NOS tur ke pa hende mira nos komo bon hende. Pero, no ta fásil pa desplegá bondat den e mundu akí. Hopi hende ta “sin amor pa loke ta bon.” (2 Tim. 3:3) Nan ta rechasá Yehova su normanan, i nan “ta yama loke ta malu, bon, i loke ta bon, malu.” (Isa. 5:20) Ademas, debí na nos imperfekshonnan i mal eksperensianan di pasado, por ta difísil pa nos desplegá e kualidat akí. Pues, nos por sinti meskos ku Anne, * un ruman muhé ku a sirbi Yehova pa hopi aña. El a bisa: “Ta difísil pa mi kere ku mi por ta un bon hende.”

Afortunadamente, nos tur por kultivá bondat! E kualidat ei ta bini for di Yehova su spiritu santu i e spiritu ei ta mas poderoso ku kualke opstákulo, sea ku ta influensia di e mundu rònt di nos, nos mes imperfekshonnan òf nos pasado. Laga nos analisá e kualidat bondat mas di aserka i wak kon nos por desplegá e kualidat ei mas mihó.

Simplemente, bondat ta duna e idea di ekselensia moral i birtut. Ku otro palabra, un persona ku tin e kualidat ei ta un bon hende; e no tin nada malu ni korupto den dje. Un persona ku ta demostrá bondat semper ta buska manera pa yuda otro hende i pa hasi bon pa nan.

Probablemente nos konosé algun hende ku ta dispuesto pa hasi bon pa nan famia- i amigunan. Pero, akaso esei so ta sufisiente? Ta bèrdat ku ta difísil pa nos desplegá bondat na un manera perfekto pasobra Beibel ta bisa ku “no tin hende hustu riba tera ku kontinuamente ta hasi bon i nunka ta peka.” (Ekl. 7:20) Apòstel Pablo a atmití: “Mi sa ku no tin nada bon ta biba den mi, esta, den mi karni.” (Rom. 7:18) Pues, ta lógiko ku si nos ke desplegá bondat, nos mester bai na su Fuente, esta, Yehova.

Yehova Dios ta esun ku ta determiná loke ta bon. Beibel ta bisa di Yehova: “Bo ta bon i ta hasi bon; siña mi bo statutonan.” (Sal. 119:68) Laga nos wak dos aspekto di Yehova su bondat menshoná den e versíkulo ei.

Yehova ta bon. Bondat ta un parti esensial di Yehova su personalidat. Wak kiko a pasa ora Yehova a bisa Moises: “Ami mes lo laga tur mi bondat pasa bo dilanti.” Yehova a mustra Moises su gloria, inkluso su bondat. Moises a tende un stèm ku a deskribí Yehova asina akí: “SEÑOR, SEÑOR Dios, yen di kompashon i grasia, kende no ta rabia lihé i kende ta abundá den miserikòrdia i bèrdat; kende ta mantené miserikòrdia pa milnan, kende ta pordoná inikidat, transgreshon i piká; sinembargo, di ningun manera e lo no laga di kastigá e kulpabel.” (Éks. 33:19; 34:6, 7) Pues, nos por komprondé ku Yehova ta bon den tur sentido. Ora Hesus a biba komo hende riba tera, el a pone e mihó ehèmpel di bondat. Asina mes, el a bisa: “Ningun hende no ta bon, sino ún so, Dios.”—Luk. 18:19.

Yehova ta hasi bon. Yehova su bondat ta bisto den tur loke e ta hasi. Beibel ta bisa: “SEÑOR ta bon pa tur, i su miserikòrdianan ta riba tur su  obranan.” (Sal. 145:9) Yehova ta demostrá bondat na un manera imparsial; e ta duna tur hende bida i loke nan mester pa keda na bida. (Echo. 14:17) E ta mustra su bondat tambe ora e ta pordoná nos. E salmista a skirbi: “Abo, SEÑOR, ta bon, i kla pa pordoná.” (Sal. 86:5) Nos por tin sigur ku Yehova “no ta keda sin duna loke ta bon na esnan ku ta kana den rektitut.”—Sal. 84:11.

Yehova a krea nos den su imágen, pues nos por imit’é. Esei ta nifiká ku nos por ta bon hende i nos tin e kapasidat di hasi loke ta bon. (Gén. 1:27) Pero, esaki no ta bai outomátikamente. Yehova ta bisa ku nos mester ‘siña hasi bon.’ (Isa. 1:17) Kon nos por kultivá e kualidat bunita ei? Tin tres manera ku nos por hasi esei.

Di promé, nos por hasi orashon i pidi pa spiritu santu. Ku yudansa di spiritu santu nos por ta bon hende den bista di Dios. (Gal. 5:22) Sí, Yehova su spiritu santu por yuda nos stima loke ta bon i rechasá loke ta malu. (Rom. 12:9) De echo, Beibel ta bisa ku Yehova por “fortalesé [nos] den tur bon obra i bon palabra.”—2 Tes. 2:16, 17.

Di dos, nos mester lesa e Palabra inspirá di Dios. Segun ku nos ta hasi esei, Yehova por instruí nos den “tur bon kaminda” i ekipá nos “pa tur bon obra.” (Pro. 2:9; 2 Tim. 3:17) Nos kurason ta manera un kaha di tesoro. Ora nos lesa Beibel i meditá riba loke nos ta lesa, nos ta pone loke ta bon den nos kurason. Ta komo si fuera nos ta yena nos kaha di tesoro ku hopi kos presioso ku por yuda nos despues.—Luk. 6:45; Efe. 5:9.

Di tres, nos por hasi nos bèst pa “imitá . . . loke ta bon.” (3 Huan 11) Den Beibel tin hopi ehèmpel ku nos por imitá. Ta klaru ku Yehova i Hesus ta e mihó ehèmpelnan ku nos por imitá. Pero, tabatin otro hende den Beibel ku tambe tabata konosí komo bon hende. Kisas nos por pensa riba Tabita i Bárnabas. (Echo. 9:36; 11:22-24) Si nos studia tokante nan, nos por benefisiá di nan bunita ehèmpel. Segun ku nos ta studia, nos mester tuma nota di loke nan a hasi pa yuda otro hende. Kisas nos por pensa riba algun hende den nos famia i kongregashon ku nos por yuda. Ademas, nos por pensa riba e benefisionan ku Tabita i Bárnabas a risibí ora nan a hasi bon pa otro hende. Nos tambe por benefisiá meskos ku nan.

Nos por pensa tambe riba hende awe ku ta hasi loke ta bon. Tuma por ehèmpel e ansianonan di kongregashon ku ta traha duru i ku ta “stimadó di loke ta bon.” Ademas, nos no mester lubidá nos ruman muhénan fiel. Nan ta demostrá den loke nan ta bisa i hasi ku nan ta “maestra di loke ta  bon.” (Tito 1:8; 2:3) Un ruman muhé ku yama Roslyn a bisa: “Mi amiga ta hasi èkstra esfuerso pa yuda i animá e rumannan den kongregashon. E ta pensa riba nan situashon i ta duna nan regalo chikitu òf ta buska otro manera práktiko pa yuda nan. Ami ta pensa ku e ta realmente un bon hende.”

Yehova ta animá su pueblo pa “buska bondat.” (Ámos 5:14) Segun ku nos ta buska bondat i hasi loke ta bon, nos lo kuminsá stima Yehova su normanan i nos lo tin mas gana di hasi loke ta bon.

Nos no mester pensa ku nos tin ku hasi kos impreshonante òf duna regalo karu pa mustra ku nos ta bon hende. Pensa riba un kuadro. Un pintor no ta djis pasa su kuashi un òf dos biaha i e kuadro ta kla. E mester pasa su kuashi vários biaha ku hopi pasenshi pa e por haña un kuadro bunita. Di mes manera, nos por demostrá bondat si nos hasi vários kos chikitu pa otro hende.

Beibel ta animá nos pa ta “prepará” i “kla” pa hasi bon obra. (2 Tim. 2:21; Tito 3:1) Si nos ta atento na e sirkunstansianan di otro hende, nos lo por mira algun manera pa “nos agradá [nos] próhimo pa su bon i pa fortales’é.” (Rom. 15:2) Esei ta enserá kompartí algu ku nos tin. (Pro. 3:27) Por ehèmpel, nos por invitá un hende pa bin kome algu simpel serka nos òf pa pasa tempu huntu i animá otro. Si nos sa ku un hende ta malu, nos por bishit’é, yam’é òf manda un karchi p’e. Sí, nos por buska hopi oportunidat pa bisa “loke ta bon pa edifiká segun e nesesidat di e momento” i pa “kompartí loke ta probechoso ku esnan ku ta tende.”—Efe. 4:29.

Meskos ku Yehova, nos ke buska manera pa hasi bon na tur hende. P’esei, nos ta trata hende na un manera imparsial. Un di e mihó maneranan ku nos por hasi esei ta di prediká. Hesus a bisa ku nos mester hasi bon asta na esnan ku ta odia nos. (Luk. 6:27) Nunka ta malu pa hasi bon na otro hende pasobra “kontra e tipo di kosnan ei no tin lei.” (Gal. 5:22, 23) Si nos hasi bon asta ora hende trata nos malu òf ora nos ta pasa den difikultat, nos por atraé hende na e bèrdat i duna gloria na Dios.—1 Ped. 3:16, 17.

Un bon hende “ta kosechá fruta di su mes echonan.” (Pro. 14:14, BPK) Kiko ta algun di e benefisionan di mustra bondat? Ora nos hasi bon na otro hende, probablemente nan tambe lo trata nos bon. (Pro. 14:22) Asta si otro hende no trata nos bon, nos mester sigui hasi loke ta bon pa nan. Komo resultado, kisas nan por kambia nan aktitut i trata nos mihó.—Rom. 12:20, nota.

Ora nos stòp di hasi loke ta malu i hasi loke ta bon, nos mes ta benefisiá. Hopi ruman a bisa ku esei ta nèt loke a pasa ku nan. Laga nos wak e ehèmpel di Nancy. El a bisa: “Tempu mi tabata yòn, mi tabata iresponsabel, mi tabata hiba un bida inmoral, i mi no tabatin rèspèt pa niun hende. Pero, segun ku mi tabata siña Yehova su normanan i apliká nan den mi bida, mi a kuminsá sinti mi mas felis. Awor mi tin mas dignidat i rèspèt propio.”

E motibu di mas importante pakiko nos tin ku kultivá bondat ta pasobra esei ta hasi Yehova felis. Asta si hopi hende no ta mira e bon kosnan ku nos ta hasi, Yehova sí ta mira nan. I e ta tuma nota tambe di nos bon pensamentunan. (Efe. 6:7, 8) Kon Yehova ta rekompensá nos? Beibel ta bisa: “Un bon hende lo risibí grasia serka SEÑOR.” (Pro. 12:2) Pues, laga nos sigui kultivá bondat. Yehova ta primintí ku “gloria, onor i pas lo bini pa tur hende ku ta hasi loke ta bon.”—Rom. 2:10.