1. Ku kiko Yehova a konfia tur mayor?

YEHOVA a krea e promé pareha ku e deseo di haña yu. Ku bon motibu Beibel ta bisa: “Yunan ta un herensia di SEÑOR.” (Sal. 127:3) Kiko esei ke men? Wèl, imaginá ku un bon amigu pidi bo kuida un kantidat grandi di plaka p’e. Probablemente, lo bo sinti bo onrá ku el a konfia bo. Pero, na mes momento kisas bo ta preokupá tokante kon pa kuida e montante grandi ei. Yehova, nos mihó Amigu, a konfia tur mayor ku algu mas balioso ku plaka: e bienestar i felisidat di nan yunan.

2. Ki pregunta e artíkulo akí lo kontestá?

² Ken mester disidí si un pareha kasá mester haña yu? I ken mester disidí na ki momento nan tin ku haña yu? Kiko nan por hasi pa nan yunan tin un bida felis? Laga nos wak algun prinsipio den e Palabra di Dios ku lo yuda pareha kasá tuma bon desishon.

3. (a) Ken mester disidí si un pareha ke yu? (b) Ki prinsipio bíbliko amigu i famia di un pareha mester tene na mente?

³ Den algun kultura, hende ta ferwagt pa pareha resien kasá kuminsá haña yu mesora. Famia di e pareha i otro hende por purba di preshoná nan pa sigui e kustumber ei. Jethro, un ruman na Asia, a bisa: “Den kongregashon, algun ruman ku tin yu ta preshoná pareha ku no  tin yu.” Jeffrey, un otro ruman na Asia, a komentá: “Tin ruman ta bisa e parehanan ku no tin yu ku nan lo no tin niun hende pa kuida nan ora nan bira bieu.” Sinembargo, kada pareha mester disidí pa nan mes si nan ke yu òf nò. Ta nan desishon; ta nan responsabilidat. (Gal. 6:5) Klaru ku amigu i famia ke pa un pareha resien kasá ta felis. Pero, tur hende tin ku kòrda ku ta e pareha ta disidí si nan ke yu òf nò.—1 Tes. 4:11.

4-5. Ki dos punto pareha tin ku papia tokante dje, i na ki momento lo ta bon pa nan hasi esei? Splika.

⁴ Si un pareha disidí ku nan ke yu, nan mester papia tokante dos punto importante: Promé, na ki momento nan ke yu. Di dos, kuantu nan ke. Awor bon, ki ora lo ta e mihó momento pa nan papia tokante e dos puntonan ei? I dikon nan ta asina importante?

⁵ Den mayoria di kaso, lo ta bon pa un pareha papia tokante hañamentu di yu promé ku nan kasa. Dikon? Un motibu ta ku ta masha importante pa nan tur dos ta riba e mesun liña. Ademas, nan tin ku wak si nan ta kla pa e responsabilidat ei. Algun pareha resien kasá a pensa ku ta mihó nan warda un òf dos aña promé ku nan haña yu pasobra lantamentu di yu ta eksigí hopi tempu i energia. Nan ta pensa ku si nan warda, nan lo tin tempu pa adaptá na bida kasá i lo hala mas serka di otro.—Efe. 5:33.

6. Debí na e tempu difísil ku nos ta biba aden, kiko algun pareha a disidí?

⁶ Algun kristian a skohe pa imitá e tres yu hòmbernan di Noe i nan kasá. E tres parehanan ei no a haña yu mesora. (Gén. 6:18; 9:18, 19; 10:1; 2 Ped. 2:5) Hesus a kompará nos tempu ku “e dianan di Noe,” i sin duda nos ta bibando den “tempunan krítiko, difísil pa trata kuné.” (Mat. 24:37; 2 Tim. 3:1) Pa e motibu ei, algun pareha a disidí di no haña yu aworakí, ya asina nan por hasi mas den Yehova su sirbishi.

7. Kon e prinsipionan na Lukas 14:28 i 29 i Proverbionan 21:5 por yuda un pareha?

⁷ Ora di disidí si ke yu i kuantu, un pareha sabí ta “kalkulá e gastu.” (Lesa Lukas 14:28, 29.) Di eksperensia, hopi mayor sa ku lantamentu di yu no solamente ta kosta plaka, pero tambe tempu i energia. P’esei, ta importante pa un  pareha pensa riba pregunta manera: ‘Nos tur dos lo tin ku traha pa perkurá pa e nesesidatnan básiko di nos famia? Nos tur dos ta di akuerdo kiko nos “nesesidatnan básiko” ta? Si nos tur dos tin ku traha, ken lo wak e muchanan? I kon e persona ei lo influensiá nan manera di pensa i komportá?’ E parehanan ku ta analisá e preguntanan ei ta apliká e palabranan di Proverbionan 21:5.—Les’é. *

8. Ki difikultat pareha mester ferwagt, i kiko un esposo amoroso lo hasi?

⁸ Tantu e tata komo e mama mester dediká hopi tempu i energia na nan yunan. Pues, si nan tin vários yu tras di otro, lo no ta fásil pa duna kada yu e atenshon ku e mester i meresé. Algun pareha ku tabata den situashon similar a atmití ku nan tabata sinti nan kargá. Un mama kisas ta sintié agotá den sentido físiko i emoshonal. E por sintié asina kansá ku e no tin energia pa regularmente studia, hasi orashon ni prediká. Un otro desafio ta ku kisas e no por konsentrá na reunion ni saka benefisio di dje. Klaru ku un esposo amoroso lo hasi loke e por pa yuda su kasá ora e muchanan mester di atenshon, tantu na reunion komo na kas. Por ehèmpel, e por yud’é ku trabou di kas. Lo e no keda sin hasi Adorashon Komo Famia, i lo e hasi esfuerso pa tur miembro di famia benefisiá di dje. Anto lo e sali regularmente ku su famia den sirbishi.

9-10. Kiko boso mester hasi pa yuda boso yunan?

⁹ Kiko boso por hasi pa yuda boso yunan siña stima Yehova? Kon boso por protehá nan for di e peliger ku tin den e mundu malbado akí? Laga nos wak algun kos ku boso por hasi.

¹⁰ Pidi Yehova yudansa. E ehèmpel di Manoa ku su kasá, e mayornan di Sámson, ta interesante. Ora Manoa a tende ku nan lo haña un yu, el a pidi Yehova sabiduria pa lanta nan yu.

11. Kon boso por imitá e ehèmpel di Manoa ku ta skirbí na Huesnan 13:8?

¹¹ Nihad ku Alma, di Bosnia Herzegowina, a imitá e ehèmpel di Manoa. Nan a bisa: “Meskos ku Manoa, nos a roga Yehova pa siña nos kon pa nos ta bon mayornan. I Yehova a kontestá nos orashonnan den vários manera—pa medio  di Beibel, literatura bíbliko, reunion di kongregashon i kongreso.”—Lesa Huesnan 13:8.

12. Ki ehèmpel Hose ku Maria a pone pa nan yunan?

¹² Pone bon ehèmpel. Loke boso ta bisa boso yunan ta importante; pero, loke boso ta hasi tin un impakto mas grandi riba nan. Nos por tin sigur ku Hose ku Maria a pone un ekselente ehèmpel pa nan yunan, inkluso Hesus. Hose a traha duru pa perkurá pa su famia. Ademas, el a animá su famia pa balorá kos spiritual. (Deu. 4:9, 10) “Tur aña” Hose tabata bai ku su famia Herúsalèm pa selebrá Pasku Hudiu, aunke Lei no a eksigí pa henter su famia bai kuné. (Luk. 2:41, 42) Algun tata di su tempu kisas tabata pensa ku un biahe di famia asina lo tabata muchu difísil, lo a tuma muchu tempu i lo a kosta muchu plaka. Pero, ta bisto ku Hose a balorá kos spiritual i a siña su yunan pa hasi meskos. Maria, di su parti, tabata konosé e Skritura bon. Sin duda, pa medio di loke el a bisa i hasi, el a siña su yunan stima e Palabra di Dios.

13. Kon un pareha a imitá e ehèmpel di Hose ku Maria?

¹³ Nihad ku Alma, menshoná anteriormente, a hasi sigur di imitá e ehèmpel di Hose ku Maria pa yuda nan yu stima i sirbi Dios. Nan a konta kiko nan a hasi: “Pa medio di nos manera di biba, nos a purba di mustr’é kiko ta e benefisionan di apliká prinsipio bíbliko.” Nihad a agregá: “Hasi esfuerso pa bo ta e sorto di hende ku bo ke pa bo yu ta.”

14. Dikon boso mester sa ken ta amigu di boso yunan?

¹⁴ Yuda boso yunan skohe bon amigu. Tantu un mama komo un tata mester sa ku ken nan yunan ta kòmbersá i kiko nan ta hasi. Ademas, nan mester sa ku ken nan yunan ta komuniká kuné riba ret sosial i riba nan telefòn. E amistatnan ei por influensiá nan yunan su manera di pensa i komportá.—1 Kor. 15:33.

15. Kiko e ehèmpel di Jessie ta mustra?

¹⁵ Kiko boso por hasi si boso no sa mashá tokante kòmpiuter i otro aparato elektróniko? Jessie, un tata na Filipinas, a bisa: “Nos tabata sa masha poko tokante teknologia. Pero, esei no a stroba nos di yuda nos yunan konosé e posibel peligernan di teknologia.” Jessie no a prohibí su yunan di usa e tipo di aparatonan ei djis pasobra e no tabata sa kon pa usa nan. El a splika: “Mi a animá mi yunan pa usa nan aparato elektróniko pa siña un idioma nobo, studia pa reunion i lesa nan Beibel tur dia.” Boso a lesa i analisá ku boso yunan e konseho balansá tokante manda mensahe i pone potrèt online ku tin bou di e sekshon “Hóbennan” riba jw.org^®? Boso a wak i analisá e siguiente vidionan ku nan: Ken Ta Doño? Abo òf Bo Telefòn? òf Usa Ret Sosial na un Manera Sabí? * E informashonnan ei por ta útil pa siña boso yunan usa aparato elektróniko na un manera sabí.—Pro. 13:20.

16. Kiko hopi mayor a hasi, i ku ki resultado?

¹⁶ Hopi mayor ta hasi esfuerso pa nan yunan pasa tempu ku hende ku ta pone un bon ehèmpel den sirbishi di Yehova. Por ehèmpel, N’Déni ku Bomine, un pareha na Côte d’Ivoire, tabatin kustumber di laga superintendente di sirkuito keda na nan kas. N’Déni a konta: “Esei  tabatin bon influensia riba nos yu. El a kuminsá traha pionero i awor e ta sirbi komo superintendente di sirkuito supstituto.” Boso tambe por krea oportunidat asina pa boso yunan?

17-18. Na ki momento boso mester kuminsá siña boso yunan?

¹⁷ Kuminsá siña boso yunan mas trempan ku ta posibel. Mas trempan boso kuminsá siña boso yunan, mas mihó. (Pro. 22:6) Esei ta loke mama di Timoteo, Eunise, i su wela, Loida, a hasi. “For di chikitu” nan a siña Timoteo di Yehova. (2 Tim. 1:5; 3:15) Ku tempu, Timoteo a kompañá apòstel Pablo riba su biahenan.

¹⁸ Un otro pareha na Côte d’Ivoire, Jean-Claude ku Peace, a siña nan seis yunan pa stima i sirbi Yehova. Kon nan a hasi esei? Nan a imitá e ehèmpel di Eunise i Loida. Nan a bisa: “Nos a kuminsá siña nos yunan e Palabra di Dios djis despues ku nan a nase.”—Deu. 6:6, 7.

19. Kiko ke men siña boso yunan e Palabra di Dios ku tur diligensia?

¹⁹ Deuteronomio 6:7 ta mustra kon boso, komo mayornan, mester siña boso yunan e Palabra di Dios. Regularmente boso mester ‘siña nan e Palabra di Dios ku tur diligensia,’ esta, “mediante ripitishon.” Tin biaha, boso por desanimá pasobra boso tin ku ripití e mes instrukshon na boso yunan. Pero, hasi esfuerso pa mira esei komo un oportunidat pa yuda nan komprondé e Palabra di Dios i aplik’é.

20. Splika kon boso por apliká Salmo 127:4 ora ta trata lantamentu di yu.

²⁰ Konosé boso yunan bon. Salmo 127 ta kompará yu ku flecha. (Lesa Salmo 127:4.) Meskos ku flecha por varia di material i tamaño, asina tambe kada yu ta diferente for di otro. P’esei, boso mester disidí kon pa eduká kada yu. Un pareha na Israel moderno kende tabatin éksito den lanta dos yu pa sirbi Yehova a  konta kiko a yuda nan: “Nos kada un tabata studia Beibel ku un yu.” Ta klaru ku kada kabes di famia lo disidí si studia di e manera ei ta nesesario òf posibel.

21. Kon Yehova ta yuda tur mayor?

²¹ Tin biaha, boso por sinti ku no ta fásil pa lanta boso yunan. Pero, yu ta un regalo di Yehova; semper boso por konta ku su yudansa. Di buena gana Yehova ta skucha orashon di tur mayor. Anto e ta kontestá e orashonnan ei mediante Beibel, nos publikashonnan i ehèmpel i konseho di otro mayor eksperensiá den kongregashon.

22. Kiko ta algun di e mihó kosnan ku boso por duna boso yunan?

²² Hende a yega di bisa ku lantamentu di yu ta un proyekto di 20 aña. Pero, bèrdat ta ku nunka un mayor no ta stòp di ta mayor. Algun di e mihó kosnan ku nan por duna nan yunan ta: amor, tempu i entrenamentu basá riba Beibel. Kada yu lo reakshoná diferente na e entrenamentu ei. Joanna Mae, un ruman na Asia, a bisa: “Ora mi wak bèk riba loke mi mayornan a siña mi, mi ta masha gradisidu ku nan a disipliná mi i siña mi stima Yehova. Nan no a djis pone mi na mundu, nan a duna mi un bida ku sentido.” (Pro. 23:24, 25) Miónes di kristian ku a ser lantá pa mayornan ku ta stima Yehova tin e mes sintimentu ei.