1. Ki mandamentu spesífiko Hesus a duna su disipelnan? (Wak e plachi riba portada.)

E ANOCHI promé ku Hesus a muri, el a duna su disipelnan un mandamentu spesífiko. El a bisa nan: “Meskos ku ami a stima boso, boso tambe stima otro.” Kaba el a agregá: “Na esaki tur hende lo sa ku boso ta mi disipelnan, esta, si boso ta stima otro.”—Huan 13:34, 35.

2. Dikon ta asina importante pa nos stima nos rumannan?

² Hesus a bisa ku lo ta fásil pa hende mira ken ta su siguidónan si nan ta stima hende meskos ku e a stima nan. E deklarashon ei tabata sierto den promé siglo i e ta sierto awe tambe. Ta p’esei ta asina importante pa nos stima nos rumannan asta ora esei no ta fásil.

3. Kiko nos lo siña den e artíkulo akí?

³ Debí na nos imperfekshon, no ta fásil pa nos stima nos rumannan. Pero, nos mester purba di imitá Kristu. Den e artíkulo akí, nos lo siña kon amor ta yuda nos hasi pas ku nos rumannan, no hasi distinshon di ruman i demostrá hospitalidat. Segun ku bo ta analisá e diferente puntonan, puntra bo mes: ‘Kiko mi por siña for di e rumannan ku a sigui stima otro apesar di e difikultatnan ku nan a haña nan kuné?’

4. Segun Mateo 5:23 i 24, dikon nos mester hasi pas ku un ruman ku tin algu kontra nos?

⁴ Hesus a siña nos e importansia di hasi pas ku un ruman  ku tin algu kontra nos. (Lesa Mateo 5:23, 24.) El a enfatisá ku, pa agradá Dios, nos mester mantené un bon relashon ku nos rumannan. Yehova ta kontentu ora nos ta hasi nos máksimo esfuerso pa hasi pas ku nos rumannan. Lo e no aseptá nos adorashon si nos ta tene un ruman na kurason i no ke purba di hasi pas.—1 Huan 4:20.

5. Dikon no tabata fásil pa Mark hasi pas?

⁵ Kisas no ta fásil pa nos hasi pas. Dikon? Wak kiko a pasa ku Mark. * El a sintié ofendí ora un ruman a kritik’é i papia malu di dje den kongregashon. Kon Mark a reakshoná? El a rabia asina tantu ku e no por a kontrolá su palabranan. Despues, Mark a sinti duele di loke el a hasi i a purba di pidi e ruman despensa i hasi pas kuné. Pero e ruman no kier a tende nada di esei. Na promé instante, Mark a pensa: ‘Dikon ami tin ku sigui purba di hasi pas si e mes no ke?’ Ma, e superintendente di sirkuito a anim’é pa no entregá. Kiko Mark a hasi?

6. (a) Kon Mark a sigui purba di hasi pas? (b) Kon Mark a apliká Kolosensenan 3:13 i 14?

⁶ Ora Mark a analisá su manera di pensa, el a realisá ku e mester tabata mas humilde i ku e tabatin e tendensia di pensa ku semper e tin rason. El a rekonosé ku e mester kambia. (Kol. 3:8, 9, 12) El a bai serka e ruman atrobe i humildemente el a pidié despensa pa su komportashon. El a skirbié algun karta, splikando kuantu ta duel e loke el a hasi i ku e ke pa nan bira amigu atrobe. El a asta regalá e ruman algun kos chikitu ku el a pensa ku lo hasi e ruman kontentu. Ta tristu pa bisa ku e ruman a sigui tene Mark na kurason. Pero, Mark a sigui obedesé e mandamentu di Hesus pa stima su ruman i pa pordoná. (Lesa Kolosensenan 3:13, 14.)  Asta ora nos rumannan no ta reakshoná faborabel na nos esfuerso pa hasi pas, si nos ta stima hende meskos ku Hesus, nos lo sigui pordoná nan i sigui resa pa nos tin pas ku nan atrobe.—Mat. 18:21, 22; Gal. 6:9.

7. (a) Kiko Hesus a animá nos pa hasi? (b) Ki situashon difísil Lara a hañ’é kuné?

⁷ Hesus a animá nos pa sigui trata otro hende meskos ku nos ke pa nan trata nos. El a bisa ku nos no mester stima solamente esnan ku ta stima nos. (Luk. 6:31-33) Kiko lo bo hasi si un ruman ta evitá bo i no ta kumindá bo? Aunke esei no ta pasa hopi, esei ta nèt loke a pasa ku Lara. El a splika: “Un ruman muhé tabata hasi manera e no a mira mi i mi no tabata sa dikon. E situashon ei a duna mi strès i mi a pèrdè gana di bai reunion.” Promé Lara a pensa: ‘Mi no a hasi nada malu, otro ruman den kongregashon mes ta haña ku e ruman ei ta straño.’

8. Kon Lara a hasi pas, i kiko nos por siña for di dje?

⁸ Lara a hasi vários kos pa hasi pas ku e ruman. El a resa na Yehova i a disidí di papia ku e ruman. Nan a kòmbersá tokante e problema, nan a brasa otro i a hasi pas. Parse ku tur kos a drecha. Pero Lara a konta: “Despues, e ruman a bolbe hasi meskos. E kos ei a kibrá mi.” Na promé instante, Lara a pensa ku e por ta felis solamente si e ruman kambia su aktitut. Pero, el a bin komprondé ku e mihó kos ku e por hasi ta di sigui trata e ruman ku amor i pordon’é libremente. (Efe. 4:32–5:2) El a kòrda ku berdadero amor kristian “no ta keda kòrda e malu ku hende a hasié. E ta wanta tur kos, kere tur kos, spera tur kos [i] soportá tur kos.” (1 Kor. 13:5, 7) Lara no a preokupá mas tokante e problema. Ku tempu, e ruman a bira mas amigabel kuné. Si bo hasi esfuerso pa hasi pas ku bo ruman i sigui stim’é, bo por tin sigur ku “e Dios  di amor i di pas lo ta ku [bo].”—2 Kor. 13:11.

9. Segun Echonan 10:34 i 35, dikon nos no mester hasi distinshon di persona?

⁹ Yehova no ta hasi distinshon di persona. (Lesa Echonan 10:34, 35.) Ora nos imitá Yehova, nos ta demostrá ku nos ta su yunan. Nos ta obedesé e mandamentu di stima nos próhimo meskos ku nos mes i ta mantené pas ku nos rumannan.—Rom. 12:9, 10; Sant. 2:8, 9.

10-11. Kon Ruth a lucha kontra sintimentu negativo?

¹⁰ Pa algun hende, no ta fásil pa no hasi distinshon di persona. Wak e ehèmpel di un ruman ku yama Ruth. Ora e tabata hóben, un hende di un pais estranhero a hasié hopi doló. Kon esei a afekt’é? El a atmití: “Mi no tabata ke tin nada di haber ku e pais ei. Pa mi tur hende di e lugá ei tabata meskos, asta e rumannan.” Kiko Ruth a hasi pa vense e sintimentunan negativo ei?

¹¹ Ruth a rekonosé ku e mester a lucha kontra e pensamentu negativo ei. El a lesa eksperensia i informe den Anuario tokante e pais ei. El a bisa: “Mi a hasi esfuerso pa pensa bon di hende di e lugá ei. Mi a kuminsá mira ku e rumannan tabatin zelo pa Yehova. A bira bisto pa mi ku nan tambe ta parti di e hermandat mundial.” Tiki tiki, Ruth a realisá ku e mester a hasi mas. El a splika: “Ki ora ku mi topa ruman di e pais ei, mi ta hasi èkstra esfuerso pa mi ta amigabel, pa papia ku nan i konosé nan mihó.” Kiko tabata e resultado? Ruth a bisa: “Ku tempu, mi sintimentunan negativo a disparsé.”

12. Ki problema Sarah tabatin?

¹² Algun hende ta hasi distinshon di persona sin ku nan mes sa. Por ehèmpel, Sarah a pensa ku e no tabata hasi distinshon di ruman pasobra e no tabata husga nan a base di nan koló, posishon finansiero òf responsabilidat den e organisashon. Pero el a rekonosé: “Mi a bin ripará ku mi tabata hasi distinshon di persona.” Den ki sentido? El a bini di un famia di kual nan tur a bai universidat, i el a preferá di anda ku hende ku tambe tabata studiá. Un biaha el a asta bisa un amigu: “Mi ta anda ku ruman studiá i no tin trato ku esnan ku no tin bon edukashon.” Ta bisto ku Sarah mester a kambia su aktitut. Pero kon el a hasi esei?

13. Kiko nos ta siña for di e manera ku Sarah a kambia su aktitut?

¹³ Un superintendente di sirkuito a yuda Sarah analisá su mes. Sarah a konta: “El a elogiá mi pa mi sirbishi fiel, bon komentario i konosementu di Beibel. Kaba el a bisa mi ku segun ku nos konosementu ta krese, nos mester kultivá kualidat kristian manera humildat, modestia i miserikòrdia.” Sarah a apliká loke e superintendente di sirkuito a bis’é. El a bisa: “Mi a komprondé ku e kos di mas importante ta pa mi ta amabel i demostrá amor.” Komo resultado, el a kuminsá mira e rumannan diferente. El a splika: “Mi a purba di diserní ki kualidat ta hasi kada ruman presioso pa Yehova.” Kiko di nos? Hamas nos ke pensa ku nos ta mihó ku otro ruman debí na nos edukashon! Si nos ta “stima henter e hermandat” intensamente, nos lo evitá di hasi distinshon di ruman.—1 Ped. 2:17.

14. Segun Hebreonan 13:16, kon Yehova ta sinti ora nos demostrá hospitalidat?

¹⁴ Yehova ta balorá hospitalidat mashá. (Lesa Hebreonan 13:16.) E ta konsider’é komo parti di nos adorashon, foral ora nos ta yuda esnan den nesesidat. (Sant. 1:27; 2:14-17) P’esei Beibel ta animá nos pa “sigui e kaminda di hospitalidat.” (Rom. 12:13) Ora nos ta hospitalario, nos ta demostrá nos rumannan ku nos ta interesá den nan, ta stima nan i ke ta nan amigu. Yehova ta kontentu ora nos kompartí algu di kome òf bebe ku nos rumannan, òf ora nos pasa tempu ku nan. (1 Ped. 4:8-10) Pero tin algun kos ku por stroba nos di demostrá hospitalidat.

15-16. (a) Dikon algun hende ta pensa ku nan no por demostrá hospitalidat? (b) Kiko a yuda Edit demostrá hospitalidat?

¹⁵ Kisas nos ta duda ku nos por demostrá hospitalidat debí na vários motibu. Esei tabata e kaso di un biuda ku yama Edit. Promé ku el a bira un Testigu, e no tabata masha sosial. El a pensa ku otro hende lo ta den mas mihó sirkunstansia kuné pa demostrá hospitalidat.

¹⁶ Pero despues ku Edit a bira Testigu, el a kambia su manera di pensa i a hasi esfuerso pa demostrá hospitalidat. El a konta: “Ora tabata konstruí nos Salòn di Reino, un ansiano a puntra mi si mi por a laga un pareha kasá keda serka mi pa dos siman. Mi a kòrda kon Yehova a bendishoná e biuda di Sarepta.” (1 Rei. 17:12-16) Edit a laga e pareha keda serka dje. Ki bendishon el a haña? El a splika: “Mi tabata masha kontentu, pasobra nan a keda serka mi no djis dos siman, pero dos luna. Durante e tempu ei, nos a forma un bunita amistat.” Edit a ser bendishoná tambe ku bon amigu den kongregashon. Awor e ta pionero i ta gusta invitá ruman ku e ta traha kuné den sirbishi pa bin bebe algu na su kas. El  a bisa: “Duna ta laga mi sinti mi bon! I e bèrdat ta ku mi ta haña hopi bendishon a kambio.”—Heb. 13:1, 2.

17. Kiko Luke ku su kasá a ripará?

¹⁷ Kisas ya nos ta demostrá hospitalidat. Pero, nos por mehorá den esei? Por ehèmpel, Luke ku su kasá ta masha hospitalario. Nan tin kustumber di invitá nan mayornan, famianan, amigunan será i e superintendente di sirkuito i su kasá. Pero Luke a bisa: “Nos a ripará ku nos tabata invitá solamente esnan ku nos tabata será kuné.” Kiko nan a hasi pa nan ta mas hospitalario?

18. Kiko Luke ku su kasá a hasi pa nan ta mas hospitalario?

¹⁸ Luke ku su kasá a komprondé loke ser hospitalario realmente ta nifiká ora nan a meditá riba e palabranan di Hesus: “Si boso ta stima esnan ku ta stima boso, ki rekompensa boso tin?” (Mat. 5:45-47) Nan a yega na e konklushon ku nan mester imitá Yehova, kende ta generoso ku tur. Pues, nan a pone komo meta pa invitá ruman ku nunka nan a invitá promé. Luke a bisa: “Awor nos tur ta disfrutá di e okashonnan ei, nan ta animá i edifiká nos den sentido spiritual.”

19. Kon nos ta demostrá ku nos ta disipel di Hesus, i kiko abo ta determiná pa hasi?

¹⁹ Den e artíkulo akí, nos a mira kon ora nos ta stima otro intensamente, esei lo yuda nos hasi pas, no hasi distinshon di ruman i demostrá hospitalidat. Nos mester lucha kontra kualke sintimentu negativo i stima nos rumannan intensamente di kurason. Si nos hasi esei, nos lo ta felis i nos lo demostrá ku di bèrdat nos ta disipel di Hesus.—Huan 13:17, 35.