1-2. Ken por yuda un studiante di Beibel yega na boutismo?

AMY, kende ta biba na Fidji, a bisa: “Mi tabata gusta mi estudio di Beibel. Mi tabata sa ku esaki tabata e bèrdat. Pero ta te ora m’a kuminsá pasa tempu ku e rumannan, m’a hasi kambio i batisá.” Loke Amy a bisa ta siña nos algu masha importante. Un studiante di Beibel tin mas chèns di batisá ora e haña yudansa tambe for di otro rumannan den kongregashon.

² Kada publikadó por yuda e kongregashon krese. (Efe. 4:16) Leilani un pionero ku ta biba na Vanuatu a skirbi: “Tin un dicho ta bisa ku tur hende den un pueblo ta nesesario pa lanta un mucha.” I ta bèrdat, pa un mucha por bira un adulto responsabel, e ta haña yudansa di su mayornan, amigunan i maestronan di skol. Nan ta hasi esei ora nan ta anim’é i ta siñ’é lèsnan importante. Leilani a agregá: “Mi ta kere ku e mesun kos ta konta ora di hasi hende disipel. Generalmente ta henter un kongregashon ta yuda un hende bini den e bèrdat.” Publikadónan por yuda un studiante yega na boutismo ora nan ta dun’é konseho, anim’é i ta un bon ehèmpel p’e.—Pro. 15:22.

3. Kiko bo ta siña for di loke Ana, Dorin i Leilani a bisa?

³ Dikon un publikadó mester ta kontentu ora otro rumannan ta yuda su studiante? Ana, un pionero spesial na Moldavia, a bisa: “Un studiante di Beibel mester di hopi yudansa, i ta imposibel ku un persona so por  dun’é tur e yudansa ei ku e mester.” Dorin, un pionero spesial den e mesun pais, a bisa: “Hopi biaha, otro publikadónan por bisa algu ku ta motivá e studiante, algu ku nunka ami lo a kai ariba.” Leilani a agregá un otro motibu: “E amor i kariño ku e studiante ta haña di e rumannan, ta lag’é mira ku esaki di bèrdat ta e pueblo di Yehova.”—Huan 13:35.

4. Kiko nos lo trata den e artíkulo akí?

⁴ Kisas bo ta puntra bo mes: ‘Kon mi por yuda un studiante si no ta ami ta esun ku ta dirigí e estudio?’ Laga nos wak kiko nos por hasi ora un ruman pidi nos pa kompañ’é na su estudio di Beibel, i kiko nos por hasi ora un studiante kuminsá bini reunion. Tambe nos lo wak kon ansianonan por yuda studiante di Beibel yega na boutismo.

5. Kiko bo tin ku hasi ora un ruman pidi bo pa kompañ’é na su estudio?

⁵ Na e estudio, ta e maestro ta esun ku ta responsabel pa yuda e studiante komprondé e Palabra di Dios. Si un ruman pidi bo kompañ’é na su estudio, bo t’ei pa yud’é. (Ekl. 4:9, 10) Awor, laga nos wak kiko bo por hasi pa bo ta un bon ayudante durante e estudio.

6. Ora bo ta kompañá un ruman na su estudio, kon bo por apliká e prinsipio ku tin na Proverbionan 20:18?

⁶ Prepará pa e estudio. Promé, pidi e ruman algun detaye di su studiante. (Lesa Proverbionan 20:18.) Kisas bo por puntr’é: “Ken e studiante ta? Kiko mi tin ku prepará? Anto ki lès bo ke resaltá for di esei?” Tambe bo por puntr’é: “Tin algu ku mi tin ku evitá di bisa òf hasi na e estudio? Kon mi por animá e studiante pa progresá?” Ta klaru ku e ruman lo no konta bo kosnan privá di su studiante, pero loke e bisa bo lo ta di gran yudansa. Joy, un misionero ta menshoná e detayenan ei na e rumannan ku ta kompañ’é na e estudio. El a bisa: “E tipo di kòmbersashonnan ei ta yuda ku e ruman ku ta kompañá mi por demostrá interes personal den e studiante i sa kon pa yuda durante e estudio.”

7. Dikon bo tin ku prepará si bo ta kompañá un ruman na un estudio?

⁷ Si bo tin ku kompañá un ruman na un estudio, lo ta bon si bo prepará e lès adelantá. (Èsd. 7:10) Dorin a bisa: “Mi ta keda masha kontentu ora e ruman ku ta kompañá mi na e estudio prepará.  E ora ei, e por agregá puntonan útil durante e estudio.” Ademas, muy probablemente e studiante lo ripará ku boso tur dos ta prepará i esei lo ta un bon ehèmpel p’e. Asta si bo no a haña tempu pa prepará e material bon bon, por lo ménos tuma tempu pa wak e puntonan prinsipal di e lès.

8. Kiko bo por hasi pa bo orashon yega na kurason di e studiante?

⁸ Orashon ta un parti hopi importante di un estudio di Beibel. P’esei, pensa di antemano kiko lo bo bisa si e ruman pidi bo pa hasi orashon. Asina ei, bo orashon lo yega na kurason di e studiante. (Sal. 141:2) Hanae, kende ta biba na Hapon te ainda ta kòrda e orashonnan di un ruman ku a kompañá e ruman ku tabata studi’é. El a bisa: “M’a ripará ku e tabatin un amistat será ku Yehova, i mi ke tabata meskos kuné. I ora e tabata inkluí mi nòmber den su orashonnan, mi tabata sinti mi balorá.”

9. Segun Santiago 1:19, kiko bo por hasi pa yuda e ruman durante e estudio?

⁹ Yuda e ruman durante e estudio. Un pionero spesial na Nigeria a bisa: “Un bon kompañero ta presta atenshon durante e estudio. Aunke e ta duna bon komentario, e no ta papia hopi. E ta realisá ku no ta e ta esun ku ta dirigí e estudio.” Pero, kon bo por sa ki ora pa papia i ki pa bisa? (Pro. 25:11) Skucha bon ora ku e maestro i e studiante ta papia. (Lesa Santiago 1:19.) Ta asina so bo por yuda si esei ta nesesario. Pero, ta klaru ku bo mester pensa promé ku bo papia. Por ehèmpel, lo bo no papia hopi, interumpí e ruman òf bini ku un otro tópiko. En bes di esei, lo bo sea duna un komentario breve, un ilustrashon òf hasi un pregunta ku lo yuda klarifiká un punto den e lès. Tin biaha, por parse ku bo no tin masha kos di agregá durante e estudio. Pero si bo elogiá e studiante i mustra interes personal den dje, lo bo ta yudand’é progresá.

10. Kon bo eksperensia por yuda un studiante?

¹⁰ Konta bo eksperensia. Si lo e yuda e studiante, brevemente kont’é kon bo a haña e bèrdat, kon bo a vense difikultatnan i kon bo a mira Yehova yuda bo. (Sal. 78:4, 7) Kisas ta nèt esei ta loke e mester tende. Esei por fortalesé su fe i anim’é pa sigui progresá pa yega na boutismo. I kisas esei por yud’é vense e pruebanan ku e tin. (1 Ped. 5:9) Gabriel un pionero ku ta biba na Brazil ta kòrda kiko a yud’é ora e tabata studia Beibel.  El a bisa: “Ora m’a skucha e eksperensia di e rumannan, m’a mira ku Yehova ta na altura di e problemanan ku nos ta pasa aden. I si nan por a vense nan, ami tambe por.”

11-12. Dikon nos tin ku yama un studiante bon biní ora e bini reunion?

¹¹ Pa un studiante yega na boutismo, e tin ku asistí regularmente na e reunionnan. (Heb. 10:24, 25) Mayoria di biaha, ta e maestro lo invit’é. Ora ku e bini, nos por anim’é pa sigui bini e reunionnan. Pero, kon nos por hasi esei?

¹² Yama e studiante bon biní. (Rom. 15:7) Si nos laga e studiante sintié na kas, e chèns ta grandi ku lo e sigui bini reunion. Pues ora e yega, kumind’é i introdusié na otro ruman, pero sin lag’é sintié inkómodo. No asumí ku tin otro ruman ta yudand’é. Kisas su maestro a kai lat òf tin ku atendé otro responsabilidat. Skucha bon loke e studiante ta bisa i mustra interes personal den dje. Hasiendo tur esei lo yuda e studiante. Dikon nos por bisa asina? Wak e ehèmpel di Dmitrii, kende a batisá un par di aña pasá i ku awor ta sirbidó ministerial. Kòrdando su promé reunion el a bisa: “Mi tabata pará pafó di Salòn tur nèrvioso. Un ruman a mira mi i a hiba mi paden. Hopi ruman a bin kumindá mi. Mi no a ferwagt esei. M’a disfrutá asina tantu ku pa mi parti henter siman tabatin reunion. Nunka m’a eksperensiá algu asina.”

13. Kon bo bon ehèmpel por yuda un studiante?

¹³ Pone un bon ehèmpel. Bo ehèmpel por yuda konvensé un studiante ku el a haña e bèrdat. (Mat. 5:16) Vitalii, kende awor ta un pionero na Moldavia, a bisa: “Ora m’a opservá kon e rumannan den e kongregashon ta biba i komportá nan mes, esei a konvensé mi ku Testigunan di Yehova ta e religion berdadero.”

14. Kon bo ehèmpel por yuda un studiante sigui progresá?

¹⁴ Promé ku un studiante batisá, e tin ku apliká loke e ta siñando. No ta semper esei ta fásil. Pero ora e mira ki bon resultado bo a haña debí ku bo a apliká prinsipionan di Beibel, esei lo pone ku lo e ke imitá bo. (1 Kor. 11:1) Hanae, menshoná anteriormente, a bisa: “E rumannan den e kongregashon ya kaba tabata hasiendo e kosnan ku ami tabata siñando di dje. M’a siña kon pa animá i pordoná otro, i kon pa mustra amor. Semper nan tabata papia bon di otro. Mi tabata ke ta meskos ku nan.”

15. Segun Proverbionan 27:17, dikon nos mester bira amigu di e studiante?

 ¹⁵ Bira amigu di e studiante. Segun ku e studiante ta bini reunion, keda mustra interes personal den dje. (Flp. 2:4) Traha tempu pa kòmbersá kuné. Sin bai muchu den su bida personal, elogi’é pa e kambionan positivo ku el a hasi. Puntr’é kon ta bayendo ku su estudio, famia i trabou. E tipo di kòmbersashonnan ei por pone ku boso ta bira bon amigu i esei por yud’é yega na boutismo. (Lesa Proverbionan 27:17.) Awor, Hanae ta un pionero regular. E ta kòrda ora el a kuminsá bai reunion. El a bisa: “Mas mi tabata sera ku e rumannan den e kongregashon, mas gana mi tabatin pa bai Salòn. I aunke tin biaha mi tabata sinti mi kansá tòg mi tabata bai. Mi tabata disfrutá di ta ku mi amigunan nobo. I esei a yuda mi pa stòp di ta amigu di hende ku no ta adorá Yehova. Mi kier a hala mas serka di Yehova i e rumannan. Anto esei a pone ku m’a batisá.”

16. Kiko mas bo por hasi pa yuda un studiante sintié na kas den kongregashon?

¹⁶ Segun ku e studiante ta sigui progresá i ta hasi kambio, yud’é sinti ku e ta parti di e kongregashon. Un manera ku bo por logra esei ta di mustr’é hospitalidat. (Heb. 13:2) Denis, kende ta biba na Moldavia, ta kòrda e tempu ku e tabata studia i a bisa: “Vários biaha, e rumannan tabata invitá mi i mi esposa pa bin pasa un ratu ku nan. Nan a konta nos kon Yehova a yuda nan, i esei a animá nos. Debí na esei nos tabatin sigur ku nos kier a sirbi Yehova i ku un bida maravioso tabata spera nos.” Ora un studiante di Beibel bira publikadó, bo por pidié tambe pa sali ku bo den sirbishi. Diego, un ruman na Brazil, a bisa: “Hopi ruman a pidi mi sali ku nan den sirbishi. Asina m’a siña konosé nan mas mihó. Segun ku m’a hasi esei, m’a siña hopi. I m’a hala mas serka di Yehova i Hesus.”

17. Kon ansiano por yuda e studiantenan?

¹⁷ Traha tempu pa e studiantenan. Ansiano, ora boso ta stima e studiantenan i tin interes personal den nan, boso por yuda nan yega na boutismo. Hasi esfuerso pa kòmbersá regularmente ku nan na reunion. Ora nan hisa man pa duna komentario, yama nan na nan nòmber. Esei ta demostrá ku bo ta interesá den nan. Ratu-ratu, kompañá un ruman na un di su estudionan. E kosnan  ei por yuda e studiante mas di loke bo por imaginá. Jackie, un pionero na Nigeria, a bisa: “Hopi studiante ta keda babuká ora nan haña sa ku e ruman ku a kompañá mi na nan estudio ta un ansiano. Un studiante a bisa: ‘Hamas mi pastor lo a hasi un kos asina. E ta bishitá solamente e rikunan, anto esei ta si nan pag’é.’” Awor e studiante ei ta asistí na e reunionnan.

18. Kon ansiano por apliká Echonan 20:28?

¹⁸ Entrená i animá publikadó ku tin estudio. Ansiano, boso tin un responsabilidat importante pa yuda e publikadónan bira bon predikadó i maestro. (Lesa Echonan 20:28.) Si un publikadó ta sintié nèrvioso pa dirigí su estudio pasobra bo t’ei, ofresé pa dirigí e estudio. Jackie, menshoná anteriormente, a konta: “Regularmente e ansianonan ta puntra mi kontá ku mi studiantenan. Ora mi haña mi ku reto ku e estudio, nan ta duna mi bon konseho.” Ansiano, boso por hasi hopi pa yuda, animá i motivá e rumannan ku tin estudio. (1 Tes. 5:11) Jackie a agregá: “Mi gusta ora e ansianonan ta animá mi i ta bisa mi ku nan ta balorá mi trabou. E palabranan ei ta baha mes bon ku un glas di awa friu riba un dia ku ta kayente. E elogio ku nan ta duna mi ta laga mi sinti ku mi ta hasiendo un bon trabou ku mi studiantenan, i mi ta haña mas goso.”—Pro. 25:25.

19. Dikon nos tur por ta kontentu?

¹⁹ Asta si na e momentonan akí nos no tin un estudio, tòg nos por yuda un studiante yega na boutismo. Ora bo tin ku kompañá un ruman na su estudio, prepará bon pa bo por yud’é. Anto kòrda pa no papia hopi. Ora ku studiantenan kuminsá bini reunion, bira nan amigu i sea un bon ehèmpel pa nan. Ansiano ta animá e studiantenan ora nan traha tempu pa nan. Ademas, nan ta animá e ruman ku tin e estudio tambe ora nan ta entren’é i elogi’é. Asta si loke nos hasi por parse algu chikitu, nos por ta kontentu ku nos a yuda un hende stima i sirbi Yehova.