1. Ki efekto e komportashon egoista di mundu por tin riba nos humildat?

DIKON no ta fásil pa pone na práktika loke nos ta siña for di e Palabra di Dios? Un motibu ta ku pa hasi loke ta korekto, nos mester ta humilde, i den e “último dianan” akí ta difísil pa keda humilde. Nos ta rondoná pa hende ku ta stima nan mes i stima plaka, hende bromadó, arogante i sin dominio propio. (2 Tim. 3:1-3) Komo sirbidó di Dios, nos sa ku e tipo di komportashon ei ta malu, pero tin biaha por parse ku ta hende ku ta komportá nan asina ta esnan ku tin éksito i ta gosa di bida, i kisas nos ta envidiá e supuesto benefisionan ei. (Sal. 37:1; 73:3) Podisé nos ta asta puntra nos mes: ‘Ta bale la pena pa mi pone e interesnan di otro hende promé ku esnan di mi? Si mi komportá mi “komo esun di mas chikitu,” hende lo sigui respetá mi?’ (Luk. 9:48) Si nos laga e aktitut egoista di mundu influensiá nos, nos lo por daña nos bon relashon ku nos rumannan den kongregashon i stroba otro hende di mira ku nos ta kristian. Pero si nos studia i imitá e bon ehèmpelnan ku tin den Beibel, nos lo benefisiá sigur.

2. Kiko nos por siña for di fiel sirbidónan di Dios?

² Pa nos por imitá e ehèmpel di fiel sirbidónan di Dios, nos  tin ku analisá loke nan a hasi ku a duna bon resultado. Kiko a yuda nan bira amigu di Dios? Kon nan a logra haña su aprobashon? Kon nan a haña e forsa pa hasi Dios su boluntat? Un estudio profundo asina ta un parti masha importante di nos alimentashon spiritual.

3, 4. (a) Kon nos ta haña alimento spiritual? (b) Dikon nos por bisa ku kuminda spiritual ta enserá mas ku djis gana konosementu?

³ Komo kristian, nos ta haña hopi konseho i guia for di Beibel, for di e publikashonnan bíbliko, e websitenan jw.org i JW Broadcasting, e reunion- i e asambleanan. Pero segun e palabranan di Hesus na Huan 4:34, pa alimentá nos mes den sentido spiritual, nos tin ku hasi mas ku djis gana konosementu. Hesus a bisa: “Mi kuminda ta pa hasi e boluntat di esun ku a manda mi i kaba e trabou ku el a duna mi pa hasi.”

⁴ Segun Hesus, hasimentu di e boluntat di Dios ta parti di e kuminda spiritual. Den ki sentido esei ta manera kuminda? Wèl, ora nos kome un bon kuminda, nos ta sinti nos satisfecho i felis. Asina tambe ora nos hasi e boluntat di Dios, nos fe ta bira fuerte i nos ta sinti nos satisfecho den sentido spiritual. Kuantu biaha bo no a yega di bai prediká sin grasia, pero a bini kas bèk despues di sirbishi kontentu i yen di energia?

5. Ki benefisio nos ta haña ora nos apliká sabiduria?

⁵ Ora nos ta pone na práktika loke Dios ta siña nos, nos ta bira sabí. (Sant. 3:13) I e benefisionan di sabiduria ta bale la pena. “Bendishoná ta e hende ku haña sabiduria, e hende ku haña komprondementu . . . E ta mas presioso ku rubí, i tur loke bo por deseá no ta di kompará kuné. . . . E ta un palu di bida pa esnan ku ta gar’é tene, i felis ta tur esnan ku tene duru na dje.” (Pro. 3:13-18) Hesus a bisa: “Ya ku boso sa e kosnan akí, boso lo ta felis si boso hasi nan.” (Huan 13:17) E disipelnan lo tabata felis basta nan a sigui obedesé Hesus. I esei ta loke nan a hasi. No ta na un okashon so nan a obedesé su instrukshonnan i imitá su ehèmpel. Mas bien, esei a bira nan forma di biba.

6. Dikon nos tin ku sigui pone na práktika loke nos ta siña?

⁶ Awe tambe ta masha importante pa nos sigui pone na práktika loke nos ta siña for di Beibel. Nos por kompará esei ku e trabou di un mekániko. E por tin hèrmènt, material i konosementu. Pero si e no ta usa nan, nan no ta di niun probecho p’e. Ademas, si ántes el a traha komo mekániko i a haña eksperensia, e tin ku sigui praktiká loke el a siña p’e por keda un bon mekániko. Asina tambe, tempu ku nos a kuminsá studia Beibel i a pone na práktika loke nos a siña, nos a haña sierto benefisio. Sinembargo pa nos keda felis, humildemente nos tin ku obedesé e siñansanan di Yehova tur dia.

7. Pa nos por ta sabí, kiko nos mester hasi ku loke nos ta siña for di e ehèmpelnan di Beibel?

⁷ Den e artíkulo akí, nos lo analisá algun situashon ku por pone nos humildat na prueba, i nos lo wak kon e fiel sirbidónan di Dios di antigwedat a enfrentá situashonnan similar ku éksito. Si nos ke fortalesé nos spiritualidat, nos tin ku hasi mas ku djis studia e informashon. Pues, pensa kon bo ta bai pone e puntonan ku bo ta siña na práktika, anto hasié mesora.

8, 9. Kiko e susesonan deskribí na Echonan 14:8-15 ta bisa nos di e humildat di apòstel Pablo? (Wak e promé plachi.)

⁸ E boluntat di Dios ta “pa tur sorto di  hende ser salbá i yega na un konosementu eksakto di e bèrdat.” (1 Tim. 2:4) Kon nos ta mira e diferente sorto di hendenan ku ainda no konosé e bèrdat? Apòstel Pablo a bai na e snoanan pa buska hende ku ya kaba tabata sa algu di Yehova. Pero e no a prediká na hudiu so, sino tambe na hende ku tabata adorá otro dios. Nan reakshon a pone Pablo su humildat na prueba.

⁹ Por ehèmpel, durante Pablo su promé biahe di misionero, e hendenan di Likaonia a kere ku é i Bárnabas tabata e diosnan falsu Zeus i Hermes den forma di hende. Akaso Pablo i Bárnabas a gosa di nan fama i popularidat? Nan a mira esei komo un kambio agradabel despues di e persekushon ku nan a sufri den e dos último statnan ku nan a bishitá? Akaso nan a pensa ku e publisidat lo por a yuda e predikashon di e bon notisia? Niun ora so! Mesora nan a sker nan paña, kore drenta e multitut i grita: “Pakiko boso ta hasi e kosnan akí? Nos ta hende meskos ku boso.”—Echo. 14:8-15.

10. Den ki sentido Pablo i Bárnabas a konsiderá nan mes igual ku e hendenan di Likaonia?

¹⁰ Pablo i Bárnabas a rekonosé ku nan tambe tabata hende imperfekto, meskos ku e hendenan pagano ei. Nan no tabata bisando ku nan forma di adorashon ta meskos ku di e hendenan di Likaonia. Nan dos tabata misionero ku Dios a skohe. (Echo. 13:2) Ademas, Dios a ungi nan ku spiritu santu i nan tabatin un speransa maravioso. Pero esei no tabata motibu pa nan sinti nan superior. Nan a komprondé ku e hendenan di Likaonia tambe por a haña e mesun speransa di bai shelu si nan a aseptá e bon notisia.

11. Kon nos por imitá e humildat di Pablo ora nos ta prediká?

¹¹ Kon nos lo por imitá e humildat di Pablo? Na promé lugá, nos no mester pensa nunka ku e asignashon di prediká ku nos tin òf ku e kosnan ku Yehova ta yuda nos logra ta hasi nos spesial. Nos tur mester puntra nos mes: ‘Kon mi ta mira e hendenan ku mi ta prediká na dje? E prehuisio ku ta reina den komunidat pa ku sierto grupo di hende a influensiá mi sin ku mi a ripará?’ Ta di elogiá ku rònt mundu Testigunan di Yehova ta purba di haña sa ki idioma e hendenan ku ta biba den nan teritorio ta papia, ya ku nan ke yuda mas tantu hende posibel haña e bèrdat. Tin di nan ta asta hasi esfuerso pa siña idioma òf kustumber di hende ku e komunidat en general ta konsiderá inferior. E Testigunan ei nunka ta sinti ku nan ta superior na e hendenan ku nan ta prediká na dje. Al kontrario, nan ta trata di komprondé kada persona pa asina nan por yega na nan kurason ku e mensahe di Reino.

12. Kon Epafras a demostrá amor i interes pa otro hende?

¹² Un otro manera pa demostrá ku nos ta humilde i ta obedesé Yehova ta di hasi orashon pa nos rumannan den fe. (2 Ped. 1:1) Epafras a hasi esei. Beibel ta menshoná Epafras tres biaha so, i tur ta den e kartanan inspirá di Pablo. Na Roma, ora Pablo tabata bou di aresto na kas, el a skirbi e rumannan di Kolósas bisando ku Epafras ‘semper ta hasi orashon pa nan ku masha fervor.’ (Kol. 4:12) Epafras tabata konosé e rumannan bon, i e tabata masha interesá den nan bienestar. I aunke e tabatin su mes problemanan—e tabata “kompañero di prizòn” di Pablo—tòg e no a sera wowo pa e nesesidat spiritual di otro hende.  (Flm. 23) Al kontrario, el a hasi algu pa yuda nan i asina el a demostrá su amor i interes. E orashonnan ku nos ta hasi pa nos rumannan tin un efekto poderoso, foral ora nos ta menshoná e rumannan pa nòmber.—2 Kor. 1:11; Sant. 5:16.

13. Kon lo bo por imitá e ehèmpel di Epafras ora bo ta hasi orashon?

¹³ Pensa riba e rumannan ku bo por inkluí den bo orashon. Pensa riba algun nòmber spesífiko. Meskos ku Epafras, hopi ruman ta hasi orashon pa otro rumannan di nan kongregashon òf pa famianan ku ta enfrentá situashonnan difísil. Kisas nan tin ku tuma desishonnan importante òf tin tentashon ku nan mester resistí. Otro ruman ta menshoná den nan orashonnan nòmber di e rumannan ku ta den e artíkulo riba jw.org (na spañó) “Testigos de Jehová presos por sus creencias.” (Bai na PRENSA > ASUNTOS LEGALES.) Ademas, ta bon pa nos kòrda riba e rumannan ku a pèrdè ser kerí den morto, esnan ku resientemente a sobrebibí desaster natural i guera i esnan ku ta sufri e konsekuensianan di krísis ekonómiko. Ta bisto ku masha hopi ruman tin mester di nos orashonnan. Ora nos ta hasi orashon pa nan, nos ta demostrá ku nos no ta interesá den nos mes so, sino tambe den otro hende. (Flp. 2:4) Yehova ta skucha orashon asina.

14. Dikon nos ta bisa ku Yehova ta e mihó ehèmpel di skucha otro hende?

¹⁴ Un otro manera ku nos ta demostrá humildat ta ora nos ta dispuesto pa skucha otro hende. Santiago 1:19 ta bisa ku nos mester ta “kla pa skucha.” E mihó ehèmpel di esei ta Yehova mes. (Gén. 18:32; Hos. 10:14) Laga nos wak kiko nos por siña for di e kòmbersashon na Éksodo 32:11-14. (Les’é.) Yehova no tabatin mester di e opinion di Moises, pero tòg el a duna Moises chèns pa ekspresá su sintimentunan. Ta kua di nos lo a sinta ku nos santu pasenshi skucha un hende ku a yega di ta robes, i despues asta sigui su sugerensia? Wèl, Yehova ku gran pasenshi ta skucha sernan humano ku ta hasi orashon na dje ku fe.

15. Kon nos por imitá e manera ku Yehova ta mustra onor na otro hende?

¹⁵ Ta bon pa kada un di nos puntra nos mes: ‘Si Yehova ta asina humilde ku e por trata ku hende i skucha nan, manera el a hasi ku Abraham, Raquel, Moises, Hosue, Manoa, Elías i Ezekías, ami no mester purba di hasi meskos? Mi por mustra mas onor na e rumannan ora mi trata nan ku dignidat, skucha nan ideanan i asta sigui nan bon sugerensianan? Tin un hende den mi kongregashon òf den mi famia ku lo mi por skucha ku mas atenshon? Kiko lo mi tin ku hasi tokante esei? Kiko mi ta bai hasi tokante esei?’—Gén. 30:6; Hues. 13:9; 1 Rei. 17:22; 2 Kró. 30:20.

16. Kon Rei David a reakshoná ora Simei a provok’é?

¹⁶ Ademas, humildat ta yuda nos pa demostrá dominio propio ora hende provoká nos. (Efe. 4:2) Un ehèmpel notabel di esaki nos ta haña na 2 Samuel 16:5-13. (Les’é.) Simei, un famia di Rei Saul, a insultá David i su sirbidónan i a tira nan ku piedra. David a soportá esei apesar ku e tabatin e poder pa kaba ku e situashon. Di unda David a saka e forsa pa dominá su mes? Nos ta haña e kontesta ora nos analisá Salmo 3.

17. (a) Kiko a yuda David dominá su mes? (b) Kon nos por imitá e ehèmpel di David?

¹⁷ E introdukshon di Salmo 3 ta indiká  ku David a komponé e salmo “tempu ku el a hui pa su yu hòmber Absalon.” Versíkulonan 1 i 2 ta kuadra ku e susesonan ku 2 Samuel kapítulo 16 ta deskribí. Anto Salmo 3:4 ta resaltá e konfiansa ku David tabatin: “Ku mi bos mi tabata sklama na SEÑOR, i el a kontestá mi for di su seru santu.” Nos tambe por hasi orashon ora hende ta ataká nos. Anto Yehova lo duna nos su spiritu santu pa nos por perseverá. Bo por pensa riba un situashon kaminda bo tin ku demostrá mas dominio propio òf pordoná un hende ku ta trata bo malu sin motibu? Bo tin e konfiansa ku Yehova ta mira bo sufrimentu i lo yuda bo i bendishoná bo?

18. Ki benefisio nos ta saka ora nos sigui hasi loke Yehova ta manda nos hasi?

¹⁸ Ora nos ta hasi loke nos sa ku ta korekto, nos lo haña hopi bendishon. Ku bon motibu anto Proverbionan 8:11 ta bisa lo siguiente tokante sabiduria: “Tur loke hende por deseá no ta di kompará kuné”! Aunke sabiduria ta basá riba konosementu, loke ta demostrá ku nos tin sabiduria ta e desishonnan ku nos ta tuma, no djis e konosementu ku nos tin. Asta vruminga ta demostrá sabiduria. Yehova a krea nan ku instinto ku ta yuda nan prepará nan kuminda den zomer. (Pro. 30:24, 25) Kristu ta e “sabiduria di Dios,” i semper e ta hasi loke ta agradá su Tata. (1 Kor. 1:24; Huan 8:29) Dios sa ku tin un diferensia entre sa loke ta korekto i hasi loke ta korekto. E ta rekompensá e hendenan ku ta demostrá humildat i perseveransia i ta hasi loke nan sa ku ta bon. (Lesa Mateo 7:21-23.) Pues, laga nos sigui traha pa hasi e kongregashon un lugá kaminda tur hende por sirbi Yehova ku humildat. Ta bèrdat ku ta tuma tempu i pasenshi pa nos pone na práktika loke nos sa ku ta korekto, pero si nos hasi esei, nos lo demostrá ku nos ta humilde i nos lo ta felis awor i pa semper.