papia ku Yehova tokante nos preokupashon- i dudanan. Yehova ta asta invitá nos pa hasi orashon i deshogá nos mes serka dje. (Sal. 50:15; 62:8) Proverbionan 3:5 ta animá nos pa ‘konfia den Yehova ku henter nos kurason i no dependé riba nos mes komprondementu.’ Habakuk sigur a apliká e palabranan akí den su bida.

6. Dikon ta importante pa nos hasi orashon?

⁶ Habakuk tabata konfia den su Amigu i Tata, Yehova. P’esei, el a tuma inisiativa pa papia ku Yehova. En bes di keda preokupá i purba di solushoná e situashon su mes, el a bisa Yehova kon e tabata sinti. Habakuk a pone un bon ehèmpel pa nos. Yehova, kende ta skucha orashon, ta invitá nos pa konfia den dje i bis’é loke ta preokupá nos. (Sal. 65:2) Si nos hasi esei, lo ta komo si fuera nos ta sinti Yehova su brasa amoroso ora e ta kontestá nos orashonnan i ta guia nos. (Sal. 73:23, 24) Sin importá ki situashon nos ta pasando aden, Yehova lo yuda nos mira e kosnan manera e ta mira nan. Sí, ora nos hasi orashon di kurason, nos ta mustra Yehova ku nos ta konfia den dje.

7. Kon Yehova a reakshoná ora Habakuk a kont’é su preokupashonnan?

⁷ Lesa Habakuk 1:5-7. Despues ku Habakuk a bisa Yehova kon e tabata sinti, kisas el a puntra su mes kon Yehova lo a reakshoná. Ma komo ku Yehova ta un Tata amoroso, el a komprondé kon Habakuk tabata sinti. Dios tabata sa kuantu Habakuk tabata sufri i ku e tabata roga pa yudansa. P’esei, Yehova a laga Habakuk sa kiko lo el a hasi ku e hudiunan rebelde. Kisas Habakuk tabata e promé persona ku Yehova a bisa ku fin di e periodo violento ei tabata serka.

8. Dikon Yehova su kontesta a konfundí Habakuk?

⁸ Yehova a laga Habakuk komprondé ku e tabata kla pa tuma akshon. E generashon malbado i violento ei pronto lo a haña nan kastigu. Ora Yehova a usa e ekspreshon “den boso dianan,” el a indiká ku e huisio akí lo a tuma lugá durante bida di e profeta òf di e hendenan ku tabata biba den su tempu. Akaso esei tabata e kontesta ku Habakuk tabata spera? Sigur ku nò. E kontesta ku Yehova a dun’é lo a nifiká mas sufrimentu pa henter Huda. E kaldeonan, òf babilonionan, tabata hende feros i kruel, i nan tabata mas violento ku Habakuk su mes hendenan, kendenan sikiera tabata konosé Yehova su normanan. Pakiko Yehova lo a usa e nashon pagano i kruel akí pa trese kalamidat riba su pueblo? Kon abo lo a sinti si bo tabata den Habakuk su situashon?

9. Ki otro pregunta Habakuk tabatin?

⁹ Lesa Habakuk 1:12-14, 17. Habakuk a komprondé ku Yehova lo a usa Babilonia pa kastigá e malbadonan, pero ainda e tabata konfundí. Asina mes, Habakuk a bisa humildemente ku Yehova lo a sigui ta su “Baranka.” (Deu. 32:4; Isa. 26:4) Ku pasenshi, Habakuk a sigui konfia den Yehova su amor i bondat. Esei a dun’é konfiansa pa bolbe akudí na Yehova i el a hasi pregunta manera: ‘Pakiko Dios a permití e situashon na Huda bira pió? Dikon e no a intervení mesora? Dikon e Todopoderoso a sigui permití mas sufrimentu? E ta “Santu”; su “wowonan ta muchu puru pa aprobá maldat.” Pues, dikon e tabata “keda ketu” miéntras ku maldat tabata tur kaminda?’

10. Dikon tin ora nos por sinti nos meskos ku Habakuk?

¹⁰ Tin ora nos por sinti nos meskos ku Habakuk. Nos ta skucha Yehova, nos ta konfia den dje i ta lesa i studia su Palabra. Tur e kosnan akí ta duna nos speransa. Ademas, nos ta siña tokante su promesanan mediante su organisashon. Apesar di tur e kosnan ei, kisas nos ta puntra nos mes: ‘Pa kuantu tempu mas nos tin ku sufri?’ Ban wak kiko Habakuk a hasi despues i kiko nos por siña for di esei.

11. Kiko Habakuk a disidí di hasi despues ku el a papia ku Yehova?

¹¹ Lesa Habakuk 2:1. Ora Habakuk a papia ku Yehova, el a haña pas mental. Esei a yud’é sigui warda ku konfiansa riba Yehova. Esaki no tabata un desishon emoshonal, pasobra mas despues el a bolbe bisa ku lo el a “spera ketu asina pa e dianan di angustia.” (Hab. 3:16) Tabatin mas sirbidó di Yehova ku meskos ku Habakuk, a sigui konfia den Yehova i a warda riba dje ku pasenshi. Esei ta animá nos tambe pa hasi meskos.—Mik. 7:7; Sant. 5:7, 8.

12. Kiko nos ta siña for di Habakuk?

 ¹² Kiko nos por siña for di e desishon ku Habakuk a tuma? Di promé, sin importá ki prueba nos pasa aden, nunka nos no mester stòp di hasi orashon na Yehova. Di dos, nos mester skucha loke Yehova ta bisa nos mediante su Palabra i su organisashon. Di tres, nos mester warda ku pasenshi riba Yehova i konfia ku lo e aliviá nos sufrimentu na su debido tempu. Ademas, meskos ku Habakuk, nos tambe por tin pas mental si nos hasi orashon di kurason na Yehova, skuch’é i warda riba dje ku pasenshi. Si nos hasi e kosnan akí, nos lo por sigui perseverá. Ademas, nos speransa lo duna nos mas pasenshi i, esei na su turno, lo yuda nos ta felis apesar di e problemanan ku nos enfrentá. Sí, speransa lo yuda nos konfia ku nos Tata selestial lo tuma akshon.—Rom. 12:12.

13. Ki siguransa nos ta haña na Habakuk 2:3?

¹³ Lesa Habakuk 2:3. Siguramente Yehova tabata kontentu ku Habakuk a disidí di warda riba dje. E Todopoderoso tabata konsiente di e situashon difísil ku Habakuk tabata aden. P’esei, na un manera amoroso i bondadoso Dios a konsol’é i a sigur’é ku pronto lo el a tuma akshon. Tabata komo si fuera Dios tabata bisa Habakuk: “Tene pasenshi i konfia den mi. Maske por parse ku mi ta tarda, lo mi tuma akshon!” Yehova a rekordá Habakuk ku ya el a pone un dia pa kumpli ku su promesanan. Pues, el a animá Habakuk pa sigui warda ku pasenshi. Finalmente, e profeta lo no a keda desepshoná.

14. Kiko nos tin ku hasi ora nos ta pasa den situashon difísil?

¹⁴ Nos tambe mester warda riba Yehova i skucha atentamente na loke e ta bisa nos. Esei lo fortalesé nos konfiansa den dje, i lo yuda nos tin pas mental apesar di prueba i difikultat. Hesus a animá nos pa no enfoká riba “e tempu- òf dianan stipulá” ku Yehova no a revelá na nos. (Echo. 1:7) Nos ta konfia ku Yehova sa ki ora ta e mihó momento pa aktua. P’esei, nos no ta entregá, ma ta spera riba Yehova ku humildat, pasenshi i fe. I miéntras ku nos ta spera riba Yehova, nos ke hasi bon uso di nos tempu i sirbi Yehova lo mihó ku nos por.—Mar. 13:35-37; Gal. 6:9.

15, 16. (a) Menshoná algun promesa importante ku nos ta haña den e buki di Habakuk. (b) Kiko e promesanan akí ta siña nos?

¹⁵ Yehova a primintí ku “e hustu lo biba pa medio di su fe” i ku “tera lo wòrdu yená ku konosementu di e gloria di SEÑOR.” (Hab. 2:4, 14) Sí, esnan ku warda riba Yehova ku pasenshi lo haña bida eterno.

¹⁶ Na promé instante, e promesa na Habakuk 2:4 ta parse di ta djis un simpel deklarashon. Ma apòstel Pablo no a pensa asina. El a haña e deklarashon ei di Yehova asina importante ku el a sita e versíkulo akí tres biaha! (Rom. 1:17; Gal. 3:11; Heb. 10:38) Sea kual sea e difikultatnan ku e hustunan enfrentá, si nan tin fe i konfiansa den Yehova, nan lo mira kumplimentu di su promesanan. Yehova ke pa nos fiha nos bista riba nos speransa pa futuro.

17. Kiko Yehova ta primintí nos si nos konfia den dje?

¹⁷ E buki di Habakuk ta kontené algun lès importante pa nos ku ta bibando den e último dianan. Yehova a primintí bida eterno na tur hende hustu ku tin  fe i ku ta pone konfiansa den dje. Sin importá ki problema òf preokupashon nos tin, laga nos sigui fortalesé nos fe i konfiansa den Yehova. Pa medio di Habakuk, Yehova a sigurá nos ku lo e sostené nos i salba nos. Na un manera amoroso, Yehova ta pidi nos pa warda ku pasenshi pa e tempu ku su Reino lo goberná e tera. Na e tempu ei, henter mundu lo ta yen di hende felis i pasífiko ku ta adorá Yehova.—Mat. 5:5; Heb. 10:36-39.

18. Ki impakto Yehova su palabranan tabatin riba Habakuk?

¹⁸ Lesa Habakuk 3:16-19. Yehova su palabranan tabatin un gran impakto riba Habakuk. El a meditá riba e kosnan maravioso ku Yehova a hasi, i esei a fortalesé su konfiansa den Yehova. Habakuk tabata sa ku pronto Yehova lo a tuma akshon, i esei a konsol’é apesar ku e mester a sufri un poko mas tempu. Habakuk no tabatin duda mas, al kontrario, su konfiansa den Yehova a oumentá. De echo, loke el a bisa den versíkulo 18 ta un di e ekspreshonnan di mas bunita di konfiansa ku nos ta haña den Beibel. Algun eksperto ta pensa ku e versíkulo ei ta nifiká literalmente: “Lo mi bula di alegria den SEÑOR; lo mi drei rònt di delisia den mi Dios.” Ki un bunita lès pa nos! Yehova no solamente a duna nos un bunita promesa, pero e ta garantisá nos ku e ta trahando awor kaba pa kumpli ku su promesanan.

19. Kon nos por risibí e mes konsuelo ku Habakuk a risibí?

¹⁹ E lès importante ku nos ta siña for di e buki di Habakuk ta ku nos tin ku konfia den Yehova. (Hab. 2:4) Pa nos por sigui konfia den Yehova, nos tin ku fortalesé nos relashon kuné. Pues, nos tin ku: (1) sigui hasi orashon na Yehova i bis’é tur nos preokupashonnan. (2) Skucha bon kiko Yehova ta bisa nos pa medio di su Palabra i su organisashon. (3) Pone fe den Yehova i warda riba dje ku pasenshi. Esei ta eksaktamente loke Habakuk a hasi. Aunke el a kuminsá su buki ku palabra tristu, el a kab’é ku konfiansa i alegria! Si nos sigui Habakuk su ehèmpel, nos tambe lo sinti komo si fuera Yehova ta duna nos un brasa amoroso. No tin mihó konsuelo ku nos por risibí den e mundu malbado akí.