1-2. Kiko Hesus tabata ke men ora el a bisa e palabranan na Huan 4:35 i 36?

DURANTE un biahe, Hesus a pasa den un kunuku; probablemente di puspas bèrdè. (Huan 4:3-6) Tabata falta kuater luna pa kosecha. Djei, Hesus a bisa algu ku por a zona straño: “Hisa boso kara wak e kunukunan; nan ta kla pa kosechá.” (Lesa Huan 4:35, 36.) Kiko e tabata ke men?

² Aparentemente Hesus no tabata papia di un kosecha literal, sino di un kosecha di hende. Wak kiko a pasa un ratu promé. Aunke hudiu normalmente no sa atendé ku samaritano, Hesus a prediká na un muhé samaritano; i el a skucha! De echo, miéntras ku Hesus tabata bisa ku e kunukunan tabata “kla pa kosechá,” un grupo grandi di samaritano ku a skucha e señora papia di Hesus tabata bini serka dje pa siña mas. (Huan 4:9, 39-42) Un eksperto riba tereno di Beibel a bisa: “E bon disposishon di e hendenan ei . . . a demostrá ku nan tabata meskos ku grano ku ta kla pa kosechá.”

3. Si bo ta mira hende meskos ku Hesus a mira nan, ki tres kos lo pasa ku bo predikashon?

³ Awor, kiko di e hendenan den bo teritorio? Bo ta mira nan meskos ku grano ku ta kla pa kosechá? Si ta asina, tres kos lo pasa. Promé, lo bo prediká ku mas urgensia. Temporada di kosecha ta kòrtiku, pues no tin tempu pa  pèrdè. Di dos, lo bo ta kontentu ora bo mira hende aseptá e bon notisia. Beibel ta bisa: “Hende sa ta kontentu den tempu di kosecha.” (Isa. 9:3) Di tres, lo bo mira kada hende komo posibel disipel, p’esei lo bo adaptá bo presentashon na loke ta interesá nan.

4. Kiko nos lo siña for di Pablo den e artíkulo akí?

⁴ Algun di Hesus su siguidónan kisas a pensa ku e samaritanonan tabata kaso pèrdí. Pero, Hesus sí no a pensa asina; el a mira nan komo posibel disipel. Ta asina nos mester mira hende den nos teritorio. Apòstel Pablo a pone un bon ehèmpel pa nos. Kiko nos por siña for di dje? Den e artíkulo akí, nos lo analisá tres kos: (1) Pablo tabata sa kiko ta kreensia di e hendenan ku el a prediká na dje, (2) el a saka afó loke tabata interesá nan i (3) el a mira nan komo posibel disipel di Hesus.

5. Dikon Pablo por a komprondé su oyentenan den snoa?

⁵ Hopi biaha Pablo a prediká den snoa hudiu. Por ehèmpel, den esun na Tesalónika, “durante tres sabat tras di otro el a usa e Skritura pa rasoná ku [e hudiunan].” (Echo. 17:1, 2) Probablemente el a sintié kómodo den snoa. El a lanta komo hudiu. (Echo. 26:4, 5) Pablo por a komprondé e hudiunan bon, i p’esei e por a papia ku nan ku konfiansa.—Flp. 3:4, 5.

6. Ki diferensia tabatin entre Pablo su oyentenan den snoa i esnan riba e plasa na Aténas?

⁶ Despues ku Pablo a hui pa opositor na Tesalónika i despues na Berea, el a bai Aténas. Un bes mas, “el a kuminsá rasoná den snoa ku e hudiunan i ku e otro hendenan temeroso di Dios.” (Echo. 17:17) Pero ora el a prediká riba plasa, e tabatin otro tipo di oyente. Entre nan tabatin filósofo i hende no-hudiu. Pa nan, Pablo su mensahe tabata un “siñansa nobo.” Nan a bis’é: “Bo ta bini ku algun kos ku ta zona straño den nos orea.”—Echo. 17:18-20.

7. Segun Echonan 17:22 i 23, kon Pablo a adaptá su presentashon?

⁷ Lesa Echonan 17:22, 23. Pablo no a prediká na e hendenan no-hudiu na Aténas na e mesun manera ku el a prediká na e hudiunan den snoa. Probablemente el a puntra su mes: ‘Kiko e hendenan na  Aténas ta kere aden?’ El a tuma tempu pa opservá bon loke tin rònt di dje i a ripará kiko tabata kustumber religioso di e hendenan. Despues, el a buska un base komun entre nan kreensia i e bèrdat den e Skritura. Un komentarista di Beibel a bisa: “Komo un hudiu kristian, [Pablo] a realisá ku e griegonan pagano no a adorá e Dios ‘berdadero’ di e hudiu- i kristiannan. Pero, el a purba di demostrá ku e Dios ku e ta papia di dje en realidat no ta deskonosí pa hende di Aténas.” Pues, Pablo tabata dispuesto pa adaptá su presentashon. El a bisa e hendenan di Aténas ku su mensahe tabata di e “Dios Deskonosí,” ku nan tabata purba di adorá. Aunke e hendenan no-hudiu no tabata konosé e Skritura, Pablo no a pèrdè speransa den nan. Al kontrario, el a mira nan meskos ku grano ku ta kla pa kosechá i a adaptá su presentashon di e bon notisia.

8. (a) Kiko por yuda bo haña sa loke hende den bo teritorio ta kere aden? (b) Kiko bo por bisa un hende ku bisa bo ku e tin su mes religion?

⁸ Meskos ku Pablo, opservá bon. Buska detaye ku por yuda bo haña sa loke hende den bo teritorio ta kere aden. Por ehèmpel, bo ta mira algu na su kas òf outo ku por yuda bo haña sa ki religion e persona ta? Su nòmber, manera di bisti òf asta vokabulario ta indiká di ki religion e ta? Kisas e mes a bisa bo ku e tin su religion. Ora esei pasa ku un pionero spesial, e ta bisa: “Mi no a bini pa fòrsa bo aseptá mi kreensianan. Mi ke djis papia ku bo tokante . . . ”

9. Ki base komun bo por haña ku un hende religioso?

⁹ Tokante kiko bo por papia ku un hende religioso? Purba di buska un base komun. Kisas e ta adorá un Dios so, e ta rekonosé ku Hesus ta e Salbador di humanidat òf e ta kere ku e maldat ku nos ta mira awendia pronto lo kaba. Usa e kosnan ku boso tin en komun pa kompartí e mensahe di Beibel kuné na un manera ku lo interes’é.

10. Kiko bo mester purba di hasi, i dikon?

¹⁰ Tene kuenta ku un hende kisas no ta kere tur kos ku su religion ta siñ’é. Pues, unabes bo sa na ki religion e ta pertenesé, purba di haña sa loke e ta kere aden. David, un pionero spesial na Australia, a bisa: “Awendia hopi hende ta meskla religion ku filosofia.” Un ruman na Albania a bisa: “Algun hende ta bisa ku nan tin nan religion, pero despues nan ta atmití  ku nan no ta kere den Dios.” Anto, un misionero na Argentina a ripará ku tin hende ta bisa ku nan ta kere den Trinidat, pero en realidat no ta kere ku e Tata, e Yu i spiritu santu ta un Dios. El a bisa: “Si bo sa esei, ta mas fásil pa bo haña un base komun ku e hende.” Pues, purba di haña sa kiko realmente e ta kere aden. E ora ei, meskos ku Pablo, bo por “bira tur kos pa tur sorto di hende.”—1 Kor. 9:19-23.

11. Segun Echonan 14:14-17, kon Pablo a kompartí su mensahe na un manera ku tabata interesá e hendenan na Listra?

¹¹ Lesa Echonan 14:14-17. Pablo a saka afó loke tabata interesá su oyentenan i a adaptá su presentashon. Por ehèmpel, e grupo di hende na Listra tabatin tiki òf niun konosementu di e Skritura. Pues, Pablo a papia di kos ku nan tabata konosé, manera bon kosecha i e abilidat i kapasidat di disfrutá di bida. El a usa palabra i ehèmpel fásil pa komprondé.

12. Kon bo por saka afó loke ta interesá un hende i adaptá bo presentashon?

¹² Purba di saka afó loke ta interesá hende den bo teritorio i adaptá bo presentashon. Kon bo por haña sa loke ta interesá un hende segun ku bo ta aserká su kas? Un biaha mas, opservá bon. Kisas e ta traha den kurá, ta lesa un buki, ta drecha outo òf ta hasi algu otro. Si ta apropiá, usa loke e ta hasi pa kuminsá un kòmbersashon. (Huan 4:7) Asta un hende su paña por bisa bo algu tokante dje: kisas su nashonalidat, profeshon òf su tim faborito. Gustavo a bisa: “Mi a kuminsá kòmbersá ku un hóben di 19 aña ku tabatin un kantante famoso riba su flanèl. Mi a puntr’é algu tokante su flanèl, i el a bisa mi dikon e gusta e kantante. E kòmbersashon a hiba na un estudio di Beibel, i awor e ta un di nos rumannan.”

13. Kon bo por ofresé estudio di Beibel na un manera ku ta interesá otro hende?

 ¹³ Ora nos ofresé un hende pa studia Beibel kuné, hasi e estudio interesante; mustr’é kon e estudio lo benefisi’é. (Huan 4:13-15) Por ehèmpel, un señora ku a mustra interes a laga un ruman ku yama Poppy pasa paden. Na muraya Poppy a mira un diploma ku a mustra ku e señora a studia edukashon. Poppy a enfatisá ku nos tambe ta eduká hende pa medio di nos kursonan di Beibel i nos reunionnan. E señora a aseptá un estudio, bai reunion e siguiente dia i a asistí na un asamblea di sirkuito djis despues. Un aña despues, el a batisá. Puntra bo mes: ‘Den kiko mi rebishitanan ta interesá? Kon mi por ofresé un estudio di Beibel na un manera ku lo interesá nan?’

14. Kon bo por adaptá un estudio di Beibel na kada studiante?

¹⁴ Despues ku bo kuminsá un estudio di Beibel, prepará bon pa kada seshon. Tene kuenta ku sirkunstansia di e studiante i loke ta interes’é. Skohe ki teksto lo bo lesa, ki vidio lo bo pasa i ki ilustrashon lo bo usa. Puntra bo mes: ‘Kiko lo interesá e studiante akí mas i lo yega na su kurason?’ (Pro. 16:23) Na Albania, un pionero ku yama Flora tabatin un studiante ku a bis’é bon kla: “Mi no por aseptá e siñansa di resurekshon.” Flora no a insistí riba e asuntu. El a bisa: “Mi a pensa ku promé e mester konosé e Dios ku a primintí resurekshon.” Djei padilanti, na kada seshon di estudio, Flora tabata resaltá Yehova su amor, sabiduria i poder. Ku tempu, e studiante a kuminsá pone fe den e resurekshon. Awor e ta un Testigu di Yehova zeloso.

15. Segun Echonan 17:16-18, kiko e habitantenan di Aténas tabata hasi ku a molestiá Pablo, pero dikon el a sigui prediká na nan?

¹⁵ Lesa Echonan 17:16-18. Aténas tabata un stat yen di idolatria, inmoralidat seksual i filosofia pagano. Asina mes, Pablo a sigui prediká na e hendenan di e stat ei i no a laga nan insulto desanim’é. El a kòrda ku e mes a bira un kristian aunke un tempu e tabata “un blasfemadó, un persiguidó i un hòmber arogante i ònbeskòp.” (1 Tim. 1:13) Meskos ku Hesus a mira Pablo komo un posibel disipel, asina Pablo a mira e hendenan di Aténas. I Pablo no a keda desapuntá.—Echo. 9:13-15; 17:34.

16-17. Kiko ta mustra ku tur sorto di hende por bira disipel di Kristu? Duna un ehèmpel.

¹⁶ Den promé siglo, tur sorto di hende a bira disipel di Hesus. Ora Pablo a skirbi e kristiannan ku tabata biba den e stat griego di Korinto, el a bisa ku algun di nan den pasado tabata kriminal òf a hiba un bida skandaloso. Anto kaba el a agregá: “Pero Dios a hasi boso limpi.” (1 Kor. 6:9-11) Abo lo a pensa ku e hendenan ei lo por a kambia i bira disipel?

¹⁷ Awe, hopi hende ta dispuesto pa hasi e kambionan nesesario pa bira disipel di Hesus. Por ehèmpel, na Australia, un pionero spesial ku yama Yukina a bin komprondé ku tur sorto di hende por aseptá e mensahe di Beibel. Un dia, e tabata na un makelar i a mira un hóben tur na tatú. Yukina a bisa: “Pa un ratu mi a pensa: ‘papia kuné òf nò?’ Pero, ora mi a papia kuné, mi a haña sa ku e tin asina tantu interes den Beibel ku algun di su  tatúnan tabata saká for di Salmo!” E hóben a kuminsá studia i bai e reunionnan. *

18. Dikon nos no mester husga hende?

¹⁸ Akaso Hesus a bisa ku e kunukunan tabata kla pa kosechá pasobra el a ferwagt ku mayoria di hende lo siguié? Nò. E Skritura a profetisá ku masha tiki hende lo a “pone fe den dje.” (Huan 12:37, 38) I Hesus por lesa kurason. (Mat. 9:4) No opstante, el a prediká na tur hende, i el a enfoká riba esnan ku a kere den dje. Den nos kaso, komo ku nos no por lesa kurason, nos mester lucha kontra e tendensia di husga un teritorio òf un hende! Mas bien, mira hende komo posibel disipel. Marc, un misionero na Burkina Faso a bisa: “Hende ku mi a kere lo progresá, mayoria di biaha ta stòp di studia. Anto nèt esnan ku mi no a pensa, ta progresá bon. Pues, mi a siña ku ta mihó laga Yehova su spiritu guia nos.”

19. Kon nos mester mira hende den nos teritorio?

¹⁹ Kisas na promé instante no ta parse ku tin hopi hende den e teritorio ku ta meskos ku grano ku ta kla pa kosechá. Pero, kòrda riba loke Hesus a bisa su disipelnan. E kunukunan ta kla pa kosechá. Hende por kambia i bira disipel di Kristu. Pa Yehova nan ta algu deseabel. (Ageo 2:7) Si nos ta mira hende meskos ku Yehova i Hesus, nos lo purba di komprondé nan sirkunstansia i loke ta interesá nan. Nos lo no tin un punto di bista negativo di nan, ma nos lo mira nan komo posibel ruman.