1. Kiko ta un di e aspektonan mas bunita di Hesus su personalidat? Splika.

UN DI e aspektonan mas bunita di Hesus su personalidat ta su abilidat di komprondé e difikultatnan ku nos, komo hende imperfekto, ta enfrentá. Ora Hesus tabata riba tera, e tabata “alegrá ku esnan ku ta alegrá” i “yora ku esnan ku ta yora.” (Rom. 12:15) Por ehèmpel, ora su 70 disipelnan a bini bèk tur kontentu despues ku nan tabatin éksito den sirbishi, Hesus a “yena ku goso.” (Luk. 10:17-21) Di otro banda, ora Hesus a mira kon tristu Lázaro su famia tabata ora ku Lázaro a muri, Hesus “a suspirá profundamente i a keda masha konmoví.”—Huan 11:33.

2. Kiko a yuda Hesus mustra miserikòrdia i kompashon na hende imperfekto?

² Aunke Hesus tabata perfekto, el a mustra miserikòrdia i kompashon na hende imperfekto. Kiko a yud’é hasi esei? E motibu di mas importante tabata su amor pa hende. Manera nos a menshoná den e artíkulo anterior, su “delisia tabata den e yunan di hende.” (Pro. 8:31) Pues, amor a motivá Hesus pa buska pa haña sa kon hende ta pensa. Apòstel Huan a bisa: “E mes tabata sa kiko ta biba den kurason di hende.” (Huan 2:25) Hesus tabatin kompashon pa hende i nan por a sinti esei. P’esei, nan a skucha e mensahe di e Reino. Mas nos kultivá empatia pa hende, mas nos lo por yuda hende den sirbishi.—2 Tim. 4:5.

3-4. (a) Kon empatia pa hende ta motivá nos pa prediká? (b) Kiko nos lo trata den e artíkulo akí?

³ Apòstel Pablo tabata sa ku e mester a prediká, i nos tambe sa ku nos mester prediká. (1 Kor. 9:16) Pero, si nos tin empatia pa hende, nos lo prediká pasobra nos ta interesá den hende i nos ke yuda nan, i no djis pasobra nos  mester prediká. Nos sa ku “tin mas felisidat den duna ku den risibí.” (Echo. 20:35) Si e motibu ku nos ta prediká ta pa yuda hende, nos lo disfrutá mas di nos sirbishi.

⁴ Den e artíkulo akí, nos lo siña kon pa mustra empatia den sirbishi. Promé, nos lo bai wak kiko nos por siña for di e manera ku Hesus tabata mira hende. Despues, nos lo trata kuater manera ku nos por imitá su ehèmpel.—1 Ped. 2:21.

5-6. (a) Na ki okashon Hesus a mustra empatia? (b) Segun Isaías 61:1 i 2, dikon Hesus a haña duele di e hendenan ku el a prediká na dje?

⁵ Laga nos analisá kon na un okashon Hesus a mustra empatia. Hesus i su disipelnan tabata hopi kansá pasobra nan tabatin basta ratu ta prediká sin sosegá. Nan no a haña “ni sikiera chèns di kome.” Pues, Hesus a bai hiba su disipelnan “na un lugá solitario” pa “sosegá un poko.” Pero, un multitut grandi a kore bai i a yega einan promé ku nan. Kon Hesus a sinti ora el a yega einan i a mira e multitut, i kiko el a hasi? “El a haña duele * di nan, pasobra nan tabata manera karné sin wardadó. I el a kuminsá siña nan hopi kos.”—Mar. 6:30-34.

⁶ Dikon Hesus a haña duele di e hendenan ei òf a mustra empatia pa nan? El a ripará ku e hendenan ei “tabata manera karné sin wardadó.” Kisas Hesus a ripará ku algun di nan tabata pober i ku nan mester a traha hopi duru pa perkurá pa nan famia. Otronan kisas tabata tristu pasobra nan a pèrdè un ser kerí den morto. Si ta asina, Hesus por a komprondé nan situashon. Manera nos a menshoná den e artíkulo anterior, ta posibel ku Hesus mes a enfrentá algun di e problemanan ei. Hesus tabatin empatia pa hende, i e tabata sintié motivá pa konsolá nan.—Lesa Isaías 61:1, 2.

7. Kon nos por imitá Hesus?

 ⁷ Kiko nos ta siña for di Hesus su ehèmpel? Meskos ku Hesus, nos ta rondoná di hende ku ta “manera karné sin wardadó.” Nan tin hopi problema. I nos tin loke nan mester—e mensahe di e Reino. (Rev. 14:6) Pues, meskos ku Hesus, nos ta prediká e bon notisia pasobra nos “tin kompashon di e pober i di esun den nesesidat.” (Sal. 72:13) Nos tin duele di hende, i nos ke hasi algu pa yuda nan.

8. Kiko ta un manera ku nos por mustra empatia pa hende ora nos ta prediká? Duna un ehèmpel.

⁸ Kiko por yuda nos mustra empatia pa hende ora nos ta prediká? Nos ke pone nos mes den sapatu di hende ku nos topa den sirbishi i nos ke trata nan manera nos lo ke pa hende trata nos si nos tabata den nan situashon. * (Mat. 7:12) Laga nos trata kuater manera spesífiko ku nos por hasi esei. Di promé, pensa riba e nesesidat di kada persona. Nos por kompará nos trabou di prediká ku trabou di un dòkter. Un bon dòkter ta pensa riba e nesesidat di kada pashènt. E ta hasi pregunta i ta skucha ku atenshon segun ku e pashènt ta deskribí loke e ta sinti. E dòkter no ta djis preskribí e promé tratamentu ku bini na su mente. En bes di esei, e ta buska pa sa kiko e problema ta, i despues e ta preskribí e tratamentu korekto. Di mes manera, nos no mester usa e mesun presentashon ku kada persona ku nos haña den sirbishi. Mas bien, nos mester purba di komprondé e sirkunstansia i punto di bista di kada persona.

9. Kiko nos no mester hasi ora nos topa un hende den sirbishi? Splika.

⁹ Ora nos topa un hende den sirbishi, nos no mester pensa ku nos sa kiko su sirkunstansia ta òf kiko su kreensianan ta. (Pro. 18:13) Mas bien, nos mester hasi pregunta ku takto pa konosé e persona i haña sa kiko ta su kreensianan i dikon e ta kere esei. (Pro. 20:5) Si ta aseptabel den bo kultura, puntra e persona tokante su trabou, famia, background i punto di bista. Ora nos hasi hende pregunta, ta komo si fuera nan mes ta bisa nos dikon nan tin mester di e bon notisia. Unabes ku nos sa esei, nos por mustra empatia i duna kada un di nan e yudansa ku nan tin mester.—Kompará ku 1 Korintionan 9:19-23.

10-11. Segun 2 Korintionan 4:7 i 8, kiko ta e di dos manera ku nos por mustra empatia? Duna un ehèmpel.

¹⁰ Di dos, purba di imaginá kon nan bida ta. Den un sentido, nos por komprondé nan situashon. Al fin i al kabo,  nos tur ta imperfekto i nos tambe tin problema. (1 Kor. 10:13) Nos sa ku bida den e sistema akí por ta hopi difísil. Ku Yehova su yudansa so nos por perseverá. (Lesa 2 Korintionan 4:7, 8.) Pero, pensa kon difísil lo ta pa hende sobrebibí den e mundu akí sin Yehova su yudansa. Meskos ku Hesus, nos ta haña duele di nan, i nos ta sinti nos motivá pa konta nan e ‘bon notisia di felisidat.’—Isa. 52:7.

¹¹ Laga nos wak un ehèmpel di un ruman hòmber ku yama Sergey. Promé ku Sergey a haña e bèrdat, e tabata hopi tímido i ketu. Pa Sergey tabata hopi difísil pa e papia ku otro hende. Ku tempu, el a aseptá un estudio di Beibel. Sergey a bisa: “Segun ku mi tabata studia Beibel, mi a siña ku tur kristian tin un obligashon pa kompartí nan fe ku otro hende. I mi a ègt pensa ku lo mi no por a hasi esei.” Pero, Sergey a pensa riba tur e hendenan ku ainda no a tende e bèrdat. El a realisá ku nan bida mester ta hopi difísil pasobra nan no konosé Yehova. El a bisa: “E kosnan nobo ku mi tabata siña, tabata hasi mi felis i duna mi pas mental. Mi tabata sa ku otro hende tambe mester a siña e bèrdat.” Sergey a kuminsá sinti mas empatia pa hende, i komo resultado el a haña mas kurashi pa prediká. El a sigui bisa: “Pa mi sorpresa, mi a bira ménos tímido segun ku mi tabata papia ku hende tokante Beibel. I ora mi tabata papia ku hende tokante mi kreensianan, mi fe a bira mas fuerte.” *

12-13. Dikon nos mester tene pasenshi ku hende ku nos ta siña den sirbishi? Duna un ehèmpel.

¹² Di tres, tene pasenshi ku e hendenan ku bo ta siña. Kòrda bon, kisas ta promé biaha nan ta tende e bèrdatnan di Beibel ku nos konosé asina bon. I hopi hende ta ègt konvensí di loke nan ta kere. Kisas nan ta sinti ku nan religion ta yuda nan keda será ku nan famia i komunidat i ku nan religion ta parti di nan kultura. Kon nos por yuda nan?

 ¹³ Pensa riba e siguiente ehèmpel: Kiko hende ta hasi pa kambia un brùg ku ta bieu i den mal kondishon? Mayoria di biaha nan ta traha un brùg nobo banda di esun bieu. Miéntras tantu, hende por sigui usa esun bieu. Unabes ku e brùg nobo ta kla, nan por basha esun bieu abou. Di mes manera, promé ku nos pidi hende pa bandoná nan kreensianan “bieu” ku ta hopi presioso pa nan, nos mester yuda nan apresiá e bèrdatnan “nobo” ku kisas nunka nan no a yega di tende promé. Asina so nan lo por bandoná e kreensianan ku nan tabatin promé. No ta fásil pa hende hasi e tipo di kambionan ei, i esei ta tuma tempu.—Rom. 12:2.

14-15. Kon nos por yuda hende ku no sa nada òf kasi nada di e speransa di biba pa semper den Paradeis riba tera? Duna un ehèmpel.

¹⁴ Si nos tin pasenshi ku hende den sirbishi, nos lo no ferwagt ku nan ta komprondé òf aseptá un bèrdat di Beibel asina ku nan tend’é. En bes di esei, empatia lo motivá nos pa tuma tempu i usa Beibel pa rasoná ku nan. Por ehèmpel, kon nos por rasoná ku un persona riba e speransa di biba pa semper den Paradeis riba tera? Mayoria di hende no sa nada òf kasi nada di e speransa ei. Nan ta pensa ku morto ta fin di tur kos. Òf nan ta pensa ku tur bon hende ta bai shelu. Kon nos por yuda nan?

¹⁵ Laga nos wak kon un ruman hòmber ta yuda hende komprondé e speransa di biba pa semper riba tera. Promé, e ta lesa Génesis 1:28. Despues, e ta puntra e doño di kas unda Dios tabata ke pa hende biba i ki tipo di bida e tabata ke pa nan tin. Hopi hende ta kontestá: “Dios tabata ke pa hende tin un bida felis riba tera.” E ora ei, e ruman ta lesa Isaías 55:11, i e ta puntra e persona si Dios su propósito a kambia. Mayoria di hende ta kontestá: “Nò.” Finalmente, e ruman ta lesa Salmo 37:10 i 11, i e ta puntra e persona kon hende su futuro lo ta. Di e manera ei, e ruman a yuda hopi hende komprondé, mediante Beibel, ku ainda Dios ke pa hende biba pa semper den Paradeis riba tera.

16-17. Segun Proverbionan 3:27, kiko ta algun manera práktiko ku nos por mustra empatia? Duna un ehèmpel.

¹⁶ Di kuater, buska manera práktiko pa mustra empatia. Por ehèmpel, kiko si nos yama na un kas pero e doño di kas ta bisa ku awor no ta un bon momento? Nos por pidi despensa i bisa ku nos lo pasa un otro biaha. Pero kiko si e doño di kas mester di yudansa ku algu chikitu? Òf kiko si un hende mester di yudansa pasobra su salú òf edat no ta permitié sali for di kas? Den e tipo di situashonnan ei, nos por yuda nan.—Lesa Proverbionan 3:27.

 ¹⁷ Por ehèmpel, un ruman muhé tabatin bon resultado ora el a hasi un akto di bondat ku no a parse importante. Empatia a motiv’é pa skirbi un karta pa un famia ku a kaba di pèrdè nan yu den morto. Den e karta, el a skirbi algun teksto ku lo por a konsolá e famia. Kon e famia a reakshoná? E mama a bisa: “Ayera mi tabata hopi tristu. Bo no por imaginá bo kon bo karta a yuda nos. Mi ta hopi gradisidu pa bo karta ku a konsolá nos mashá. Ayera mi a les’é mas ku 20 biaha. Mi no por a kere kon amoroso i animante e karta tabata. Nos ta gradisí bo ku henter nos kurason.” Sin duda, nos por tin bon resultado si nos pone nos mes den sapatu di hende ku ta sufri i hasi algu pa yuda nan.

18. Segun 1 Korintionan 3:6 i 7, ki punto di bista balansá nos mester tin di nos sirbishi?

¹⁸ Aunke nos trabou den sirbishi ta importante i nos tin ku hasi nos bèst pa yuda hende konosé Dios, no ta nos ta hasi e parti mas importante, sino Yehova. P’esei, nos tin ku mantené un punto di bista balansá di nos sirbishi. (Lesa 1 Korintionan 3:6, 7.) Yehova ta esun ku ta hala hende serka dje. (Huan 6:44) Al fin i al kabo, ta un persona su kurason ta determiná si lo e aseptá òf rechasá e bon notisia. (Mat. 13:4-8) Kòrda ku Hesus tabata e mihó Maestro ku hamas a biba! Asina mes, mayoria di hende no a aseptá su mensahe. Pues, nos no mester desanimá si hopi di e hendenan ku nos purba di yuda no skucha nos mensahe.

19. Kiko lo ta e resultado si nos mustra empatia pa hende den sirbishi?

¹⁹ Kiko lo ta e resultado si nos mustra empatia pa hende den sirbishi? Nos lo disfrutá mas di e trabou di prediká, i nos lo mira ku tin mas felisidat den duna. Ademas, lo ta mas fásil pa esnan ku ta “dispuesto pa aseptá e bèrdat ku ta hiba na bida eterno . . . bira kreyente.” (Echo. 13:48) Pues, “tanten ku nos tin e oportunidat, laga nos hasi loke ta bon pa ku tur hende.” (Gal. 6:10) E ora ei nos lo tin e goso di duna gloria na nos Tata ku ta den shelu.—Mat. 5:16.