1-3. (a) Kiko mester ta nos punto di bista enkuanto e bèrdatnan bíbliko? Duna un ehèmpel. (Wak e promé plachinan.) (b) Ki pregunta nos lo analisá den e artíkulo akí?

AWENDIA, ta masha normal pa hende debolbé algu ku nan a kumpra. Segun kálkulo, na algun pais, hende ta debolbé kasi 9 porshento di loke nan a kumpra den tienda i mas ku 30 porshento di loke nan a kumpra online. Kisas nan ta realisá ku nan no ta gusta loke nan a kumpra òf ku loke nan a kumpra tin un defekto. Esei por pone ku nan ta pidi nan plaka bèk òf kambia loke nan a kumpra pa algu otro.

² Nunka nos lo no ke hasi esaki ku e bèrdatnan di Beibel. Unabes nos kumpra e bèrdat, esta, siña e bèrdat, nunka nos lo ke “bend’é,” òf debolb’é. (Lesa Proverbionan 23:23; 1 Tim. 2:4) Den e artíkulo anterior, nos a trata algun kos ku nos a sakrifiká pa asina nos por a haña e bèrdat. Nos tur a sakrifiká tempu pa siña e bèrdat. Algun di nos mester a sakrifiká un karera luhoso òf nos relashon ku amigu i famia. Ademas, nos mester a kambia nos manera di pensa i nos kondukta òf asta stòp ku sierto práktika òf kustumber ku  Dios ta odia. Sinembargo, e preis ku nos a paga ta nada na komparashon ku e bendishonnan ku nos a haña.

³ Hesus a duna un ilustrashon di un komersiante ku tabata biaha en buska di pèrla di bon kalidat. E pèrla ku e komersiante a haña tabata asina balioso ku “mesora el a bende tur loke e tabatin i kumpr’é.” (Mat. 13:45, 46) E bèrdat ku nos a haña, esta, e bèrdat tokante e Reino di Dios i tur e otro bèrdatnan ku nos a siña di Beibel, ta asina balioso ku mesora nos a hasi e sakrifisionan nesesario pa por optené nan. Tanten ku nos ta mira e balor di e bèrdat, nunka nos lo “no bend’é.” Lamentablemente, algun sirbidó di Yehova a stòp di balorá e bèrdat i a asta bend’é. Nunka nos lo no ke hasi esei! Pa demostrá ku realmente nos ta balorá e bèrdat i ku nunka nos lo no bend’é, nos mester hasi kaso di Beibel su konseho pa “sigui kana den e bèrdat.” (Lesa 3 Huan 2-4.) Sigui kana den e bèrdat ke men biba e bèrdat, esta, duna e bèrdat prioridat den nos bida i biba di akuerdo kuné. Awor, laga nos analisá e siguiente preguntanan: Kon algun hende ta bende e bèrdat, i dikon nan ta hasi esei? Kon nos por evitá di bende e bèrdat? Kon nos por ta mas determiná pa “sigui kana den e bèrdat”?

4. Kon bini algun hende den promé siglo a bende e bèrdat?

⁴ Den promé siglo, algun hende ku na promé instante a aseptá e bèrdat no a sigui kana den e bèrdat. Por ehèmpel, despues ku Hesus a alimentá hende milagrosamente, un gran kantidat di nan a siguié te na e otro banda di Laman di Galilea. Einan, Hesus a bisa nan algu ku a shòk nan. El a bisa: “A ménos ku boso kome e karni di e Yu di hende i bebe su sanger, boso lo no haña bida.” En bes di pidi Hesus un splikashon, nan a bisa: “E palabranan akí ta ofensivo; ken por skucha nan?” Komo resultado, “hopi di su disipelnan a bai bèk na e kosnan ku nan a laga atras i no a sigui kana kuné mas.”—Huan 6:53-66.

5, 6. (a) Dikon algun hende awe no ta keda den e bèrdat? (b) Kon un hende por drif bai for di e bèrdat? Splika esei.

⁵ Lamentablemente, algun hende awe no a keda den e bèrdat. Tin vários kos ku por a pone nan trompeká. Kisas tabata un ahuste den komprondementu di un teksto bíbliko òf kisas nan no a gusta loke un ruman bon konosí a bisa òf hasi. Podisé nan no a gusta ku un ruman a duna nan konseho for di Beibel òf nan tabatin un desakuerdo serio ku un ruman. I tin ruman ku kisas a sigui siñansa di apóstata òf di hende ku ta oponé e bèrdat. Komo resultado, algun di nan a “alehá” for di Yehova i e kongregashon. (Heb. 3:12-14) Lo tabata muchu mas mihó si nan a imitá apòstel Pedro i pone nan fe i konfiansa den Hesus! Ora Hesus a puntra su apòstelnan si nan tambe kier a bai, mesora Pedro a kontestá: “Señor, serka ken nos lo bai? Abo tin e palabranan ku ta hiba na bida eterno.”—Huan 6:67-69.

⁶ Algun hende no a ripará mes ku pokopoko nan tabata drif bai for di e bèrdat. Nos por kompará un persona ku gradualmente ta bai for di e bèrdat ku un boto ku pokopoko ta drif bai for di kantu. Beibel ta spièrta nos “pa nunka nos no drif bai.” (Heb. 2:1)  Generalmente, un persona no ta alehá su mes for di e bèrdat intenshonalmente. E problema ta ku pokopoko e ta laga su amistat ku Yehova bai atras te ku e ta pèrdè e amistat akí kompletamente. Kon nos por evitá ku esaki ta pasa ku nos?

7. Kiko nos tin ku hasi pa evitá di bende e bèrdat?

⁷ Pa nos por sigui kana den e bèrdat, nos mester aseptá i obedesé tur Yehova su palabranan. Nos tin ku duna e bèrdat prioridat den nos bida i biba segun e prinsipionan di Beibel. Rei David a primintí Yehova den orashon: “Lo mi kana den bo bèrdat.” (Sal. 86:11) Meskos ku David, nos tambe mester ta determiná pa sigui kana den e bèrdat. Si nos no hasi esei, nos por kuminsá pensa riba e kosnan ku nos a sakrifiká pa e bèrdat i kisas asta anhelá pa haña e kosnan ei bèk. Pero nos no por hasi esei; nos no por skohe kua bèrdat nos ta aseptá i kua nos ta ignorá. Laga nos analisá sinku kos ku kisas nos mester a sakrifiká pa haña e bèrdat. E análisis akí lo yuda nos keda determiná pa nunka bai bèk na e kosnan ku nos a laga atras.—Mat. 6:19.

8. Kon nos por drif bai for di e bèrdat si nos no usa nos tempu bon? Duna un ehèmpel.

⁸ Tempu. Pa evitá ku nos ta drif bai for di e bèrdat, nos tin ku hasi bon uso di nos tempu. Si nos no paga tinu, nos por kuminsá dediká demasiado tempu na rekreo, hòbi, Internet òf wakmentu di televishon. Aunke e kosnan akí riba nan mes no ta malu, e tempu ku nos ta dediká na nan por kuminsá interferí ku e tempu ku nos tin mester pa hasi estudio personal i otro aktividat spiritual. Laga nos wak kiko a pasa ku un ruman muhé ku yama Emma. * For di tempu ku Emma tabata chikitu, e tabata stima kabai. Tur oportunidat ku e tabata haña e tabata kore kabai. Pero, ku tempu, el a kuminsá sinti malu ku e tabata dediká asina tantu tempu na korementu di kabai. El a disidí di hasi kambio. Loke a anim’é tabata e eksperensia di Cory Wells, kende tabata hasi akrobasia riba kabai. * Awor, Emma ta kontentu ku e por dediká mas tempu na aktividat spiritual i na su famia i amigunan ku tambe ta sirbi Yehova. Ademas, e tin un mihó relashon ku Yehova i su konsenshi ta trankil pasobra e sa ku e ta usando su tempu bon.

9. Kiko amor pa kos material por hasi ku un kristian?

⁹ Kos material. Si nos ke sigui kana den e bèrdat, nos mester mantené un punto di bista balansá enkuanto kos material. Ora nos a haña e bèrdat, nos a bin komprondé ku kos spiritual ta muchu mas importante ku kos material. I nos tabata kontentu di por a sakrifiká kos material pa kana den e bèrdat. Pero, segun ku tempu ta pasa, nos ta mira ku otronan ta kumpra e último modelonan di aparato elektróniko òf ta disfrutá di vários otro kos material, i nos por kuminsá pensa ku nos ta pèrdiendo algu. Kisas, nos no ta satisfecho mas ku e kosnan básiko, i nos por kuminsá pone kos spiritual un banda pa nos por akumulá mas kos material. Esei ta loke a pasa ku Démas. El a “stima e  mundu akí” asina tantu ku e no a sigui den su asignashon huntu ku apòstel Pablo. (2 Tim. 4:10) Dikon Démas a hasi esei? Ta posibel ku el a stima kos material mas ku kos spiritual. Podisé e no kier a hasi sakrifisio mas pa e por a sigui sirbi huntu ku Pablo. Beibel no ta bisa. Loke nos ta siña for di e eksperensia akí ta ku nos no ke rebibá amor pa kos material i asina pone ku nos amor pa e bèrdat ta fria.

10. Si nos ke sigui kana den e bèrdat, ki preshon nos tin ku resistí?

¹⁰ Nos relashon ku amigu i famia. Pa nos por sigui kana den e bèrdat, nos mester resistí preshon di hende ku no ta sirbi Yehova. Ora nos a kuminsá kana den e bèrdat, nos relashon ku famia i amigu ku no ta Testigu a kambia. Algun a respetá nos kreensianan i otronan a oponé nos. (1 Ped. 4:4) Aunke nos ta purba di tin un bon relashon ku nos famia i trata nan bon, nos no por keda sin kumpli ku Yehova su normanan djis pa komplasé nan. I manera 1 Korintionan 15:33 ta siña nos, nos amigunan di mas será mester ta solamente esnan ku ta stima Yehova.

11. Kon nos por evitá pensamentu i kondukta inapropiá?

¹¹ Pensamentu i kondukta inapropiá. Tur hende ku kana den e bèrdat mester ta santu. (Isa. 35:8; lesa 1 Pedro 1:14-16.) Ora nos a haña e bèrdat, nos tur mester a hasi kambio pa biba segun e normanan di Beibel. Algun di nos mester a hasi kambio drástiko. Sea kual sea e kaso, nunka nos lo ke kambia nos bida ku ta moralmente limpi pa un bida inmoral. Kiko por yuda nos resistí e tentashon di hasi algu inmoral? Nos por meditá riba e preis haltu ku Yehova a paga pa asina nos por ta santu. El a paga ku e bida presioso di su Yu stimá, Kristu Hesus. (1 Ped. 1:18, 19) Pa nos por keda santu den bista di Yehova, semper nos mester kòrda kon presioso e sakrifisio di reskate di Hesus ta.

12, 13. (a) Dikon ta importante pa nos tin Yehova su punto di bista enkuanto dia di fiesta? (b) Kiko nos lo bai trata awor?

¹² Kustumber i práktika ku Dios ta odia. Tantu nos famianan, komo nos koleganan di trabou i kompañeronan di skol por purba di konvensé nos pa selebrá hasimentu di aña òf otro dia di fiesta ku Dios ta odia. Kon nos por resistí e preshon ei? Semper nos mester buska pa sa dikon Yehova no ta aprobá e kustumber- i práktikanan ei. Nos por buska informashon tokante nan orígen den nos publikashonnan. Ora nos ta kòrda e motibunan bíbliko pakiko nos no ta partisipá den e tipo di práktikanan akí, nos ta bira mas konvensí ku nos ta kanando na un manera ku ta “agradá Señor.” (Efe. 5:10) Si nos ta konfia den Yehova i den su Palabra, esei lo yuda nos pa nos no tin “temor pa hende.”—Pro. 29:25.

¹³ Nos ke sigui kana den e bèrdat pa semper. Pues, kon nos por ta mas determiná pa sigui kana den e bèrdat? Laga nos wak tres manera ku nos por hasi esei.

14. (a) Kon estudio di Beibel por yuda nos ta mas determiná pa nunka bende e bèrdat? (b) Dikon nos tin mester di sabiduria, instrukshon i komprondementu?

¹⁴ Di promé, sigui studia Beibel i meditá riba loke bo ta siña. Nos tin ku saka tempu pa hasi esei regularmente.  Mas nos studia, mas apresio nos lo haña pa e bèrdat i nos lo ta mas determiná pa nunka bend’é. Pero konosementu di e bèrdat so no ta sufisiente. Proverbionan 23:23 ta bisa tambe ku nos tin ku kumpra “sabiduria, instrukshon i komprondementu.” Pues, nos tin ku apliká loke nos ta siña tambe. Komprondementu ta permití nos diserní kon Yehova su palabranan ta konektá ku otro. Sabiduria ta konmové nos pa tuma akshon basá riba nos konosementu. Ademas, tin biaha e bèrdat ta instruí òf disipliná nos; e ta mustra nos unda nos tin ku hasi kambio. Semper nos mester ta kla pa aseptá e instrukshon, òf disiplina ei, pasobra Beibel ta siña nos ku e ta muchu mas balioso ku plata.—Pro. 8:10.

15. Kon e faha di bèrdat ta protehá nos?

¹⁵ Di dos, sea determiná pa biba na armonia ku e bèrdat. Laga nos bisti e faha di bèrdat. (Efe. 6:14) Un sòldá den tempu di Beibel tabata usa su faha pa protehá su sintura i su órganonan. Pa e faha por a sirbí komo protekshon, e mester tabata bon mará sino lo e no a protehá su kurpa. Awor, kon e bèrdat por protehá nos meskos ku un faha? Si nos tin e bèrdat bon mará, lo e protehá nos di pensamentu inkorekto i yuda nos tuma bon desishon. Ora nos haña nos ku tentashon òf prueba, e bèrdatnan di Beibel lo yuda nos ta mas determiná pa hasi loke ta korekto. Un sòldá nunka lo a bai bringa sin su faha. Di mes manera, nos ke hasi sigur ku semper nos tin e faha di bèrdat bon mará, aplikando e bèrdatnan di Beibel den kada aspekto di nos bida. Un otro benefisio di un sòldá su faha ta ku e por a us’é pa wanta su spada. Esei ta hiba nos na e siguiente manera ku nos por fortalesé nos determinashon pa sigui kana den e bèrdat.

16. Kon partisipashon den e trabou di siña hende e bèrdat lo yuda nos ta mas determiná pa sigui kana den e bèrdat?

¹⁶ Di tres, partisipá mas tantu posibel den e trabou di siña hende e bèrdat. Di e manera ei, lo bo tin e spada spiritual, esta, “e palabra di Dios,” duru tené. (Efe. 6:17) Nos tur por mehorá nos abilidat di siña hende, i asina “manehá e palabra di e bèrdat korektamente.” (2 Tim. 2:15) Ora nos usa Beibel pa yuda otro hende siña e bèrdat i rechasá siñansa falsu, e ta yuda graba e bèrdat den nos mente i kurason tambe. Esei lo hasi nos mas determiná pa sigui kana den e bèrdat.

17. Dikon abo ta balorá e bèrdat?

¹⁷ E bèrdat ta un regalo presioso di Yehova, pasobra e ta permití nos tin un bon relashon ku nos Tata selestial. Loke nos a siña te ku awor ta djis e komienso! Dios a primintí nos ku lo e sigui siña nos pa semper. P’esei, balorá e bèrdat manera un pèrla di bon kalidat. Sigui “kumpra bèrdat, i no bend’é.” E ora ei, nos por ta manera David, kende a primintí Yehova: “Lo mi kana den bo bèrdat.”—Sal. 86:11.