RÒNT mundu, ansianonan ta apresiá e privilegionan di sirbishi ku nan tin den e pueblo di Dios. Esta un bendishon nan ta pa nos tur! Pero no muchu tempu pasá tabatin un kambio. A pidi e ansianonan di mas edat pa nan entregá sierto responsabilidat di mas peso na e ansianonan mas yòn. Kiko presis e kambio ei a enserá?

Esei a nifiká ku e superintendentenan di sirkuito i e instruktornan di skol bíbliko ta stòp ku e formanan di sirbishi ei ora nan hasi 70 aña di edat. Ademas, e ansianonan ku tin 80 aña di edat ta stòp ku sierto asignashon, manera koordinadó di Komité di Sukursal òf di e kuerpo di ansiano pa e ansianonan mas yòn tuma e asignashonnan ei over. Kon nos ansianonan stimá di mas edat a reakshoná riba e kambio akí? Nan a demostrá lealtat na Yehova i na su organisashon!

Un ruman ku yama Ken, ku a sirbi pa kasi 49 aña komo koordinadó di un Komité di Sukursal, a bisa: “Mi tabata kompletamente di akuerdo ku e desishon ei. De echo, nèt e mainta ei ku m’a haña sa di e kambio, m’a  hasi orashon na Yehova i a bis’é ku nos tin mester di un ruman mas yòn pa sirbi komo koordinadó.” Rònt mundu, hopi di e ansianonan fiel di mas edat a ekspresá e mesun sintimentu. Klaru ku komo ku nan tabata gusta sirbi nan rumannan, algun di nan tabata un poko desepshoná na promé instante.

Esperandio, kende tabata e koordinadó di un kuerpo di ansiano, a bisa: “E notisia a hasi mi un poko tristu.” Pero el a atmití: “Mi tabatin mester di mas tempu pa kuida mi salú.” Klaru, Esperandio ta sigui sirbi Yehova fielmente, i e ta un bendishon pa su kongregashon.

Pero kiko di e rumannan ku despues di hopi aña mester a stòp di sirbi komo superintendentenan di sirkuito? Allan, kende a sirbi 38 aña den e trabou di sirkuito, a atmití: “Ora mi a tende e notisia, mi a keda di shòk!” Pero e ta rekonosé ku ta benefisioso pa entrená e rumannan mas yòn pa e trabou, i e ta sigui sirbi fielmente.

Russell tabata den e trabou di sirkuito i instruktor di skol bíbliko pa un total di 40 aña. El a splika ku na promé instante é ku su kasá tabata desepshoná. “Nos tabata stima nos asignashon i tabata sinti ku nos tin e energia nesesario pa sigui hasié.” Awor Russell ku su kasá ta usa nan entrenamentu i eksperensia kaminda nan ta biba, i e publikadónan di e kongregashon ta masha kontentu ku esei.

Kisas abo personalmente no a eksperensiá e sintimentunan ku nos a kaba di deskribí. Pero un relato den e buki di 2 Samuel lo por yuda bo komprondé e rumannan ku sí a pasa den esei.

Ban bèk na e tempu ku Absalon a rebeldiá kontra su tata, Rei David. David a hui for di Herúsalèm i a bai Mahanaim, un stat situá ost di Riu Hordan. Einan, David ku su sòldánan tabatin mester di kuminda i otro nesesidatnan. Bo ta kòrda kiko a pasa?

Tres habitante di e region a trese kama, kuminda i vários artíkulo di uso pa nan. Barzilai tabata un di e hòmbernan generoso ei. (2 Sam. 17:27-29) Despues ku e rebelion di Absalon a ser dominá, David por a bai Herúsalèm bèk, i Barzilai a kompañ’é te na Riu Hordan. Rei David a animá Barzilai pa bin biba na Herúsalèm i a bis’é ku lo e por kome na David su mesa. Barzilai lo no tabatin mester di esei, pasobra e tabata “un hòmber masha riku mes.” (2 Sam. 19:31-33) Pero David sin duda a apresiá su kualidatnan i lo kier a hasi uso di kualke sugerensia ku Barzilai lo por a dun’é. Anto pa Barzilai mes, sigur lo tabata un bunita privilegio di por biba i traha den e palasio di rei!

Pero komo ku Barzilai tabata un hòmber realístiko i modesto, el a indiká ku e tin 80 aña di edat. Anto el a agregá: “Mi por distinguí entre bon i malu?” Kiko e tabata ke men? Barzilai sin duda a akumulá sabiduria durante su bida. I ainda e por a duna bon konseho, meskos ku mas despues  e “ansianonan” a duna bon konseho na Rei Roboam. (1 Rei. 12:6, 7; Sal. 92:12-14; Pro. 16:31) P’esei, ora ku Barzilai a papia di “distinguí entre bon i malu,” e tabata referí kisas na e limitashonnan físiko ku e tabatin debí na edat avansá. El a atmití ku e no por a disfrutá mas di e smak di kuminda ni di e stèm di kantante. (Ekl. 12:4, 5) Pues, Barzilai di su mes inisiativa a pidi David pa bai ku Kimam, un hòmber mas yòn, ku probablemente tabata su yu.—2 Sam. 19:35-40.

E kambio menshoná den e introdukshon ta reflehá un punto di bista similar na loke Barzilai tabatin. Den nos tempu, ta di komprondé ku ora a disidí pa hasi e kambio ei, no por a tene kuenta ku e sirkunstansianan i kapasidat di kada persona. Mester a analisá na un manera realístiko kiko lo ta mihó pa e fiel ansianonan di mas edat ku ta sirbi rònt mundu.

E ansianonan di mas edat ei, siendo modesto, por a komprondé mesora ku e organisashon di Yehova lo por atendé futuro kresementu mihó si konfia e ansianonan mas yòn ku e responsabilidatnan ku nan a atendé pa hopi aña. Den mayoria di kaso, ta e rumannan di mas edat a entrená esnan mas yòn, meskos ku Barzilai probablemente a entrená su yu hòmber, i apòstel Pablo a entrená Timoteo. (1 Kor. 4:17; Flp. 2:20-22) E rumannan mas yòn akí ta duna prueba awor di ta “regalo den forma di hende,” kapas pa yuda “edifiká e kurpa di Kristu.”—Efe. 4:8-12; kompará ku Numbernan 11:16, 17, 29.

Hopi ruman hòmber di edat ku a entregá sierto responsabilidat awor por probechá di oportunidatnan nobo pa ser útil den e sirbishi di Yehova.

Marco, kende tabata superintendente di sirkuito pa 19 aña, a splika: “Mi situashon nobo ta permití mi mustra interes den e esposonan ku no ta Testigu di e ruman muhénan di nos kongregashon.”

Geraldo, kende tabatin 28 aña den e trabou di sirkuito, a bisa: “Nos a pone komo meta pa yuda e rumannan inaktivo i pa dirigí mas estudio di Beibel.” El a agregá ku te asina leu é ku su kasá ta dirigí 15 estudio di Beibel i ku hopi ruman inaktivo ta asistí na reunion awor.

Allan, sitá anteriormente, a bisa: “Awor nos tin e oportunidat di dediká mas tempu na diferente forma di predikashon, manera predikashon den área públiko, den teritorio di negoshi i na nos bisiñanan. Dos di nos bisiñanan ya kaba a bishitá Salòn di Reino.”

Si abo ta un di e ruman hòmbernan kapasitá i fiel i bo a haña un asignashon nobo, tin un otro manera spesial ku bo por apoyá e trabou di Yehova: Bo por kompartí bo eksperensia balioso ku e ruman hòmbernan mas yòn den kongregashon. Russell, sitá anteriormente, a bisa: “Yehova ta entrená i ta hasi bon uso di e hóbennan presioso i yen di talento. E kongregashon ta benefisiá di nan manera dinámiko di duna siñansa i di e manera ku nan ta pastoriá e karnénan!”—Wak e kuadro “ Yuda e Hòmbernan Mas Yòn Alkansá Nan Pleno Potensial.”

Si resientemente bo a drenta un otro forma di sirbishi, keda positivo. Pa medio di bo trabou fiel, ya kaba bo a hasi bon pa hopi hende, i bo por sigui hasi esei. E rumannan tabata stima bo, i siguramente nan lo sigui stima bo.

Mas importante ainda, bo a haña un lugá den Yehova su kurason. Lo e no ‘lubidá bo trabou i e amor ku bo a mustra pa su nòmber, mirando ku bo a sirbi i ta sigui sirbi e santunan.’ (Heb. 6:10) E versíkulo ei ta sigurá nos ku Yehova ta hasi mas ku djis  kòrda e trabou ku nos a hasi den pasado. Bo ta muchu balioso den su bista p’e lubidá, no solamente bo esfuersonan di pasado, sino tambe loke bo ta sigui hasi pa agrad’é!

Pero kiko si abo no ta un di e ruman hòmbernan ku a haña kambio di asignashon? Tòg e kambio ei kisas tin di haber ku  bo. Den ki sentido?

Si den bo kongregashon tin un fiel ruman hòmber di edat ku a haña un kambio di asignashon, bo por benefisiá di su madures i su añanan di eksperensia. Pidié pa konseho i sugerensia. I opservá kon e ta usa su eksperensia den su asignashon aktual.

Sea ku bo ta un ruman di mas edat sirbiendo den un asignashon nobo òf un ruman ku por benefisiá di su eksperensia, tene na mente ku Yehova ta balorá e lealtat di e rumannan ku a sirbié pa hopi tempu i ku ta sigui sirbié.