1-2. (a) Kiko ta un hubileo? (Wak e kuadro “ Kiko e Hubileo Tabata?”) (b) Di kiko Hesus a papia na Lukas 4:16-18?

DEN algun pais, generalmente hende ta selebrá e di 50 aniversario di un evento òf suseso importante. E aniversario ei ta ser yamá hubileo. E fiesta ei por dura un dia, un siman òf asta mas largu, pero ku tempu tur kos ta terminá i ta pasa pa olvido.

² Den e artíkulo akí, nos lo analisá un mihó hubileo; unu muchu mas mihó ku esun ku e israelitanan tabata selebrá kada 50 aña. E Hubileo di Israel a dura henter un aña i a duna e israelitanan nan libertat. Dikon esei mester interesá nos? Pasobra esei ta rekordá nos di algu maravioso ku Yehova a hasi pa nos haña nos libertat pa semper. Hesus a papia tokante e libertat ei, un libertat ku for di awor nos por benefisiá di dje.—Lesa Lukas 4:16-18.

3. Segun Levítiko 25:8-12, kon e israelitanan a benefisiá di e Hubileo?

³ Lo ta mas fásil pa nos komprondé kiko Hesus tabata ke men ora el a papia tokante libertat si nos analisá promé kiko Yehova a manda e israelitanan hasi durante e Hubileo. El a bisa nan: “Boso mester konsagrá e di sinkuenta aña i proklamá libertat den e tera pa tur su habitantenan. E mester ta un Hubileo pa boso, i kada un di boso mester bolbe na su mes propiedat, i kada un di boso mester bolbe serka su famia.” (Lesa Levítiko 25:8-12.) Den e artíkulo anterior, nos a mira kon e israelitanan a  benefisiá di e sabat semanal. Awor nos lo mira kon nan a benefisiá di e Hubileo. Imaginá ku un israelita a hinka su mes den hopi debe i mester a bende su tera pa paga e debe. Durante e aña di Hubileo, lo el a haña su tera bèk. Pues, e hòmber lo a “bolbe na su mes propiedat,” i su yunan lo no a pèrdè nan herensia. Òf, imaginá un otro israelita ku a hañ’é den problema finansiero i mester a bende su mes òf un di su yunan komo esklabo pa paga e debe. Durante e aña di Hubileo, e esklabo ei lo a “bolbe serka su famia.” Di e manera ei, niun esklabo lo a pèrdè e speransa di haña su libertat un dia. Esta amoroso di Yehova su parti!

4-5. Dikon nos mester ta interesá den e Hubileo di e israelitanan?

⁴ Kiko tabata un otro benefisio di e Hubileo? Yehova a bisa: “Lo no tin hende pober meimei di bo, komo ku SEÑOR siguramente lo bendishoná bo na e tera ku SEÑOR bo Dios ta duna bo komo herensia pa bo poderá di dje.” (Deu. 15:4) Esei ta hopi diferente for di loke ta pasa den mundu awe, unda e riku ta bira mas riku i e pober ta bira mas pober!

⁵ Komo kristian, nos no ta bou di e Lei di Moises. Esei ke men ku nos no ta sigui e areglo ku tin den e Hubileo di Israel tokante libra esklabo, kanselá debe i debolbé un hende su tereno di famia. (Rom. 7:4; 10:4; Efe. 2:15) No opstante, nos tin bon motibu pa nos ta interesá den e Hubileo. Dikon? Pasobra esei ta kòrda nos di loke Yehova a hasi pa libra nos di piká.

6. For di kiko humanidat mester haña nan libertat?

⁶ Nos tur mester haña nos libertat pasobra nos ta esklabo di piká. Debí na esei, nos ta bira bieu, bira malu i muri. Nos ta mira prueba di e sklabitut kruel ei ora nos wak den spil òf tin ku bai dòkter. Ademas, nos ta desanimá ora nos kometé piká. Apòstel Pablo a rekonosé ku ‘e  lei di piká tabatiné prezu.’ I el a agregá: “Pober di mi! Ken lo libra mi di e kurpa ku ta hiba mi na e morto akí?”—Rom. 7:23, 24.

7. Kiko Isaías a profetisá tokante libertat?

⁷ Afortunadamente, Dios a perkurá un manera pa nos ser librá for di piká. E papel ku Hesus ta hunga den e liberashon ei ta importante. Mas ku 700 aña promé ku Hesus a bini na tera, Isaías a profetisá di un gran liberashon den futuro. E gran liberashon ei lo logra muchu mas ku e liberashon durante e Hubileo den tempu di Israel. El a skirbi: “E spiritu di Señor DIOS ta riba mi, pasobra SEÑOR a ungi mi pa hiba bon nobo na esnan afligí; el a manda mi pa kura hende di kurason kibrá, pa proklamá libertat na katibunan.” (Isa. 61:1) Laga nos wak ta di ken e profesia ei ta papia.

8. Na ken e profesia di Isaías ta apliká?

⁸ E profesia importante ei tokante liberashon a kuminsá kumpli despues ku Hesus a kuminsá ku su sirbishi. Ora el a bai snoa di Názarèt, e stat kaminda el a lanta, el a lesa e mesun profesia ei di Isaías na e hudiunan ku tabata einan. Hesus a apliká e siguiente palabranan na su mes: “E spiritu di Yehova ta riba mi, pasobra el a ungi mi pa deklará bon notisia na hende pober; el a manda mi pa proklamá liberashon na e prezunan i restorashon di bista na e siegunan, pa duna libertat na esnan oprimí, pa proklamá e tempu di aseptashon di parti di Yehova.” (Luk. 4:16-19) Kon Hesus a kumpli ku e profesia ei?

9. Ki tipo di liberashon hopi hende den tempu di Hesus a spera?

⁹ Den promé siglo, hende a kuminsá haña e libertat ku Isaías a profetisá i ku Hesus a lesa tokante dje. Hesus mes a konfirmá esei ora el a bisa: “Awe e skritura akí ku boso a kaba di tende a kumpli.” (Luk. 4:21) Hopi di e hendenan ku a skucha loke Hesus a lesa probablemente a spera ku nan lo a ser librá for di gobernashon romano. Kisas nan a pensa meskos ku e dos hòmbernan ku a bisa: “Nos tabata karga speransa ku e hòmber akí tabata esun ku lo a libra Israel.” (Luk. 24:13, 21) Pero, nos sa ku  Hesus no a animá su siguidónan pa rebeldiá kontra e gobernashon kruel di e romanonan. Al kontrario, el a manda nan pa “duna Sésar loke ta di Sésar.” (Mat. 22:21) Pues, kon Hesus a libra e hendenan di su tempu?

10. For di kiko Hesus a libra hende?

¹⁰ E Yu di Dios a bini pa yuda hende haña dos tipo di libertat. Promé, el a yuda nan ser librá for di e siñansanan robes di e lidernan religioso. Hopi hudiu tabata esklabo di tradishon i kreensia falsu. (Mat. 5:31-37; 15:1-11) E supuesto lidernan religioso mes no tabata sirbi Dios manera mester ta. Den un sentido nan tabata siegu. Kon asina? Ora nan a rechasá e Mesías i e lus di e bèrdat ku el a siña hende, nan a keda den skuridat i a sigui ta esklabo di piká. (Huan 9:1, 14-16, 35-41) Hesus a mustra hende humilde kon pa haña liberashon di siñansa falsu siñando nan e bèrdat i poniendo un bon ehèmpel pa nan.—Mar. 1:22; 2:23–3:5.

11. Kiko ta e di dos manera ku Hesus a perkurá libertat?

¹¹ Di dos, Hesus a hasi posibel ku humanidat por ser librá for di sklabitut di piká. A base di e sakrifisio di Hesus, Dios por pordoná piká di hende ku tin fe den e reskate i ku ta demostrá esei na nan manera di biba. (Heb. 10:12-18) Hesus a bisa: “Si e Yu hasi boso liber, boso lo ta realmente liber.” (Huan 8:36) E libertat ei sigur tabata mas mihó ku e libertat ku e israelitanan por a haña durante e aña di Hubileo. Por ehèmpel, un hende ku a ser librá durante e Hubileo por a bolbe bira esklabo, i kon ku bai bini, ku tempu lo el a muri.

12. Ken tabata e promé hendenan pa benefisiá di e libertat ku Hesus a anunsiá?

¹² Riba e dia di Pentekòste di aña 33, Yehova a ungi e apòstelnan i otro hende fiel ku spiritu santu. El a adoptá nan komo su yunan, di manera ku den futuro nan lo ser resusitá pa reina ku Hesus den shelu. (Rom. 8:2, 15-17) Nan tabata e promé hendenan pa benefisiá di e libertat ku Hesus a anunsiá den snoa di Názarèt. Nan no tabata esklabo mas di siñansa falsu ni tampoko di e kustumbernan di e lidernan religioso ku no tabata basá riba e Skritura. Ademas, Dios a konsiderá nan liber di e efektonan mortal di piká. E Hubileo kristian a kuminsá na  aña 33 ku ungimentu di Kristu su siguidónan i lo terminá na final di e Reinado di Mil Aña di Hesus. Pa e tempu ei, hopi kos bunita lo tuma lugá. Ki nan ta?

13-14. Ademas di e kristiannan ungi, ken mas lo haña e libertat ku Hesus a anunsiá?

¹³ Awe, miónes di hende humilde for di tur nashon ta forma parti di e “otro karné[nan].” (Huan 10:16) Yehova no a skohe nan pa reina den shelu ku Hesus. Mas bien Beibel ta bisa ku nan tin e speransa di biba pa semper riba tera.

¹⁴ Si esei ta bo speransa, ya kaba bo ta risibiendo algun benefisio ku e ungínan ta disfrutando di dje. Por ehèmpel, bo por pidi Yehova pa pordoná bo pikánan debí ku bo tin fe den e sakrifisio di Hesus. Asina ei, bo tin e aprobashon di Dios i un bon konsenshi. (Efe. 1:7; Rev. 7:14, 15) Pensa tambe riba e benefisionan di a ser librá di siñansa falsu. Hesus a bisa: “Boso lo konosé e bèrdat, i e bèrdat lo hasi boso liber.” (Huan 8:32) E libertat ei ta hasi bo felis!

15. Ki liberashon i bendishon nos por haña den futuro?

¹⁵ Tin un liberashon mas grandi na kaminda. Pronto, Hesus lo destruí tur religion falsu i gobièrnu korupto. Yehova lo protehá “un multitut grandi” di su  sirbidónan i lo e duna nan hopi bendishon den un paradeis akí riba tera. (Rev. 7:9, 14) Na e tempu ei, hopi hende lo haña resurekshon. Esnan ku skohe pa sirbi Yehova lo no bira malu, bira bieu ni muri.—Echo. 24:15.

16. Ki gran liberashon ta warda humanidat?

¹⁶ Durante e Reinado di Mil Aña, Hesus huntu ku su ko-gobernantenan lo yuda humanidat haña salú perfekto i un amistat perfekto ku Dios. Meskos ku e israelitanan a disfrutá di liberashon durante e Hubileo, asina tambe humanidat lo disfrutá di gran liberashon durante e Reinado di Mil Aña. E ora ei tur hende ku ta sirbi Yehova lealmente lo ta perfekto i liber di piká.

17. Kon Isaías 65:21-23 ta deskribí bida di Dios su sirbidónan? (Wak e plachi riba portada.)

¹⁷ Isaías 65:21-23 (les’é) ta deskribí kon bida riba tera lo ta. Dios su sirbidónan lo no sinta man krusá sin hasi nada. Al kontrario, Beibel ta bisa ku nan lo tin trabou útil i satisfaktorio. Nos por tin sigur ku, despues di e periodo ei, “kreashon mes tambe lo ser librá di sklabitut na un kurpa ku ta kaba na nada i lo tin e glorioso libertat di e yunan di Dios.”—Rom. 8:21.

18. Dikon nos por tin sigur ku nos lo tin un futuro felis?

¹⁸ Meskos ku Yehova a perkurá pa e israelitanan tabatin tempu pa traha i pa sosegá, asina lo e hasi tambe pa su sirbidónan durante e Reinado di Mil Aña di Kristu. Adorashon di Yehova ta masha importante pa nos felisidat awe. Pues, nos por tin sigur ku nos lo dediká tempu na aktividat spiritual den e mundu nobo. Sí, henter humanidat fiel lo ta felis pasobra nan tur lo tin trabou satisfaktorio i lo ta adorando Yehova.