1, 2. Ki responsabilidat grandi Hosue a risibí despues di e morto di Moises?

E PALABRANAN di Yehova ainda tabata zona den orea di Hosue: “Moises, mi sirbidó, a muri; p’esei, lant’ariba awor, krusa e Hordan akí, abo i henter e pueblo akí, bai na e tera ku mi ta duna nan.” (Hos. 1:1, 2) Esaki sí tabata un kambio inesperá pa Hosue! E tabata e ayudante di Moises pa kasi 40 aña, pero awor é tabata e lider di Israel.

² Moises tabata lider di e pueblo di Israel pa hopi tempu, p’esei Hosue kisas lo a puntra su mes si e pueblo lo a aseptá é komo nan lider. (Deu. 34:8, 10-12) Un buki di referensia bíbliko ta bisa di Hosue 1:1, 2: “Tantu den pasado komo den tempu moderno, e kambio di lider ta un di e momentonan di mas difísil i peligroso pa un pais.”

3, 4. (a) Kon nos sa ku Hosue a hasi bon di konfia den Yehova? (b) Ki pregunta nos por hasi nos mes?

³ Hosue tabatin bon motibu pa ta preokupá. Ma el a konfia den Yehova i denter di un par di dia, el a sigui e instrukshon ku el a  haña. (Hos. 1:9-11) I el a hasi bon di konfia den Yehova. Manera Beibel ta mustra, Yehova a manda un angel pa guia Hosue i e israelitanan. Muy probablemente, e angel ei tabata “e Palabra,” Dios su Yu primogénito.—Huan 1:1; Éks. 23:20-23.

⁴ Ku yudansa di Yehova, e pueblo di Israel no tabatin problema pa adaptá na e guia di nan lider nobo, Hosue. Awe, nos tambe ta biba den un tempu di kambionan grandi, i e organisashon di Yehova ta avansá mas i mas. Kisas nos ta puntra nos mes: ‘Ainda nos por konfia den nos Lider, Hesus?’ (Lesa Mateo 23:10.) Wèl, ban wak kon Yehova a perkurá guia konfiabel den pasado den tempu di kambio.

5. Ken Hosue a topa pegá ku Yériko? (Wak e promé plachi.)

⁵ Poko despues ku e israelitanan a krusa Riu Hordan, Hosue tabatin un enkuentro inesperá. Pegá ku e stat di Yériko, el a topa un hòmber ku un spada den su man. Hosue no tabata sa ken e hòmber ta, p’esei el a puntr’é: “Bo ta pa nos òf pa nos atversarionan?” Pa Hosue su sorpresa, e hòmber a bis’é ku e tabata e “kapitan di e ehérsito di SEÑOR,” un angel ku tabata kla pa defendé e pueblo di Dios. (Lesa Hosue 5:13-15.) Maske otro kaminda den e relato ta bisa ku ta Yehova a papia ku Hosue, no tin duda ku Yehova a hasi esei pa medio di un angel, manera el a hasi na hopi otro okashon den pasado.—Éks. 3:2-4; Hos. 4:1, 15; 5:2, 9; Echo. 7:38; Gal. 3:19.

6-8. (a) Dikon algun instrukshon di Yehova kisas no a parse lógiko for di e punto di bista humano? (b) Kon e instrukshonnan ei tòg a resultá di ta bon i oportuno? (Wak tambe e nota.)

⁶ E angel a splika Hosue bon kla kon pa konkistá Yériko. Na prinsipio, algun di e instrukshonnan ei kisas no a parse lógiko. Por ehèmpel, Yehova a manda pa sirkunsidá tur hende hòmber. Komo konsekuensia, nan lo no por a bai guera pa vários dia. Realmente esei tabata e mihó momento pa sirkunsidá e hòmbernan ei?—Gén. 34:24, 25; Hos. 5:2, 8.

⁷ Probablemente, e sòldánan israelita indefenso ei lo a puntra nan mes kon nan lo a protehá nan famia si e enemigu ataká e kampamentu. Pero, diripiente, algu inesperá a sosodé! En bes di ataká e israelitanan, e hòmbernan di Yériko a haña miedu di nan. Beibel ta bisa: “Yériko tabata bon será pa motibu di e yunan di Israel; ningun hende no tabata sali i ningun hende no tabata drenta.” (Hos. 6:1) Sin duda, e kambio inesperá ei a oumentá nan konfiansa den e instrukshon di Yehova.

⁸ Ademas, e israelitanan a haña òrdu pa no ataká Yériko. Nan mester a marcha un biaha pa dia rònt di e stat durante seis dia, i shete biaha riba e di shete dia. Podisé algun sòldá a pensa: ‘Ta pèrdèmentu di tempu i energia!’ Pero Israel su Lider Yehova, tabata sa eksaktamente kiko e tabata hasi. E strategia akí no solamente a fortalesé fe di e israelitanan pero tambe a spar nan di bringa kontra e sòldánan di Yériko.—Hos. 6:2-5; Heb. 11:30. *

9. Dikon nos tin ku sigui e instrukshonnan ku nos ta risibí for di e organisashon di Dios? Duna un ehèmpel.

⁹ Kiko nos por siña for di e relato akí? Tin biaha nos no ta komprond’é kompletamente dikon e organisashon ta introdusí sierto kambio. Por ehèmpel, kisas na prinsipio nos a kuestioná e uso di aparatonan elektróniko pa estudio personal, sirbishi di vèlt  i reunion. Pero probablemente awor nos ta mira e benefisionan di usa nan ora ta posibel. P’esei, asta ora ku na promé instante nos tin duda, nos mester sigui e instrukshonnan di e organisashon di Dios. Ora nos mira e bon resultado di e kambionan, nos fe ta bira mas fuerte i nos ta bira mas uní ku nos rumannan.

10. Ken realmente a sòru pa e reunion importante di e kuerpo gobernante na Herúsalèm tuma lugá?

¹⁰ Mas o ménos 13 aña despues ku Kornelio, un persona no hudiu, a kombertí, e kristiannan hudiu ainda tabata promové sirkunsishon. (Echo. 15:1, 2) Ora a surgi un desakuerdo tokante esei na Antiokia, e rumannan a pidi Pablo bai serka e kuerpo gobernante na Herúsalèm pa papia tokante e asuntu ei. Pero ken tabata tras di e desishon ei? Pablo a bisa: “Mi a bai pasobra mi a haña un revelashon.” Ta bisto ku ta Kristu a sòru pa e kuerpo gobernante por a solushoná e desakuerdo.—Gal. 2:1-3.

11. (a) Ki situashon relashoná ku sirkunsishon a keda eksistí entre e kristiannan hudiu? (b) Kon Pablo a mustra ku humildemente el a apoyá e ansianonan di Herúsalèm? (Wak tambe e nota.)

¹¹ Bou di guia di Kristu, e kuerpo gobernante a splika bon kla ku kristiannan no hudiu no tabatin nodi di sirkunsidá. (Echo. 15:19, 20) Pero añanan despues di e desishon akí, hopi kristian hudiu ainda tabata sirkunsidá nan yunan. Ora ku e ansianonan na Herúsalèm a tende ku tabatin un rumor ku Pablo no tabata kumpli ku Lei di Moises, nan a pidi Pablo hasi algu inesperá. * (Echo. 21:20-26) Nan a bis’é pa tuma kuater hòmber i bai na e tèmpel pa purifiká nan mes seremonialmente ya asina e hendenan por mira ku e tambe “ta kumpli ku Lei.” Pablo por a bisa ku no tabata sabí pa hasi esei i ku e problema no tabata serka dje sino serka e kristiannan hudiu ku no a komprondé e asuntu di sirkunsishon bon. Sinembargo, Pablo a demostrá ku e ta apoyá e deseo di e  ansianonan pa promové union entre e kristiannan, i humildemente el a kumpli ku nan instrukshon. Kisas nos ta puntra nos mes: ‘Dikon Hesus a laga asina tantu tempu pasa pa resolvé e kuestion di sirkunsishon, siendo ku su morto a eliminá e Lei di Moises?’—Kol. 2:13, 14.

12. Pa ki motibu Kristu kisas a permití tempu pasa promé ku el a resolvé e kuestion di sirkunsishon?

¹² Algun hende tin mester di tempu pa ahustá na un komprondementu nobo. E kristiannan hudiu tabatin mester di tempu pa aseptá ku nan no tabata bou di Lei mas. (Huan 16:12) Algun di nan a haña ku tabata duru pa aseptá ku sirkunsishon ya no tabata un señal di nan relashon spesial ku Dios. (Gén. 17:9-12) Otronan tabatin miedu ku nan lo a ser persiguí den e komunidat hudiu, pasobra nan ta diferente. (Gal. 6:12) Pero ku tempu, Kristu a duna mas guia mediante e kartanan inspirá ku Pablo a skirbi.—Rom. 2:28, 29; Gal. 3:23-25.

13. Kiko por yuda nos apoyá e manera ku Kristu ta guia nos awe?

¹³ Ora nos no ta komprondé kompletamente dikon e organisashon a hasi sierto kambio, ta bon pa nos meditá riba e manera ku Kristu a guia e pueblo di Dios den pasado. Tantu den e dianan di Hosue komo den promé siglo, Kristu semper a perkurá bon guia pa protehá Dios su sirbidónan, pa fortalesé nan fe i pa yuda nan keda uní.—Heb. 13:8.

14-16. Kon e guia ku “e esklabo fiel i prudente” ta duna nos ta demostrá ku Kristu ta interesá den nos bienestar spiritual?

¹⁴ Nos ta mira Hesus su amor i interes den nos bienestar spiritual na e manera ku e ta usa “e esklabo fiel i prudente” pa duna nos guia na momento ku nos tin mester di esei. (Mat. 24:45) Marc, un tata di kuater yu, a bisa: “Satanas ta purba di suak e kongregashonnan atakando famia. Awor ku nos ta haña e animashon pa tene nos adorashon komo famia tur siman, e mensahe pa e kabesnan di famia ta hopi kla: Protehá boso famia!”

¹⁵ Ora nos ta mira kon Kristu ta guia nos, nos ta komprondé ku e ke pa nos keda ku un fe fuerte. Patrick, kende ta sirbi komo ansiano, a bisa: “Na prinsipio, algun ruman a sinti nan desanimá ora nan mester a reuní den grupo chikitu pa sirbishi di vèlt den wikènt. Pero, e ahuste akí a laga nos mira bon kla un di Hesus su kualidatnan prinsipal, esta, su interes den tur hende. Awor rumannan ku ta tímido òf ménos aktivo ta sinti ku nan ta ser apresiá mas tantu i ku nan ta mas útil. Esaki a yuda nan hasi nan fe mas fuerte.”

¹⁶ Kristu no solamente ta perkurá pa nos nesesidatnan spiritual, sino tambe e ta yuda nos konsentrá nos atenshon riba e trabou di mas importante ku ta ser hasí riba tera awe. (Lesa Marko 13:10.) André, un ruman ku a kaba di bira ansiano, semper ta atento pa kualke instrukshon nobo ku ta bini di Dios su organisashon. El a bisa: “E redukshon di trahadó na e sukursalnan ta kòrda nos ku nos ta bibando den e último dianan i ku nos mester konsentrá nos atenshon riba e trabou di prediká.”

17, 18. Dikon ta bon pa nos meditá riba e benefisionan ku nos a haña pasobra nos a adaptá e kambionan resien?

¹⁷ E guia ku nos ta risibí di Hesukristu, nos Rei, ta yuda nos awor i den futuro. P’esei, laga nos meditá riba e benefisionan ku nos a haña pasobra nos a adaptá e kambionan resien. Durante nos adorashon komo famia, nos por analisá e benefisionan ku nos a haña di e kambionan ku a hasi den e reunionnan  òf den nos manera di prediká. Esei sigur lo animá nos mashá.

¹⁸ Si nos keda kòrda ku ora nos sigui e instrukshonnan ku nos ta haña di Yehova su organisashon esei ta hiba na hopi benefisio, nos lo kumpli ku nan ku mas smak. Por ehèmpel, komo ku nos a baha e kantidat di literatura ku ta ser imprimí i ta usa teknologia moderno, nos ta spar plaka. Esaki ta permití e organisashon dediká mas plaka awor na hiba e bon notisia na mas hende. Ku esaki na mente, nos lo por usa publikashonnan elektróniko i medionan oudiovisual mas tantu posibel. Asina nos lo demostrá ku, meskos ku Kristu, nos ta interesá pa usa e rekursonan finansiero di e organisashon na un manera sabí.

19. Dikon nos tin ku sigui e guia di Kristu?

¹⁹ Ora nos ta hasi esfuerso pa sigui e guia di Kristu, nos ta fortalesé e fe di nos rumannan i yuda nan keda mas uní. André, menshoná anteriormente, a bisa lo siguiente tokante e redukshon di e famia di Bètel rònt mundu: “Ora mi mira e bon aktitut di e rumannan ku tabata bètelita ku a adaptá na e kambionan akí, esei ta duna mi mas konfiansa den nos Lider i mas rèspèt pa e rumannan ei. Nan ta felis den kualke asignashon ku duna nan i asina nan ta keda pareu ku e garoshi di Yehova.”

20, 21. (a) Dikon nos por tin konfiansa den Kristu, nos Lider? (b) Ki pregunta nos lo konsiderá den e siguiente artíkulo?

²⁰ Pronto nos Lider, Hesukristu, lo “kompletá su viktoria,” i lo e logra kosnan impreshonante. (Rev. 6:2; Sal. 45:4) Mientrastantu, e ta prepará e pueblo di Dios pa bida den e mundu nobo i pa e trabou ku nan lo hasi einan, esta, siña e hendenan ku resusitá i yuda hasi e tera un paradeis.

²¹ Nos Rei ungí lo logra hiba nos te den e mundu nobo, basta nos sigui demostrá pleno konfiansa den dje, pase loke pase. (Lesa Salmo 46:1-3.) Tin biaha ta difísil pa nos adaptá na kambionan, spesialmente ora nos bida kue un rumbo inesperá. Si esei sosodé, kon nos por mantené nos pas mental i pleno fe den Yehova? Nos lo konsiderá e pregunta ei den e siguiente artíkulo.