1. Kiko nos tur mester hasi?

LO BO ke partisipá den un kareda ku bo sa ku ta difísil, spesialmente si bo ta malu òf kansá? Sigur ku nò. Sinembargo, Apòstel Pablo a bisa ku tur kristian berdadero ta den un kareda. (Heb. 12:1) Anto nos tur, sea ku nos ta hóben òf di edat, yen di energia òf kansá, mester perseverá te na fin si nos ke haña e premio ku Yehova ta ofresé nos.—Mat. 24:13.

2. Dikon Pablo por a duna e konseho na 2 Timoteo 4:7 i 8?

² Lesa 2 Timoteo 4:7, 8. Pablo por a duna e konseho ei pasobra el a “terminá e kareda” ku éksito. Pero, di ki tipo di kareda Pablo tabata papia di dje?

3. Di ki kareda Pablo tabata papia di dje?

³ Tin biaha Pablo tabata usa ehèmpel di e weganan ku tabatin na antiguo Gresia pa siña otro hende lès importante. (1 Kor. 9:25-27; 2 Tim. 2:5) Na vários okashon, el a kompará bida di un kristian ku un kareda. (1 Kor. 9:24; Flp. 2:16) Un hende ta drenta e “kareda” ei ora e dediká su mes na Yehova i batisá. (1 Ped. 3:21) E ta krusa e liña final ora Yehova dun’é e premio di bida eterno.—Mat. 25:31-34, 46; 2 Tim. 4:8.

4. Kiko nos lo analisá den e artíkulo akí?

⁴ Tin algun similaridat entre un kareda di distansia largu  i bida di un kristian. Nos lo analisá tres di nan. Promé, nos mester sigui e ruta korekto. Di dos, nos mester enfoká riba e liña final. I di tres, nos tin ku vense opstákulo ku nos ta haña nos kuné.

5. Ki ruta nos mester sigui, i dikon?

⁵ Pa e koredónan por gana e premio den un kareda literal, nan mester sigui e ruta ku e organisadónan a stipulá. Asina tambe, si nos ke gana e premio di bida eterno, nos mester sigui e manera di biba ku a ser stipulá pa kristian. (Echo. 20:24; 1 Ped. 2:21) Sinembargo, Satanas i esnan ku ta sigui su ehèmpel ke pa nos skohe un otro ruta; nan ke pa nos sigui nan manera di biba, òf kore huntu ku nan. (1 Ped. 4:4) Nan ta hasi chèrchi di nos manera di biba i ta bisa ku esun di nan ta mihó. Pero, esei no ta bèrdat!—2 Ped. 2:19.

6. Kiko bo ta siña for di e ehèmpel di Brian?

⁶ Si un hende ke kore riba e ruta influensiá pa e mundu di Satanas, pronto lo e deskubrí ku e ruta ei no ta hiba na libertat; mas bien na sklabitut. (Rom. 6:16) Wak e ehèmpel di Brian. Su mayornan a purba di siñ’é biba di akuerdo ku prinsipio bíbliko. Pero ora e tabata tiner, el a kuminsá duda si e bida ei lo a hasié felis. Pues, el a disidí di bai kore huntu ku hende ku tabata biba segun e normanan di Satanas. Brian a bisa: “Mi no a realisá mes ku e supuesto libertat ku mi a anhelá lo a hiba mi den gara di adikshon. . . . Ku tempu, mi a kuminsá usa droga i bebe di mas, i tambe mi a hiba un bida inmoral. Algun aña despues, mi a kuminsá ta eksperimentá ku droganan mas fuerte te ku mi a bira adikto na hopi di nan. . . . Mi a kuminsá ta bende droga pa mi por a sigui ku mi estilo di bida.” Ku tempu, Brian a disidí di biba segun Yehova su normanan. El a skohe e ruta korekto i a batisá na 2001. Awor e ta berdaderamente felis pasobra e ta biba manera un kristian. *

7. Segun Mateo 7:13 i 14, ki dos kaminda tin nos dilanti?

⁷ Ta masha importante pa nos skohe e kaminda korekto! Satanas ke pa nos stòp di kore riba e kaminda pèrtá ku ta “hiba na bida” i krusa bai riba e kaminda espasioso ku mayoria di hende den e mundu akí ta riba dje. E kaminda ei ta  popular i mas fásil pa kore ariba, pero e ta “hiba na destrukshon.” (Lesa Mateo 7:13, 14.) Si nos ke keda riba e kaminda korekto i no desviá, nos mester konfia den Yehova i skuch’é.

8. Kiko un koredó tin ku hasi si e trompeká?

⁸ E koredónan den un kareda di distansia largu ta keda wak nan dilanti pa nan no trompeká. Asina mes, un otro koredó òf un buraku den kaminda por pone nan trompeká. Si nan kai, nan ta lanta bèk i sigui kore. Nan no ta enfoká riba loke a pone nan trompeká, sino riba e liña final i e premio ku nan ke gana.

9. Kiko nos tin ku hasi si nos trompeká?

⁹ Den nos kareda, nos por trompeká hopi biaha, sea den loke nos ta bisa òf hasi. Òf un otro koredó por kometé un eror ku ta duel nos. Esei no mester sorprendé nos, pasobra nos tur ta imperfekto i ta kore riba e mesun kaminda pèrtá ku ta hiba na bida. Pues, ta lógiko ku ratu ratu nos ta “dal” den otro. Pablo a bisa ku tin biaha nos ta duna nos rumannan “motibu pa keha.” (Kol. 3:13) Pero, no enfoká riba loke a pone nos trompeká, sino riba e premio ku tin nos dilanti. Si nos trompeká, lanta ariba i sigui kore. No keda bentá ei bou tur amargá sin ke lanta bèk, pasobra asina nunka nos lo krusa e liña final i gana e premio. Ademas, nos por bira un opstákulo pa otro koredó ku sí ta purba di sigui kore riba e kaminda pèrtá ku ta hiba na bida.

10. Kon nos por evitá di bira “un piedra di trompeká òf un opstákulo” pa otro koredó?

¹⁰ Tin un otro manera ku nos por evitá di bira “un piedra di trompeká òf un opstákulo” pa otro koredó. Ki ora ku ta posibel nos mester sede i evitá di keda insistí riba nos derecho, esta, pa hasi kos na nos manera. (Rom. 14:13, 19-21; 1 Kor. 8:9, 13) Esei ta masha diferente for di loke ta pasa den kareda literal. Den e karedanan ei, e koredónan ta kompetí kontra otro i kada un ta hasi esfuerso  pa nan ta e ganadó. Nan ta pensa prinsipalmente riba nan mes. Pues, nan lo purba di pusha otro un banda pa asina nan bai dilanti. Kontrali na esei, nos no ta kompetí ku nos rumannan. (Gal. 5:26; 6:4) Nos meta ta pa yuda mas tantu hende posibel krusa e liña final i gana e premio di bida. P’esei, nos ta hasi esfuerso pa apliká e konseho inspirá di Pablo pa “no buska [nos] mes interes so, ma tambe interes di otro hende.”—Flp. 2:4.

11. Riba kiko un koredó mester enfoká, i dikon?

¹¹ Aparte ku e koredónan ta keda wak nan dilanti, nan ta enfoká tambe riba e liña final. Asta si nan no por mir’é ku nan wowo, nan ta imaginá nan mes ta krus’é i haña e premio. Esei ta laga nan keda motivá.

12. Kiko Yehova ta garantisá nos?

¹² Amorosamente Yehova ta garantisá tur su sirbidónan ku si nan kaba e kareda, nan lo gana un bunita premio: bida eterno den shelu òf den Paradeis riba tera. Beibel ta duna detaye di e premio ei, ya asina nos por imaginá kon maravioso nos bida lo ta. Mas bibu nos mantené e speransa ei, mas determiná nos lo ta pa perseverá den e kareda.

13. Ki bentaha nos tin riba koredó literal?

¹³ E koredónan den e weganan griego mester a vense opstákulo manera kansansio i doló. Pero, nan por a dependé solamente riba nan entrenamentu i nan mes forsa. Meskos ku nan, nos tambe ta risibí entrenamentu pa kore e kareda kristian. Pero, nos tin un bentaha: nos fuente di energia ta ilimitá, pasobra e ta bini for di Yehova. Si nos dependé riba djE, e ta primintí di entrená nos i hasi nos fuerte.—1 Ped. 5:10.

14. Kon 2 Korintionan 12:9 i 10 ta yuda nos trata ku opstákulo?

¹⁴ Pablo tabatin ku trata ku hopi opstákulo. Aparte ku hende a insult’é i persiguié, tabatin biaha ku el a sinti su mes débil i e mester a trata ku loke el a yama “un sumpiña den karni.” (2 Kor. 12:7) Pero, en bes di mira e opstákulonan ei komo un motibu pa stòp di sirbi Yehova, el a mira nan komo un oportunidat pa konfia riba Yehova. (Lesa 2 Korintionan 12:9, 10.) P’esei, Yehova semper a yud’é.

15. Kiko nos lo eksperensiá si nos imitá Pablo?

¹⁵ Nos tambe por haña nos ku insulto òf persekushon pa motibu di nos fe. Ademas, kisas nos tin ku trata ku problema di salú òf kansansio. Pero, si nos imitá Pablo, kada un di e opstákulonan ei por bira un oportunidat pa eksperensiá Yehova su amor i yudansa.

16. Asta si bo tin problema di salú, kiko bo por hasi?

¹⁶ Bo ta na kama òf den ròlstul? Bo tin problema ku rudia òf ku bista? Kisas bo ta puntra bo mes si bo por kore huntu ku esnan ku ta yòn i bon di salú. No duda den esei. Tin hopi koredó di edat i ku problema di salú ku ta partisipá den e kareda pa bida. Nan no ta hasi esei riba nan mes forsa, sino ku e forsa ku Yehova ta duna nan. Nan ta sigui e reunionnan via telefòn òf Internet. Nan ta prediká na dòkter, verpleegster i famia.

17. Kiko Yehova ta sinti pa e rumannan ku tin limitashon físiko?

¹⁷ Nunka laga limitashon físiko desanimá bo ni pone bo pensa ku bo no por  kore e kareda ku ta hiba na bida. Yehova ta stima bo pa e fe ku bo tin den dje i pa tur loke bo a hasi p’e durante e añanan. Bo mester di su yudansa awor mas ku nunka, i lo e no bandoná bo. (Sal. 9:10) Mas bien, lo e ta mas serka bo. Wak kiko un ruman ku tin problema serio ku salú a bisa: “Segun ku mi problemanan di salú ta bira pió, mi ta haña ménos oportunidat pa prediká. Pero, mi sa ku asta e tiki esfuerso ku mi ta hasi ta alegrá Yehova su kurason, i esei ta hasi mi felis.” Ora bo ta sinti bo desanimá, semper kòrda ku Yehova ta ku bo. Pensa riba e ehèmpel di Pablo i kòrda riba su palabranan di animashon: “Mi tin plaser den debilidat, . . . pasobra ora mi ta débil, e ora ei mi ta poderoso.”—2 Kor. 12:10.

18. Ki opstákulo difísil algun ruman tin ku trata kuné?

¹⁸ Algun di e rumannan ku ta kore riba e kaminda ku ta hiba na bida ta haña nan ku otro opstákulo. Nan ta lucha ku problema ku otro hende no ta mira i ku hopi biaha no ta komprondé, manera depreshon òf sintimentu di ansiedat ku ta dominá nan. Dikon e sirbidónan stimá ei di Yehova tiné asina difísil? Pasobra si bo tin un man kibrá òf si bo ta den ròlstul, tur hende por mira esei i ta sinti nan motivá pa yuda bo. Pero si bo tin problema emoshonal òf mental, kisas otro hende no ta mira esei. Ma e doló ta mes real ku si bo tin un man kibrá, pero mayoria di biaha bo no ta haña e mesun kompashon di otro hende.

19. Kiko nos ta siña for di e ehèmpel di Mefi-boset?

¹⁹ Si bo tin problema ku salú i ta sinti ku otro hende no ta komprondé bo situashon, e ehèmpel di Mefi-boset por animá bo. (2 Sam. 4:4) Aparte ku e tabatin problema físiko, Rei David a husg’é robes i a trat’é inhustu. No ta Mefi-boset su falta ku el a pasa den e kosnan ei, pero e no a bira negativo. Mas bien, el a balorá e kosnan positivo den su bida. E tabata gradisidu pa e amabilidat ku David a demostrá na dje den pasado. (2 Sam. 9:6-10) Pues, ora David a husg’é robes, el a skohe pa no rabia ni karga renkor. E no a permití e eror ku David a kometé pon’é bira amargá ni e no a kulpa Yehova pa loke David a hasi. Mefi-boset a enfoká riba apoyá e rei ku Yehova a nombra. (2 Sam. 16:1-4; 19:24-30) Yehova a laga skirbi e ekselente ehèmpel di Mefi-boset den Su Palabra pa nos siña for di dje.—Rom. 15:4.

20. Kon ansiedat ta afektá algun ruman, pero di kiko nan por tin sigur?

 ²⁰ Debí na ansiedat, algun ruman ta sinti nan mes masha nèrvioso i insigur ora nan ta rònt di otro hende. Kisas nan ta haña ku ta difísil pa nan ta den grupo grandi di hende pero tòg nan ta sigui asistí na reunion, asamblea i kongreso. Pa nan, ta difísil pa papia ku hende ku nan no konosé, pero tòg nan ta bai prediká. Si esei ta bo kaso, bo no ta so. Hopi ruman ta lucha ku e mesun problema. Kòrda ku Yehova ta kontentu ku e esfuerso ku bo ta hasi. E echo ku bo no a entregá ta demostrá ku Yehova ta bendishoná bo i ta duna bo e forsa ku bo mester. * (Flp. 4:6, 7; 1 Ped. 5:7) Si bo ta sirbi Yehova apesar di limitashon físiko òf emoshonal, bo por tin sigur ku bo ta hasi su kurason kontentu.

21. Kiko nos tur lo hasi ku Yehova su yudansa?

²¹ Manera nos a mira, tin diferensia entre kareda literal i esun ku Pablo tabata papia di dje. Den e karedanan di tempu bíbliko, un hende so tabata gana. En kambio, den e kareda kristian, tur hende ku perseverá fiel ta haña e premio di bida eterno. (Huan 3:16) I den kareda literal, tur koredó mester ta den bon kondishon; sino nan no por gana. Di otro banda, hopi di nos tin limitashon físiko, pero nos ta perseverá. (2 Kor. 4:16) Ku Yehova su yudansa, nos tur lo kore e kareda te na final!