1-2. Dikon Hesus tabata sintié hopi anshá?

TABATA Hesus su último dia komo hende, i e tabata sintié hopi anshá. Dikon? E tabata sa ku pronto lo e kai den man di hende malbado ku lo tortur’é i mat’é. Pero no ta esei so a preokupá Hesus. E tabata stima su Tata i kier a agrad’é. Hesus tabata sa ku si el a keda fiel bou di e prueba difísil ku tabata sper’é, lo el a yuda vindiká òf defendé e nòmber di Dios. Ademas, Hesus tabata stima hende, i e tabata sa ku nos lo tin e speransa pa biba pa semper solamente si el a keda fiel na Yehova te na morto.

² Aunke e anochi ei Hesus tabata bou di hopi strès, e tabatin pas mental. El a bisa su apòstelnan: “Mi ta duna boso mi pas.” (Huan 14:27) E tabatin “e pas di Dios,” esta, e trankilidat ku solamente un amigu di Yehova por tin. E pas ei a yuda Hesus sintié mas trankil.—Flp. 4:6, 7.

3. Kiko nos lo analisá den e artíkulo akí?

³ Niun di nos hamas lo haña nos ku e mesun tipo di preshon ku Hesus tabatin, pero tur su siguidónan lo haña nan ku prueba. (Mat. 16:24, 25; Huan 15:20) I meskos ku Hesus, tin biaha nos por sinti nos hopi anshá. Kon nos por evitá ku ansiedat ta dominá nos i kita nos pas mental? Laga nos analisá tres kos ku Hesus a hasi durante su sirbishi riba tera i kon nos por imit’é ora nos ta bou di prueba.

4. Ku 1 Tesalonisensenan 5:17 na mente, duna algun ehèmpel ku ta mustra ku Hesus a hasi hopi orashon durante su último dia komo hende.

⁴ Lesa 1 Tesalonisensenan 5:17. Hesus a hasi orashon na vários okashon durante su último dia komo hende. Ora ku el a mustra su disipelnan kon pa konmemorá su morto, el a hasi orashon pa e pan ku e biña. (1 Kor. 11:23-25) El a hasi orashon tambe promé ku nan a sali for di e lugá ku nan a selebrá Pasku Hudiu. (Huan 17:1-26) Ora Hesus i su disipelnan a yega Getsémani e anochi ei, el a hasi orashon bes tras bes. (Mat. 26:36-39, 42, 44) I su último palabranan promé ku el a muri tabata un orashon. (Luk. 23:46) Sí, Hesus a hasi orashon na Yehova tokante delaster un kos ku a pasa durante e último dia di su bida komo hende.

5. Dikon e apòstelnan no a demostrá kurashi?

⁵ Un motibu dikon Hesus por a perseverá tabata pasobra el a sigui hasi orashon na su Tata i pidié yudansa. Di otro banda, e apòstelnan no a sigui hasi orashon. Komo resultado, nan no a demostrá kurashi ora nan a haña nan ku prueba. (Mat. 26:40, 41, 43, 45, 56) Kiko esei ta siña nos? Ora nos ta bou di prueba, nos por keda fiel solamente si nos imitá Hesus i “hasi orashon konstantemente.” Pero kiko nos por pidi den orashon?

6. Kon fe por yuda nos mantené nos pas mental?

⁶ Nos por pidi Yehova “duna nos mas fe.” (Luk. 17:5; Huan 14:1) Nos mester di fe pasobra Satanas lo pone tur siguidó di  Hesus na prueba. (Luk. 22:31) Kon fe por yuda nos mantené nos pas mental ora nos tin ku enfrentá un problema tras di otro? Unabes ku nos a hasi tur loke nos por pa trata ku e problema, fe den Yehova lo yuda nos laga e asuntu den su man. Nos ta konfia ku e por atendé e asuntu mihó ku nos i esei ta duna nos pas mental.—1 Ped. 5:6, 7.

7. Kiko bo a siña for di e ehèmpel di Robert?

⁷ Orashon por yuda nos mantené nos pas mental sin importá ki prueba nos tin ku enfrentá. Laga nos wak e ehèmpel di Robert, un ansiano fiel ku tin mas ku 80 aña. El a bisa: “E konseho ku tin na Filipensenan 4:6 i 7 a yuda mi ku hopi prueba den mi bida. Mi tabatin problema finansiero. I pa un tempu, mi a pèrdè e privilegio di sirbi komo ansiano.” Kiko a yuda Robert mantené su pas mental? El a bisa: “Asina mi kuminsá sinti mi anshá, mi ta hasi orashon. Mi ta sinti ku mas mi hasi orashon i mas ferviente nan ta, mas pas mental mi tin.”

8. Segun Huan 8:29, kiko ta un otro motibu dikon Hesus tabatin pas mental?

⁸ Lesa Huan 8:29. Asta ora nan tabata persiguí Hesus, e tabatin pas mental pasobra e tabata sa ku e tabata hasi su Tata felis. Semper e tabata obediente asta bou di sirkunstansia difísil. Hesus a stima su Tata i henter su bida tabata drei rònt di sirbi Yehova. Promé ku Hesus a bini na tera, e tabata Dios su “trahadó  eksperto.” (Pro. 8:30) Miéntras ku e tabata riba tera, el a probechá di tur oportunidat pa siña hende tokante su Tata. (Mat. 6:9; Huan 5:17) E trabou ei a laga Hesus sintié masha felis.—Huan 4:34-36.

9. Dikon nos ta mantené nos pas mental ora nos ta dediká nos mes na e trabou di prediká?

⁹ Nos por imitá Hesus ora nos ta obedesé Yehova i ta hasi hopi “den e trabou di Señor.” (1 Kor. 15:58) Un kristian ku ta “dediká su mes kompletamente” na e trabou di prediká ta mira su problemanan ku un bista mas positivo. (Echo. 18:5) Por ehèmpel, hende ku nos ta haña den sirbishi sa tin problema pió ku esnan di nos. Pero, ora nan siña stima Yehova i pone su konsehonan na práktika, nan bida ta mehorá i nan ta mas felis. Kada bes ku nos mira esei pasa, nos ta sinti nos mas sigur ku Yehova lo kuida nos. E konfiansa ei ta yuda nos mantené nos pas mental. Esei ta loke un ruman muhé a ripará. Henter su bida el a lucha ku depreshon i e tabata sinti ku e no ta bal nada. El a bisa: “Ora mi ta okupá den sirbishi, mi ta sinti ku mi por dominá mi emoshonnan mihó i mi ta sinti mi kontentu. Mi ta kere esei ta pasobra ora mi ta den sirbishi, mi ta sinti mi mas serka Yehova.”

10. Kiko bo a siña for di Brenda su ehèmpel?

¹⁰ Laga nos wak e ehèmpel di un ruman ku yama Brenda. Tantu e komo su yu muhé ta sufri di múltiple sklerósis. Brenda ta den ròlstul i no tin hopi forsa. Ora e por, e ta prediká di kas pa kas. Pero mayoria di biaha e ta prediká via karta. El a bisa: “Unabes mi a realisá i aseptá ku lo mi no kura den e sistema akí, mi por a konsentrá kompletamente riba mi sirbishi. De echo, ora mi ta prediká mi no ta kòrda mes riba mi preokupashonnan. Sirbishi ta obligá mi pensa riba hende ku mi ta topa den teritorio. Ademas, e ta laga mi kòrda riba mi speransa den futuro.”

11-13. (a) Kon e apòstelnan i otro disipelnan a demostrá di ta berdadero amigu di Hesus? (b) Kon Hesus a sinti di e yudansa ku el a haña di su amigunan?

¹¹ Durante Hesus su sirbishi, el a pasa den vários situashon difísil. Pero e fiel apòstelnan a demostrá di ta berdadero amigu, manera e amigu ku Proverbionan 18:24 ta deskribí. Ei e ta bisa: “Tin un amigu ku ta mas pegá ku un ruman.” Hesus a balorá su amigunan mashá. Durante su sirbishi, niun di su rumannan karnal a pone fe den dje. (Huan 7:3-5) Na dado momento su famianan asta a pensa ku el a bira di kabes. (Mar. 3:21) Pero su fiel apòstelnan tabata diferente. Riba e anochi promé ku Hesus a muri, el a bisa nan: “Boso ta esnan ku a keda huntu ku mi durante mi pruebanan.”—Luk. 22:28.

¹² Ta bèrdat ku, tin biaha, e apòstelnan a desapuntá Hesus. Pero e no a konsentrá riba nan erornan, sino riba e echo ku nan tabatin fe den dje. (Mat. 26:40; Mar. 10:13, 14; Huan 6:66-69) E anochi promé ku el a muri, el a bisa e hòmbernan fiel ei: “Mi a yama boso amigu, pasobra mi a laga boso sa tur kos ku mi a tende di mi Tata.” (Huan 15:15) No tin duda ku Hesus su amigunan tabata un fuente di animashon p’e. E yudansa ku nan a dun’é durante su sirbishi a yen’é ku goso.—Luk. 10:17, 21.

¹³ E apòstelnan no tabata e úniko amigunan di Hesus. Tabatin hopi hende  hòmber i muhé ku a yud’é den e trabou di prediká. Nan a yud’é den otro manera tambe; algun a invit’é bin kome. (Luk. 10:38-42; Huan 12:1, 2) Otronan a biaha kuné i a kompartí loke nan tabatin kuné. (Luk. 8:3) Hesus tabatin bon amigu pasobra e mes tabata un bon amigu. El a trata su amigunan bon i no tabata eksigí hopi di nan. Aunke Hesus tabata perfekto, el a apresiá e yudansa ku su amigunan imperfekto tabata dun’é. I no tin duda ku nan a yud’é mantené su pas mental.

14-15. Kon nos por tin bon amigu, i kon nan por yuda nos?

¹⁴ Bon amigu lo yuda nos keda leal na Yehova. E mihó manera ku nos por haña bon amigu ta si nos mes ta un bon amigu. (Mat. 7:12) Por ehèmpel, Beibel ta bisa nos pa duna di nos tempu i energia pa yuda otro hende, foral esnan “ku ta den nesesidat.” (Efe. 4:28) Tin un ruman den bo kongregashon ku bo por yuda? Por ehèmpel, lo bo por hasi kompra pa un ruman ku no por sali for di kas? Òf kisas bo por hiba kuminda pa un famia ku tin problema finansiero? Abo sa kon pa usa e website jw.org^® i JW Library^® app? Si ta asina, lo bo por yuda otro ruman den bo kongregashon i siña nan kon pa usa nan? Ora nos ta hasi esfuerso pa yuda otro hende, chèns ta grandi ku nos lo sinti nos felis.—Echo. 20:35.

¹⁵ Nos amigunan lo ta na nos banda ora nos tin difikultat i nan lo yuda nos mantené nos pas mental. Ora Yòb a papia tokante su problemanan, Eliú a skuch’é ku  pasenshi. Nos amigunan lo hasi meskos ora nos ta papia ku nan tokante nos preokupashonnan. (Yòb 32:4) Nos no mester spera ku nan lo tuma desishon pa nos, pero lo ta sabí di nos parti pa skucha nan konseho basá riba Beibel. (Pro. 15:22) Ademas, si nos amigunan ofresé nos yudansa ora nos ta den nesesidat, nos no mester ta orguyoso. Nos mester hasi meskos ku Rei David. E tabata humilde i a aseptá yudansa di su amigunan. (2 Sam. 17:27-29) Sin duda, amigunan asina ta un regalo di Yehova.—Sant. 1:17.

16. Segun Filipensenan 4:6 i 7, kon nos por haña pas mental? Splika.

¹⁶ Lesa Filipensenan 4:6, 7. Dikon Yehova ta bisa ku ta “pa medio di Kristu Hesus” nos por haña pas mental? Pasobra si nos ke mantené nos pas mental, nos mester komprondé e ròl di Hesus den Dios su propósito i pone fe den esei. Por ehèmpel, ora nos sa ku ta pa medio di e reskate di Hesus nos ta haña pordon pa nos pikánan, nos ta haña alivio. (1 Huan 2:12) Di otro banda, ora nos sa ku Hesus ta e Rei di e Reino di Dios i ku lo e bai drecha tur e daño ku Satanas i su mundu a kousa, esei ta duna nos speransa. (Isa. 65:17; 1 Huan 3:8; Rev. 21:3, 4) Ademas, ora nos sa ku Hesus ta na nos banda i ta yuda nos den e trabou difísil ku el a enkargá nos pa e último dianan, nos ta haña kurashi. (Mat. 28:19, 20) Pues, alivio, speransa i kurashi ta masha importante pa nos mantené nos pas mental.

17. (a) Kiko nos tin ku hasi pa mantené nos pas mental? (b) Segun Huan 16:33, kiko nos por hasi?

¹⁷ Pues, kiko abo por hasi pa mantené bo pas mental ora bo ta enfrentá vários difikultat? Hasi meskos ku Hesus. Promé, resa; no stòp di hasi orashon. Di dos, obedesé Yehova i dediká bo mes na e trabou di prediká, asta den sirkunstansia difísil. Di tres, aseptá yudansa di bo amigunan. Si bo hasi esei, e ora ei e pas di Dios lo protehá bo kurason i mente. I meskos ku Hesus, lo bo vense kualke prueba.—Lesa Huan 16:33.