1-2. Kiko nos lo analisá den e artíkulo akí?

TA NORMAL ku tin biaha nos ta sinti nos desanimá ora nos pensa ku bida ta kòrtiku i ku nos dianan ta “yen di problema.” (Yòb 14:1) Hopi sirbidó di Yehova den pasado a sinti nan asina. Algun di nan asta kier a muri. (1 Rei. 19:2-4; Yòb 3:1-3, 11; 7:15, 16) Pero Yehova—e Dios den ken nan a konfia—semper a konsolá i fortalesé nan. Ademas, el a laga skirbi loke a pasa ku nan pa konsolá nos i pa nos siña for di dje.—Rom. 15:4.

² Den e artíkulo akí, nos lo analisá loke a pasa ku: (1) Yosef, un yu di Yakòb, (2) e biuda Noemí ku su nuera Rut, (3) e levita ku a skirbi Salmo 73 i (4) Apòstel Pedro. E sirbidónan di Yehova ei a perseverá bou di prueba masha difísil. Kon Yehova a fortalesé nan? I kiko nos por siña for di nan? E kontesta pa e preguntanan ei ta sigurá nos ku Yehova “ta serka di e hende di kurason kibrá” i e ta “salba esnan . . . abatí.”—Sal. 34:18.

3-4. Kiko a pasa ku Yosef ora e tabata hóben?

³ Ora Yosef tabatin mas o ménos 17 aña, Dios a dun’é dos soño. E soñonan ei a indiká ku Yosef lo a bira un persona respetá den su famia. (Gén. 37:5-10) Pero djis despues di e soñonan ei, Yosef su bida a kambia drástikamente. Su rumannan no a respet’é, en bes di esei nan a bend’é komo esklabo. Ku tempu, el a resultá den kas di un ofisial egipsio ku yama Potifar. (Gén. 37:21-28) Di un dia pa otro, Yosef a stòp di ta e yu stimá di su tata i a bira  un simpel esklabo di un hòmber ku no tabata adorá Yehova.—Gén. 39:1.

⁴ Komo si fuera no tabata basta, Potifar su esposa a akusá Yosef falsamente di a purba di viol’é. Pero, Potifar no a ni investigá e akusashon. En bes di esei, el a manda sera Yosef den prizòn i nan a bui su pianan ku kadena di heru. (Gén. 39:14-20; Sal. 105:17, 18) Bo por imaginá kon e hóben Yosef lo a sintié ora nan a akus’é falsamente di violashon? I kon esei lo a mancha Yehova su nòmber? Sin duda, Yosef tabatin motibu pa sintié masha desanimá.

5. Kon Yosef a lucha kontra desanimashon?

⁵ Yosef no por a hasi nada pa kambia su situashon ora e tabata esklabo, i e no por a hasi nada tampoko ora e tabata den prizòn. Kon e por a keda positivo? En bes di enfoká riba loke e no por a hasi, el a hasi tur su esfuerso pa kumpli ku e tareanan ku el a haña. Pero mas importante ainda, semper el a pone Yehova na promé lugá den su bida, i p’esei Yehova a bendishoná tur loke Yosef tabata hasi.—Gén. 39:21-23.

6. Kon e soñonan di Yosef a anim’é?

⁶ Otro kos ku a yuda Yosef lucha kontra desanimashon tabata di pensa riba e soñonan ku el a haña un par di aña promé. E soñonan ei a indiká ku lo el a mira su famia atrobe i ku su situashon lo a mehorá. I esei ta nèt loke a pasa. Ora Yosef tabatin mas o ménos 37 aña, su soñonan profétiko a kuminsá kumpli na un manera impreshonante!—Gén. 37:7, 9, 10; 42:6, 9.

7. Di akuerdo ku 1 Pedro 5:10, kiko lo yuda nos soportá prueba?

⁷ Loke nos ta siña. Loke a pasa ku Yosef ta rekordá nos ku den e mundu kruel akí nos por haña nos ku hende ta trata nos na un manera inhustu. Kisas asta un di nos rumannan por hùrt nos. Pero, si  nos ta mira Yehova komo nos Baranka òf nos Refugio, nos lo no desanimá ni stòp di sirbié. (Sal. 62:6, 7; lesa 1 Pedro 5:10.) Kòrda tambe ku Yosef tabatin mas o ménos 17 aña ora Yehova a dun’é e soñonan spesial ei. Pues, Yehova ta konfia su sirbidónan hóben. Awe, hopi hóben ta fiel na Yehova meskos ku Yosef, i algun di nan ta será inhustamente debí na nan lealtat na Dios.—Sal. 110:3.

8. Kiko a pasa ku Noemí ku Rut?

⁸ Noemí ku Elimelek tabatin dos yu i nan tabata biba na Huda, pero debí na un hamber severo nan a muda pa un pais estranhero ku yama Moab. Ora nan tabata einan, Elimelek a muri i Noemí a keda su so ku su dos yunan. Ku tempu, e dos yunan a kasa ku dos muhé moabita, ku yama Rut i Orfa. Mas o ménos dies aña despues, e dos yunan di Noemí a muri, i nan no tabatin yu. (Rut 1:1-5) E tres hende muhénan ei tabata masha tristu! Ta klaru ku Rut ku Orfa por a kasa atrobe. Pero, Noemí ya tabata birando grandi. Ken lo a kuid’é? Dado momento, Noemí tabata asina desanimá ku el a bisa: “No yama mi Noemí; yama mi Mara, pasobra e Todopoderoso a trata mi ku hopi amargura.” Ku un kurason tur kibrá, Noemí a disidí di bai bèk Bètlehèm, i Rut a bai kuné.—Rut 1:7, 18-20.

9. Di akuerdo ku Rut 1:16, 17 i 22, kon Rut a animá Noemí?

⁹ Kiko a yuda Noemí? Esei tabata amor leal. Por ehèmpel, Rut a demostrá amor leal ora el a keda huntu ku Noemí. (Lesa Rut 1:16, 17, 22.) Na Bètlehèm, Rut a traha duru pa piki puspas pa e ku Noemí kome. Debí na esei, den korto tempu Rut a haña un bon reputashon.—Rut 3:11; 4:15.

10. Den ki manera Yehova a demostrá amor pa hende den nesesidat manera Noemí ku Rut?

¹⁰ Yehova a duna e israelitanan un lei ku a demostrá su kompashon pa hende den nesesidat manera Noemí ku Rut. El a bisa su pueblo ku ora nan tabata kosechá, nan no mester a kosechá te den e skinanan di nan kunuku ya asina hende den nesesidat por a bai einan i piki loke a resta. (Lev. 19:9, 10) Pues, Noemí ku Rut por a haña nan kuminda sin tin ku roga niun hende pa esei.

11-12. Kon Boas a yuda Noemí ku Rut?

¹¹ Doño di e kunuku kaminda Rut tabata traha tabata un hòmber riku ku yama Boas. E tabata asina impreshoná pa e amor i lealtat ku Rut a demostrá na Noemí, ku el a kasa ku Rut i a kumpra bèk e kunuku ku tabata pertenesé na famia di Noemí i ku Rut su yunan por a heredá. (Rut 4:9-13) Rut ku Boas a haña un yu, kende nan a yama Obed. Despues Obed a bira tawela di Rei David.—Rut 4:17.

¹² Imaginá bo kon kontentu Noemí tabata pa karga Obed i a gradisí Yehova pa e regalo ei! Pero, Noemí ku Rut lo ta mas felis ainda ora nan resusitá i haña sa ku Obed tabata antepasado di e Mesías Primintí, Hesukristu!

13. Kiko nos ta siña for di e relato di Noemí ku Rut?

¹³ Loke nos ta siña. Ora nos ta pasa den prueba, kisas nos por desanimá òf asta sinti nos kurason kibrá. Podisé nos no ta mira niun solushon pa nos problemanan. Na momentonan asina, konfia kompletamente  den nos Tata selestial i keda serka di nos rumannan. Ta bèrdat ku no ta semper Yehova ta kita e prueba. Por ehèmpel den kaso di Noemí, Yehova no a resusitá su esposo ni su yunan. Pero, Yehova lo yuda nos pa medio di e amor leal ku nos rumannan ta demostrá na nos.—Pro. 17:17.

14. Kon bini un levita a bira masha desanimá?

¹⁴ E eskritor di Salmo 73 tabata un levita. E tabatin e privilegio di sirbi na Yehova su lugá di adorashon. Pero, tabatin un momento den su bida ku el a bira masha desanimá. Dikon? El a kuminsá envidiá e malbado- i arogantenan, no pasobra e tabata kier a kometé maldat, pero pasobra nan bida a parse di tabata mihó ku esun di dje. (Sal. 73:2-9, 11-14) A parse ku nan tabatin tur kos: rikesa, bon bida i nada nada di ansiedat. Esei a desanimá e levita asina tantu ku el a bisa: “Siguramente ta en bano mi a tene mi kurason puru, i a laba mi mannan den inosensia.” Tabata bisto ku su spiritualidat tabata na peliger.

15. Di akuerdo ku Salmo 73:16-19 i 22-25, kon e levita a lucha kontra desanimashon?

¹⁵ Lesa Salmo 73:16-19, 22-25. E levita “a drenta den e santuario di Dios.” Einan meimei di otro sirbidó di Yehova, e por tabata kalmu, e por a pensa kla i hasi orashon tokante su situashon. E ora ei, el a realisá ku su manera di pensa tabata robes i ku asta e por a pèrdè su amistat ku Yehova. El a komprondé tambe ku e malbadonan tabata “den lugánan ku ta slep” i ku nan lo ser “eliminá dor di teror.” Pa e levita por a lucha kontra envidia i desanimashon, e mester a mira e kosnan for di Yehova su punto di bista. Ora el a hasi esei, el a haña su pas atrobe i e tabata felis. El a bisa: “Fuera di [Yehova] mi no ta deseá nada riba tera.”

16. Kiko nos ta siña for di e levita?

¹⁶ Loke nos ta siña. Nunka nos mester envidiá hende malbado ku ta parse di tin un bida felis. Nan felisidat lo no dura;  nan lo no biba pa semper. (Ekl. 8:12, 13) Si nos envidiá nan, nos lo desanimá i nos por pèrdè nos amistat ku Yehova. Pues si bo ta sinti meskos ku e levita, hasi loke el a hasi: skucha e konseho di nos Dios amoroso i asosiá ku hende ku ta sirbié. Si bo stima Yehova mas ku tur kos, lo bo ta berdaderamente felis. I lo bo sigui riba e kaminda ku “realmente ta [hiba na] bida.”—1 Tim. 6:19.

17. Ki motibu Pedro tabatin pa sintié desanimá?

¹⁷ Apòstel Pedro tabata un hende masha dinámiko, pero e por tabata impulsivo tambe. Tabatin biaha ku e tabata bisa òf hasi algu sin pensa, i despues tabata duel e pa loke el a bisa òf hasi. Por ehèmpel, ora Hesus a bisa su apòstelnan ku lo el a sufri i muri, Pedro a skual e i a bisa: “Esei sigur lo no pasa ku bo.” (Mat. 16:21-23) Hesus a korigí Pedro. Ora un grupo di hende a bini pa arestá Hesus, sin pensa, Pedro a kita orea di un esklabo di e sumo saserdote. (Huan 18:10, 11) Atrobe Hesus mester a korigí Pedro. Ademas, Pedro a broma bisa ku maske e otro apòstelnan trompeká i bandoná Hesus, e nunka lo hasi esei! (Mat. 26:33) Pero, e konfiansa ku Pedro tabatin den su mes no a dura mashá. Mas despues e anochi ei, el a haña asina tantu miedu ku tres biaha el a nenga di konosé Hesus. Tur desanimá, Pedro “a bai pafó i yora amargamente.” (Mat. 26:69-75) Kasi sigur el a pensa ku Hesus nunka lo por pordon’é.

18. Kon Hesus a yuda Pedro lucha kontra desanimashon?

¹⁸ Sinembargo, Pedro no a laga desanimashon stòp e di sirbi Yehova. Apesar di su eror, el a rekuperá i a sigui sirbi huntu ku e otro apòstelnan. (Huan 21:1-3; Echo. 1:15, 16) Kiko a yud’é lucha kontra desanimashon? El a kòrda ku Hesus a bis’é ku el a roga Yehova pa Pedro su fe  no debilitá, i Hesus a bisa Pedro tambe pa e regresá i fortalesé su rumannan. Yehova a kontestá e orashon ei. Mas despues, Hesus a aparesé personalmente na Pedro, probablemente pa anim’é. (Luk. 22:32; 24:33, 34; 1 Kor. 15:5) Na un otro okashon, Hesus a aparesé na e apòstelnan despues ku nan a pasa henter un anochi sin piska nada. Einan, Hesus a duna Pedro e oportunidat pa bis’é kuantu e ta stim’é. Hesus a pordoná su amigu stimá i a konfi’é ku mas trabou.—Huan 21:15-17.

19. Di akuerdo ku Salmo 103:13 i 14, kiko Yehova ta pensa di nos pikánan, i kon nos por imit’é?

¹⁹ Loke nos ta siña. E manera ku Hesus a trata Pedro ta demostrá ku Hesus tin kompashon, meskos ku su Tata. Pues ora nos kometé un eror, nos no mester pensa ku Yehova nunka lo por pordoná nos. Kòrda ku ta Satanas ke pa nos pensa asina. En bes di esei, purba di mira nos mes i esnan ku a hùrt nos ku e mesun amor i kompashon ku nos Tata selestial ta mira nos.—Lesa Salmo 103:13, 14.

20. Kiko nos lo mira den e siguiente artíkulo?

²⁰ Loke a pasa ku Yosef, Noemí ku Rut, e levita i Pedro ta sigurá nos ku Yehova “ta serka di e hende di kurason kibrá.” (Sal. 34:18) Ta bèrdat, ku e ta permití nos pasa den prueba i ta permití nos sinti nos desanimá tin biaha. Pero, si nos perseverá ku su yudansa nos fe lo bira mas fuerte. (1 Ped. 1:6, 7) Den e siguiente artíkulo, nos lo mira kon Yehova ta yuda su sirbidónan leal ku ta desanimá, kisas debí na imperfekshon òf sirkunstansia difísil.