1. Kiko nos por bisa di nos ruman hòmbernan hóben?

RUMAN hòmbernan hóben, boso por yuda ku hopi kos den boso kongregashon. Mayoria di boso tin hopi forsa i ta yen di energia. (Pro. 20:29) Sí, boso ta di gran yudansa! Kisas boso lo tin gana di bira sirbidó ministerial. Pero, por ta algun ruman ta pensa ku boso ta muchu yòn i ku boso no tin asina tantu eksperensia te pa boso haña un asignashon asina importante. Aunke ku boso ta yòn, tin hopi kos ku boso por hasi fo’i djawó pa gana e konfiansa i rèspèt di e rumannan den boso kongregashon.

2. Kiko nos lo analisá den e artíkulo akí?

² Den e artíkulo akí, nos lo analisá bida di Rei David. Tambe nos lo analisá algun kos ku a pasa den bida di dos rei di Huda: Asa i Yehosafat. Nos lo wak algun problema ku e tres reinan ei a haña nan kuné, kiko nan a hasi i loke kada ruman hòmber hóben por siña for di nan ehèmpel.

3. Kon un hóben por yuda rumannan di edat den su kongregashon?

³ Fo’i tempu ku David tabata yòn, el a desaroyá abilidat ku otro hende a balorá. Tabata bisto ku e tabatin un bon amistat ku Yehova. Tambe el a traha duru pa bira un bon músiko i el a usa e talento ei pa yuda Saul, Dios su rei nombrá. (1 Sam. 16:16, 23) Hóben, muy probablemente  tin algu ku bo ta bon den dje. Awèl, dikon bo no ta pensa pa us’é pa yuda e rumannan den bo kongregashon? Por ehèmpel, kisas bo a ripará kon e rumannan di edat den bo kongregashon ta lucha ku nan tablet i telefòn na reunion i durante nan estudio personal. Dikon no usa bo konosementu pa yuda nan? Nan lo keda masha kontentu.

4. Meskos ku David, ki kualidat un hóben mester desaroyá? (Wak e plachi riba portada.)

⁴ David a demostrá di ta responsabel i konfiabel. Por ehèmpel tempu e tabata hóben, el a traha duru pa kuida e karnénan di su tata. Esei no tabata un trabou fásil; e tabatin su peliger kuné. David a yega di splika Rei Saul: “Bo sirbidó tabata kuida e karnénan di su tata. Ora ku un leon òf un ber tabata bin kohe un lamchi for di e tou, mi tabata sali su tras i atak’é i reskatá e lamchi for di su boka.” (1 Sam. 17:34, 35) El a sinti ku e tabata responsabel pa e karnénan i ku kurashi el a bringa pa protehá nan. Hóben, ora ku bo traha duru pa kumpli ku kualke asignashon ku bo haña, bo ta imitando David.

5. Segun Salmo 25:14, kiko ta e kos di mas importante ku un hóben por hasi?

⁵ Fo’i yòn David tabatin un amistat será ku Yehova. Aunke David tabatin kurashi i por a toka arpa, e kosnan ei no tabata importante p’e. Loke tabata importante p’e tabata su amistat ku Yehova. Pa David, Yehova no tabata djis su Dios, pero tambe su Amigu—su mihó Amigu. (Lesa Salmo 25:14, NW.) * Hóben, e kos di mas importante ku bo por tin ta un amistat será ku Yehova. Si bo tin esei, bo por haña mas asignashon den kongregashon.

6. Kiko algun hende tabata pensa di David?

⁶ Un problema ku David a hañ’é kuné tabata ku algun hende a pensa ku e tabata muchu yòn òf iresponsabel. Por ehèmpel, ora el a ofresé su mes pa bringa kontra di Goliat, Rei Saul a purba di stòp e. El a bis’é: Bo “ta hóben ainda.” (1 Sam. 17:31-33) Mas promé, David su mes ruman a akus’é di ta iresponsabel. (1 Sam. 17:26-30) Pero, Yehova  sí no a konsiderá David muchu yòn ni iresponsabel. E tabata konosé David bon. Anto David a logra mata Goliat pasobra el a konfia den su Amigu, Yehova.—1 Sam. 17:45, 48-51.

7. Kiko bo ta siña for di un relato tokante David?

⁷ Kiko ta e kosnan ku bo por siña for di loke David a pasa aden? Pa di promé, bo mester tin pasenshi. Ta bai tuma tempu pa esnan ku konosé bo fo’i chikitu realisá ku bo no ta mucha mas. Pero no wòri, bo por tin sigur ku Yehova ta wak mas ku djis bo aparensia. E sa ken bo ta, i e sa e kosnan ku bo por hasi. (1 Sam. 16:7) Di dos, fortalesé bo amistat ku Yehova. David a hasi esei ora el a opservá e kosnan ku Yehova a krea i a para pensa kiko nan tabata siñ’é tokante e Kreador. (Sal. 8:3, 4; 139:14; Rom. 1:20) Di tres, konfia ku Yehova lo duna bo e forsa ku bo tin mester. Por ehèmpel, algun mucha di bo skol ta hasi chèrchi di bo pasobra bo ta un Testigu di Yehova? Si esei ta e kaso, pidi Yehova duna bo e forsa pa dil ku e problema ei anto pa apliká e konsehonan útil ku tin den su Palabra i den nos vidio- i publikashonnan. Kada bes ku bo mira kon Yehova ta yuda bo resolvé un problema, bo fe den dje lo bira mas fuerte. Ademas, ora otronan mira ku bo ta konfia den Yehova, lo bo gana nan konfiansa.

8-9. Kiko a yuda David warda ku pasenshi te ora el a bira rei, i kiko hóbennan por siña for di su ehèmpel?

⁸ Laga nos wak un otro un kos ku David a hañ’é kuné. Aunke Dios a skoh’é pa bira rei, e mester a warda hopi aña promé ku el a kuminsá reina komo rei di Huda. (1 Sam. 16:13; 2 Sam. 2:3, 4) Durante e tempu ei, kiko a yud’é warda ku pasenshi? Wèl, el a enfoká riba loke e por a hasi. E no a desanimá ni bai sinta man krusá. Por ehèmpel, ora e tabata un fugitivo bibando den e pais di e filisteonan, el a probechá usa su tempu pa bringa kontra e enemigunan di Israel. Hasiendo esei, el a protehá e fronteranan di e teritorio di Huda.—1 Sam. 27:1-12.

⁹ Kiko bo por siña fo’i David su ehèmpel? Probechá di tur oportunidat pa sirbi Yehova i bo rumannan. Wak e ehèmpel di un ruman ku yama Ricardo. * Pa hopi tempu, e tabata ke bira pionero regular. Pero, e ansianonan a bis’é ku e no tabata kla ainda. Na lugá di rabia i legumai, el a kuminsá sali mas tantu den sirbishi. El a bisa: “Pensando bèk, tabata bon ku m’a probechá di e tempu pa progresá. M’a hasi sigur di bai tur rebishita i prepará kada biaha pa nan. M’a asta haña mi promé estudio. Mas m’a prediká, ménos nèrvioso m’a bira.” Awor Ricardo ta un bon pionero regular i ta sirbi komo sirbidó ministerial.

10. Kiko David a hasi promé ku el a tuma un desishon importante?

¹⁰ Wak un otro un kos ku a pasa ku David. Durante e tempu ku e ku su hòmbernan tabata fugitivo, nan a laga nan famianan atras pa bai bringa un bataya. Miéntras nan tabata den bataya, un trupa di enemigu a kapturá nan famianan. David por a pensa ku debí ku e tabatin hopi eksperensia den bataya e mes por a hinka un strategia den otro pa reskatá nan famianan. Ma e no a hasi esei; el a pidi Yehova yudansa. Ku yudansa di un  saserdote ku yama Abiatar, David a puntra Yehova: “Mi mester persiguí e trupa aki?” Yehova a bis’é ku e mester bai i ku lo e tin éksito den reskatá tur hende. (1 Sam. 30:7-10) Kiko bo por siña for di esaki?

11. Kiko bo por hasi promé ku bo tuma desishon?

¹¹ Pidi konseho promé ku bo tuma un desishon. Di ken? Pa di promé, di bo mayornan. Tambe bo por haña bon konseho for di ansiano ku eksperensia. Yehova ta konfia e rumannan ei, i abo tambe por hasi mesun kos. P’e nan ta “regalo” pa e kongregashon. (Efe. 4:8) Si bo imitá nan fe i skucha e bon sugerensianan ku nan duna bo, lo bai bon ku bo. Pero awor, laga nos wak loke bo por siña for di Rei Asa.

12. Ki kualidat Asa tabatin ora el a bira rei?

¹² Komo hóben, Rei Asa tabata humilde i yen di kurashi. Por ehèmpel, despues ku su tata, Abías, a muri, el a bira rei i a kuminsá kita tur imágen fo’i dje pais. Tambe el a bisa “Huda pa buska e SEÑOR Dios di nan tatanan i pa warda e lei i e mandamentu.” (2 Kró. 14:1-7) Anto ora Zera di Etiopia a invadí Huda ku 1.000.000 sòldá, Asa a aktua sabí i mesora a pidi Yehova yudansa, bisando: “SEÑOR, no tin ni un fuera di bo pa yuda den e bataya entre esun poderoso i esnan ku no tin forsa; asina, yuda nos, o SEÑOR nos Dios, pasobra ta den bo nos ta konfia.” For di e palabranan bunita ei bo por mira ku Asa tabatin konfiansa ku Yehova por a salba tantu e komo e pueblo. Asa a konfia den su Tata selestial, i Yehova “a derotá e etiopenan.”—2 Kró. 14:8-12.

13. Kiko a pasa despues ku Asa, i dikon?

¹³ Ta di komprondé ku Asa lo tabatin miedu ora e ehérsito di 1.000.000 sòldá a bin bringa kontra dje. Ma, el a konfia den Yehova i e tabatin éksito. Pero lamentablemente ora e rei malbado Baasa di Israel a menas’é, e no a konfia den Yehova. Na lugá di esei, el a pidi e rei di Siria yudansa. E desishon ei tabata desastroso! Mediante Profeta Hanani, Yehova a bisa Asa: “Pasobra bo a dependé riba rei di Siria i bo no a dependé riba  SEÑOR bo Dios, p’esei e ehérsito di rei di Siria a skapa for di bo man.” Anto for di e tempu ei padilanti, henter su bida el a keda den guera ku Baasa.—2 Kró. 16:7, 9; 1 Rei. 15:32.

14. (a) Kon bo ta demostrá ku bo ta konfia den Yehova? (b) Segun 1 Timoteo 4:12, kiko lo bo bira si bo konfia den Yehova?

¹⁴ Kiko bo por siña for di e ehèmpel di Asa? Semper keda humilde i konfia den Yehova. Ora bo a batisá, bo a demostrá hopi fe i konfiansa den Yehova. Anto pa Yehova ta un privilegio ku bo ta forma parti di su famia. Awor, loke bo tin ku hasi ta di sigui konfia den Yehova. Generalmente ora bo tin ku tuma un desishon grandi, mesora bo ta pidi Yehova yudansa. Pero, esei mester konta tambe pa tur bo desishonnan, sea ku ta entretenimentu, trabou òf otro metanan den bida. Na lugá di hasi loke ku abo ta pensa ta bon, buska prinsipionan di Beibel ku por yuda bo den bo situashon, anto despues apliká nan. (Pro. 3:5, 6) Si bo hasi esei, lo bo hasi Yehova kontentu i lo bo gana rèspèt di e rumannan den bo kongregashon.—Lesa 1 Timoteo 4:12.

15. Segun 2 Krónikanan 18:1-3 i 19:2, ki fayonan Rei Yehosafat a kometé?

¹⁵ Klaru ku, meskos ku nos tur, bo ta imperfekto i tin biaha lo bo faya. Pero, no laga esei stroba bo di hasi tur loke bo por pa Yehova. Wak e ehèmpel di Rei Yehosafat. E tabatin hopi bon kualidatnan. Fo’i komienso di su reinado, el a “buska e Dios di su tata [i] a sigui su mandamentunan.” Tambe, el a manda su ofisialnan den tur e statnan di Huda pa siña e hendenan tokante Yehova. (2 Kró. 17:4, 7) Pero, tabatin biaha Yehosafat a tuma mal desishon. Pa un di e mal desishonnan ei, el a haña konseho fuerte for di un di Yehova su representantenan. (Lesa 2 Krónikanan 18:1-3; 19:2.) Laga nos wak loke bo por siña for di e relato ei.

16. Kiko bo por siña for di e eksperensia di Rajeev?

¹⁶ Ta masha importante pa bo aseptá i apliká e konsehonan ku bo ta haña. Hopi hóben awe ta haña ku no ta fásil pa pone Yehova Dios na promé lugá den nan bida. Si esei ta bo kaso, no desanimá.  Wak e eksperensia di un ruman ku yama Rajeev. El a bisa: “Komo hóben, tin biaha mi no tabata sa kiko presis mi kier a hasi ku mi bida. Meskos ku hopi otro hóben, mi tabata mas interesá den deporte i pasa prèt ku bai reunion i sali den sirbishi.” Kiko a yud’é? Un ansiano ku tabata preokupá p’e a dun’é algun konseho. Rajeev a sigui bisa: “El a yuda mi pensa riba e prinsipio ku tin na 1 Timoteo 4:8.” Rajeev tabata humilde, el a apliká e konseho i a para pensa kiko mester ta e kos di mas importante den su bida. El a bisa: “M’a disidí di pone metanan spiritual na promé lugá den mi bida.” Ku ki resultado? El a bisa: “Un par di aña despues ku m’a haña e konseho ei, m’a kualifiká pa bira sirbidó ministerial.”

17. Kiko e rumannan den kongregashon ta pensa di e hóbennan ku ta sirbi Yehova?

¹⁷ Hóbennan, e rumannan den kongregashon ta masha kontentu ku boso ta sirbi Yehova skouder ku skouder ku nan! (Sof. 3:9) Nan ta kontentu pa mira ku kuantu energia i entusiasmo boso ta hasi e trabou ku boso ta haña. P’esei, sa sigur ku nan stima boso mashá.—1 Huan 2:14.

18. Segun Proverbionan 27:11, kiko Yehova ta pensa di hóbennan ku ta sirbié?

¹⁸ Hóben, nunka lubidá ku Yehova stima bo i ta konfia bo. El a bisa ku den e lastu dianan lo tin un ehérsito di hóben ku lo pone nan mes disponibel. (Sal. 110:1-3) E sa ku bo stim’é i ku bo ke sirbié lo mihó ku bo por. Pues, tene pasenshi ku otro hende i ku bo mes. Ora bo faya, aseptá e konseho i disiplina ku bo a haña i komprondé ku ta fo’i Yehova nan a bini. (Heb. 12:6) Hasi bo bèst i traha duru pa kumpli ku kualke asignashon ku bo haña. I mas importante ainda, den tur kos ku bo hasi, laga Yehova sintié orguyoso di bo.—Lesa Proverbionan 27:11.