1, 2. Kiko Diabel a usa ku a kousa hopi daño na humanidat?

ALGUN invento, manera telefòn, pera di lus, outo i frishidèr, a mehorá hende su bida di tur dia. Miéntras ku inovashonnan manera pòlbu, mina (eksplosivo derá bou di tera), sigaria i bòm atómiko, djis pa menshoná un par, a pone hende su bida na peliger. Sinembargo, tabatin algu promé ku tur e inventonan ei ku a kousa hopi daño na humanidat. Kiko esei ta? Esei ta mentira! Mentira ta ora un hende ta bisa algu ku e sa ku no ta bèrdat pa asina engañá un otro hende. Ken a saka e promé mentira? Diabel! Hesukristu a yam’é “e tata di mentira.” (Lesa Huan 8:44.) Na ki tempu Diabel a saka e promé mentira?

² Esaki a tuma lugá míles di aña pasá den e hòfi di Edén. E promé pareha humano, Adam ku Eva, tabata disfrutá di bida den un bunita paradeis ku nan Kreador a traha pa nan. Despues, Diabel a subi esenario. E tabata sa ku Dios a bisa e pareha pa no kome di “e palu di konosementu di bon i malu,” sino nan lo muri. Maske Satanas tabata sa esei, el a usa un kolebra pa bisa Eva e promé mentira: “Siguramente boso lo no muri! Pasobra Dios sa ku e dia ku boso kome di dje, boso wowo lo habri i boso lo ta manera Dios, konosiendo bon i malu.”—Gén. 2:15-17; 3:1-5.

3. Dikon nos por bisa ku Satanas su mentira tabata malisioso, i kiko tabata konsekuensia di e mentira ei?

 ³ Satanas su mentira tabata malisioso pasobra e tabata sa ku Eva lo a muri si e ker’é i kome e fruta. Tantu Eva komo Adam a desobedesé e mandamentu di Yehova i ku tempu nan a muri. (Gén. 3:6; 5:5) Pió ainda, pa motibu di e piká ei, “morto a pasa pa tur hende.” De echo, “morto a reina komo rei . . . , asta riba hende ku no a kometé un pika manera Adam a kometé.” (Rom. 5:12, 14) Awor, en bes di disfrutá di un bida perfekto pa semper manera tabata Dios su propósito for di prinsipio, nos ta biba 70 aña, òf si nos tin hopi forsa, 80 aña. I hopi biaha, bida ta yená ku “nada otro ku molèster i pena.” (Sal. 90:10) Esta un final tristu. Tur esei pa motibu di e mentira di Satanas!

4. (a) Ki pregunta nos lo tin ku kontestá? (b) Di akuerdo ku Salmo 15:1, 2, ken so por ta amigu di Yehova?

⁴ Na Huan 8:44, Hesus a bisa esaki di Satanas: “E no a keda firme den e bèrdat, pasobra e bèrdat no ta den dje.” Satanas no a kambia, pasobra te ainda e ta sigui “gaña henter e tera habitá” ku su mentiranan. (Rev. 12:9) Nos no ke pa e Diabel gaña nos. Pues, laga nos konsiderá kontesta pa e tres preguntanan akí: Kon Satanas ta engañá hende? Dikon hende ta gaña? I kon nos por “papia bèrdat” na tur momento pa nos no pèrdè nos amistat ku Yehova, manera a pasa ku Adam ku Eva?—Lesa Salmo 15:1, 2.

5. Kon Satanas ta engañá hende awe?

⁵ Apòstel Pablo tabata sa ku nos por evitá di laga Satanas engañá nos, “pasobra su trikinan no ta deskonosí pa nos.” (2 Kor. 2:11) Nos sa ku henter e mundu ta bou di kontrol di Diabel, inkluso religion falsu, gobièrnu korupto i komersiante golos. (1 Huan 5:19) P’esei, nos no ta keda sorprendí ku Satanas i su demoñonan ta influensiá hende den puesto di poder pa “papia mentira.” (1 Tim. 4:1, 2) Por ehèmpel, algun komersiante ta usa mentira den nan propaganda pa logra bende produkto ku ta perhudisial òf pa engañá hende i ranka plaka for di nan.

6, 7. (a) Dikon e lidernan religioso ku ta papia mentira ta prinsipalmente kulpabel? (b) Ki mentira bo a yega di tende for di e lidernan religioso?

⁶ E lidernan religioso ku ta saka mentira ta prinsipalmente kulpabel pasobra nan ta pone na peliger e speransa di biba pa semper di e hendenan ku ta kere nan. Si un hende aseptá siñansa falsu i praktiká loke Dios ta kondená, e hende ei por pèrdè e oportunidat di haña bida eterno. (Osé. 4:9) Hesus tabata sa ku e lidernan religioso den su tempu tabata engañá hende. El a bisa nan stret den nan kara: “Ai di boso, eskriba i fariseo, hipókritanan! Pasobra boso ta krusa laman i tera seku pa hasi ún hende un kreyente nobo, i ora e bira un kreyente, boso ta hasié un persona ku ta meresé di bai Gehena [destrukshon eterno], anto dos biaha mas tantu ku boso!” (Mat. 23:15) Hesus a kondená e lidernan religioso falsu ei ku palabranan masha fuerte mes i a bisa nan: “Boso ta bini di boso tata, e Diabel,” un “matadó.”—Huan 8:44.

⁷ Awe mundu ta yen di lider religioso ku título manera pastor, saserdote, rabi, swami, òf kualke otro título. Meskos ku e guianan religioso falsu di promé siglo, e lidernan akí ta ‘stroba e bèrdat di e Palabra di Dios di sali na kla’ i nan ta “skohe pa kere mentira i no e bèrdat tokante Dios.” (Rom. 1:18, 25) Nan ta promové siñansa  falsu manera “unabes salbá, semper salbá,” alma inmortal, reenkarnashon i e idea apsurdo di ku Dios ta aseptá homoseksualidat i matrimonio di hende di mesun sekso.

8. Ki mentira e polítikonan lo lansa pronto, pero kon nos mester reakshoná?

⁸ E polítikonan a usa mentira pa engañá hende. Pronto nan lo lansa e mentira di mas grandi ku hamas humanidat a yega di tende, esta, ku nan a logra “pas i siguridat!” Pero, “e ora ei diripiente destrukshon lo bini riba nan instantáneamente.” Pues, laga nos no kere e mentira di e lidernan polítiko akí. Nan lo no papia bèrdat tokante kon malu e situashon di e mundu akí ta! E bèrdat ta ku nos “sa bon ku e dia di Yehova lo bini eksaktamente manera ladron den anochi.”—1 Tes. 5:1-4.

9, 10. (a) Dikon hende ta gaña, i kiko ta e resultado? (b) Kiko nos tin ku kòrda tokante Yehova?

⁹ Den e mundu moderno djawe, gañamentu a bira algu normal, i hendenan famoso no ta e únikonan ku ta gaña hende. Den e artíkulo “Dikon Nos Ta Gaña,” e outor Y. Bhattacharjee ta bisa: “Gañamentu a bira un hábito ku ta difísil pa kambia.” Ku otro palabra, hende ta pensa ku gañamentu ta algu natural i normal. Hende ta gaña sea pa protehá nan mes òf pa benefisiá nan mes di un manera òf otro. Nan ta gaña pa tapa nan eror òf pa saka probecho personal. Manera e artíkulo ta mustra, tin hende “no tin problema pa gaña estranhero, kolega di trabou, amigu- òf famianan.”

¹⁰ Kiko ta e resultado di tur e gañamentu ei? Hende no ta konfia otro mas i ta daña nan amistat ku otro. Por ehèmpel, imaginá bo kon kibrá un esposo lo sinti ora ku su esposa kòrta su orea i despues ta gaña pa tapa loke el a hasi. Òf ora un hòmber agresivo ta maltratá su kasá i su yunan den privá pero den públiko e ta hasi komo si fuera e ta un bon kabes di kas. Pero, nos mester kòrda ku hende mentiroso asina no por skonde nada for di Yehova, pasobra “tur kos ta sunú i habri dilanti” di dje.—Heb. 4:13.

11. Kiko nos ta siña for di e mal ehèmpel di Ananías ku Safira? (Wak e promé plachi.)

¹¹ Por ehèmpel, Beibel ta menshoná kon Satanas a ‘duna un pareha den promé siglo e kurashi’ pa nan gaña Dios. Ananías ku Safira a traha un kòmplòt den nan kurason i a gaña ku intenshon di nèk e apòstelnan. Nan a bende nan propiedat pero a duna e apòstelnan un parti so di e plaka. E pareha kier a impreshoná e kristiannan den kongregashon i laga parse ku nan donashon tabata mas generoso ku e tabata en realidat. Pero, Yehova a mira kiko nan a hasi i el a kastigá nan.—Echo. 5:1-10.

12. Kiko lo pasa ku e gañadónan malisioso ku no ta arepentí, i dikon?

¹² Kon Yehova ta mira gañamentu? Tur hende ku ta papia mentira malisioso i no ta arepentí ta bai resultá den “e lago di kandela,” meskos ku Satanas. (Rev. 20:10; 21:8; Sal. 5:6) Dikon? Pasobra pa Yehova nan ta den e kategoria di “hende ku ta praktiká kosnan repugnante den bista di Dios.”—Rev. 22:15, nota.

13. Kiko nos sa tokante Yehova, i kiko esaki ta motivá nos pa hasi?

¹³ Beibel ta bisa ku Yehova ‘no ta manera hende, ku ta gaña.’ De echo, “ta imposibel pa Dios gaña.” (Num. 23:19; Heb. 6:18) Yehova “ta odia . . . lenga mentiroso.” (Pro. 6:16, 17) Si nos ke agrad’é, nos mester papia bèrdat tur ora. P’esei mes nos ‘no ta gaña otro.’—Kol. 3:9.

14. (a) Kon nos ta distinguí nos mes for di e miembronan di religion falsu? (b) Splika e prinsipio bíbliko na Lukas 6:45.

¹⁴ Den ki manera kristiannan berdadero ta distinto for di e miembronan di religion falsu? Nos ta “papia bèrdat.” (Lesa Zakarías 8:16, 17.) Pablo a splika: “Nos ta rekomendá nos mes komo sirbidó di Dios dor di . . . [papia] palabranan ku ta bèrdat.” (2 Kor. 6:4, 7) I Hesus a bisa lo siguiente di hende: “Di loke su kurason ta yen di dje, su boka ta papia.” (Luk. 6:45) Esaki ta nifiká ku un persona ku ta onesto den su kurason semper lo papia bèrdat. Lo e papia bèrdat ku tur hende, sea ku estranhero, kolega di trabou, amigu òf famia. Laga nos analisá algun ehèmpel ku ta mustra ku nos ke ta onesto den tur kos.

15. (a) Dikon no ta sabí pa hiba un bida dòbel? (b) Kiko por yuda hóbennan resistí preshon di pareu ku no ta saludabel? (Wak nota.)

¹⁵ Si bo ta un hóben, lo bo ke pa bo pareunan aseptá bo, i esei ta algu normal. Pero tene kuidou pa bo no hasi manera algun hóben a hasi, esta, hiba un bida dòbel. Nan ta parse di ta moralmente limpi ora nan ta huntu ku nan famia i den kongregashon. Sinembargo, nan ta kompletamente diferente ora nan ta riba ret sosial òf den kompania di hende ku no ta sirbi Yehova. Kisas nan ta papia palabra malu, bisti paña ku no ta modesto, skucha muzik degradá, bebe di mas, usa droga, ‘date’ den sekreto i asta hasi kosnan mas pió. Nan ta gañando nan mayornan, e rumannan i Dios. (Sal. 26:4, 5) Yehova sa ki ora nos ta simplemente ‘onr’é ku nos lep, ma nos kurason ta leu for di dje.’ (Mar. 7:6) Lo ta muchu mas mihó pa nos hasi manera e proverbio ta bisa: “No laga bo kurason envidiá pekadó, ma biba semper den e temor di SEÑOR.”—Pro. 23:17. *

16. Kon nos mester kontestá e preguntanan riba e solisitut pa sirbishi di tempu kompleto?

¹⁶ Kisas bo ke sirbi komo pionero regular òf den kualke rasgo di sirbishi di tempu kompleto, manera traha na Bètel. Ora bo ta yena e papel di solisitut, ta importante pa bo ta onesto i duna informashon korekto tokante bo salú, e forma di  entretenimentu ku bo ta skohe i bo prinsipionan moral. (Heb. 13:18) Pero, kiko si bo a hasi algu ku Yehova ta odia òf algu ku ta molestiá bo konsenshi i bo no a papia esaki ku e ansianonan ainda? Pidi nan yudansa di manera ku bo por sirbi Yehova ku un konsenshi limpi.—Rom. 9:1; Gal. 6:1.

17. Kiko nos mester hasi ora hende ku ta persiguí nos ta hasi nos pregunta tokante nos rumannan?

¹⁷ Imaginá bo ku outoridatnan a prohibí e aktividat di Reino kaminda bo ta biba. Awor kiko bo mester hasi si nan arestá bo i kuminsá hasi bo pregunta tokante bo rumannan? Bo mester bisa nan tur loke bo sa? Kiko Hesus a hasi ora e gobernante romano a interog’é? Tabatin biaha ku Hesus no a bisa nada mes! Esei ta di akuerdo ku e prinsipio bíbliko ku tin “un tempu pa keda ketu i un tempu pa papia.” (Ekl. 3:1, 7; Mat. 27:11-14) Den un situashon asina, e mihó kos pa hasi ta usa diskreshon, en bes di pone bida di bo rumannan na peliger.—Pro. 10:19; 11:12.

18. Kiko nos mester hasi si e ansianonan hasi nos pregunta tokante nos rumannan?

¹⁸ Kiko si un persona den e kongregashon a kometé un pika serio i abo ta na haltura di esei? Siendo ku e ansianonan tin e responsabilidat di tene e kongregashon moralmente limpi, nan por puntra bo kiko bo sa di e asuntu. Kiko lo bo hasi, spesialmente si ta un bon amigu òf famia ta enbolbí? Beibel ta bisa: “Esun ku ta papia bèrdat ta konta loke ta korekto.” (Pro. 12:17; 21:28) Pues, bo tin e responsabilidat di bisa e ansianonan e bèrdat kompleto, no bisa mitar bèrdat ni no trose e bèrdat. E ansianonan tin e derecho di sa loke a pasa pa di manera ei nan por yuda e persona ku a faya drecha su relashon ku Yehova.—Sant. 5:14, 15.

19. Kiko nos lo bai analisá den e siguiente artíkulo?

¹⁹ E salmista David a bisa Yehova den orashon: “Bo ta deseá bèrdat den e parti mas íntimo.” (Sal. 51:6) David tabata sa ku loke ta konta ta e hende ku nos ta di paden, esta, loke tin den nos kurason. Pues, kristiannan berdadero mester “papia bèrdat un ku otro” na tur momento. Un otro manera ku nos por mustra ku nos ta diferente for di e miembronan di religion falsu ta ora nos ta siña otro hende e bèrdatnan for di Beibel. Den e siguiente artíkulo, nos lo analisá kon nos por hasi esaki den nos sirbishi.