1-2. Kon Apòstel Pablo por yuda ansianonan awe?

 APÒSTEL PABLO tabata stima su rumannan. E tabata hasi tur loke e tabata por pa yuda nan. (Echo. 20:31) I p’esei nan tabata stim’é hopi tambe. De echo, tabatin un biaha ku e ansianonan na Efeso “a basha na yoramentu” ora nan a haña sa ku nunka nan lo no mir’é atrobe. (Echo. 20:37) Nos ansianonan tambe ta stima nan rumannan i ta hasi tur loke nan por pa yuda nan. (Flp. 2:16, 17) Pero, no ta tur biaha nan ta logra hasi tur e kosnan ku nan tin ku hasi. Kiko por yuda nan?

² Ansianonan por siña hopi for di Pablo. (1 Kor. 11:1) E tabata un hende imperfekto meskos ku nos i no tabatin niun poder spesial. Tin biaha, e tabata lucha pa hasi loke ta korekto. (Rom. 7:18-20) Ademas, Pablo tabatin vários reto ku e mester a trata kuné. Pero nunka el a entregá ni pèrdè su goso. Dor di imitá Pablo, ansianonan por sigui sirbi Yehova ku goso asta ora nan haña nan ku reto. Laga nos wak kon nan por hasi esei.

3. Kiko ta tur e kosnan ku nos lo trata den e artíkulo akí?

³ Den e artíkulo akí, nos ta bai papia di kuater reto ku ansianonan ta haña nan kuné: (1) balansá e trabou di prediká ku otro responsabilidatnan, (2) saka tempu pa pastoriá, (3) trata ku nan mes debilidatnan i (4) dil ku e fayonan di otro hende. Ban wak kon Pablo a trata ku e kuater retonan ei i loke ansianonan por siña.

4. Dikon tin biaha no ta fásil pa ansianonan ta un bon ehèmpel den e trabou di prediká?

⁴ Dikon e no ta dje fásil ei? Ansianonan mester ta un bon ehèmpel den e trabou di prediká. Pero banda di esei,  tin yen di otro kos mas ku nan tin ku hasi tambe. Por ehèmpel, durante e reunion di den siman nan tin ku para komo presidente i dirigí Estudio di Beibel di Kongregashon. Tambe nan ta duna diskurso, ta train e sirbidónan ministerial i ta saka tempu pa animá e rumannan den kongregashon. (1 Ped. 5:2) I tin otro ansianonan ku tambe ta traha i mantené Salònnan di Reino i otro edifisionan di e organisashon. Pero, meskos ku tur otro ruman, e trabou di mas importante ku un ansiano tin ta di prediká e bon notisia.​—Mat. 28:19, 20.

5. Dikon Pablo tabata un bon ehèmpel den e trabou di prediká?

⁵ Loke Pablo a hasi. Pablo tabatin éksito den e trabou di prediká. Kiko tabata su sekreto? Na Filipensenan 1:10, el a bisa: “Hasi sigur kiko ta e kosnan mas importante.” E asignashon ku el a haña tabata di bai prediká, anto pa dékadanan el a mira e asignashon ei komo e kos di mas importante den su bida. El a prediká “públikamente i di kas pa kas.” (Echo. 20:20) Pablo no a sinti ku ta solamente durante sierto ora òf sierto dia e mester a prediká. Tur chèns ku el a haña, el a prediká. Por ehèmpel, ora e tabata warda riba su kompañeronan na Aténas, el a probechá prediká na algun hende prominente i algun di nan a skucha bon. (Echo. 17:16, 17, 34) Asta ora e tabatin su “kadenanan di prizòn,” el a prediká na tur hende ku tabata rònt di dje.​—Flp. 1:13, 14; Echo. 28:16-24.

6. Kiko Pablo a siña otro rumannan hasi?

⁶ Pablo a hasi bon uso di e tempu ku e tabatin. Hopi biaha el a invitá otro hende pa bin djòin e den e trabou di prediká. Por ehèmpel, riba su promé biahe komo misionero, el a bai ku Huan Marko i riba e di dos el a bai ku Timoteo. (Echo. 12:25; 16:1-4) Sin duda Pablo a hasi su esfuerso pa siña nan kon pa yuda un kongregashon funshoná bon, kon pa pastoriá i kon pa bira un bon maestro.—1 Kor. 4:17.

7. Kon ansianonan por hasi loke Pablo a bisa na Efesionan 6:14 i 15?

⁷ Loke ansianonan por siña. Ansianonan ta imitá Pablo ora nan ta prediká di kas pa kas. Pero, nan ta imit’é tambe dor di semper ta kla pa prediká na kualke momento. (Lesa Efesionan 6:14, 15.) Por ehèmpel, nan por prediká na nan trabou òf ora nan bai kumpra algu. Òf, si nan ta traha riba proyektonan teokrátiko, nan por prediká na e bisiñanan i na e hendenan ku ta bin entregá material.  I meskos ku Pablo, ansianonan ta usa e tempu ku nan ta pasa den sirbishi pa train otro rumannan, inkluso sirbidónan ministerial.

8. Kiko tin biaha un ansiano tin ku hasi?

⁸ Ansianonan lo no ke ta asina okupá ku asignashonnan teokrátiko ku nan no ta sobra tempu pa prediká. P’esei, pa nan keda balansá tin biaha nan tin ku nenga un asignashon. Ora un ansiano haña un asignashon, lo ta bon pa e hasi orashon i analisá su situashon promé ku e asept’é. Dikon? Pasó, asina ei lo e mira si lo e sobra tempu pa e kosnan mas importante. E kosnan importante ta inkluí adorashon di famia tur siman, prediká regularmente i si e tin yu, siña nan prediká. Algun ansiano ta haña ku ta difísil pa nenga un asignashon, pero nan por tin sigur ku Yehova ta komprondé nan deseo pa keda balansá.

9. Ki otro kos no ta dje fásil ei pa ansianonan hasi?

⁹ Dikon e no ta dje fásil ei? Yehova su sirbidónan ta haña nan ku hopi difikultat. P’esei, durante e último dianan, nos tur mester di animashon, yudansa i konsuelo. I tin di nos tin mester di un poko yudansa pa nos evitá di hasi algu robes. (1 Tes. 5:14) Klaru, ansianonan no por kita tur e pruebanan ku Yehova su pueblo ta pasa aden. Apesar di esei, Yehova tòg ke pa e ansianonan hasi tur loke nan por pa protehá i animá su karnénan. Un ansiano ku ya kaba ta hopi okupá kisas por puntra su mes: ‘For di unda mi ta bai saka tempu pa yuda e rumannan?’

10. Segun 1 Tesalonisensenan 2:7, kon Pablo a kuida Yehova su sirbidónan?

¹⁰ Loke Pablo a hasi. Pablo a buska oportunidat pa elogiá i animá e rumannan. Ansianonan awe tin ku hasi meskos i trata nan rumannan ku hopi amor. (Lesa 1 Tesalonisensenan 2:7.) Pablo a bisa su rumannan kuantu e tabata stima nan i kuantu Yehova tambe tabata stima nan. (2 Kor. 2:4; Efe. 2:4, 5) P’e, nan tabata su amigunan i p’esei e tabata pasa tempu ku nan. E tabata konfia nan i e tabata bisa nan gewon kiko tabata preokup’é i kiko tabata e kosnan ku e tabata lucha kuné. (2 Kor. 7:5; 1 Tim. 1:15) Pablo no a laga su problemanan strob’é di yuda su rumannan.

11. Dikon Pablo a konsehá su rumannan?

¹¹ Tin biaha Pablo mester a duna konseho na su rumannan. Pero nunka el a hasi esei pasobra e tabata fadá ku nan. El a duna nan konseho pasobra e tabata stima nan anto e kier a protehá nan di vários peliger. El a sòru pa su konseho tabata fásil pa komprondé i tabata ke pa  nan aseptá e konseho. Por ehèmpel, el a duna e rumannan di Korinto un konseho fuerte. Despues di a skirbi nan e karta, el a manda Tito bai bishitá nan. Dikon? Pablo tabata ansioso pa tende kon e rumannan a reakshoná riba su karta. Pues, nos por djis imaginá kon kontentu e tabata pa haña sa ku su konseho a kai den bon tera.​—2 Kor. 7:6, 7.

12. Kiko ansianonan por hasi pa fortalesé nan rumannan?

¹² Loke ansianonan por siña. Un manera ku ansianonan por hasi meskos ku Pablo ta di pasa tempu ku nan rumannan. Nan por hasi esei dor di yega trempan na reunion, ya asina nan por kòmbersá ku e rumannan i animá nan. Anto no ta tuma hopi tempu pa duna un ruman e animashon ku e mester. (Rom. 1:12; Efe. 5:16) Un otro manera ku un ansiano por hasi meskos ku Pablo ta di usa Beibel pa fortalesé e rumannan su fe i pa konvensé nan kuantu Yehova ta stima nan. Ademas, e ta hasi sigur ku e rumannan sa kuantu e mes ta stima nan. E ta papia tur ora ku nan i ta buska oportunidat pa elogiá nan. Anto ora e tin ku duna konseho, e ta hasi sigur ku e konseho ta na armonia ku Beibel. Aunke ku su konseho ta spesífiko, e ta dun’é ku amor pasobra e ke pa e ruman komprondé i aplik’é.—Gal. 6:1.

13. Kon un ansiano su debilidatnan por lag’é sinti?

¹³ Dikon e no ta dje fásil ei? Meskos ku nos, tur ansiano ta imperfekto i nan ta hasi fout. (Rom. 3:23) Pero no ta tur ansiano tin e mesun punto di bista tokante nan debilidatnan. Tin ta keda enfoká asina hopi riba nan erornan ku nan ta desanimá. I tin otro ku no ta wòri nan kabes mes tokante nan foutnan i nan ta kere ku nan no mester hasi niun kambio.

14. Segun Filipensenan 4:13, kon humildat a yuda Pablo trata ku su debilidatnan?

¹⁴ Loke Pablo a hasi. Pablo tabata humilde i tabata sa ku ta solamente ku Yehova su yudansa e por a trata ku su debilidatnan. Mas promé, Pablo tabata determiná pa persiguí e kristiannan. Pero despues, el a bin komprondé ku loke e tabata hasi no tabata bon, i e tabata dispuesto pa kambia su aktitut i personalidat. (1 Tim. 1:12-16) Ku Yehova su yudansa, el a bira un ansiano amoroso, kompasivo i humilde. Pablo tabata sa ku el a hasi hopi kos robes. Pero na lugá di keda pensa riba nan, el a hasi  esfuerso pa kòrda ku Yehova ta un Dios ku ta pordoná. (Rom. 7:21-25) Pablo no a kere ku e tabata perfekto. Mas bien, el a hasi esfuerso pa mehorá su kualidatnan kristian i a dependé humildemente riba Yehova su spiritu santu p’e kumpli ku su asignashon.​—1 Kor. 9:27; lesa Filipensenan 4:13.

15. Kiko por yuda un ansiano tin un punto di bista korekto tokante su imperfekshonnan?

¹⁵ Loke ansianonan por siña. Un ruman hòmber no ta bira ansiano pasó e ta perfekto. Loke Yehova ta ferwagt di dje ta pa e rekonosé su fayonan i traha riba su personalidat kristian. (Efe. 4:23, 24) Ora un ansiano lesa Beibel, e tin ku hasié ku e meta pa mira unda e tin ku hasi kambio. E ora ei Yehova ta bai yud’é pa ta un bon ansiano i pa ta felis.​—Sant. 1:25.

16. Kiko por pasa si un ansiano keda wak e fayonan di su rumannan?

¹⁶ Dikon e no ta dje fásil ei? Ora ansianonan pasa hopi tempu ku nan rumannan, mas konsiente nan ta bira di e rumannan su fayonan. Pero si nan no paga tinu, nan por laga e fayonan ei pone nan konsumí ku e rumannan, trata nan brutu òf kritiká nan. Pablo a spièrta e kristiannan ku si nan hasi e kosnan ei, Satanas lo keda hopi kontentu ku nan.​—2 Kor. 2:10, 11.

17. Ki punto di bista Pablo tabatin di su rumannan?

¹⁷ Loke Pablo a hasi. Pablo semper a wak e bon den su rumannan. E tabata konsiente di nan fayonan pasobra tin biaha nan a hasi kos ku a hasié tristu. Pero e tabata sa ku un ruman no ta bira un mal hende djis pasobra el a kometé un eror. El a stima su rumannan i a preferá di focus riba nan bon kualidatnan. Si su rumannan tabatin difikultat pa hasi loke ta korekto, su punto di bista semper tabata ku nan tin e deseo di hasi loke ta bon i ku ta djis yudansa nan mester.

18. Kiko bo ta siña for di e manera ku Pablo a yuda Evodia i Síntike? (Filipensenan 4:1-3)

¹⁸ Ban wak kon Pablo a yuda dos ruman den e kongregashon na Filipo. (Lesa Filipensenan 4:1-3.) Ta parse ku Evodia i Síntike a rabia ku otro debí na un desakuerdo. Pablo no a baha pisá riba nan ni kritiká nan. Mas bien, el a preferá di focus riba nan bon kualidatnan. E dos rumannan fiel ei a sirbi Yehova pa hopi tempu, i Pablo tabata sa ku Yehova tabata stima nan. Pablo su punto di bista positivo a yud’é den vários manera. El a yud’é animá e dos rumannan ei pa buska pas, el a yud’é mantené su mes goso i  pa mantené e amistatnan ku e mes tabatin den e kongregashon ei.

19. (a) Kon un ansiano por focus riba e bon kualidatnan di su rumannan? (b) Kiko bo ta siña for di e plachi di e ansiano ku ta hasiendo limpiesa na Salòn?

¹⁹ Loke ansianonan por siña. Ansianonan, tur ruman den kongregashon ta imperfekto, pero kada un tin kualidatnan ku ta hasi nos kontentu. (Flp. 2:3) Ta bèrdat ku ansianonan de bes en kuando tin ku duna e rumannan konseho. Pero, meskos ku Pablo, ansianonan ta hasi nan esfuerso pa wak mas aleu di e kosnan ku e rumannan por bisa òf hasi ku ta traha riba nan nèrvio. En bes di esei, nan mester kòrda kuantu e ruman akí ta stima Yehova, kuantu kos el a pasa aden pa keda sirbi Yehova i e kapasidat ku e tin pa hasi loke ta bon. Un ansiano ku ta purba di focus riba e bon kualidatnan di su rumannan ta krea un ambiente kaminda henter e kongregashon ta stima otro.

20. Kiko ansianonan por hasi pa sigui imitá Pablo?

²⁰ Ansianonan, lo ta bon pa boso sigui hasi estudio personal tokante Pablo. Por ehèmpel, boso por hasi investigashon den e Índice de las publicaciones Watch Tower bou di e tópiko “Pablo” anto djei buska “ejemplo para los ancianos.” Segun ku boso ta lesa e referensianan einan, puntra boso mes: ‘Kon loke Pablo a hasi por yuda mi keda ku mi goso segun ku mi ta kumpli ku mi tareanan komo ansiano?’

21. Kiko ansianonan por tin sigur di dje?

²¹ Kòrda ku Yehova no ta pidi pa boso ta ansianonan perfekto, ma pa boso ta fiel. (1 Kor. 4:2) Pablo a traha duru i tabata fiel, anto Yehova a keda kontentu ku esei. Boso por tin sigur ku Yehova ta keda kontentu ku loke boso ta hasi. Yehova nunka lo “lubidá boso trabou i e amor ku boso a mustra pa su nòmber, mirando ku boso a sirbi i ta sigui sirbi e santunan.”—Heb. 6:10.