Na aña 1913 mi tata, John Mills, a batisá ku 25 aña di edat na New York. Ruman Russell a duna su diskurso di boutismo. Un poko tempu despues, Tata a bai Trinidad i a kasa ku un ruman yen di selo ku yama Constance Farmer. Tata tabata yuda su amigu William R. Brown presentá e “Foto-Drama di Kreashon.” Tata a hasi esaki te na aña 1923 ora ku Ruman Brown ku su esposa a haña asignashon pa bai Wèst Afrika. Mi tata ku mi mama a keda na Trinidad. Nan tur dos tabatin e speransa pa biba den shelu.

Mi mayornan tabatin nuebe yu. Ora nan promé yu a nase, Rutherford tabata e presidente di Watch Tower Bible and Tract Society, pues nan a yama nan promé yu Rutherford. I ora mi a nase, riba 30 di desèmber 1922, mi mayornan a yama mi Woodworth, komo ku e editor di The Golden Age (awor Spièrta!) tabata yama Clayton Woodworth. Nos mayornan a hasi sigur ku nos tur a haña edukashon básiko, ma loke mas nan a animá nos pa hasi ta pone meta spiritual. Mi mama por a rasoná hopi bon riba e Skrituranan i asina e tabata konvensé nos di loke Beibel ta siña. Mi tata tabata gusta konta nos relato bíbliko; e tabata hasi tur tipo di gesto i moveshon pa hasi e relato bibu pa nos.

Nan esfuerso tabatin bon resultado, pasobra di nan nuebe yunan, tres di e mucha hòmbernan a asistí na Skol di Galaad i tres di e mucha muhénan a sirbi komo pionero regular pa hopi aña na Trinidad i Tobago. Nos mayornan a siña nos tambe mediante nan bon ehèmpel i asina nan, na moda di papia, a planta nos “den e kas di SEÑOR.” Nan animashon a yuda nos floresé i keda den “e plenchinan di nos Dios.”—Sal. 92:13.

E rumannan tabata organisá e trabou di prediká for di nos kas. E pioneronan tabatin kustumber di reuní einan i nan tabata gusta papia tokante Ruman George Young, un misionero di Canada ku a bishitá Trinidad. Ademas, mi mayornan tabata  gusta konta eksperensia di Ruman Brown ku su esposa, kendenan tabata sirbi huntu ku nan na Trinidad pero ku despues a haña asignashon pa sirbi na Wèst Afrika. Tur esaki a animá mi pa kuminsá prediká ku dies aña.

Nos revistanan tabata hopi direkto den e tempu ei; nan tabata eksponé religion falsu, gobièrnu korupto i komersiante golos. Komo resultado, na aña 1936, klero a konvensé e gobièrnu di Trinidad pa prohibí tur publikashon di Watch Tower. Nos a skonde tur literatura i a sigui usa nan te ora nan a kaba. Nos tabata hasi marcha di informashon i predikashon ku baiskel, usando pamfleta i pankarta. E grupo di e stat Tunapuna tabatin e outo ku ekipo di zonido. Huntu ku nan, nos tabata prediká asta na e lugánan mas leu di Trinidad. Tabata hopi emoshonante! E ambiente spiritual ei a motivá mi pa batisá ku 16 aña di edat.

E ehèmpel ku nos famia a pone i tur loke mi a eksperensiá tempu mi tabata hóben a duna mi e deseo pa bira misionero. Mi a keda ku e deseo ei ora mi a bai Aruba na aña 1944 i a kuminsá prediká huntu ku Ruman Edmund W. Cummings. Na aña 1945, dies hende a asistí na Memorial. Nos tabata masha kontentu! E siguiente aña nos a forma e promé kongregashon riba e isla.

Un poko tempu despues, mi a duna testimonio informal na mi kolega di trabou Oris Williams. Oris a hasi hopi esfuerso pa purba di defendé e doktrinanan ku el a siña for di tempu e tabata chikitu. Sinembargo, el a kuminsá studia Beibel i a siña loke e Palabra di Dios ta bisa realmente. Riba 5 di yanüari 1947, Oris a batisá. Ku tempu nos a kasa. Na novèmber 1950, Oris a kuminsá traha pionero. Huntu, nos tabatin masha hopi eksperensia bunita.

Na aña 1955 nos a haña invitashon pa bai Skol di Galaad. Pues, nos a kita for di trabou, bende nos kas i nos pertenensianan i nos a despedí di Aruba. Dia 29 di yüli 1956, nos a gradua for di e di 27 klas di Galaad i nos a haña asignashon pa sirbi na Nigeria.

Pensando bèk riba e tempu ei, Oris a bisa: “Yehova su spiritu santu por yuda hende adaptá na e difikultatnan di bida di un misionero. Kontrali na mi esposo, nunka mi no kier a bira un misionero. Mi a preferá di keda kas i lanta yu. Pero, mi a kambia mi manera di pensa ora mi a realisá kon urgente e trabou di prediká e bon notisia ta. Pues, ora nos a gradua for di Galaad, mi tabata kla i determiná pa sirbi den sirbishi di vèlt. Na momento ku nos tabata subi e barku Queen Mary, Ruman Worth Thornton, kende tabata traha den ofisina di Ruman Knorr, a deseá nos un bon biahe i a bisa nos ku nos lo a bai sirbi na Bètel. Mi tabata un tiki desapuntá ora mi a tende esei. Pero, mi a adaptá masha lihé i mi a kuminsá stima bida na Bètel. Na Bètel mi a haña vários asignashon. E asignashon ku mi a gusta mas tabata resepshonista. Mi stima hende, i e asignashon akí a permití mi tin kontakto direkto ku e rumannan di Nigeria. Hopi di nan tabata yega kansá, tur na stòf, ku set i hamber. Tabata un plaser di por a perkurá pa nan i yuda nan sinti kómodo. Tur esaki tabata sirbishi sagrado na Yehova i esei ta loke a duna mi berdadero satisfakshon i felisidat.” Sí, tur nos asignashonnan a yuda nos floresé spiritualmente.

Na aña 1961, henter nos famia a bini huntu na Trinidad. Ruman Brown a konta algun eksperensia emoshonante di su sirbishi na Afrika. Despues mi a konta di e kresementu ku tabata tumando lugá na Nigeria. Ruman Brown a brasa mi i a bisa mi tata: “Johnny, nunka abo no a bai Afrika, pero Woodworth sí!” Mi tata a kontestá: “Sigui asina Worth! Sigui asina!” E animashon ku mi a risibí for di e rumannan ei ku a sirbi Yehova yen di zelo pa hopi aña, a fortalesé mi deseo pa kumpli ku mi sirbishi kabalmente.

Na aña 1962 mi a risibí e privilegio pa bai e di 37 klas di Galaad pa haña mas entrenamentu. Esaki a dura dies luna. Ruman Wilfred Gooch, kende tabata superintendente di sukursal na Nigeria e tempu ei, a asistí na e di 38 klas di Galaad i a haña asignashon pa Inglatera. Pues, mi a ser nombrá komo superintendente di sukursal di Nigeria. Siguiendo e ehèmpel di Ruman Brown, mi a biaha hopi, i esei a permití mi konosé i stimá e  rumannan di Nigeria. E rumannan akí no tabatin hopi kos material manera mayoria di hende di pais mas desaroyá tabatin. Asina mes, e goso i satisfakshon ku e rumannan na Nigeria tabatin a mustra bon kla ku un bida ku propósito no ta dependé di plaka ni kos material. Si nos pensa riba nan sirkunstansia, tabata masha impreshonante pa mira nan na nos reunionnan bistí na un manera limpi, nèchi i digno. Ora nan tabata bai kongreso, hopi di nan tabata bini den trùk i bolekajas * (bùs ku nan tabata traha lokalmente i ku tabata habrí na banda). Hopi di e bùsnan ei tabatin lema interesante riba nan. Un di nan tabata bisa: “Hopi gota chikitu di awa ta forma un laman inmenso.”

I e palabranan di e lema ei ta bèrdat! Tur esfuerso chikitu ta konta. Ami ku Oris tambe a duna di nos parti. Na aña 1974, Nigeria a bira e promé pais pafó di Merka ku a yega 100.000 publikadó. E trabou di prediká tabata floresé!

Durante e periodo di kresementu ei, Nigeria tabata meimei di un guera sivil ku a dura di aña 1967 pa aña 1970. Pa algun luna, nos rumannan ku tabata biba na e otro banda di Riu Niger, den region di Biafra, no tabatin kontakto ku e ofisina di sukursal. P’esei, nos no por a keda sin hasi nada; nos mester a hiba kuminda spiritual pa nan. Manera mi a menshoná den e introdukshon, ku konfiansa den Yehova i ku hopi orashon, nos a krusa e riu vários biaha.

Mi ta kòrda e biahenan peligroso ei meskos ku tabata ayera. De echo, nos tabata riska nos bida pasobra tabatin hopi sòldá nèrvioso ku tabata kla pa tira hende. Ademas, tabatin malesa i otro peliger. Aunke nos tabatin miedu pa pasa kaminda e sòldánan di gobièrnu tabata, nos tabatin mas miedu ainda pa pasa na e banda di Biafra, kaminda e sòldánan rebelde tabata. Un biaha, mi a krusa Riu Niger anochi den un kanoa for di e stat Asaba te na e stat Onitsha i despues mi a bai e stat Enugu pa animá e ansianonan. Durante e periodo ku e hendenan na e stat Aba no tabatin mag di sende nan lus anochi pa e enemigunan no wak nan, mi a biaha bai einan pa fortalesé e ansianonan. I un biaha ora mi tabata na e stat Port Harcourt, nos mester a hasi orashon lihé lihé i stòp ku e reunion pasobra nos a haña sa ku e sòldánan di gobièrnu a logra derotá e sòldánan di Biafra na e liña di defensa pafó di e stat.

E reunionnan ei tabata importante pasobra nan tabata sigurá nos rumannan di Yehova su amor i interes den nan. Es mas, e reunionnan ei tabata un bon okashon pa duna e rumannan konseho nesesario tokante neutralidat i union. E rumannan di Nigeria a perseverá apesar di tur e konfliktonan horibel ei. Nan a demostrá e tipo di amor ku ta surpasá odio entre tribu i nan a mantené nan union kristian. Esta un privilegio pa tabata huntu ku nan durante e pruebanan difísil ei!

Na aña 1969, Ruman Milton G. Henschel tabata presidente di e Asamblea Internashonal “Pas Riba Tera” ku a tuma lugá na Yankee Stadium, New York. Mi tabata Ruman Henschel su asistente i mi a siña hopi for di dje. E entrenamentu ei a bini nèt na ora pasobra na aña 1970 nos tabatin e Asamblea Internashonal “Hende di Bon Boluntat,” na Lagos, Nigeria. Komo ku e asamblea akí a tuma lugá asina lihé despues di e guera sivil, tabata bisto ku esaki tabata posibel solamente ku bendishon di Yehova. E asamblea tabata un evento impreshonante pasobra el a tuma lugá na 17 idioma i 121.128 hende a asistí. Ruman Knorr, Ruman Henschel i otro bishitante di Merka i Inglatera a charter un avion pa asistí na e asamblea akí. Nan a haña oportunidat di mira 3.775 hende batisá; e kantidat mas grandi di hende ku a yega di batisá riba un dia desde Pentekòste! Mi mester a hasi hopi esfuerso pa yuda organisá e evento ei; tabata un di e tempunan mas drùk di mi bida. E kantidat di publikadó tabata krese masha lihé!

Durante e mas di 30 aña ku mi tabata na Nigeria, mi tabatin e privilegio di sirbi de bes en kuando komo superintendente biahero i superintendente di zona na Wèst Afrika. E misioneronan a apresiá mashá e atenshon i animashon ku nan tabata haña! Mi tabata kontentu di por a sigurá nan ku Yehova no a lubidá nan! E trabou akí a siña mi ku ta masha importante pa mustra interes personal den hende pa yuda nan sirbi Yehova i asina  mantené Yehova su organisashon spiritualmente fuerte i uní.

Ta solamente ku yudansa di Yehova nos a logra trata ku tur e problemanan ku e guera sivil i malesa a trese kuné. Semper nos a mira kon Yehova tabata bendishoná nos. Oris a konta:

“Nos tur dos a haña malaria vários biaha. Un biaha malaria a hasi Worth asina malu ku el a bai leu i a bai para te na hospital na Lagos. Nan a bisa mi ku probablemente lo e no skapa. Pero mi ta kontentu ku e ta na bida! Ora el a bini bei, el a kuminsá papia ku e bruder ku tabata kuid’é tokante e Reino di Dios. Mas despues, mi a bai huntu ku Worth pa bishitá e bruder ei, ku yama Señor Nwambiwe, pa kultivá su interes den Beibel. El a aseptá e bèrdat i mas despues el a bira un ansiano na Aba. Mi tambe a yuda hopi hende bira sirbidó fiel di Yehova, asta hende ku tabata mòslem deboto. Loke a duna nos hopi goso tabata siña konosé i stima e hendenan di Nigeria, inkluso nan kultura, kustumber i idioma.”

Nos a siña un otro lès tambe: Pa nos por tabatin éksito den nos asignashon den eksterior, nos mester a siña stima nos rumannan sin importá kon diferente nan kultura tabata for di esun di nos.

Na aña 1987, despues ku nos a sirbi na Bètel na Nigeria, nos a haña un asignashon nobo pa bai na e bunita isla den Karibe, St. Lucia. Einan nos a sirbi komo misionero. E tabata un asignashon masha dushi, pero el a trese difikultat nobo. Kontrali na Afrika kaminda un hòmber tabata kasa ku hopi esposa, aki na St. Lucia un pareha tabata biba huntu sin kasa mes. Sinembargo, e Palabra di Dios ta asina poderoso ku el a motivá hopi di nos studiantenan di Beibel pa hasi e kambionan nesesario.

Segun ku e añanan tabata pasa, nos forsa i energia tabata menguando. P’esei, na aña 2005 Kuerpo Gobernante bondadosamente a trasladá nos pa e sede mundial na Brooklyn, New York. Na aña 2015, nos enemigu morto a kita Oris for di mi. E pèrdida ei ta algu ku mi no por ni deskribí. Ainda mi ta gradisí Yehova tur dia pa a duna mi Oris. Oris tabata un ekselente kompañera i un esposa amoroso ku tabata hopi fásil pa stima. Mi a stima Oris ku henter mi kurason durante nos 68 aña di matrimonio. Nos a siña ku e klave pa felisidat, tantu den matrimonio komo den kongregashon, ta di respetá e areglo di outoridat, pordoná libremente, keda humilde i desplegá e fruta di spiritu.

Ora nos tabatin ku trata ku desapunto òf desanimashon, nos tabata dependé riba Yehova pa yuda nos sigui sirbié fielmente. Segun ku Yehova tabata reahustá nos, nos a ripará ku semper kos tabata mehorá i ku algu mihó tabatin ku bini ainda!—Isa. 60:17; 2 Kor. 13:11.

Na Trinidad i Tobago, Yehova a bendishoná e esfuerso ku mi mayornan i e otro rumannan a hasi. Segun e último datonan, tin 9.892 Testigu di Yehova na Trinidad. Na Aruba, hopi ruman a traha duru pa fortalesé e promé kongregashon ku mi a yuda forma. Awor e isla ei tin 14 kongregashon dinámiko. Na Nigeria tin 381.398 publikadó awor. Esei ta un kantidat grandi! I riba e isla St. Lucia, tin 783 Testigu di Yehova ku ta apoyá e Reino.

Awor mi tin mas ku 90 aña. Salmo 92:14 ta bisa lo siguiente di esnan ku ta plantá den e kas di Yehova: “Asta den nan behes nan lo duna fruta; nan lo ta yen di vigor i bèrdè-bèrdè.” Mi ta asina gradisidu pa e bida ku mi tabatin den Yehova su sirbishi. E herensia spiritual ku mi a haña a animá mi pa sirbi Yehova ku henter mi kurason. Pa motibu di Yehova su amor leal, mi por a “floresé den e plenchinan di [mi] Dios.”—Sal. 92:13.