Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Kiko ta kuater kos ku nos por hasi pa kanta mihó?

Nos mester para règt, tene nos buki di kantika na haltu, hala rosea korektamente, habri nos boka hanchu i kanta ku stèm fuerte. Asina nos lo kanta mas mihó.—w17.11, pág. 5.

Kiko ta interesante di e lugá di e statnan di refugio na Israel i di e kayanan ku tabata hiba na nan?

E seis statnan di refugio tabata bon repartí den e pais, i e kayanan ku tabata hiba na nan tabata bon mantené. Pues, un hende por a haña refugio relativamente fásil i lihé den un di nan.—w17.11, pág. 14.

Dikon e reskate di Hesus ta e mihó regalo ku nos por a haña di Dios?

E reskate ta duna nos chèns di biba pa semper i ta libra nos for di piká i morto. Komo ku Dios ta stima e desendientenan di Adam, el a duna nos su Yu miéntras ku nos tabata pekadó ainda.—wp17.6, pág. 6-7.

Kon Salmo 118:22 a indiká ku Hesus lo a ser resusitá?

Hende a rechasá Hesus komo e Mesías i a mat’é. Pero p’e por a bira “e piedra-di-skina prinsipal,” e mester a ser resusitá.—w17.12, pág. 9-10.

Un hende mester tabatin e derecho di yu mayó pa e por tabata un antepasado di e Mesías?

Tin biaha sí, pero no semper. David no tabata e yu mayó di Isaí; tòg el a bira antepasado di e Mesías.—w17.12, pág. 14-15.

Ki prinsipionan tokante medisina nos por haña den Beibel?

E Lei di Moises a bisa ku mester a tene hende ku sierto malesa separá for di otro hende, laba man despues di mishi ku un kurpa morto i deshasí di sushi di hende. Tur yu hòmber mester a ser sirkunsidá riba e di ocho dia ku nan a nase, ku tabata e tempu ideal, pa nan sanger kuaha.—wp18.1, pág. 7.

Dikon ta bon pa un kristian stima su mes te na sierto grado?

Nos mester stima nos próhimo meskos ku nos mes. (Mar. 12:31) Esposonan mester “stima nan esposa manera nan mes kurpa.” (Efe. 5:28) Pero amor pa bo mes no mester bira eksagerá.—w18.01, pág. 23.

Kiko nos por hasi pa progresá spiritualmente?

Nos tin ku studia e Palabra di Dios, meditá riba dje i apliká loke nos ta siña. Nos mester laga spiritu santu guia nos mente i kurason i aseptá i apresiá yudansa di otro hende.—w18.02, pág. 26.

Dikon astrologia i wakmentu di destino no ta e mihó manera pa haña sa futuro?

Tin vários motibu, pero esun prinsipal ta ku Beibel ta kondená tur e dos práktikanan ei.—wp18.2, pág. 4-5.

Kiko nos mester kòrda ora nos aseptá un invitashon pa kome?

Nos mester kumpli ku nos palabra. (Sal. 15:4) Nos no mester kansel’é sin motibu bálido. Probablemente, nos anfitrion a hasi preparashon pa risibí nos.—w18.03, pág. 18.

Kiko ruman hòmbernan nombrá por siña for di Timoteo?

Timoteo tabata realmente interesá den hende i a pone kosnan spiritual na promé lugá. El a traha duru pa sirbi Yehova i a apliká loke el a siña. El a sigui entrená su mes i a dependé riba spiritu santu di Yehova. Tantu ansiano komo otro ruman por imitá su ehèmpel.—w18.04, pág. 13-14.