1. Kiko Isaías a profetisá tokante Hesus, i dikon esei ta un animashon pa nos?

E PROFESIA di Isaías tokante nos Señor Hesukristu ta animá nos i ta duna nos speransa. El a bisa ku Hesus “lo no husga segun loke su wowo ta mira, ni hasi desishon segun loke su orea ta tende; ma ku hustisia e lo husga e pobernan.” (Isa. 11:3, 4) Dikon e palabranan ei ta un animashon pa nos? Pasobra nos ta biba den un mundu yen di prehuisio, kaminda hende ta husga otro a base di loke nan ta mira. Nos tur ta anhelá pa Hesus bin husga nos, e Hues perfekto ku nunka lo husga nos segun aparensia!

2. Ki mandato Hesus a duna nos, i kiko nos lo trata den e artíkulo akí?

² Tur dia nos ta husga òf forma opinion tokante otro hende. Pero komo hende imperfekto, nos no por husga perfektamente manera Hesus. Por lo general, nos ta ser influensiá pa loke nos ta mira. Sinembargo, ora Hesus tabata riba tera el a duna e mandato akí: “Stòp di husga segun aparensia, ma husga na un manera hustu.” (Huan 7:24) Ta bisto ku Hesus ke pa nos sigui su ehèmpel i no husga hende segun aparensia. Den e artíkulo akí, nos lo trata tres faktor ku hopi biaha ta influensiá nos manera di mira kosnan: un hende su rasa òf nashonalidat, su posishon finansiero i su edat. Den kada kaso, nos lo siña maneranan práktiko ku nos por obedesé e mandato di Hesus.

3, 4. (a) Kiko a pone apòstel Pedro kambia su manera di mira hende ku no ta hudiu? (Wak e promé plachi.) (b) Ki bèrdat nobo Yehova a yuda Pedro komprondé?

³ Imaginá loke tabata pasa den mente di apòstel Pedro ora nan a manda busk’é pa bai Sesarea, na kas di Kornelio, un hòmber no hudiu. (Echo. 10:17-29) Pedro, meskos ku otro hudiu di su tempu, a lanta den un kultura ku tabata konsiderá hende ku no ta hudiu impuru. Pero algun suseso ku Pedro a pasa aden a pon’é kambia su punto di bista. Por ehèmpel, Pedro a kaba di haña un vishon di Dios. (Echo. 10:9-16) Den e vishon el a mira algu manera un laken ta baha for di shelu ku tur sorto di bestia impuru den dje i un stèm for di shelu a bis’é: “Lanta ariba Pedro, mata i kome!” Pedro a nenga redondamente di hasi esei. E ora ei e stèm for di shelu a bis’é: “Stòp di yama kontaminá loke Dios a hasi limpi.” Despues di e vishon, Pedro a keda tur konfundí, pasobra e no por a komprondé kiko e stèm kier a bis’é. Nèt na e momento ei, e mensaheronan di Kornelio a yega. Despues ku Pedro a haña instrukshon for di spiritu santu, el a bai ku nan na kas di Kornelio.

⁴ Si Pedro a husga e situashon puramente “segun aparensia,” nunka lo e no a bai e kas di Kornelio. Un hudiu hamas lo a drenta den kas di un persona ku no ta hudiu. Pues, dikon Pedro a bai tòg? Apesar di su prehuisio kontra hende ku no ta hudiu, loke el a mira den e vishon i e instrukshon ku el a haña di spiritu santu a kambia su manera di pensa. Despues di skucha loke Kornelio a splika, Pedro a sintié asina konmoví ku bou di inspirashon el a bisa: “Awor mi ta komprondé di bèrdat ku Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.” (Echo. 10:34, 35) E komprondementu nobo i emoshonante ei ku Pedro a haña—tokante no hasi distinshon di persona—lo tabatin un efekto riba tur kristian. Den ki sentido?

5. (a) Kiko Yehova ke pa tur kristian komprondé? (b) Apesar ku nos sa e bèrdat, ki sintimentu nos por tin ainda?

⁵ Pa medio di Pedro, Yehova a yuda tur kristian komprondé ku e no ta hasi distinshon di persona. Pa Yehova, no ta importá ki idioma un persona ta papia òf di ki rasa, nashonalidat òf tribu e ta. E ta aseptá tur hende hòmber òf hende muhé ku ta tem’é i ku ta hasi loke ta korekto. (Gal. 3:26-28; Rev. 7:9, 10) Esei ta algu ku sin duda bo sa kaba. Pero kiko si bo a lanta den un pais òf famia ku tin prehuisio? Podisé abo ta haña ku bo no ta hasi distinshon di persona, ma kisas sin ku bo sa tòg bo por tin algun rastro di prehuisio. Asta Pedro, ku a yuda otro hende mira ku Yehova no ta hasi distinshon di persona, a demostrá prehuisio despues. (Gal. 2:11-14) Pues, kon nos por obedesé Hesus i stòp di husga hende segun aparensia?

6. (a) Kiko por yuda nos eliminá tur rastro di prehuisio den nos kurason? (b) Kiko e rapòrt ku un ruman ansiano a manda a revelá?

⁶ Pa haña sa si ainda nos tin prehuisio, nos tin ku saminá nos mes a base di e Palabra di Dios. (Sal. 119:105) Tambe nos lo por puntra un amigu di konfiansa si e ta mira ku ainda nos ta demostrá rastronan di prehuisio, ya ku nos mes no por mira esei. (Gal. 2:11, 14) Podisé nos a kustumbrá asina tantu ku e sintimentunan ei ku nos no ta ni ripará ku nos tin nan. Por ehèmpel, esei ta loke a pasa ku un ruman ansiano. El a manda un rapòrt pa sukursal tokante un pareha kasá ku ta aktivo den sirbishi di tempu kompleto. E esposo tabata di un nashonalidat ku  hopi bes hende ta menospresiá. E ansiano a bisa hopi kos bon di e esposo, pero na final di e rapòrt e di: “Apesar ku e ta di [tal nashonalidat], su komportashon i manera di biba ta yuda otro hende komprondé ku si bo ta di [tal nashonalidat] no nesesariamente ta nifiká ku bo ta un hende sushi òf ku bo tin un estilo di bida inferior ku ta típiko di hende di [e nashonalidat ei].” Aparentemente, e ruman ansiano ku a skirbi e rapòrt no a ripará ku e mes tabatin prehuisio kontra e nashonalidat akí. Kiko nos ta siña for di esei? Maske kuantu responsabilidat nos tin den e organisashon di Yehova, nos tin ku saminá nos mes bon i keda dispuesto pa laga otro hende yuda nos wak si ainda nos tin rastronan di prehuisio den nos kurason. Kiko mas nos por hasi?

7. Kon nos por demostrá ku nos a habri nos kurason?

⁷ Si nos habri nos kurason hanchu, nos lo duna amor e chèns di kore ku prehuisio. (2 Kor. 6:11-13) Bo tin e kustumber di pasa tempu solamente ku hende di bo mes rasa, nashonalidat, tribu òf idioma? Si ta asina, ta ora pa bo hancha bo mes. Dikon bo no ta invitá rumannan di otro kultura pa bai prediká huntu ku bo òf pa bini bo kas pa kome algu òf pa pasa un ratu ameno huntu ku otro rumannan? (Echo. 16:14, 15) Si bo hasi esei, lo bo yena bo kurason ku asina tantu amor ku lo no tin lugá pa prehuisio. Pero tin otro faktor ku por pone nos husga hende segun aparensia, por ehèmpel, nan posishon finansiero.

8. Segun Levítiko 19:15, kiko por influensiá nos manera di mira un persona?

⁸ Un otro faktor ku por influensiá e manera ku nos ta mira otro hende ta si nan ta riku òf pober. Levítiko 19:15 (NW) ta bisa: “No bai na fabor di hende pober djis pasobra nan ta pober ni duna preferensia na hende riku. Bo mester husga bo próhimo ku hustisia.” Pero kon e echo ku un persona ta riku òf pober por influensiá e manera ku nos ta mira e persona?

9. Ki bèrdat tristu Sálomon a skirbi, i kiko esei ta siña nos?

⁹ Bou di inspirashon, Sálomon a skirbi un bèrdat tristu tokante hende imperfekto. Na Proverbionan 14:20, el a deklará: “E pober ta wòrdu odiá asta dor di su bisiña, ma e riku tin hopi amigu.” Kiko e proverbio akí ta siña nos? Si nos no tene kuidou, nos lo ke bira amigu di rumannan ku ta riku i evitá amistat di esnan ku ta pober. Dikon ta asina peligroso pa balorá hende solamente a base di nan posishon material?

10. Ki problema Santiago a spièrta e kristiannan p’e?

¹⁰ Si nos ta trata nos rumannan diferente a base di nan posishon finansiero, nos lo por trese divishon den kongregashon. Den promé siglo, disipel Santiago a spièrta e kristiannan ku e problema ei tabata dividí algun kongregashon. (Lesa Santiago 2:1-4.) Nos tin ku tene kuidou pa esei no sosodé den nos kongregashonnan awe. Kon nos por lucha kontra e tendensia di husga hende a base di loke nan tin?

11. Kos material ta influensiá un hende su amistat ku Yehova? Splika esei.

¹¹ Nos tin ku mira nos rumannan manera Yehova ta mira nan. Un hende ta balioso pa Yehova no pasobra e ta riku òf pasobra e ta pober. Nos amistat ku Yehova lo no dependé nunka di kuantu plaka òf kos material nos tin òf no tin. Ta bèrdat ku Hesus a bisa ku “ta difísil pa un hende riku drenta e Reino di shelu,” pero  e no a bisa ku ta imposibel. (Mat. 19:23) Di otro banda, Hesus a bisa tambe: “Felis ta boso ku ta pober, pasobra e Reino di Dios ta di boso.” (Luk. 6:20) Ma e no tabata ke men ku tur hende pober lo a skuch’é i risibí bendishon spesial. Bon mirá, hopi hende pober no a bira siguidó di Hesus. E punto ta ku nos no por determiná si un persona ta amigu di Yehova djis a base di e kosnan material ku e tin.

12. Kiko Beibel ta bisa tantu hende riku komo hende pober?

¹² Den e pueblo di Yehova, nos ta bendishoná ku hopi ruman hòmber i ruman muhé, riku i pober, ku ta stima Yehova i ku ta sirbié ku henter nan kurason. Beibel ta bisa esnan ku ta riku “pa nan pone nan speransa, no den rikesa insigur, sino den Dios.” (Lesa 1 Timoteo 6:17-19.) A la bes e Palabra di Dios ta spièrta tur sirbidó di Yehova, riku i pober, ku ta peligroso pa stima plaka. (1 Tim. 6:9, 10) Pues, si nos siña mira nos rumannan manera Yehova ta mira nan, nos lo no kai den e tentashon di husga nan a base di loke nan tin òf no tin. Pero awor, lo ta bon pa husga hende a base di nan edat? Laga nos wak.

13. Kiko Beibel ta siña nos tokante e manera ku nos mester trata hende di mas edat?

¹³ Hopi biaha Beibel ta duna nos e instrukshon pa trata hende di edat ku rèspèt. Levítiko 19:32 ta bisa: “Lanta para pa esun ku tin kabei blanku, onra e ansiano i teme bo Dios.” Proverbionan 16:31 tambe ta bisa nos: “Kabei blanku ta un korona di gloria; den e kaminda di hustisia e ta wòrdu hañá.” Ademas, Pablo a konsehá Timoteo pa no korigí un hòmber di mas edat na mal manera, ma pa trat’é manera su tata. (1 Tim. 5:1, 2) Aunke Timoteo tabatin sierto outoridat riba ruman hòmbernan mas grandi kuné, e mester a trata nan ku kompashon i rèspèt.

14. Ki ora ta na su lugá pa nos duna konseho òf disiplina na un persona ku tin mas edat ku nos?

¹⁴ Pero te kon leu nos tin ku sigui e prinsipio ei? Por ehèmpel, kiko si un ruman di mas edat ta peka konsientemente òf ta animá otro hende pa hasi algu ku Yehova no ta gusta? Pasobra e ta hende grandi, nos tin ku laga esei pasa numa? Yehova lo no husga segun aparensia i despensá un hende ku ta peka konsientemente djis pasobra e persona ta di mas edat. Tuma nota di e prinsipio ku tin na Isaías 65:20 (NW): “E pekadó lo ser maldishoná, maske e tin 100 aña di edat.” Nos ta haña e mesun prinsipio den un vishon di Ezekiel. (Eze. 9:5-7) Pues, nos preokupashon prinsipal semper mester ta pa mustra rèspèt pa Yehova Dios, “e Ansiano di Dianan.” (Dan. 7:9, 10, 13, 14) E ora ei, nos lo no tin miedu di korigí un persona ku tin mester di konseho, sin importá kuantu aña e tin.—Gal. 6:1.

15. Kiko e ehèmpel di apòstel Pablo ta siña nos tokante rèspèt pa ruman hòmbernan yòn?

¹⁵ Kon nos mester trata ruman hòmbernan yòn den kongregashon? Kon abo ta mira nan? Apòstel Pablo a duna e hóben Timoteo e siguiente konseho: “No laga ningun hende menospresiá bo nunka pasobra bo ta yòn. Al kontrario, bira un bon ehèmpel pa esnan fiel den bo manera di papia, bo kondukta, amor, fe i puresa.” (1 Tim. 4:12) Tempu ku Pablo a skirbi e palabranan ei, Timoteo lo por tabatin 30 i piku aña. Pero tòg Pablo a dun’é responsabilidatnan di peso. Sea kual sea e motibu ku Pablo a dun’é e konseho ei, e punto ta ku nos no mester  husga ruman hòmbernan yòn djis a base di nan edat. Ta bon pa nos kòrda ku tempu nos Señor Hesus tabatin 30 i piku aña, ya el a kumpli ku henter su sirbishi riba tera!

16, 17. (a) Kon ansianonan ta disidí si un ruman hòmber ta kualifiká pa nan rekomend’é komo sirbidó ministerial òf ansiano? (b) Kon punto di bista personal òf kultura lokal por bai kontra di loke Beibel ta bisa?

¹⁶ Den algun kultura, hende ta menospresiá hende hòmber yòn. Esei por pone ku algun ansiano den kongregashon kisas ta vasilá pa rekomendá e ruman hòmbernan yòn ku ta kualifiká pa sirbi komo sirbidó ministerial òf ansiano. Ta bon pa tur ansiano kòrda ku Beibel no ta duna un edat mínimo pa rekomendá un ruman hòmber komo sirbidó ministerial òf ansiano. (1 Tim. 3:1-10, 12, 13; Tito 1:5-9) Si un ansiano bini ku un regla basá riba kultura, e no ta obedesiendo e Palabra di Dios. Ansianonan no mester evaluá ruman hòmbernan yòn segun nan punto di bista personal òf kultura lokal, ma segun e normanan di e Palabra di Dios.—2 Tim. 3:16, 17.

¹⁷ Si ansianonan no ta sigui e normanan di Beibel, kisas nan ta keda sin rekomendá rumannan ku ta kumpli ku e rekisitonan pa bira sirbidó ministerial òf ansiano. Wak kiko a pasa ku un sirbidó ministerial na un sierto pais. E tabata kumpli ku responsabilidatnan importante den su kongregashon, i e ansianonan tabata di akuerdo ku e tabata kumpli ku e rekisitonan bíbliko pa bira ansiano. Pero algun ansiano di mas edat tabata haña ku e ta parse muchu yòn pa hende konsider’é un ansiano. Lamentablemente, nan no a rekomend’é, djis pa su aparensia muchu yòn. Aunke esaki ta ún eksperensia so, rapòrtnan ta indiká ku hopi ansiano na vários parti di mundu ta pensa asina. P’esei, ta masha importante pa nos dependé riba Beibel i no riba nos kultura òf punto di bista personal! Esei ta e úniko manera pa nos obedesé Hesus i stòp di husga hende segun nan aparensia.

18, 19. Kiko lo yuda nos mira otro hende manera Yehova ta mira nan?

¹⁸ Aunke nos ta imperfekto, nos por siña mira otro hende sin prehuisio, manera Yehova ta mira nan. (Echo. 10:34, 35) Pero pa logra esei, nos mester hasi esfuerso konstantemente i presta atenshon na e rekordatorionan di e Palabra di Dios. Ora nos apliká nan, nos ta obedesé e mandato di Hesus pa “stòp di husga segun aparensia.”—Huan 7:24.

¹⁹ Pronto nos Rei, Hesukristu, lo husga henter humanidat na un manera hustu, no segun loke su wowo ta mira ni segun loke su orea ta tende. (Isa. 11:3, 4) Sin duda, esei lo ta un tempu maravioso!