1. Kiko un ruman muhé mester puntra su mes si e tin pensá di kasa?

TUR kristian ta bou di outoridat di Hesukristu, kende ta perfekto. Pero ora un ruman muhé kasa, e ta bou di outoridat di un hende hòmber imperfekto. Anto no ta semper esei ta fásil. Ora un ruman muhé tin un ruman hòmber na bista, ta bon p’e puntra su mes: ‘Kon mi por sa si lo e ta un bon kabes di famia? E ta pone kosnan spiritual na promé lugá den su bida? I si esei no ta e kaso, dikon mi ta pensa ku despues ku nos kasa kosnan lo kambia?’ Ta klaru ku e tambe mester puntra su mes: ‘Ki kualidat ami tin ku lo por benefisiá nos matrimonio? Mi tin pasenshi i ta generoso? Mi tin un amistat será ku Yehova?’ (Ekl. 4:9, 12) Te na sierto grado, e desishonnan ku un hende muhé tuma promé ku e kasa lo determiná kon felis lo e ta den su matrimonio.

2. Kiko nos lo trata den e artíkulo akí?

² Miónes di nos ruman muhénan ta sumiso na nan esposo. Nan ta pone un bunita ehèmpel, i nan meresé elogio pa esei! Nos ta kontentu pa por sirbi Yehova huntu ku e rumannan leal ei. Den e artíkulo akí, nos lo para ketu na tres pregunta: (1) Ki ta algun reto ku esposanan ta haña nan kuné? (2) Dikon un esposa ta skohe pa ta sumiso, esta, obedesé i respetá su esposo? (3) Kiko tantu esposo komo esposa por siña tokante sumishon for di e ehèmpel di Hesus, Abigail i Maria, esposa di Hose?

3. Dikon niun matrimonio no ta perfekto?

³ Matrimonio ta un regalo perfekto di Dios, pero hende ta imperfekto. (1 Huan 1:8) P’esei, e Palabra di Dios ta spièrta pareha kasá ku nan “lo haña nan ku difikultat den bida.” (1 Kor. 7:28) Ban wak algun reto ku kisas un esposa por hañ’é kuné.

4. Dikon un esposa por sinti ku ta algu humiante pa ta sumiso na su esposo?

⁴ Kisas debí na e manera ku un esposa a lanta, e por sinti ku ser sumiso na su esposo ta algu humiante. Marisol, un ruman ku ta biba na Merka, a bisa: “Kaminda mi a lanta, tur ora bai hende muhé tabata tende ku nan mester ta igual ku hende hòmber den tur kos. Mi sa ku Yehova a duna esposo outoridat i ku el a duna esposa un ròl humilde pero digno di rèspèt. Pero ta difísil pa mi tin un punto di bista korekto tokante esei.”

5. Ki pensamentu robes algun hende hòmber tin di hende muhé?

⁵ Di otro banda, un hende muhé por ta kasá ku un hende hòmber ku ta konsiderá hende muhé komo inferior. Ivon, un ruman ku ta biba na Suramérika, a bisa: “Kaminda mi ta biba, hende hòmber ta kome promé anto despues hende muhé. Mucha muhé tin ku kushiná i limpia kas, pero mucha hòmber ta ‘rei di kas’ i nan mama i ruman muhé mester sirbi nan.” Yingling, un ruman muhé ku ta biba na Asia, a bisa: “Na mi idioma tin un dicho ku ta laga bo komprondé ku hende muhé no mester ta inteligente ni mester tin abilidat. Nan tin ku hasi tur trabou di kas i no tin mag di bisa nan esposo nan opinion.” Un esposo ku ta pensa i ta hasi asina ku su esposa no ta hasi loke Beibel ta bisa. E no ta stima su esposa, e ta hasi bida di su esposa difísil, e no ta imitando Hesus i no tin aprobashon di Yehova.—Efe. 5:28, 29; 1 Ped. 3:7.

6. Kiko un esposa tin ku hasi p’e por tin un amistat será ku Yehova?

⁶ Manera nos a mira den e artíkulo anterior, Yehova ta ferwagt pa esposonan perkurá pa e nesesidatnan spiritual, emoshonal i material di nan famia. (1 Tim. 5:8) Pero, un ruman muhé kasá tin ku saka tempu tur dia p’e lesa Beibel i meditá riba loke el a lesa i hasi orashon na Yehova. Esei por ta un reto. Un esposa por ta asina drùk ku e por sinti ku e no tin tempu ni energia pa hasi e kosnan ei. Pero, tòg ta importante p’e traha tempu. Dikon? Pasobra Yehova ke pa kada un di nos tin un amistat será kuné.—Echo. 17:27.

7. Kiko lo yuda un esposa kumpli ku e asignashon ku el a haña di Yehova?

⁷ Ta bèrdat ku pa un esposa ta sumiso na un esposo imperfekto ta eksigí hopi esfuerso. Pero, si e esposa komprondé i aseptá e motibunan ku Yehova ta dun’é pa ta sumiso na su esposo, lo bira muchu mas fásil p’e kumpli ku e asignashon ku el a haña di Yehova.

8. Segun Efesionan 5:22-24, dikon un esposa kristian lo skohe pa ta sumiso na su esposo?

⁸ Un esposa kristian ta skohe pa ta sumiso pasobra e sa ku esei ta loke Yehova ta ferwagt di dje. (Lesa Efesionan 5:22-24.) E ta konfia su Tata selestial pasobra e sa ku Yehova stim’é i ku tur loke e pidié hasi ta pa su bon.—Deu. 6:24; 1 Huan 5:3.

9. Kiko ta pasa ora un ruman muhé ta respetá outoridat di su esposo?

 ⁹ Hopi hende ta kere ku hende muhé no mester ta sumiso na hende hòmber pasobra esei ta algu humiante. E tipo di pensamentu ei ta pone ku hopi hende muhé no ta wòri ku loke Dios ta bisa tokante sumishon. Klaru ku hende ku ta apoyá e ideanan ei no konosé nos Dios amoroso. Yehova hamas lo pidi su yu muhénan presioso hasi algu ku lo laga nan sinti nan humiá. Un ruman muhé ku ta hasi esfuerso pa kumpli ku e asignashon ku Yehova a dun’é ta yuda krea pas den su kas. (Sal. 119:165) Tur hende ta benefisiá: su esposo, su yunan i e mes.

10. Kiko nos ta siña for di loke Carol a bisa?

¹⁰ Un esposa ku ta sumiso na su esposo, kende ta imperfekto, ta mustra ku e ta stima i respetá Yehova, kende ta esun ku a disidí di duna outoridat na otro persona. Carol, un ruman na Suramérika, a bisa: “Mi sa ku mi esposo ta hasi fout, pero mi sa tambe ku e manera ku mi ta reakshoná riba e foutnan ei ta demostrá kuantu mi ta balorá mi amistat ku Yehova. Pues, mi ta hasi esfuerso pa keda sumiso pasobra mi ke hasi mi Tata selestial kontentu.”

11. Kiko a yuda Aneese pa pordoná, i kiko nos por siña for di loke el a bisa?

¹¹ Si un esposa ta sinti ku su esposo no ta wòri ku su sintimentu- i preokupashonnan, di bèrdat por bira difísil p’e respetá i obedesé su esposo. Pero, wak kiko un ruman muhé ku yama Aneese ta hasi ora esei pasa. El a bisa: “Mi ta purba di no rabia. Mi ta keda kòrda ku nos tur ta hasi fout. Mi meta ta pa, meskos ku Yehova, pordoná libremente. Anto ora mi hasi esei mi ta haña mi pas mental bèk.” (Sal. 86:5) Un esposa ku ta kla pa pordoná, lo haña ku ta mas fásil p’e ta sumiso.

12. Ki ehèmpel tin den Beibel?

¹² Tin hende ta pensa ku hende sumiso ta débil. Pero, esei no ta bèrdat. Beibel  tin hopi ehèmpel di hende ku tabata sumiso pero ku a demostrá kurashi. Ban wak loke nos por siña for di Hesus, Abigail i Maria.

13. Splika dikon Hesus ta sumiso na Yehova.

¹³ Hesus ta sumiso na Yehova no pasobra e no ta inteligente i no por hasi nada. E manera simpel i kla ku el a siña hende a proba ku e tabata masha inteligente. (Huan 7:45, 46) Yehova Dios tabata sa di Hesus su abilidatnan; p’esei, el a permitié traha kuné ora el a krea universo. (Pro. 8:30; Heb. 1:2-4) Despues ku Hesus a ser resusitá, Yehova a dun’é “tur outoridat den shelu i riba tera.” (Mat. 28:18) Aunke Hesus tin hopi abilidat, tòg e ta dependé riba Yehova. Dikon? Pasobra e ta stima su Tata.—Huan 14:31.

14. Kiko esposo por siña for di (a) e manera ku Yehova ta mira hende muhé? (b) e palabranan na Proverbionan 31?

¹⁴ Loke esposo por siña. E echo ku Yehova a hasi hende hòmber kabes di hende muhé no ta pasobra E ta pensa ku hende muhé ta inferior na hende hòmber. El a proba esei bon kla ora el a skohe tantu hende muhé komo hende hòmber pa ta ko-gobernante ku Hesus. (Gal. 3:26-29) Yehova a demostrá ku e ta konfia su Yu dunand’e outoridat. Asina tambe, un esposo sabí lo konfia su esposa ku sierto outoridat. Beibel ta deskribí ku un esposa ekselente ta wak pa su famia, ta kumpra i bende tereno i ta hasi negoshi. (Lesa Proverbionan 31:15, 16, 18.) E no ta un esklabo ku no por duna su opinion. Mas bien, su esposo ta konfi’é i ta skucha loke e tin di bisa. (Lesa Proverbionan 31:11, 26, 27.) Ora un esposo ta trata su esposa ku e tipo di rèspèt ei, su esposa lo ta kontentu pa ta sumiso na dje.

15. Kiko esposa por siña for di Hesus su ehèmpel?

¹⁵ Loke esposa por siña. Apesar ku Hesus a hasi hopi kos, e no ta sinti ku ta algu humiante pa ta sumiso na Yehova. (1 Kor. 15:28; Flp. 2:5, 6) Asina tambe, un esposa ekselente ku ta imitá Hesus su ehèmpel lo no sinti ku ta algu humiante pa ta sumiso na su esposo. Lo e apoyá su esposo no djis pasobra e ta stim’é, pero foral pasobra e ta stima i respetá Yehova.

16. Segun 1 Samuel 25:3, 23-28, ki problema Abigail a hañ’é kuné? (Wak plachi riba portada.)

¹⁶ Abigail tabata kasá ku Nabal. Un hòmber egoista, orguyoso i malagradesí. Si Abigail kier a buska manera pa sali for di e matrimonio ei, e por a keda trankil asina laga David i su hòmbernan mata su esposo. Pero e no a hasi esei; mas bien, el a hasi tur loke e tabata por pa protehá Nabal i tur e hendenan di su kas. Imaginá kuantu kurashi Abigail mester tabatin pa aserká 400 hòmber armá i rasoná ku David na un manera respetuoso. E tabata dispuesto pa tuma e kulpa di loke su kasá a hasi. (Lesa 1 Samuel 25:3, 23-28.) David a realisá ku Yehova a usa e hende muhé ei yen di kurashi pa yud’é. E konseho ku Abigail a dun’é a evitá ku el a kometé un eror grave.

17. Kiko esposo por siña for di e relato di David i Abigail?

¹⁷ Loke esposo por siña. Abigail tabata masha inteligente. Anto David a hasi bon di skucha su konseho. Debí na esei, e no a mata hende inosente. Asina tambe, un esposo sabí lo tuma  tempu pa pensa riba e punto di bista di su esposa promé ku e tuma un desishon importante. Kisas loke su esposa a trese dilanti por evitá ku lo e tuma un mal desishon.

18. Kiko esposa por siña for di e ehèmpel di Abigail?

¹⁸ Loke esposa por siña. Un esposa ku ta stima i respetá Yehova por tin un bon influensia riba su famia, asta ora su esposo no ta sirbi Yehova òf si su esposo ta sirbi Yehova pero no ta hasiendo loke ku Yehova ke. Lo e no buska manera pa sali for di su matrimonio; mas bien, lo e respetá i keda sumiso na su esposo. Hasiendo e kosnan ei, e por motivá su esposo pa siña tokante Yehova. (1 Ped. 3:1, 2) Si e hasi tur su esfuerso pero nada no kambia, e por tin sigur ku Yehova ta balorá su sumishon na su esposo.

19. Ki ora un esposa lo no obedesé su esposo?

¹⁹ Un esposa sumiso hamas lo aseptá pa hasi algu ku ta bai kontra prinsipio di Beibel, ni maske ku ta su esposo pidié hasi esei. Por ehèmpel, imaginá ku un ruman muhé su esposo ku no ta Testigu pidié pa gaña, hòrta òf hasi algu otro ku Yehova no ta aprobá. Tur kristian, inkluso ruman muhé kasá, lo skohe pa obedesé Yehova Dios promé. Un ruman muhé mester nenga di hasi algu ku ta bai kontra prinsipio di Beibel i splika na un manera bondadoso pero firme dikon lo e no hasi loke e ta pidié.—Echo. 5:29.

20. Kon nos sa ku Maria tabatin un amistat será ku Yehova?

²⁰ Maria tabatin un amistat será ku Yehova. Ta bisto ku e tabata konosé e Skritura bon. Den un kòmbersashon ku Elisabèt, mama di Huan Boutista, el a sita for di e Skritura Hebreo mas ku 20 biaha. (Luk. 1:46-55) Pensa un ratu riba esaki: Maria tabata komprometé ku Hose, pero e angel di Yehova no a aparesé na Hose promé. E angel a papia ku Maria promé i a bis’é ku lo e duna lus na e Yu di Dios. (Luk. 1:26-33) Yehova tabata konosé Maria bon i tabatin sigur  ku lo e stima i kuida su Yu. Anto sin duda, Maria a sigui mantené un amistat será ku Yehova asta despues ku Hesus a muri i a ser resusitá pa bai shelu.—Echo. 1:14.

21. Kiko esposo por siña for di loke Beibel ta bisa tokante Maria?

²¹ Loke esposo por siña. Un esposo sabí lo ta kontentu ku su esposa konosé Beibel bon. Lo e no sintié intimidá ni menasá pa su esposa. E ta realisá ku un esposa ku konosé Beibel i su prinsipionan bon lo benefisiá henter e famia. Klaru ku e esposo tin e responsabilidat di perkurá pa adorashon komo famia i otro aktividatnan spiritual, asta si su esposa tin mas skol kuné.—Efe. 6:4.

22. Kiko esposa por siña for di Maria?

²² Loke esposa por siña. Aunke un hende muhé ta sumiso na su esposo, ta e mes ta responsabel pa su amistat ku Yehova. (Gal. 6:5) P’esei, e tin ku saka tempu pa asina e hasi su estudio personal i meditashon. Esei lo yud’é keda stima i respetá Yehova i keda felis siendo sumiso na su esposo.

23. Ora esposanan ta sumiso kon esei ta benefisiá nan mes, nan famia i e kongregashon?

²³ Esposanan ku ta stima Yehova lo keda sumiso na nan esposo. Nan lo ta mas felis ku esnan ku no ta aseptá ku Yehova a skohe hende hòmber pa ta kabes di hende muhé. Ademas, nan ta pone bon ehèmpel pa e hóbennan den kongregashon. Esei ta yuda ku tantu den e kongregashon komo den nan famia lo tin amor i pas. (Tito 2:3-5) Awendia, gran parti di esnan ku ta sirbi Yehova lealmente ta hende muhé. (Sal. 68:11) Tantu hende hòmber komo hende muhé por yuda ku e kongregashon ta felis. E siguiente artíkulo lo mustra kon kada un di nos por yuda ku esei.