1. Dikon Yehova su famia ta uní?

NOS ta kontentu di ta parti di Yehova su famia. Dikon Yehova su famia ta asina uní i na pas ku otro? Un motibu ta ku nos tur ta hasi nos esfuerso pa respetá esnan ku Yehova a duna un grado di outoridat. Mas nos komprondé Yehova su areglo di outoridat, mas uní nos lo ta.

2. Ki pregunta nos lo kontestá den e artíkulo akí?

² Den e artíkulo akí nos lo papia tokante ken tin outoridat den kongregashon. Nos lo kontestá e siguiente preguntanan tambe: Ki trabou Yehova a duna ruman muhé? Ta bèrdat ku tur ruman hòmber ta kabes di e ruman muhénan? E outoridat ku ansiano tin riba e rumannan den kongregashon ta meskos ku e outoridat ku un kabes di famia tin riba su kasá i yunan? Promé, laga nos wak kon nos mester mira ruman muhé.

3. Kiko lo yuda nos balorá nos ruman muhénan mas ainda?

³ Di bèrdat nos ta balorá nos ruman muhénan. Nan ta traha duru! Nan ta kuida nan famia, ta prediká i ta yuda den kongregashon. Nos lo balorá nan mas ainda si nos mira nan manera Yehova i Hesus ta mira nan. Anto ora nos wak kon Apòstel Pablo a trata hende muhé, nos lo siña kon pa trata nos ruman muhénan den kongregashon.

4. Kon Beibel ta mustra ku Yehova ta balorá tantu hende muhé komo hende hòmber?

⁴ Beibel ta mustra ku Yehova ta balorá tantu hende  muhé komo hende hòmber. Por ehèmpel, den promé siglo, Yehova Dios a drama su spiritu santu riba tantu hende muhé komo hende hòmber. Esei a pone ku nan por a hasi kosnan maravioso manera papia diferente idioma. (Echo. 2:1-4, 15-18) Tantu hende muhé komo hende hòmber a ser ungí ku spiritu santu pa reina ku Hesus den shelu. (Gal. 3:26-29) Tantu hende muhé komo hende hòmber lo biba pa semper akí riba tera. (Rev. 7:9, 10, 13-15) Anto tantu hende muhé komo hende hòmber tin ku prediká i siña hende e bon notisia. (Mat. 28:19, 20) Por ehèmpel, e buki di Echonan ta papia di Priskila. E huntu ku su esposo Akila a yuda Apolo, kende tabata un hòmber bon siñá, komprondé e bèrdat hopi mas mihó.—Echo. 18:24-26.

5. Kon Lukas 10:38, 39 i 42 ta mustra ku Hesus a respetá hende muhé?

⁵ Hesus a respetá hende muhé. E no a imitá e fariseonan. E fariseonan a menospresiá hende muhé. Nan no tabata papia ku hende muhé den públiko te pa nan splika nan tokante Skritura. Pero, Hesus sí a papia ku hende muhé tokante kosnan spiritual meskos ku el a hasi ku su otro disipelnan. * (Lesa Lukas 10:38, 39, 42.) Asta el a permití hende muhé kompañ’é ora e tabata bai prediká. (Luk. 8:1-3) Anto ta hende muhé el a duna e privilegio pa bai bisa su apòstelnan ku el a lanta for di morto.—Huan 20:16-18.

6. Kon Pablo a demostrá ku el a respetá hende muhé?

⁶ Apòstel Pablo a demostrá ku el a respetá hende muhé. Por ehèmpel, el a bisa Timoteo pa trata “hende muhé mas grandi manera ta [su] mama nan ta, i hende muhé mas yòn manera ta [su] ruman muhé nan ta.” (1 Tim. 5:1, 2) Ta bèrdat ku Pablo a hasi hopi esfuerso pa yuda Timoteo bira un kristian maduro. Pero, el a rekonosé ku ta Timoteo su mama i su wela ta esnan ku a siña Timoteo tokante “e skrituranan santu.” (2 Tim. 1:5; 3:14, 15) Ora el a skirbi e romanonan, el a asta kumindá algun ruman muhé na nan nòmber. Pablo no a djis tuma nota di loke e ruman muhénan ei a hasi, pero el a bisa tambe ku e tabata masha gradisidu pa tur e trabounan ku nan a hasi.—Rom. 16:1-4, 6, 12; Flp. 4:3.

7. Ki pregunta nos lo bai kontestá?

⁷ Manera e promé paragrafnan a mustra, niun kaminda Beibel no ta bisa ku ruman muhé ta inferior na ruman hòmber. Nos ruman muhénan semper ta kla pa yuda i nan ta stima e rumannan den kongregashon. E ansianonan ta keda kontentu pa e esfuerso ku e ruman muhénan ta hasi pa tin pas i union den e kongregashon. Pero esei ta lanta un par di pregunta: Dikon tin biaha Yehova ta ferwagt ku un ruman muhé mester tapa su kabes? Mirando ku ta ruman hòmber so por bira ansiano i sirbidó ministerial, esei ke men ku tur ruman hòmber ta kabes di e ruman muhénan den kongregashon?

8. Segun Efesionan 5:23, ta tur ruman hòmber ta kabes di ruman muhé den kongregashon? Splika.

⁸ E kontestá ta nò! Un ruman hòmber no ta kabes di tur ruman muhé den kongregashon; mas bien ta Kristu. (Lesa  Efesionan 5:23.) Den famia, esposo ta kabes di su esposa. Un yu hòmber batisá no ta kabes di su mama. (Efe. 6:1, 2) Anto den e kongregashon, e ansianonan tin un grado di outoridat tantu riba ruman muhé komo ruman hòmber. (1 Tes. 5:12; Heb. 13:17) Kiko awor di un ruman muhé soltera ku no ta biba ku su mayornan mas? E ta sigui respetá nan, pero su tata no ta su kabes mas. E ta respetá e ansianonan tambe, pero meskos ku e ruman hòmbernan den e kongregashon e tin un kabes: Hesus.

9. Dikon tin biaha un ruman muhé tin ku tapa su kabes?

⁹ Ta bèrdat ku Yehova a nombra ruman hòmber pa dirigí e kongregashon, i e no a duna ruman muhé e outoridat ei. (1 Tim. 2:12) Dikon el a hasi esei? Yehova a hasi esei pa tene su famia bon organisá. P’esei tambe el a hasi Hesus kabes di hende hòmber. Pues, si pa un motibu òf otro un ruman muhé mester hasi algu ku normalmente ta un ruman hòmber tin ku hasi, Yehova ta eksigí pa e tapa su kabes. * (1 Kor. 11:4-7) Yehova a pidi ruman muhénan pa hasi esaki no pa humiá nan, pero pa asina nan demostrá rèspèt na esnan ku Yehova a duna un grado di outoridat. Teniendo esei na mente, laga nos kontestá e siguiente pregunta: Ki outoridat kabesnan di famia i ansianonan tin?

10. Dikon un ansiano tin biaha ke pone regla pa e rumannan den kongregashon?

¹⁰ Ansianonan ta stima Kristu, i nan ta stima e karnénan ku Yehova i Hesus a  pidi nan kuida. (Huan 21:15-17) Ku bon intenshon, un ansiano por mira su mes komo tata di e rumannan den kongregashon. Kisas e ta pensa ku si un tata por pone regla pa protehá su famia, un ansiano tambe por pone regla pa protehá e rumannan den kongregashon. Anto algun ruman ta animá e tipo di pensamentu ei, ora nan pidi un ansiano tuma desishon pa nan. Pero, ansiano tin e mesun outoridat ku kabes di famia?

11. Ki similaridat tin entre e outoridat di kabes di famia i esun di ansiano?

¹¹ Apòstel Pablo a indiká ku tin algun similaridat entre e outoridat di kabes di famia i esun di ansiano. (1 Tim. 3:4, 5) Por ehèmpel, Yehova ke pa esposa i yunan obedesé e kabes di famia. (Kol. 3:20) Anto e ke pa e rumannan den kongregashon obedesé e ansianonan. Yehova ta ferwagt pa tantu kabes di famia komo ansiano perkurá pa e nesesidatnan spiritual i emoshonal di esnan bou di nan kuido. Anto meskos ku un bon kabes di kas, ansianonan tambe ta hasi sigur ku e rumannan ku ta bou di nan kuido ta haña yudansa den tempunan difísil. (Sant. 2:15-17) Ademas, Yehova ta ferwagt ku ansiano i kabes di famia ta yuda otronan obedesé Yehova  su normanan. El a spièrta nan tambe pa “no bai mas leu di loke ta pará skirbí” den Beibel.—1 Kor. 4:6.

12-13. Segun Romanonan 7:2, ki diferensia tin entre e outoridat di kabes di famia i esun di ansiano?

¹² Sinembargo, tin diferensia grandi entre e outoridat di ansiano i esun di kabes di famia. Yehova a pidi ansiano, no kabes di famia, pa ta hues den kongregashon. El a duna e ansianonan e responsabilidat pa saka e pekadónan ku no ke arepentí for di e kongregashon.—1 Kor. 5:11-13.

¹³ Di otro banda, Yehova a duna kabes di famia outoridat pa hasi sierto kosnan ku ansianonan no por hasi. Un di e kosnan ei ta ku kabesnan di famia tin e outoridat pa pone regla pa nan famia i hasi sigur ku nan ta kumpli kuné. (Lesa Romanonan 7:2.) Por ehèmpel, un kabes di famia tin derecho di disidí kuant’or su yunan tin ku yega kas anochi. Anto e tin derecho di disipliná su yunan si nan no obedesé e regla ei. (Efe. 6:1) Pero ta klaru ku si e ta stima su famia, lo e papia ku su esposa promé ku e disidí ki regla pa pone pa e famia. Pasobra kon ku bai bini nan dos ta “ún karni.” *—Mat. 19:6.

14. (a) Kon Marko 10:45 ta yuda bo komprondé ku Yehova tabatin bon motibu pa hasi Hesus kabes di e kongregashon? (b) Ki responsabilidat Kuerpo Gobernante tin? (Wak e kuadro “ Responsabilidat di Kuerpo Gobernante.”)

¹⁴ Mediante e reskate, Yehova a kumpra bida di kada ruman den e kongregashon  i di tur hende ku lo demostrá fe den Kristu. (Lesa Marko 10:45; Echo. 20:28; 1 Kor. 15:21, 22) Komo ku Hesus a muri pa nos, ta lógiko ku Yehova a hasi Hesus kabes di e kongregashon. Debí ku Hesus ta nos kabes, e tin outoridat pa pone regla pa tur hende, tur famia i henter e kongregashon. I e tin outoridat pa hasi sigur ku nos ta obedesé e reglanan ei. (Gal. 6:2) Hesus ta hasi mas ku djis pone regla. E ta stima i ta kuida kada un di nos.—Efe. 5:29.

15-16. Kiko bo ta siña for di loke Marley i Benjamin a bisa?

¹⁵ Ruman muhénan ta demostrá ku nan ta respetá Kristu ora nan sigui e guia di e ansianonan ku t’ei pa kuida nan. Hopi ruman muhé ta di akuerdo ku Marley, un ruman muhé ku ta biba na Merka. El a bisa: “Mi ta ègt balorá mi lugá komo esposa den famia i ruman muhé den kongregashon. Aunke kada bes mi tin ku hasi esfuerso pa respetá e outoridat ku Yehova a duna mi esposo i e ansianonan, nan ta hasié fásil pa mi pasobra nan ta respetá mi, i nan ta gradisidu pa e trabou ku mi ta hasi.”

¹⁶ Ruman hòmbernan ta demostrá ku nan ta apoyá Yehova su areglo di outoridat ora nan ta respetá ruman muhénan. Benjamin, un ruman hòmber ku ta biba na Inglatera, a bisa: “Mi ta siña hopi for di e komentarionan di e ruman muhénan, i di nan sugerensianan tokante kon pa studia mihó i kon pa haña mas éksito den sirbishi. Mi ta ègt balorá e trabou ku nan ta hasi.”

17. Kiko ta pasa ora nos respetá e echo ku Yehova a duna algun persona outoridat?

¹⁷ Ora tur hende den kongregashon—hòmber, muhé, kabes di famia i ansiano—komprondé i respetá e echo ku Yehova a duna algun persona outoridat, lo tin pas den kongregashon. I mas importante ainda, nos lo duna gloria i onor na nos Tata selestial, Yehova, ku ta stima nos mashá.—Sal. 150:6.