1-2. Segun eksperensia di Angelito, kiko kada un di nos mester hasi?

BO MAYORNAN ta Testigu di Yehova? Si ta asina, kòrda ku amistat ku Yehova no ta algu ku bo ta heredá. Sea ku nos mayornan ta sirbi Dios òf nò, kada un di nos mester hasi esfuerso pa bira amigu di Yehova.

² Pensa riba e eksperensia di un ruman ku yama Angelito, kende a lanta den un famia Testigu. Tempu e tabata yòn, e no tabatin un amistat será ku Dios. El a rekonosé: “Mi tabata sirbi Yehova djis pasobra mi tabata kier a hasi meskos ku mi famia.” Ma, Angelito a disidí di dediká tempu na lesa Beibel i meditá riba dje, i tambe el a kuminsá hasi orashon na Yehova ku mas frekuensia. Kiko tabata e resultado? Angelito a bisa: “Mi a realisá ku ta solamente si mi mes siña konosé mi Tata stimá, Yehova, mi por bira será kuné.” E eksperensia di Angelito ta lanta dos pregunta importante: Ki diferensia tin entre djis sa ken Yehova ta i konos’é bon? I kiko nos por hasi pa konosé Yehova bon?

3. Kiko ta e diferensia entre sa algun kos di Yehova i konos’é bon?

³ Kisas nos ta pensa ku nos konosé Yehova pasobra nos sa su nòmber òf algun di e kosnan ku el a hasi òf bisa. Pero, konosé Yehova bon ta enserá mas ku esei. Nos mester dediká tempu na siña tokante Yehova i su kualidatnan  maravioso. Ta e ora ei numa nos por komprondé dikon Yehova ta bisa òf hasi sierto kos. Esei lo yuda nos sa si e ta aprobá loke nos ta pensa i hasi. Unabes ku nos haña sa kiko e ta ferwagt di nos, nos mester hasi esei.

4. Kon e ehèmpelnan den Beibel por yuda nos?

⁴ Algun hende kisas lo hasi bofon di nos pasobra nos ke sirbi Yehova, i nan por oponé nos mas ainda ora nos kuminsá bai reunion. Pero, si nos ta konfia den Yehova, nunka lo e bandoná nos. Asina ei, nos ta pone base pa un amistat duradero ku Dios. Di bèrdat nos por konosé Yehova asina bon? Klaru ku sí! E ehèmpelnan di hende imperfekto, manera Moises i Rei David, ta mustra ku esei ta posibel. Segun ku nos ta analisá loke nan a hasi, nos lo kontestá dos pregunta: Kiko nan a hasi pa konosé Yehova? I kiko nos ta siña for di nan ehèmpel?

5. Kiko Moises a skohe?

⁵ Moises a skohe pa sirbi Dios. Ora Moises tabatin mas o ménos 40 aña, el a skohe pa asosiá ku e pueblo di Dios, e hebreonan, en bes di ser konosí komo “yu di e yu muhé di Fárao.” (Heb. 11:24) Moises a bira lomba pa un posishon prominente. Ora el a skohe pa apoyá e hebreonan, ku tabata esklabo na Egipto, e tabata sa ku Fárao lo a rabia hopi. Fárao tabata un gobernante masha poderoso, i e egipsionan tabata mir’é manera un dios. Sin duda, Moises a demostrá fe i konfiansa ekstraordinario den Yehova. E konfiansa ei ta base pa un amistat duradero.—Pro. 3:5.

6. Kiko nos ta siña for di e ehèmpel di Moises?

⁶ Kiko nos ta siña? Meskos ku Moises, nos tur mester skohe si nos lo sirbi Dios i asosiá ku su pueblo òf nò. Sirbi Yehova ta enserá ku nos tin ku hasi sakrifisio, i ku kisas nos por haña oposishon di hende ku no konos’é. Pero, si nos ta konfia den nos Tata selestial, nos por tin sigur ku lo e yuda nos!

7-8. Kiko Moises a sigui siña?

⁷ Moises a sigui siña tokante Yehova su kualidatnan i a hasi Su boluntat. Por ehèmpel, ora Yehova a pidi Moises pa libra e nashon di Israel for di Egipto, Moises no tabatin konfiansa den su mes. Bes tras bes el a bisa Yehova ku e no tabata sinti ku e tabata e persona adekuá pa e asignashon ei. Pero, Yehova a demostr’é berdadero kompashon: el a komprondé kon Moises tabata sintié i a yud’é. (Éks. 4:10-16) Komo resultado, Moises por a duna Fárao e mensahenan di huisio fuerte. Djei, Moises a mira Yehova usa Su poder. Yehova a salba e israelitanan i a destruí Fárao i su ehérsito den Laman Kòrá.—Éks. 14:26-31; Sal. 136:15.

⁸ Despues ku Moises a saka e israelitanan for di Egipto, nan tabata keha sinfin. Apesar di esei, Moises a mira ku kuantu pasenshi Yehova a trata e pueblo ku El a libra for di sklabitut. (Sal. 78:40-43) Moises a mira tambe kon Yehova a mustra humildat ekstraordinario ora El a kambia di idea despues ku Moises a pidié esei.—Éks. 32:9-14.

9. Segun Hebreonan 11:27, kon e amistat di Moises i Yehova tabata?

⁹ Despues di e Éksodo for di Egipto, Moises su amistat ku Yehova a bira asina será ku tabata komo si fuera e por a  mira su Tata selestial. (Lesa Hebreonan 11:27.) De echo, Beibel ta bisa: “SEÑOR tabata papia kara-kara ku Moises, meskos ku un hende ta papia ku su amigu.”—Éks. 33:11.

10. Kiko nos tin ku hasi pa konosé Yehova bon?

¹⁰ Kiko nos ta siña? Pa nos konosé Yehova bon, aparte di siña tokante su kualidatnan nos tin ku hasi su boluntat tambe. I kiko ta su boluntat awendia? Beibel ta bisa: “Pa tur sorto di hende ser salbá i yega na un konosementu eksakto di e bèrdat.” (1 Tim. 2:3, 4) Un manera pa hasi esei ta di siña otro hende tokante Yehova.

11. Segun ku nos ta siña otro hende tokante Yehova, kon nos mes ta konos’é mihó?

¹¹ Mayoria di biaha, nos mes ta konosé Yehova mihó ora nos ta siña otro hende tokante dje. Por ehèmpel, nos ta mira prueba bon kla di Yehova su kompashon ora e ta dirigí nos na hende ku e ke pa bira su amigu. (Huan 6:44; Echo. 13:48) Nos ta testigu ku e Palabra di Dios, Beibel, tin poder ora nos ta mira nos studiantenan di Beibel logra stòp ku mal hábito i kuminsá bisti e personalidat nobo. (Kol. 3:9, 10) I nos ta mira prueba di su pasenshi ora hende den teritorio ta haña hopi oportunidat pa siña tokante dje i ser salbá.—Rom. 10:13-15.

12. Kiko Moises a pidi na Éksodo 33:13, i dikon?

¹² Moises a balorá su amistat ku Yehova. Asta despues ku Moises a hasi hopi milager den nòmber di Dios, ku rèspèt el a pidi Yehova permitié konos’é mihó. (Lesa Éksodo 33:13.) Moises tabatin mas ku 80 aña ora el a pidi esei, pero e tabata sa ku e tabatin hopi mas di siña tokante su amoroso Tata selestial.

13. Kon nos por demostrá ku nos ta balorá nos amistat ku Dios?

¹³ Kiko nos ta siña? Aunke nos tin hopi aña ta sirbi Yehova, nos mester balorá nos amistat kuné. Un manera ku nos por demostrá esei ta di papia kuné den orashon.

14. Dikon orashon ta asina importante pa konosé Dios?

¹⁴ Bon komunikashon ta esensial pa un amistat fuerte. P’esei, hasi orashon regularmente na Yehova i nunka tene miedu di bis’é tur loke bo tin riba bo kurason. (Efe. 6:18) Krista, un ruman di Turkia a bisa: “Kada biaha ku mi bisa Yehova loke mi ta pensa i mi mira kon e ta yuda mi, mi ta stim’é mas i mi ta konfia mas den dje. Mirando kon Yehova a kontestá mi orashonnan, a yuda mi mir’é komo un Tata i Amigu.”

15. Kiko Yehova a bisa di Rei David?

¹⁵ Rei David a nase den un nashon ku tabata dediká na Dios. Pero, David no a djis sigui e kustumbernan religioso di su famia. E mes a sera su propio amistat ku Dios, i Yehova a stim’é mashá. Yehova a bisa ku David tabata “un hòmber ku ta na agrado di [Su] kurason.” (Echo. 13:22) Kon David a logra tin un amistat asina será ku Yehova?

16. Kiko David a siña tokante Yehova for di kreashon?

¹⁶ David a siña tokante Yehova for di kreashon. Tempu David tabata yòn, e tabata pasa masha hopi tempu pafó, kuidando e karnénan di su tata. Kisas tabata na e momentonan ei ku el a kuminsá meditá riba Yehova su kreashon. Por  ehèmpel, segun ku e tabata wak shelu anochi, e no a djis mira un gran kantidat di strea. El a diserní e kualidatnan di Esun ku a traha nan. David a sintié motivá pa skirbi: “E shelunan ta konta di e gloria di Dios; i e firmamentu ta proklamá e obra di su mannan.” (Sal. 19:1, 2) Ora David a meditá riba kon hende ta trahá, el a mira Yehova su sabiduria. (Sal. 139:14) E tipo di meditashon ei a siña David humildat.—Sal. 139:6.

17. Kiko nos ta siña si nos meditá riba kreashon?

¹⁷ Kiko nos ta siña? Sea interesá den kreashon. Hasi mas ku djis eksistí den e mundu bunita akí ku Yehova a krea; laga e mundu ei impreshoná bo! Durante bo aktividatnan di tur dia meditá riba tur loke bo por siña tokante Dios for di e kosnan rònt di bo, por ehèmpel mata, animal i hende. E ora ei, tur dia di nobo lo bo siña mas tokante bo Tata amoroso. (Rom. 1:20) I tur dia lo bo mira kon bo amor p’e ta bira mas fuerte.

18. Segun Salmo 18, kiko David a diserní?

¹⁸ David a diserní ku Yehova tabata yud’é. Por ehèmpel, David tabata sa ku ta Yehova a dun’é e forsa pa mata un leon i un ber pa protehá e karnénan di su tata. El a rekonosé ku ta Yehova a permitié derota e gigante Goliat. (1 Sam. 17:37) I el a gradisí Yehova pa a skap’é di Rei Saul, ku tabata yalurs riba dje. (Sal. 18, introdukshon) Si David tabata orguyoso, lo el a pensa ku ta riba su mes el a logra tur e kosnan ei. Pero, komo ku e tabata humilde, e por a mira Yehova su man den su bida.—Sal. 138:6.

19. Kiko nos ta siña for di e ehèmpel di David?

¹⁹ Kiko nos ta siña? Aparte di pidi Yehova yudansa, nos mester purba di diserní den ki manera e ta yuda nos. Si nos ta humilde i konsiente di nos limitashonnan, lo ta fásil pa nos mira ku Yehova ta duna nos loke nos falta. I kada bes ku nos mira kon Yehova ta yuda nos, nos amistat kuné lo bira mas fuerte. Esei a pasa ku Isaac, un ruman na Fidji, kende tin hopi aña ta sirbi Yehova. El a bisa: “Ora mi wak bèk, mi ta realisá kuantu Yehova a yuda mi for di tempu mi a kuminsá studia Beibel. Esei ta hasi Yehova masha real pa mi.”

20. Kiko nos ta siña for di David su amistat ku Yehova?

²⁰ David a imitá e kualidatnan di Yehova. Yehova a krea nos ku e abilidat i kapasidat pa imitá su kualidatnan. (Gén. 1:26) Mas nos siña tokante su kualidatnan, mas mihó nos por imit’é. David a siña konosé su Tata selestial masha bon mes, esei a permitié imit’é den su trato ku otro hende. Por ehèmpel, David a peka kontra Yehova ora el a kometé adulterio ku Bètsabé i a laga mata su kasá. (2 Sam. 11:1-4, 15) Pero, Yehova a skohe pa demostrá miserikòrdia na David. Dikon? Pasobra David a imitá Yehova i tabatin e kustumber di demostrá miserikòrdia na otro hende. Komo ku David tabatin asina un bon amistat ku Yehova, el a bira un di Israel su reinan di mas stimá i esun ku Yehova a usa pa kompará e otro reinan di Israel kuné.—1 Rei. 15:11; 2 Rei. 14:1-3.

21. Segun Efesionan 4:24 i 5:1, kiko ta e resultado si nos “imitá Dios”?

²¹ Kiko nos ta siña? Nos mester “imitá Dios.” Esei no solamente lo benefisiá nos, pero tambe lo yuda nos siña mas  tokante Dios. Ora nos hasi esfuerso pa nos personalidat reflehá esun di Dios, nos ta demostrá ku nos ta su yunan.—Lesa Efesionan 4:24; 5:1.

22-23. Kiko lo pasa si nos apliká loke nos ta siña tokante Yehova?

²² Manera nos a mira, nos por siña tokante Yehova pa medio di kreashon i pa medio di su Palabra, Beibel. E buki úniko ei ta kontené hopi ehèmpel di sirbidó fiel di Dios ku nos por imitá, manera Moises i David. Yehova a hasi su parti. Awor ta keda na nos pa hasi mas tantu posibel pa siña tokante dje.

²³ Nunka nos lo stòp di siña tokante Yehova. (Ekl. 3:11) Loke ta importante no ta kuantu nos ta siña di dje, sino kiko nos ta hasi ku loke nos ta siña. Si nos apliká loke nos ta siña i purba di imitá nos Tata amoroso, lo e sigui hala serka nos. (Sant. 4:8) Su Palabra ta sigurá nos ku nunka lo e bandoná esnan ku ta busk’é.