1-2. Dikon Yehova a perkurá pa nos por ta parti di su famia, i kon el a hasi esei?

YEHOVA a duna nos un maravioso invitashon: pa nos ta parti di su famia. E famia ei ta konsistí di persona ku a dediká nan mes na Dios i ku tin fe den e sakrifisio di su Yu. Nos ta pertenesé na un famia felis. Nos bida tin sentido, i nos ta alegrá ku e speransa di bida pa semper—sea den shelu òf den Paradeis riba tera.

² Yehova ta stima nos mashá, p’esei el a perkurá pa nos por ta parti di su famia. Pero pa logra esei, e mester a hasi un sakrifisio grandi. (Huan 3:16) Beibel ta bisa ku Dios a ‘kumpra nos pa un preis haltu.’ (1 Kor. 6:20) Pa medio di e reskate ku Yehova a perkurá, nos tin un amistat será kuné. Nos tin e onor di yama e Persona di mas importante den universo nos Tata. I, manera nos a mira den e artíkulo anterior, Yehova ta e mihó Tata ku nos por tin.

3. Ki pregunta kisas nos ta hasi nos mes? (Wak tambe e kuadro “ Yehova Sa Ku Mi Ta Eksistí?”)

³ Kisas nos ta hasi nos mes e mesun pregunta ku un eskritor di Beibel a hasi: “Kiko lo mi duna SEÑOR pa tur su benefisionan na mi?” (Sal. 116:12) E kontesta ta ku nos no tin nada pa duna nos Tata den shelu pa tur loke el a hasi pa nos. No opstante, su amor pa nos ta pone ku nos tambe ta stim’é. Apòstel Huan a skirbi: “Nos ta stima, pasobra Dios a stima nos promé.” (1 Huan 4:19) Pues, den  ki manera nos por demostrá nos Tata ku nos ta stim’é?

4. Segun Santiago 4:8, dikon nos mester hasi esfuerso pa nos tin un amistat será ku Yehova?

⁴ Yehova ke pa nos tin un amistat será kuné i pa nos papia kuné. (Lesa Santiago 4:8.) E ta pidi nos pa “perseverá den orashon” i ta pone su mes disponibel pa skucha nos na tur momento. (Rom. 12:12) Nunka e ta muchu okupá òf muchu kansá pa skucha nos. Di nos parti, nos ta skuch’é ora nos ta lesa su Palabra, Beibel, i e publikashonnan ku ta yuda nos komprondé Beibel. Nos ta skuch’é tambe ora nos ta paga bon tinu na nos reunionnan. Meskos ku bon komunikashon ta yuda un yu keda ku un amistat será ku su mayornan, asina tambe bon komunikashon ku Yehova ta yuda nos keda ku un amistat será kuné.

5. Kon nos por mehorá nos orashonnan?

⁵ Kon bo orashonnan na Yehova ta? E ke pa nos bis’é tur loke nos tin riba nos kurason. (Sal. 62:8) P’esei, ta bon pa nos puntra nos mes: ‘Mi orashonnan tin tendensia di ta manera un mensahe ku mi ta kopia kada bes? Òf nan ta manera un karta skirbí na man, den kua mi ta deshogá mi kurason?’ Sin duda, bo ta stima Yehova mashá i ke pa bo amistat kuné keda fuerte. Pa logra esei, bo mester papia kuné regularmente. Konfi’é tur kos; kont’é bo alegria i bo tristesa. Bo por tin sigur ku bo por pidié pa yudansa.

6. Kiko nos mester hasi pa nos keda ku un amistat será ku nos Tata den shelu?

⁶ Pa nos keda ku un amistat será ku nos Tata den shelu, semper nos mester demostr’é ku nos ta gradisidu. Nos ta sinti meskos ku e salmista: “O SEÑOR mi Dios, hopi ta e maravianan ku bo a hasi, i bo pensamentunan pa ku nos; no tin ningun ku ta di kompará ku bo; si mi lo kier a konta i papia di nan, nan lo tabata muchu hopi pa konta.” (Sal. 40:5) Pero, nos ta hasi mas ku djis sinti ku nos ta gradisidu na Yehova. Nos ke ekspresá nos gratitut ku echo i palabra. Esei ta loke ta hasi nos diferente for di hopi hende awe. Nos ta biba den un mundu den kua hende no ta demostrá Dios ku nan ta gradisidu pa tur loke e ta hasi pa nan. De echo, Beibel mes ta señalá ku den “e último dianan” hende lo ta entre otro malagradesí. (2 Tim. 3:1, 2) Nos sí no ke ta asina!

7. Kiko Yehova ke pa nos hasi, i dikon?

⁷ Niun mayor no ke pa nan yunan pleita ku otro, ma pa nan ta amigu di otro. I Yehova ke esei pa tur su yunan. De echo, e amor ku nos tin pa otro ta proba ku nos ta berdadero kristian. (Huan 13:35) Nos ta ekspresá meskos ku e salmista: “Ki bon i ki dushi ta pa rumannan biba huntu den armonia!” (Sal. 133:1) Ora nos ta stima nos rumannan, nos ta demostrá Yehova ku nos ta stim’é tambe. (1 Huan 4:20) Forma parti di un famia di ruman ku ta “bondadoso ku otro” i ku ta trata otro ku “tierno kompashon” ta algu masha dushi!—Efe. 4:32.

8. Segun 1 Huan 5:3, kiko ta e motibu prinsipal dikon nos ta obedesé Yehova?

⁸ Yehova ke pa tur yu obedesé nan mayornan, pues e ke pa nos tambe obedes’É. (Efe. 6:1) E meresé esei pasobra ta e a krea nos i ta mantené nos na bida.  Pero, e motibu prinsipal dikon nos ta obedesé Yehova ta pasobra nos ta stim’é. (Lesa 1 Huan 5:3.) Aunke tin hopi motibu dikon nos mester obedes’é, e no ta forsa nos. El a duna nos e regalo di boluntat liber, pues e ta kontentu si nos skohe pa obedes’é pasobra nos ta stim’é.

9-10. Dikon ta importante pa nos sa kiko ta Dios su normanan i obedesé nan?

⁹ Tur mayor ke nan yunan bon. Ta p’esei nan ta pone norma enkuanto kondukta. E yunan ku ta obedesé e normanan ei, ta demostrá ku nan ta konfia i respetá nan mayornan. Pues, ta di hopi mas importansia ainda pa nos sa i obedesé e normanan di nos Tata den shelu. Asina ei, nos ta demostrá Yehova ku nos ta stim’é i respet’é. I komo resultado, lo bai bon ku nos. (Isa. 48:17, 18) Di otro banda, hende ku rechasá Yehova i su normanan lo hasi nan mes daño.—Gal. 6:7, 8.

¹⁰ Ora nos hasi loke Yehova ta pidi di nos, nos ta ser protehá den sentido físiko, emoshonal i spiritual. E sa kiko ta mihó pa nos. Aurora, kende ta biba na Merka, a bisa: “Mi ta konvensí ku, ora bo obedesé Yehova, semper lo bo tin e mihó bida ku tin.” Esei ta den tur kaso. Puntra bo mes: ‘Kon mi a benefisiá ora mi a obedesé Yehova su guia amoroso?’

11. Kon orashon ta yuda nos?

¹¹ Orashon ta yuda nos obedesé Yehova, asta ora ta difísil pa hasi esei. Tin  biaha, debí na nos imperfekshon nos tin ku lucha pa obedesé Yehova. Pero nos mester sigui hasi esei. Un salmista a roga Dios: “Duna mi komprondementu, pa mi por warda bo lei i kumpli kuné ku henter mi kurason.” (Sal. 119:34) Denise, un pionero regular, a bisa: “Si mi tin difikultat pa obedesé un mandamentu di Yehova, mi ta pidié duna mi forsa pa hasi loke ta korekto.” Nos por tin sigur ku semper Yehova ta kontestá e tipo di orashonnan ei.—Luk. 11:9-13.

12. Segun Efesionan 5:1, kiko nos mester hasi?

¹² Lesa Efesionan 5:1. Komo nos ta “yunan stimá” di Dios, nos ta hasi nos máksimo esfuerso pa imit’é. Nos ta imitá su kualidatnan tratando otro ku amor, i nos ta demostrá bondat i ta semper kla pa pordoná. Ora hende ku no konosé Dios mira nos bon kondukta, nan por haña gana di sa mas tokante dje. (1 Ped. 2:12) Mayor kristian mester purba di trata nan yunan meskos ku Yehova ta trata nos. Ora nan imitá Yehova, nan yunan tambe lo ke bira amigu di Yehova.

13. Kiko nos mester hasi si nos ta tímido?

¹³ Generalmente, tur mucha ta orguyoso di nan tata i gusta papia di dje. Asina tambe, nos ta orguyoso di nos Tata den shelu, i nos ke pa otro hende konos’é. Nos tin e mesun sintimentu ku Rei David, kende a skirbi: “Mi alma lo  gloria den SEÑOR.” (Sal. 34:2) Pero, kiko awor si nos ta tímido? Kon nos por haña kurashi? Imaginá e goso ku Yehova lo sinti si nos papia di dje ku otro hende i pensa riba e benefisionan ku nan lo haña. Yehova lo duna nos e kurashi ku nos tin mester. Meskos ku el a yuda nos rumannan di promé siglo, asina lo e yuda nos tambe.—1 Tes. 2:2.

14. Dikon ta importante pa prediká?

¹⁴ Komo Yehova no ta hasi distinshon di persona, e ta felis ora e mira nos ta demostrá amor na otro hende sin prehuisio. (Echo. 10:34, 35) Un di e mihó maneranan pa hasi esei ta di prediká na nan. (Mat. 28:19, 20) Kiko lo ta e resultado? Hende ku skucha nos por mehorá nan bida for di awor i haña e speransa di biba pa semper den Paradeis.—1 Tim. 4:16.

15-16. Ki motibunan nos tin pa nos ta felis?

¹⁵ Yehova nos Tata ta stima nos, pues e ke pa su famia ta felis. (Isa. 65:14) Aunke nos ta pasa den difikultat, nos tin hopi motibu pa nos ta felis for di awor. Por ehèmpel, nos tin sigur ku nos Tata den shelu ta stima nos masha hopi mes. Nos tin konosementu eksakto di su Palabra, Beibel. (Yer. 15:16) I nos ta parti di un famia úniko ku ta konsistí di hende ku ta stima Yehova, stima su normanan moral i stima otro.—Sal. 106:4, 5.

¹⁶ Ademas, komo nos sa ku bida lo ta mihó ainda den futuro, esei ta yuda nos mantené nos goso. Nos sa ku pronto Yehova lo kaba ku tur maldat i pa medio di su Reino lo e transformá e tera den un paradeis. Nos tin e speransa maravioso tambe di mira e mortonan resusitá i reuní ku nan sernan stimá. (Huan 5:28, 29) Esei lo ta maravioso! I mas importante ku tur, nos ta konvensí ku pronto, den shelu i riba tera, tur persona lo duna nos Tata ku ta stima nos, Yehova, e onor, alabansa i deboshon ku e meresé.