1. Kiko ta e kos ku mas ta determiná nos personalidat?

 SEA ku nos tin djis un par di dia so batisá òf vários aña kaba den e bèrdat, nos tur ke tin e tipo di personalidat ku ta hasi Yehova kontentu. Pero, pa logra esei nos tin ku kontrolá nos pensamentu. Dikon? Pasobra nos pensamentu ta e kos ku mas ta determiná nos personalidat. Si tur ora bai nos ta keda pensa riba kon pa satisfasé nos mes deseonan, tardi òf trempan nos ta bai bisa òf hasi algu robes. (Efe. 4:17-19) Pero di otro banda, si nos ta pensa riba bon kosnan, chèns ta grandi ku nos lo papia i aktua na un manera ku ta hasi Yehova kontentu.—Gal. 5:16.

2. Ki pregunta nos lo kontestá den e artíkulo akí?

² Manera nos a menshoná den e artíkulo anterior, nos no por evitá ku pensamentunan robes ta pasa den nos mente. Pero, loke sí nos por skohe ta pa no hasi e kos ku nos a pensa. Promé ku nos a batisá, nos mester a stòp di papia i aktua na un manera ku Yehova ta desaprobá. Esei ta e promé kos i esun di mas importante ku nos tin ku hasi pa kita e personalidat bieu. Pero, pa hasi Yehova mas kontentu nos tin ku “bisti e personalidat nobo” tambe. (Kol. 3:10) Den e artíkulo akí nos ta bai kontestá e siguiente preguntanan: Kiko “e personalidat nobo” ta? Kon nos por bisti e personalidat nobo i no kit’é?

3. Splika kiko “e personalidat nobo” ta i kon un hende por bistié. (Galationan 5:22, 23)

³ Un hende ku tin “e personalidat nobo” bistí lo hasi  su esfuerso pa imitá Yehova. Si e permití Dios su spiritu santu guia loke e ta hasi, lo e tin e bon kualidatnan ku Galationan 5:22 i 23 ta menshoná. (Les’é.) Por ehèmpel, lo e stima Yehova i su sirbidónan. (Mat. 22:36-39) Lo e keda ku su goso apesar di prueba. (Sant. 1:2-4) Lo e buska pas. (Mat. 5:9) Lo e tin pasenshi, i lo e ta amabel ku otro hende. (Kol. 3:13) Lo e gusta loke ta bon, i lo e gusta hasi bon pa hende. (Luk. 6:35) E ta demostrá ku e tin fe den Yehova. (Sant. 2:18) E ta keda kalmu ora otro hende provok’é i ta dominá su mes ora e hañ’é ku tentashon.—1 Kor. 9:25, 27; Tito 3:2.

4. Akaso nos por traha un pa un riba e kualidatnan ku Galationan 5:22 i 23 ta menshoná? Splika.

⁴ Pa nos por bisti e personalidat nobo, nos tin ku traha riba tur e kualidatnan ku tin na Galationan 5:22 i 23 i den otro tekstonan di Beibel. * E kualidatnan akí no ta manera paña ku nos por bisti un pa un. De echo, hopi di e kualidatnan akí ta mará ku otro. Por ehèmpel, si bo ta ègt stima bo próhimo, lo bo tene pasenshi kuné i lo bo ta amabel kuné. I si di bèrdat bo ke ta un bon hende, bo mester ta suave i demostrá dominio propio.

5. Kiko ke men tin “e mente di Kristu,” i dikon nos tin ku studia Hesus su bida? (1 Korintionan 2:16)

⁵ Lesa 1 Korintionan 2:16. Pa nos bisti e personalidat nobo nos mester tin “e mente di Kristu.” Ku otro palabra, nos tin ku siña kon Hesus ta pensa i djei imit’é. Hesus ta demostrá e fruta di Dios su spiritu santu na un manera perfekto. E ta un refleho perfekto di Yehova su kualidatnan. (Heb. 1:3) Mas nos pensa manera Hesus, mas nos lo aktua manera e i mas fásil lo ta pa nos reflehá su personalidat.—Flp. 2:5.

6. Kiko nos tin ku kòrda segun ku nos ta purba di bisti e personalidat nobo?

⁶ Kisas bo ta duda ku bo por imitá Hesus, anto bo ta bisa: ‘Ami nunka por ta manera Hesus. E ta perfekto!’ Si bo ta sinti asina, purba di kòrda lo siguiente: Pa di promé, bo a wòrdu kreá pa ta manera Yehova i Hesus. Pues, ta keda na  abo si bo kier imitá nan. I bo por; por lo ménos te na un sierto grado. (Gén. 1:26) Di dos, Dios su spiritu santu ta e forsa di mas poderoso den henter e universo. Ku su yudansa lo bo por logra hasi kos ku pa bo tabata imposibel. Di tres, Yehova no ta ferwagt ku aworakí bo tin ku demostrá e fruta di su spiritu santu na un manera perfekto. De echo, nos Tata ku ta stima nos masha tantu mes a apartá 1.000 aña pa esnan ku tin e speransa di biba pa semper aki riba tera por bira perfekto. (Rev. 20:1-3) Loke Yehova ke pa nos hasi aworakí ta di hasi nos esfuerso i dependé riba dje.

7. Kiko nos ta bai analisá aworakí?

⁷ Kon nos por imitá Hesus? Ban papia brevemente di kuater kualidat ku Dios su spiritu santu ta produsí den nos. Nos ta bai mira kon Hesus a demostrá kada un di nan i kiko nos por siña. I ku yudansa di un par di pregunta nos lo wak kon pa mehorá nos personalidat nobo.

8. Kon Hesus a demostrá amor?

⁸ Komo ku Hesus ta stima Yehova asina tantu, e tabata dispuesto pa hasi sakrifisio tantu pa su Tata komo pa nos. (Huan 14:31; 15:13) E manera ku Hesus a hiba su bida aki riba tera a demostrá kuantu e tabata stima hende. Tur ora e tabata demostrá amor i kompashon; asta ora nan tabata opon’é. I e manera mas importante ku el a demostrá ku e tabata stima hende tabata dor di siña nan tokante di Dios su Reino. (Luk. 4:43, 44) Tambe Hesus a mustra kuantu e tabata stima Dios i hende ora e tabata dispuesto pa sufri i muri na man di pekadó. Loke el a hasi ei a habri kaminda pa nos por biba pa semper.

9. Kon nos por demostrá amor manera Hesus?

⁹ Loke a pone nos dediká nos mes i batisá tabata nos amor pa Yehova. P’esei, meskos ku Hesus, nos ta demostrá ku nos ta stima Yehova na e manera ku nos ta trata hende. Apòstel Huan a skirbi: “Esun ku no ta stima su ruman, ku e ta mira, no por stima Dios, ku e no ta mira.” (1 Huan 4:20) P’esei, puntra bo mes: ‘Mi stima hende di kurason? Mi ta sigui demostrá kompashon na otro hende asta ora nan trata mi malu? Amor ta motivá mi pa hasi tur mi esfuerso pa yuda hende siña tokante Yehova? Mi ta dispuesto pa sigui hasi esei asta ora mayoria di hende no ta apresiá loke mi ta hasi òf asta ta oponé mi? Kiko mi por hasi pa mi por dediká mas tempu den e trabou di prediká?’​—Efe. 5:15, 16.

10. Dikon nos por bisa ku Hesus semper tabata buska pas?

¹⁰ Hesus tabata un hende ku ta buska pas. El a bai mas leu ku djis no paga malu ku malu. Semper el a buska pas i a animá otro hende pa hasi meskos. Por ehèmpel, el a siña nan ku nan mester a hasi pas ku nan ruman si nan tabata ke pa Yehova aseptá nan adorashon. (Mat. 5:9, 23, 24) I bes tras bes ora su apòstelnan tabata diskutí tokante kua di nan tabata esun di mas grandi, el a korigí nan manera di pensa.​—Luk. 9:46-48; 22:24-27.

11. Kon nos por ta e tipo di hende ku ta buska pas?

¹¹ Un hende ku ta buska pas ta hasi mas ku djis evitá problema. E ta tuma e inisiativa pa hasi pas i ta animá otro hende pa hasi meskos. (Flp. 4:2, 3; Sant. 3:17, 18) Hasi bo mes e siguiente preguntanan: ‘Te kon leu mi ta dispuesto pa bai  pa por hasi pas ku mi ruman? Ora un ruman hùrt mi, mi ta karga renkor? Mi ta sinta warda te ora e otro hende bin buska pas òf ami ta dal e promé paso, asta si segun mi ta é a kousa e problema? Si mi sa ku dos hende tin problema ku otro, anto e situashon ta permití, mi ta animá nan pa hasi pas?’

12. Kon Hesus a demostrá ku e tabata amabel?

¹² Hesus tabata masha amabel. (Mat. 11:28-30) El a mustra esei dor di ta suave i fleksibel asta ora tabata trata di situashonnan delikado. Por ehèmpel, ora un muhé di Fenisia a rog’é pa kura su yu, na promé instante Hesus no a hasi loke el a pidié. Pero, Hesus tabata amabel ku e muhé i a kura su yu ora el a mira kon grandi su fe tabata. (Mat. 15:22-28) Aunke Hesus tabata un hende amabel, esei no a strob’é di duna konseho. Por ehèmpel, ora Pedro a purba di desanimá Hesus di hasi Yehova su boluntat, Hesus a skual e dilanti di tur e otro disipelnan. (Mar. 8:32, 33) E no a hasi esei pa humiá Pedro, mas bien e tabata train e. Ademas, e kier a spièrta su otro disipelnan pa nan no strob’é di hasi Dios su boluntat; mas bien nan mester a apoy’é. Sin duda Pedro a sinti un tiki bèrgwensa, pero e disiplina a yud’é sí.

13. Kiko nos tin ku hasi si di bèrdat nos ke ta amabel?

¹³ Si di bèrdat bo ke ta amabel ku esnan ku bo ta stima, tin biaha lo bo tin ku duna nan konseho. Ora bo tin ku duna konseho, imitá Hesus i hasi sigur ku bo konseho ta na armonia ku Beibel. No baha pisá riba nan. Sea suave. Pensa lo mihó di nan i konfia ku si nan stima Yehova i stima bo, nan lo aseptá bo konseho. Hasi bo mes e siguiente preguntanan: ‘Si mi mira un hende ku mi ta stima ta hasi algu robes, lo mi tin kurashi pa bai papia kuné? Kon lo mi papia kuné? Lo mi ta amabel òf brutu? Pakiko mi ke papia kuné? Ta pasobra mi ta rabiá kuné, òf pasobra mi ke yud’é?’

14. Kon Hesus a demostrá bondat?

¹⁴ Hesus no djis sa loke ta bon, pero e ta hasié tambe. Anto debí ku e ta stima su Tata, semper e ta hasi e kos korekto i ku e motivashon korekto. Un hende ku ta demostrá bondat semper ta buska manera pa yuda otro hende. Pues, no ta sufisiente pa djis sa kiko ta bon; mas bien, nos tin ku hasié anto ku e motivashon korekto. Kisas un hende por puntra su mes: ‘Un hende por hasi bon pero ku mal motivashon?’ Sí, ta posibel. Por ehèmpel, Hesus a papia tokante esnan ku ta duna limosna na hende pober pero a hasi sigur ku otronan a haña sa kiko nan a hasi. Nan motivashon robes a pone ku nan bon obra a pèrdè balor den bista di Yehova.​—Mat. 6:1-4.

15. Kon nos por ta bon hende?

¹⁵ E úniko manera ku di bèrdat nos por ta bon hende ta si nos hasi loke ta bon ku e motivashon korekto. Pues, puntra bo mes: ‘Mi sa kiko ta e kos bon pa hasi i mi ta hasié tambe? Dikon mi ke hasi loke ta bon?’

16. Kiko nos tin ku hasi tur dia, i dikon?

¹⁶ Nos no mester pensa ku despues ku nos batisá nos ta kla ku nos bistimentu di e personalidat nobo anto nos no tin ku hasi nada mas. Nos personalidat  nobo ta manera un “paña nobo,” anto nos tin ku kuid’é. Un manera ku nos por hasi esei ta di demostrá e kualidatnan ku Dios su spiritu santu ta produsí den nos tur dia. Dikon? Pasobra mas nos hasi esei, mas Yehova su spiritu lo yuda nos. Kòrda, Yehova ta un Dios aktivo i su spiritu tambe ta aktivo. (Gén. 1:2) Pues, nos no por sinta man krusá. Disipel Santiago mes a bisa ku “fe sin obra ta morto.” (Sant. 2:26) I meskos ta konta pa e otro kualidatnan ku Dios su spiritu santu ta produsí den nos.

17. Kiko nos tin ku hasi si nos no logra demostrá e fruta di Dios su spiritu santu?

¹⁷ Tin biaha asta rumannan ku tin hopi aña batisá, no ta demostrá e fruta di Dios su spiritu santu. Si esei pasa, no entregá. Wak un ehèmpel. Imaginá ku bo paña faborito a haña un sker. Bo ta bent’é afó mesora? Nò. Muy probablemente, lo bo kos’é i lo bo ta mas kouteloso. Asina tambe, si a yega di sosodé ku bo no tabata amabel, bo a pèrdè pasenshi òf bo no a demostrá amor na un hende, no desanimá. Kisas si bo djis pidi despensa di kurason, esei ta sufisiente pa mantené e amistat ku e persona. Anto despues, sea determiná pa hasi mihó den futuro.

18. Kiko nos por tin sigur di dje?

¹⁸ Nos ta asina kontentu ku nos por siña for di Hesus! Mas nos logra pensa manera dje, mas fásil lo ta pa nos aktua meskos kuné. Anto mas nos aktua manera Hesus, mas mihó nos lo ta den bisti e personalidat nobo. Den e artíkulo akí nos a papia di solamente kuater kualidat ku Dios su spiritu santu ta produsí den nos. Lo ta bon pa saka un tiki tempu pa hasi estudio personal riba e otro kualidatnan tambe pa wak unda lo tin ku mehorá. Den Guia pa Buska Informashon den Publikashonnan di Testigunan di Yehova lo bo haña basta artíkulo ku ta papia tokante e tópiko ei. Bai bou di e tópiko “Bida Kristian” anto despues “Fruta di Spiritu.” Bo por tin sigur ku Yehova lo yuda bo si bo hasi esfuerso pa bisti e personalidat nobo i no kit’é.