KON bo ta sinti si un bon amigu di bo skirbi bo un karta animante? Timoteo a haña un karta asina for di Apòstel Pablo; un karta ku awor ta forma parti di Beibel i ku nos konosé komo 2 Timoteo. Sin duda, Timoteo tabata ansioso pa haña un lugá ketu p’e por a lesa loke su amigu stimá a manda bis’é. Kisas Timoteo a pensa: ‘Kon lo ta bayendo ku Pablo? Lo e tin algun konseho pa yuda mi ku mi asignashon? Lo e tin algun tep pa yuda mi prediká mihó i yuda otro hende?’ Manera nos lo mira, Timoteo a haña kontesta pa e preguntanan ei. I tabatin mas kos den e karta balioso ei. Laga nos wak algun konseho útil ku tin den dje.

Ora Timoteo a kuminsá lesa e karta, mesora el a ripará kuantu Pablo tabata stim’é. Pablo a yam’é “mi yu stimá.” (2 Tim. 1:2) Timoteo a haña e karta ei rònt di aña 65. E tempu ei, probablemente e tabatin mas ku 30 aña di edat, i ya tabata un ansiano ku eksperensia. El a traha pa mas ku 10 aña ku Pablo i a siña hopi for dje.

Ora Timoteo a lesa ku Pablo tabata perseverando tribulashon fielmente, esei sigur lo a anim’é mashá. Pablo tabata prezu na Roma i pronto nan lo a ehekut’é. (2 Tim. 1:15, 16; 4:6-8) Timoteo por a mira ku Pablo tabatin kurashi pasobra el a skirbi: “Mi ta wanta tur kos.” (2 Tim. 2:8-13) Pablo su maravioso ehèmpel di perseveransia por fortalesé nos meskos ku el a fortalesé Timoteo.

Pablo a animá Timoteo pa mira su asignashon den Dios su sirbishi komo algu masha balioso. E tabata ke pa Timoteo “waya manera kandela e don di Dios” ku tabatin den dje. (2 Tim. 1:6, nota) Den e versíkulo ei, Pablo a usa e palabra griego khárisma pa “don.” E palabra ei básikamente ta referí na un don òf regalo grátis, algu no meresí. Timoteo a haña e don ei ora el a ser skohí pa sirbi e kongregashon na un manera spesial.—1 Tim. 4:14.

Kiko Timoteo mester a hasi ku e don ei? Segun ku e tabata lesa e ekspreshon “waya manera kandela,” kisas el a pensa riba un kandela ku tabata a punto di paga i bira djis karbon kayente. Mester a waya e karbonnan  ei pa produsí vlam i mas kalor. Un dikshonario a bisa ku e verbo griego (anazopyréo) ku Pablo a usa a nifiká “sende atrobe, rebibá, waya sende un kandela.” Pues, el a nifiká bira entusiasmá i masha zeloso tokante un trabou. Ku otro palabra, Pablo tabata bisa Timoteo: ‘Hasi tur loke bo por den bo asignashon!’ Awe, nos tambe tin ku hasi meskos: hasi tur loke nos por pa sirbi Dios ku entusiasmo.

Timoteo a sigui lesa e karta di Pablo i a haña algun palabra ku lo a yud’é tin éksito den su sirbishi. Pablo a skirbi: “Ku yudansa di e spiritu santu ku ta biba den nos, kuida e tesoro akí konfiá na bo.” (2 Tim. 1:14) Ki tesoro a ser konfiá na Timoteo? Den e versíkulo anterior, Pablo a referí na e “palabra sano,” esta, e bèrdat ku tin den e Skritura. (2 Tim. 1:13) Komo kristian, Timoteo mester a siña hende e bèrdat tantu paden komo pafó di e kongregashon. (2 Tim. 4:1-5) Ademas, el a ser nombrá komo ansiano pa pastoriá e tou di Dios. (1 Ped. 5:2) Pa Timoteo kuida su tesoro—e bèrdat ku e tabata siña hende—e mester a konfia den Yehova su spiritu santu i Su Palabra.—2 Tim. 3:14-17.

Awe, nos tambe a ser konfiá ku un tesoro, e bèrdat ku nos ta siña na otro hende. (Mat. 28:19, 20) Nos no mester lubidá nunka kon balioso e bèrdat ei ta. P’esei, nos mester hasi orashon konstantemente i studia Dios su Palabra regularmente. (Rom. 12:11, 12; 1 Tim. 4:13, 15, 16) Kisas tambe nos tin asignashon den sirbishi di tempu kompleto òf komo ansiano. Si ta asina, nos mester ta humilde i realisá ku nos tin ku konfia den Dios. Si nos hasi esei, nos lo demostrá ku di bèrdat nos ta balorá e tesoro ku Dios a konfia nos kuné.

Parti di Timoteo su asignashon a enserá entrená ruman hòmber pa hasi e trabou ku e tabata hasiendo. Ta p’esei Pablo a animá Timoteo bisand’e: “E kosnan ku bo a tende serka mi, . . . konfia nan na hòmbernan fiel, kendenan na nan turno lo ta adekuadamente kapasitá pa siña nan na otro hende.” (2 Tim. 2:2) Pablo a rekordá Timoteo ku e mester a siña e ruman hòmbernan tur e kosnan ku e mes a siña. Awe, ta masha importante pa kada ansiano hasi esfuerso pa hasi meskos den kongregashon. Un bon ansiano no ta tene loke e sa tokante un asignashon pa su so. Mas bien, e ta siña otro ruman pa nan tambe por hasi e trabou. E no tin miedu ku nan por sa mas kuné ni ku nan por hasi e trabou mihó kuné. Pues, e no ta siña nan djis e kosnan básiko di un asignashon. E ke pa e rumannan ku e ta entrená desaroyá bon huisio i perspikasia, esta, pa bira kristian spiritualmente maduro. Di e manera ei, e “hòmbernan fiel” ei por ta muchu mas útil den e kongregashon.

Sin duda, Timoteo a apresiá masha e karta animante ku el a haña di Pablo. Nos por imaginá nos kon bes tras bes el a lesa e konseho ei i a meditá riba kon pa aplik’é den su asignashon.

Kon nos tambe por apliká e konseho ei? Nos por traha duru pa waya nos don manera kandela, kuida nos tesoro i siña otro ruman tur loke nos sa. Di e manera ei, meskos ku Pablo a bisa Timoteo, nos por “kumpli ku [nos] sirbishi kabalmente.”—2 Tim. 4:5.