ABO ta mira bo mes komo un hende gradisidu? Nos tur mester pensa riba e pregunta ei. Beibel a profetisá ku den nos tempu, hopi hende lo ta “malagradesí.” (2 Tim. 3:2) Kisas bo a yega di konosé hende ku ta kere ku nan meresé tur loke nan tin òf a haña i nan no ta mira e motibu pa nan ta gradisidu. No ta nada dushi pa bo ta rònt di hende asina.

Di otro banda, Beibel ta bisa tur sirbidó di Yehova: “Mustra ku boso ta gradisidu.” (Kol. 3:15) De echo, tin vários bon motibu pa nos ta gradisidu.

Un motibu importante pa nos ta semper gradisidu ta ku esei ta yuda nos sinti nos mes bon. Tantu esun ku risibí gradisimentu komo esun ku ta dun’é ta sinti nan mes bon. Dikon? Pensa riba esaki: Si un hende di buena gana ta tuma tempu pa hasi algu pa bo, ta pasobra e ta sinti ku bo ta meresé esei i e ta interesá den bo. Esei lo laga bo sinti bo mes bon. Kasi sigur ta esei a pasa ku Rut. Boas a mustr’é generosidat. Pues, ora Rut a mira ku Boas tabata interesá den dje, esei a lag’é sinti su mes bon.—Rut 2:10-13.

Ta mas importante ainda pa nos ta gradisidu na Dios. (1 Tes. 5:18) Sin duda, de bes en kuando, bo ta pensa riba tur e kosnan bon ku el a duna bo i ta sigui duna bo. (Deu. 8:17, 18; Echo. 14:17) Pero, no djis pensa riba e bondat di Dios ariba-ariba. Tuma tempu pa meditá riba e hopi bendishonnan ku abo i bo sernan kerí a haña. Esei lo oumentá bo gratitut pa bo Kreador i lo bo ta mas konvensí di su amor i interes den bo.—1 Huan 4:9.

Ademas di meditá riba Dios su generosidat i bendishon, nos mester gradisié tambe pa su bondat. (Sal. 100:4, 5) Un eskritor a yega di bisa: “Yama otro danki ta masha importante pa felisidat.”

Un otro motibu dikon ta bon pa nos ta gradisidu ta ku esei ta fortalesé amistat. Nos tur tin e nesesidat di sinti ku hende ta apresiá nos. Ora un hende hasi algu pa bo i bo gradisié di kurason, boso amistat lo bira mas fuerte. (Rom. 16:3, 4) Ademas, hende gradisidu tin mas tendensia di yuda otro hende. Nan ta ripará ora otro hende ta bondadoso ku nan i nan ta sinti nan motivá pa hasi meskos. Sí, yuda otro hende ta hiba na felisidat. Manera Hesus a bisa: “Tin mas felisidat den duna ku den risibí.”—Echo. 20:35.

Robert Emmons, ko-direktor di un proyekto di estudio tokante gratitut na Universidat di California, a bisa lo siguiente: “Pa nos ta gradisidu, nos mester komprondé ku nos tur ta dependé di otro. Tin biaha nos ta duna algu, i tin biaha nos ta haña algu.” Esei ta bèrdat. Pa nos por sigui biba i tin un bida felis, nos ta dependé di otro hende den hopi manera. Por ehèmpel, kisas nan ta perkurá pa nos alimentashon òf yudansa médiko. (1 Kor. 12:21) Un hende gradisidu ta laga otro hende mira bon kla ku e ta apresiá loke nan ta hasi p’e. Mirando ku esei ta e kaso, abo tin e kustumber di yama danki ora un hende hasi algu pa bo?

Un otro motibu dikon nos mester ta gradisidu ta ku e ta yuda nos enfoká riba kos positivo i no kos negativo. Den sierto sentido, nos mente ta manera un filter ku ta laga  sierto kos pasa pero otro kos nò. Hende gradisidu tin e tendensia di enfoká riba kos positivo i presta ménos atenshon na problema. Mas gradisidu nos ta, mas kos bon nos lo mira, i na su turno nos lo ta mas gradisidu. E manera ei di mira bida lo yuda nos sigui e konseho di apòstel Pablo: “Semper alegrá den Señor.”—Flp. 4:4.

Si nos ta gradisidu, nos lo no ta negativo. Ta hopi difísil pa un hende ta gradisidu i na mes momento envidioso, tristu i rabiá. Ademas, hende gradisidu generalmente ta ménos materialista. Nan ta kontentu ku loke nan tin i no ta purba di haña mas.—Flp. 4:12.

Komo kristian, nos sa ku Satanas ke mira nos tristu i desanimá debí na e difikultatnan di e último dianan akí. Lo e keda kontentu si nos ta negativo i gusta kritiká. Pero, un aktitut asina lo perhudiká nos trabou di prediká. E bèrdat ta ku gratitut ta konektá ku diferente aspekto di e fruta di Dios su spiritu, manera goso i fe. Por ehèmpel, nos tin goso ora nos mira tur e bon kosnan ku Dios ta duna nos, i nos tin fe den tur loke el a primintí di hasi den futuro.—Gal. 5:22, 23.

Komo parti di e pueblo di Yehova, probablemente bo ta di akuerdo ku loke bo a lesa den e artíkulo akí tokante gratitut. Pero, na mes momento bo sa ku no semper ta fásil pa bo ta gradisidu i positivo. No desanimá. Bo por bira un hende gradisidu. Kon? Tur dia, tuma un tiki tempu pa pensa riba algun kos ku bo ta gradisidu p’e den bo bida. Mas bo hasi esei, mas fásil lo bira pa bo ta gradisidu. I lo bo ta mas felis ku hende ku ta enfoká riba e problemanan di bida. Pensa riba e kosnan bon ku Dios i otro hende ta hasi pa animá bo i hasi bo felis. Kisas bo por skirbi den un dagboek dos òf tres kos ku a pasa e dia ei ku bo ta gradisidu p’e.

Algun sientífiko a deskubrí ku e kustumber di ta gradisidu ta kambia e manera ku bo selebro ta funshoná i bo ta bira mas positivo. Un hende gradisidu ta mas felis. P’esei, konta bo bendishonnan, disfrutá di e kosnan bon ku ta pasa den bo bida i semper sea gradisidu! Na lugá di pensa ku bo meresé e kosnan bon ku ta pasa den bo bida, ‘gradisí Yehova pasobra e ta bon.’ Sí, ‘mustra ku bo ta gradisidu’ pa tur kos.—1 Kró. 16:34; Kol. 3:15.