1-2. Segun Echonan 8:27-31 i 35-38, kiko a motivá e ofisial di Etiopia pa batisá?

ABO tin gana di batisá i bira un disipel di Kristu? Hopi hende ya a tuma e desishon ei. Loke a motivá nan ta amor i gratitut pa Yehova. Laga nos analisá e ehèmpel di un ofisial ku tabata traha pa e reina di Etiopia.

² E ofisial ei a batisá asina ku el a komprondé for di e Skritura ku ta esei e mester a hasi. (Lesa Echonan 8:27-31, 35-38.) Kiko a motiv’é? Wèl, ta opvio ku el a stima e Palabra di Dios; e tabata lesando algun versíkulo for di e buki di Isaías segun ku e tabata biahando den su garoshi. Ademas, e splikashon ku Felipe a dun’é a pone ku e tabata gradisidu pa loke Hesus a hasi p’e. Nos sa ku e tabata stima Yehova pasobra el a kaba di ador’é na Herúsalèm. Aparentemente el a bandoná e religion ku el a nase aden i a djòin e úniko nashon ku tabata dediká na e Dios berdadero. Pues, ta e mesun amor pa Yehova ei a motiv’é pa dal un otro paso importante: batisá i bira un disipel di Kristu.—Mat. 28:19.

3. Kiko por stroba un hende di batisá? (Wak e kuadro “ Ki Tipo di Tera Bo Kurason Ta?”)

³ Amor pa Yehova por motivá bo pa batisá. Pero amor tambe por stroba bo di dal e paso ei. Kon asina? Wak algun ehèmpel. Kisas bo ta stima bo famia- i amigunan ku no ta Testigu mashá i bo tin miedu ku si bo batisá, nan lo no keda kontentu ku bo. (Mat. 10:37) Òf tal bes bo ta gusta algun hábito ku bo sa ku Dios ta odia, i bo ta haña  ku no ta fásil pa stòp ku nan. (Sal. 97:10) Òf for di chikitu bo ta selebrá sierto fiesta i kustumber ku tin di haber ku religion falsu. Bo ta gusta e dushi rekuerdo ku bo tin di nan i esei ta pone ku bo ta haña ku ta difísil pa stòp ku e selebrashonnan ei. (1 Kor. 10:20, 21) P’esei, puntra bo mes: “Ken òf kiko mi ta stima mas?”

4. Kiko ta e kos di mas importante ku mester motivá bo pa batisá?

⁴ Promé ku bo a studia ku Testigunan di Yehova kisas bo a respetá Beibel i a kultivá un amor pa Hesus. Anto awor ku bo a bin konosé Testigunan di Yehova, kisas bo ta gusta pasa tempu ku nan. Sin duda, bo ta stima e kosnan ei i ta gradisidu pa nan. Pero, amor pa e kosnan ei no nesesariamente lo motivá bo pa dediká bo mes na Yehova i batisá. E kos di mas importante ku lo motivá bo pa batisá ta: amor pa Yehova Dios. Ora bo ta stim’é mas ku tur otro kos, lo bo no laga nada ni niun hende stroba bo di sirbié. Pues, bo amor pa Yehova lo pone bo haña gana di batisá, i e amor ei tambe lo yuda bo keda riba e kaminda di e bèrdat.

5. Kiko nos lo siña den e artíkulo akí?

⁵ Hesus a bisa ku nos mester stima Yehova ku henter nos kurason, alma, mente i forsa. (Mar. 12:30) Kon bo por kultivá un amor i rèspèt asina pa Yehova? Wèl, ora nos meditá riba e amor ku e tin pa nos, esei lo konmové nos pa stim’é tambe. (1 Huan 4:19) Pues, den e artíkulo akí lo bo haña sa kiko bo tin ku hasi pa bo amor pa Yehova bira mas fuerte i pa bo yega na boutismo.

6. Segun Romanonan 1:20, kon bo por siña tokante Yehova?

⁶ Siña tokante Yehova pa medio di kreashon. (Lesa Romanonan 1:20; Rev. 4:11) Pensa riba e sabiduria ku Yehova a usa pa krea mata i animal. Investigá un poko tokante e manera maravioso ku kurpa humano ta funshoná. (Sal. 139:14) Anto meditá riba kuantu poder Yehova a pone den solo, ku ta djis un di e míles di miónes di streanan. * (Isa. 40:26) Ora bo hasi esei, lo bo ripará ku bo rèspèt pa Yehova lo oumentá. Pero, e echo ku bo sa ku Yehova ta sabí i poderoso ta djis un parti di e fundeshi di bo amistat kuné. Pa bo por fortalesé bo amor pa Yehova i bira su bon amigu, bo mester siña mas tokante dje.

7. Di kiko bo mester ta konvensí pa bo amor pa Yehova ta fuerte?

⁷ Bo mester ta konvensí ku Yehova di bèrdat ta stima bo. Bo ta haña ku ta difísil pa kere ku e Kreador di shelu i tera sa ku bo ta eksistí i ku e ta interesá den bo? Si ta asina, kòrda ku Yehova “no ta masha leu for di kada un di nos.” (Echo. 17:26-28) E “ta skudriñá tur kurason,” i e ta primintí bo ku “si bo busk’é, lo e laga bo hañ’é.” (1 Kró. 28:9) De echo, si bo ta studiando Beibel ta pasobra Yehova “a hala bo,” manera Yeremías 31:3 ta bisa. Mas bo komprondé tur loke Yehova a hasi pa bo, mas lo bo stim’é.

8. Kon bo por demostrá bo gratitut pa Yehova su amor?

⁸ Un manera pa demostrá bo gratitut pa Yehova su amor ta di papia kuné. Bo  amor pa Dios lo krese ora bo kont’é tur bo preokupashonnan i gradisié pa e bon kosnan ku el a hasi pa bo. I bo amistat kuné lo bira mas fuerte segun ku bo ta mira kon e ta kontestá bo orashonnan. (Sal. 116:1) Esei lo laga bo bira mas konvensí ainda ku e ta komprondé bo. Pero, pa bo bira bon amigu di Yehova, bo mester komprondé su manera di pensa i haña sa loke e ta ferwagt di bo. E úniko manera pa logra esei ta di studia su Palabra, Beibel.

9. Kon bo por demostrá ku bo ta balorá Beibel?

⁹ Balorá e Palabra di Dios, Beibel. Ta Beibel so tin e bèrdat tokante Yehova i loke e ta deseá pa bo. Kon bo por demostrá ku bo ta balorá Beibel? Esei ta ora bo ta les’é tur dia, prepará pa bo estudio di Beibel i apliká loke bo ta siña. (Sal. 119:97, 99; Huan 17:17) Bo tin un skèdjel pa lesa Beibel tur dia? I bo ta hasi sigur di pega na dje?

10. Kiko ta un kos úniko di Beibel?

¹⁰ Un kos úniko di Beibel ta ku e ta kontené relato di hende ku a mira Hesus ku nan propio wowo. E ta e úniko buki ku ta splika ku eksaktitut loke Hesus a hasi pa bo. Segun ku bo ta siña loke Hesus a hasi i bisa, sin duda lo bo haña gana di bira su amigu.

11. Kiko lo yuda bo stima Yehova mas?

¹¹ Siña stima Hesus. Si bo ta stim’é, lo bo stima Yehova mas. Dikon? Pasobra Hesus ta reflehá e kualidatnan di su Tata perfektamente. (Huan 14:9) P’esei, mas bo siña tokante Hesus, mas mihó lo bo komprondé Yehova i stim’é. Pensa riba e kompashon ku Hesus a demostrá hende despresiá pa otro hende, por ehèmpel, e pobernan, e enfermonan i e débilnan. Pensa tambe riba e bon konsehonan ku e ta duna bo i kon bo bida ta mehorá ora bo ta obedesé nan.—Mat. 5:1-11; 7:24-27.

12. Ora bo siña tokante Hesus, kiko lo bo sinti bo konmoví pa hasi?

 ¹² Bo amor pa Hesus siguramente lo bira mas fuerte ora bo meditá riba e sakrifisio ku el a hasi pa nos por haña pordon di nos pikánan. (Mat. 20:28) Ora bo komprondé ku e tabata dispuesto pa muri pa bo, lo bo sinti bo konmoví pa arepentí i pidi Yehova pordoná bo. (Echo. 3:19, 20; 1 Huan 1:9) Anto, mas bo ta stima Hesus i Yehova, mas lo bo ke ta rònt di hende ku ta stima nan meskos ku bo.

13. Kiko Yehova a duna bo?

¹³ Siña stima Yehova su famia. Bo famianan ku no ta Testigu i bo amigunan di ántes kisas no ta komprondé dikon bo ke dediká bo mes na Yehova. Nan por asta oponé bo. Pero Yehova lo yuda bo: el a duna bo un famia spiritual, esta, e rumannan den kongregashon. Si bo keda serka di e famia spiritual ei, lo bo haña e amor i apoyo ku bo mester. (Mar. 10:29, 30; Heb. 10:24, 25) I kisas ku tempu bo famia tambe lo sirbi Yehova i obedesé su normanan.—1 Ped. 2:12.

14. Segun 1 Huan 5:3, kiko bo a ripará tokante Yehova su normanan?

¹⁴ Stima Yehova su normanan i siña obedesé nan. Promé ku bo a konosé Yehova, kisas bo tabata sigui bo mes normanan, pero awor bo ta ripará ku esnan di dje ta mihó. (Sal. 1:1-3; lesa 1 Huan 5:3.) Pensa riba e konseho ku Beibel ta duna esposo, esposa, mayor i yu. (Efe. 5:22–6:4) Bo ta haña ku e konseho ei a yuda bo mehorá bo bida di famia? Bo a bira un mihó hende awor ku bo ta sigui e konseho tokante bon i mal amistat? Bo ta sinti bo mas felis? (Pro. 13:20; 1 Kor. 15:33) Probablemente lo bo kontestá ku sí.

15. Kiko bo por hasi si bo no sa kon pa apliká prinsipio di Beibel?

¹⁵ Kisas tin biaha bo no sa kon pa apliká prinsipio di Beibel. P’esei, Yehova mediante su organisashon ta duna bo publikashon basá riba Beibel ku lo yuda bo distinguí bon for di malu. (Heb. 5:13, 14) Lesa i studia nan. E ora ei lo bo mira kon práktiko i útil nan ta. Anto, probablemente lo bo haña gana di forma parti di Yehova su organisashon.

16. Kon Yehova a organisá su pueblo?

¹⁶ Siña stima i apoyá Yehova su organisashon. Yehova a organisá su pueblo den vários kongregashon. I su Yu, Hesus, ta na kabes di nan tur. (Efe. 1:22; 5:23) Hesus, na su turno, a apuntá un grupo chikitu di ruman hòmber ungí pa organisá e trabou ku e ke pa e kongregashonnan hasi awe. Hesus a bisa ku e grupo ei lo ta “e esklabo fiel i prudente,” i nan ta tuma nan responsabilidat di duna bo kuminda i protehá bo den sentido spiritual masha na serio. (Mat. 24:45-47) Un manera ku nan ta kuida bo ta di hasi sigur ku ruman hòmber kapas ta ser nombrá pa bira ansiano. E ansianonan lo guia bo i protehá bo. (Isa. 32:1, 2; Heb. 13:17; 1 Ped. 5:2, 3) Di buena gana e ansianonan ta hasi tur loke nan por pa konsolá bo i yuda bo tin un amistat fuerte ku Yehova. Pero, un di e kosnan di mas importante ku nan por hasi pa bo ta di yuda bo siña otro hende tokante Yehova.—Efe. 4:11-13.

17. Segun Romanonan 10:10, 13 i 14, dikon nos ta papia ku otro hende tokante Yehova?

¹⁷ Yuda otro hende siña stima Yehova.  Hesus a bisa su siguidónan pa siña otro hende tokante Yehova. (Mat. 28:19, 20) Bo por obedesé e mandamentu ei djis pa obligashon. Ma, ta segun ku bo amor pa Yehova ta krese mas i mas, lo bo sinti meskos ku apòstel Pedro i Huan. Nan a bisa: “Nos no por stòp di papia tokante e kosnan ku nos a mira i tende.” (Echo. 4:20) No tin nada ku ta duna bo asina tantu alegria ku yuda un hende siña stima Yehova. Djis imaginá kon felis Felipe a sintié ora el a yuda e ofisial di Etiopia siña e bèrdat ku tin den e Skritura i batisá. Ora bo imitá Felipe i obedesé e mandamentu di Hesus pa prediká, bo ta demostrá ku bo ke ta un Testigu di Yehova. (Lesa Romanonan 10:10, 13, 14.) Anto e ora ei, e chèns ta hopi grandi ku lo bo hasi e mesun pregunta ku e ofisial di Etiopia: “Kiko ta stroba mi di batisá?”—Echo. 8:36.

18. Ki pregunta nos lo kontestá den e siguiente artíkulo?

¹⁸ E desishon di mas importante den bo bida ta di batisá. Komo ku e ta un desishon serio, bo mester pensa bon kiko tur esei ta enserá. Awor, kiko bo mester sa tokante boutismo? I kiko bo mester hasi promé i despues ku bo batisá? E siguiente artíkulo lo kontestá e preguntanan ei.