1. Ki motibu nos tin pa ta kontentu?

NOS ta keda masha kontentu ora nos mira kon e pueblo di Yehova ta krese! Aña pasá, nos a kondusí mas ku 10.000.000 estudio di Beibel. Sin duda, esaki ta mustra ku e sirbidónan di Dios ta laga nan lus bria! I pensa riba e miónes di personanan interesá ku a asistí na nos Memorial. Nan a siña tokante e amor ku Dios a demostrá ora el a perkurá e reskate.—1 Huan 4:9.

2, 3. (a) Kiko no ta stroba nos di “bria komo kargadó di lus”? (b) Ki pregunta nos lo trata den e artíkulo akí?

² Testigunan di Yehova rònt mundu ta papia diferente idioma. Apesar di esei, nos tur ta uní, alabando nos Tata Yehova. (Rev. 7:9) Sin importá ki idioma nos ta papia òf unda nos ta biba, nos tur por bria “komo kargadó di lus den mundu.”—Flp. 2:15.

³ Nos sirbishi, nos union kristian i nos sentido di urgensia ta duna gloria na Yehova. Kon nos por laga nos lus bria den e tres áreanan akí? E artíkulo akí lo trata e pregunta ei.—Lesa Mateo 5:14-16.

4, 5. (a) Ademas di partisipá den sirbishi, kon mas nos por laga nos lus bria? (b) Kiko por ta e benefisionan di ser amigabel? (Wak e promé plachi.)

⁴ E artíkulo “Lus den Skuridat,” publiká den E Toren di Vigilansia na ingles di 1 di yüni 1925, a bisa ku durante e último dianan niun hende no por keda fiel na Señor a ménos ku e probechá di e oportunidat pa laga su lus bria. Despues e artíkulo a splika: “Un persona ta hasi esaki ora e ta prediká e bon notisia na tur hende i ta biba na armonia ku Yehova su normanan hustu.” Pues, ta bisto ku un manera ku nos ta laga nos lus bria ta di prediká e bon notisia i hasi disipel. (Mat. 28:19, 20) Ademas, nos por duna gloria na Yehova mediante nos kondukta. Personanan ku nos ta prediká na dje òf ku ta opservá nos ta mira kon nos ta komportá nos mes. Nos smail amigabel i saludo kaluroso ta bisa hopi tokante nos i e Dios ku nos ta sirbi.

⁵ Hesus a bisa su disipelnan: “Ora boso drenta un kas, kumindá e hendenan di kas.” (Mat. 10:12) Den e área kaminda Hesus i su apòstelnan tabata prediká, hende tabatin e kustumber di risibí hende deskonosí den nan kas. Awe na hopi pais, hende no tin e kustumber ei. Si bo ta positivo, amigabel i ta splika e doño di kas e motibu di bo bishita, bo por trankilis’é. Hopi bes, e mihó introdukshon ta un smail agradabel. Esei ta e kaso tambe ora di prediká den áreanan públiko usando stènt di literatura. Miéntras bo ta partisipá den e rasgo akí di sirbishi, kisas bo ta ripará ku hopi biaha hende ta reakshoná na un manera positivo ora nos kumindá nan ku un smail. Nan lo sinti nan mas kómodo pa tuma un publikashon i pa asta kòmbersá ku nos.

6. Kon un pareha kasá di edat a laga nan lus bria?

⁶ Na Inglatera, un pareha kasá di edat kasi no por bai di kas pa kas debí na problema ku salú. Pero, nan a haña un otro manera pa laga nan lus bria. Komo ku nan tabata biba serka di un skol, nan a pone un mesa ku algun publikashon basá riba Beibel nèt pafó di nan kas. Di e manera ei, nan por hala atenshon di e mayornan ku ta bin buska nan yunan for di skol. Vários mayor a mustra interes den algun foyeto i den e dos bukinan Los jóvenes preguntan. Un ruman muhé pionero di nan kongregashon tambe a djòin nan. E ruman su manera amigabel i e pareha su interes sinsero a motivá un di e mayornan pa aseptá un estudio di Beibel.

7. Kiko abo por hasi pa yuda e refugiadonan den bo área?

⁷ Den último añanan, hopi pais a haña nan ku un gran kantidat di refugiado. Kiko abo por hasi pa yuda e refugiadonan den bo área konosé Yehova i su propósito? Na promé lugá, purba di siña kon pa kumindá nan na nan idioma. JW Language app por yuda bo hasi esei. Ademas, purba di siña algun frase ku por lanta nan interes. Despues, bo por mustra nan jw.org i e variedat di vidio i publikashon ku ta disponibel na nan idioma.—Deu. 10:19.

8, 9. (a) Ki yudansa práktiko nos ta haña na nos reunion di den siman? (b) Kon mayornan por yuda nan yunan partisipá na reunion?

⁸ Yehova ta perkurá e Reunion Nos Bida i Sirbishi Kristian pa nos por ta mas efikas den sirbishi. E instrukshonnan práktiko ku nos ta haña durante e reunion  akí ta duna hopi di nos mas konfiansa pa hasi rebishita i dirigí estudio di Beibel.

⁹ Asta muchanan por laga nan lus bria. Nan komentarionan na reunion hopi bes ta impreshoná hende ku ta bishitá nos. P’esei mayornan, siña boso yunan kon pa duna komentario ku nan mes palabra. A yega di sosodé ku un kontesta simpel i sinsero di un mucha a yuda hende nobo rekonosé ku nos tin e bèrdat.—1 Kor. 14:25.

10. Kon bo por promové union den bo famia?

¹⁰ Un otro manera ku bo por laga bo lus bria ta di promové union den bo famia i den kongregashon. Mayornan por hasi esaki mediante un programa regular di Adorashon Komo Famia. Hopi famia ta wak JW Broadcasting i despues ta tuma tempu pa kòmbersá tokante kon pa apliká loke nan a siña. Ora di tene Adorashon Komo Famia, e mayor mester kòrda ku e guia ku un mucha chikitu mester ta diferente for di loke un tiner tin mester. P’esei, hasi sigur ku e informashon ku ta ser tratá ta benefisiá tur miembro di famia.—Sal. 148:12, 13.

11-13. Kon nos tur por promové union den kongregashon i yuda otro hende laga nan lus bria?

¹¹ Kon hóbennan por promové union den kongregashon i animá otro hende pa laga nan lus bria? Hóben, bo por pone meta pa mustra interes den e rumannan di edat. Lo bo por pidi nan pa konta bo eksperensia di nan añanan di sirbishi na Yehova. Esaki lo animá bo mashá i boso tur lo ta mas motivá pa laga boso lus bria. I nos tur mester hasi esfuerso pa duna un kaluroso bonbiní na tur hende ku asistí na nos reunionnan na Salòn di Reino. Ademas, bo por kumindá e bishitantenan ku un smail amigabel i podisé asta yuda nan haña un lugá di sinta. Laga nan sera konosí ku otro hende pa nan por sinti nan na kas.

¹² Si bo tin ku dirigí e reunion pa sirbishi di vèlt, kon bo por yuda e rumannan di edat laga nan lus bria? Bo por hasi  sigur ku e rumannan akí ta haña un teritorio ku nan kondishon físiko ta permití nan traha aden. Ademas, bo por laga nan traha ku un publikadó mas yòn ku por yuda nan. Un otro kos ku bo por hasi ta mustra komprenshon pa rumannan ku no por hasi hopi debí na nan salú òf sirkunstansia. Sea bondadoso i mustra ku bo ta stima bo rumannan. Di e manera ei, tur hende den kongregashon—sin importá nan edat òf kuantu tempu nan tin den e bèrdat—lo sinti nan motivá pa prediká e bon notisia ku zelo.—Lev. 19:32.

¹³ E israelitanan tabata gusta adorá Yehova huntu. P’esei, un salmista a bisa: “Ki bon i ki dushi ta pa rumannan biba huntu den armonia!” (Lesa Salmo 133:1, 2.) El a kompará e union akí ku zeta di ungimentu ku tabata algu agradabel i refreskante. Na moda di papia, nos tambe por ta refreskante i agradabel pa nos rumannan i asina fortalesé e union den nos kongregashon. Si bo ta hasi esaki kaba, nos ta elogiá bo pa esei. Awor, bo por hancha bo kurason mas ainda pa bo rumannan?—2 Kor. 6:11-13.

14. Kiko bo por hasi pa laga bo lus bria den bo bario?

¹⁴ Kiko bo por hasi pa laga e lus di e bèrdat bria den bo bario? Bo palabranan i echonan bondadoso por atraé bo bisiña na e bèrdat. Puntra bo mes: ‘Kiko mi bisiñanan ta pensa di mi? Mi kas i mi kurá ta limpi i ta duna un bon impreshon? Mi ta tuma inisiativa pa yuda otro hende?’ Ora bo ta kòmbersá ku otro Testigu, pakiko no puntra nan kon nan bondat i bon kondukta a influensiá nan famia, bisiña, kolega di trabou òf kompañero di skol? Bo tin hopi chèns di tende bon eksperensia.—Efe. 5:9.

15. Dikon ta importante pa nos keda vigilá?

¹⁵ Pa nos lus sigui bria kla, nos mester ta konsiente di e tempu ku nos ta bibando aden. Bes tras bes, Hesus a urgi su disipelnan pa “keda vigilá.” (Mat. 24:42; 25:13; 26:41) Pero, si nos ta pensa ku e “tribulashon grandi” ta leu òf ku lo e no bini den nos tempu, nos lo no sinti ku e trabou di prediká ta urgente. (Mat. 24:21) E ora ei, en bes di nos lus keda bria kla, e por kuminsá bira dòf i asta paga.

16, 17. Kiko bo por hasi pa keda vigilá?

¹⁶ Segun ku e mundu akí ta bira pió, nos tur mester keda vigilá. Ademas, nos tin e siguransa ku Yehova lo intervení na e momento korekto. (Mat. 24:42-44) Mientrastantu, laga nos tene pasenshi, keda vigilá mas ku nunka, lesa e Palabra di Dios tur dia i no neglishá orashon. (1 Ped. 4:7) Nos por siña for di e ekselente ehèmpelnan di rumannan fiel ku ta keda vigilá ku goso miéntras nan ta laga nan lus bria. Por ehèmpel, nos por lesa e historia di bida di Leonard Smith ku a ser publiká den La Atalaya di 15 di aprel 2012, página 18-21.

¹⁷ Keda okupá den e sirbishi di Yehova i usa bo tempu pa yuda bo rumannan. Esei lo duna bo goso i lo bo sinti komo si fuera tempu ta pasa masha lihé. (Efe. 5:16) Un shen aña pasá, e sirbidónan di Yehova a logra hopi. Pero awe, nos ta logrando muchu mas. E obra di Yehova a krese na un manera masha impreshonante. Sí, nos lus ta briando mas kla ku nunka!

18, 19. Kon ansianonan por yuda nos keda vigilá? Duna un ehèmpel.

¹⁸ Aunke ku nos ta imperfekto, Yehova ta permití nos sirbié. P’esei, mustra  apresio pa e ‘regalonan den forma di hende,’ esta, e ansianonan den kongregashon, ku Yehova ta perkurá. (Lesa Efesionan 4:8, 11, 12.) Pues, e siguiente biaha ku un ansiano bishitá bo, probechá di e oportunidat pa bo benefisiá di su konsehonan sabí.

¹⁹ Na Inglatera, un pareha kasá ku tabatin problema a pidi yudansa di ansiano. E esposa tabata sinti ku su esposo no tabata asumí su responsabilidat komo kabes di famia den sentido spiritual. E esposo a atmití ku e no tabata e mihó maestro i ku e no tabatin Adorashon Komo Famia riba un base regular. E dos ansianonan a hala e pareha su atenshon na e ehèmpel di Hesus: El a kuida su disipelnan i a tene kuenta ku nan nesesidatnan. E ansianonan a urgi e esposo pa imitá Hesus i a animá e esposa pa tene pasenshi meskos ku Hesus. Ademas, nan a duna e pareha algun sugerensia práktiko pa yuda nan kooperá ku otro pa hasi Adorashon Komo Famia ku nan dos yunan. (Efe. 5:21-29) Mas despues, e ansianonan a elogiá e esposo pa e esfuerso ku el a hasi pa bira un mihó kabes di famia. Nan a anim’é pa perseverá i pa semper dependé riba spiritu santu. E ansianonan su amor i apoyo a yuda e famia akí laga nan lus bria.

20. Kiko nos por ferwagt ora nos ta laga nos lus bria?

²⁰ Un salmista a kanta: “Bendishoná ta tur esnan ku ta teme SEÑOR, ku ta kana den Su kamindanan.” (Sal. 128:1) Ora nos ta laga nos lus bria, nos ta sinti nos muchu mas felis. P’esei, laga nos sigui yuda otro hende sirbi Dios, sigui hasi esfuerso pa promové union i keda vigilá. Otro hende lo mira nos bon obranan i hopi di nan lo sinti nan motivá pa duna gloria na nos Tata.—Mat. 5:16.