E palabra “amèn” ta nifiká “sea asina,” òf “bèrdat.” E ta bini for di un palabra hebreo ku ta nifiká “sea fiel,” “sea konfiabel.” Tin biaha hende tabata usa e palabra ei ora tabatin kaso den korte. Despues ku un persona a hura, e tabata bisa “amèn” pa konfirmá ku loke el a bisa tabata korekto i ku lo el a aseptá e konsekuensianan di loke el a bisa. (Num. 5:22) Ora el a bisa “amèn” públikamente, e tabatin mas motibu pa kumpli ku su palabra.—Neh. 5:13.

Na Deuteronomio kapítulo 27, nos ta haña un ehèmpel sobresaliente di e uso di e palabra “amèn.” Despues ku e israelitanan a drenta e Tera Primintí, nan mester a reuní entre Seru Ebal i Seru Gerizim pa skucha lesamentu di e Lei. Nan a bai einan no solamente pa skucha e Lei sino tambe pa deklará ku nan tabata di akuerdo kuné i ku nan lo a kumpli kuné. Kon nan a deklará ku nan tabata di akuerdo? Nan a hasi esei ora nan a bisa “amèn” despues di a skucha kiko lo tabata e konsekuensianan si nan a desobedesé e Lei. (Deu. 27:15-26) Imaginá bo míles di hende hòmber, muhé i mucha bisando amèn huntu na bos haltu! (Hos. 8:30-35) Siguramente nan lo no a lubidá loke nan a bisa e dia ei. I e israelitanan a kumpli ku loke nan a primintí pasobra Beibel ta bisa: “Israel a sirbi SEÑOR tur e dianan di Hosue i tur e dianan di e ansianonan, kendenan a biba mas ku Hosue, i kendenan tabata konosé tur e echonan di SEÑOR ku el a hasi pa Israel.”—Hos. 24:31.

Hesus a usa “amèn” tambe pa konfirmá ku loke el a bisa ta bèrdat, pero el a hasi esaki na un manera úniko. En bes di usa e palabra “amèn” despues ku un otro persona a bisa algu, Hesus a bisa “amèn” promé ku e mes a bisa algu pa enfatisá ku loke e tabata bai bisa ta bèrdat. (Den tal kaso, nan sa tradusí e palabra “amèn”  komo “di bèrdat.”) Tin biaha Hesus tabata ripití e palabra ei, bisando “amèn amèn,” ku ta ser tradusí komo “di bèrdat bèrdat.” (Mat. 5:18; Huan 1:51) Di e manera ei, Hesus a sigurá su oyentenan ku su palabranan tabata e bèrdat apsoluto. Hesus por a papia ku e siguransa ei pasobra e tabata e úniko ku por a kumpli ku tur Dios su promesanan.—2 Kor. 1:20; Rev. 3:14.

E israelitanan tabata bisa “amèn” tambe ora nan tabata alabá Yehova i hasi orashon na dje. (Neh. 8:6; Sal. 41:13) Ora nan tabata bisa “amèn” despues di un orashon, nan tabata mustra ku nan tabata di akuerdo ku loke a ser bisá. Di e manera ei, tur hende por a partisipá i asina disfrutá di nan adorashon na Yehova. Esei ta loke a pasa ora Rei David a hiba e Arka di Yehova na Herúsalèm. Durante e selebrashon ku a sigui despues, David a hasi un orashon sinsero na Yehova den forma di un kantika. (1 Kró. 16:8-36) E hendenan presente tabata asina konmoví pa e palabranan di David ku “henter e pueblo a bisa: ‘Amèn,’ i a alabá SEÑOR.” Sí, nan tabata kontentu pa sirbi Yehova huntu.

Ademas, e kristiannan di promé siglo tabata usa “amèn” ora nan tabata adorá Yehova. Hopi eskritor di Beibel tabata inkluí e palabra ei den nan kartanan. (Rom. 1:25; 16:27; 1 Ped. 4:11) E buki di Revelashon ta menshoná kon angel den shelu ta duna gloria na Dios bisando: “Amèn! Alabá Yah!” (Rev. 19:1, 4) E promé kristiannan tabatin e kustumber di bisa “amèn” despues di orashon na nan reunionnan. (1 Kor. 14:16) Pero, nan no mester a bisa e palabra ei sin pensa.

Despues di a analisá kon Yehova su sirbidónan a usa e palabra “amèn,” nos por mira ku ta masha importante pa bisa “amèn” na final di un orashon. Si nos bisa “amèn” na final di nos mes orashon, nos ta mustra ku nos ta sinsero. I si na final di un otro hende su orashon nos sinti nos motivá pa bisa “amèn,” asta si ta den silensio, nos ta  demostrá ku nos ta di akuerdo ku loke a ser bisá. Laga nos wak algun motibu mas dikon ta importante pa bisa “amèn.”

Orashon ta parti di nos adorashon, i ora nos bisa “amèn” nos ta mustra ku nos ta presta atenshon. Nos ta adorá Yehova no solamente ora nos bisa amèn, sino tambe pa medio di nos kondukta durante orashon. Komo ku nos ke ta sinsero ora nos bisa “amèn,” nos lo presta bon atenshon na loke ta ser bisá den orashon.

Ora nos bisa “amèn,” esei ta yuda nos keda uní komo adoradó di Yehova. Durante un orashon públiko, tur hende den e kongregashon ta skucha e mesun mensahe. (Echo. 1:14; 12:5) Nos ta fortalesé nos union ora nos sinti nos motivá pa bisa “amèn” huntu ku nos rumannan. Ora nos bisa “amèn” huntu, sea na bos haltu òf den silensio, nos orashon por motivá Yehova mas ainda pa kontestá nos petishonnan.

Nos ta alabá Yehova. Yehova ta tuma nota di tur loke nos ta hasi pa ador’é. (Luk. 21:2, 3) E ta mira kiko ta nos motivashonnan i kiko tin den nos kurason. Asta si nos tin ku skucha e reunion via telefòn, nos por tin sigur ku Yehova ta tuma nota di nos “amèn” sinsero. Den un situashon asina, nos “amèn” ta parti di e alabansa ku e kongregashon ta ofresé na Yehova.

Nos “amèn” por parse di poko balor, pero nos por tin sigur ku e ta importante. E ensiklopedia di Beibel, Perspicacia para comprender las Escrituras, ta bisa ku tur sirbidó di Dios por ekspresá “e konfiansa, aprobashon fuerte i speransa profundo ku tin den nan kurason mediante uso di e palabra akí.” Pues, laga nos ta determiná pa usa e palabra “amèn” na un manera ku ta agradá Yehova.—Sal. 19:14.