1-3. (a) Segun Salmo 5:4-6, kiko Yehova ta pensa di maldat? (b) Dikon nos por bisa ku abusu seksual di mucha ta bai kompletamente kontra “lei di Kristu”?

YEHOVA DIOS ta odia tur tipo di maldat. (Lesa Salmo 5:4-6.) E ta odia spesialmente abusu seksual di mucha, un piká repugnante i masha horibel. Debí ku nos ta Testigunan di Yehova, nos ta imitá Yehova i ta odia abusu seksual di mucha i no ta tolerá esei den e kongregashon kristian.—Rom. 12:9; Heb. 12:15, 16.

² Kualke forma di abusu seksual di mucha ta bai kompletamente kontra “lei di Kristu,” esta, tur loke Hesus a siña su siguidónan mediante su palabranan i ehèmpel. (Gal. 6:2) Dikon nos por bisa asina? Manera nos a siña den e artíkulo anterior, lei di Kristu ta basá riba amor i ta promové hustisia. Debí ku tur kristian berdadero ta obedesé e lei ei, nos ta trata mucha na un manera ku ta laga nan sinti nan safe i stimá. Pero, abusu seksual di mucha ta un akto egoista i robes. E akto ei ta laga e mucha sinti ku niun hende no ta stim’é ni ta proteh’é.

³ Lamentablemente, abusu seksual di mucha ta un problema serio, i asta algun mucha den e kongregashon kristian a bira víktima di esei. Dikon? “Hende malbado” ta tur kaminda, i nan ta purba di drenta den kongregashon. (2 Tim. 3:13) Un otro motibu ta ku algun hende ku ta pretendé di ta parti di e kongregashon a entregá nan mes na deseo karnal pèrvèrso i a abusá seksualmente di mucha. Laga nos analisá dikon abusu di mucha ta un piká asina grave. Despues nos lo analisá kon ansiano ta trata kaso  di piká serio, inkluso abusu seksual di mucha, i kon tur mayor por protehá nan yunan. *

4-5. Dikon abusu seksual di mucha ta un piká kontra e víktima?

⁴ Abusu seksual di mucha tin konsekuensia devastador. E ta afektá tantu e víktima komo esnan ku ta stim’é, esta, su famia- i e rumannan den kongregashon. Abusu seksual di mucha ta un piká grave.

⁵ Un piká kontra e víktima. * Ta un piká pa hasi otro hende daño i pone nan sufri. Manera nos lo mira den e siguiente artíkulo, esei ta nèt loke hende ku ta abusá seksualmente di mucha ta hasi; nan ta kousa e mucha hopi daño. Nan ta traishoná su konfiansa i ta pone ku e no ta sintié safe mas. Ademas, nan ta fòrsa e mucha pa eksperensiá algu ku e no mester eksperensiá. Nos mester protehá mucha di akto malbado asina, i víktima di e akto ei mester di konsuelo i yudansa.—1 Tes. 5:14.

6-7. Dikon abusu seksual di mucha ta un piká kontra e kongregashon i kontra gobièrnu?

⁶ Un piká kontra e kongregashon. Ora un hende ku ta parti di e kongregashon abusá seksualmente di mucha, e ta trese reproche riba e kongregashon. (Mat. 5:16; 1 Ped. 2:12) Pero no ta hustu ku akshon di un hende ta perhudiká miónes di ruman fiel ku sí ta “lucha duru pa e fe.” (Hudas 3) Nos no ta tolerá pa hende ku ta hasi kos malbado i no ta arepentí, i ku ta trese reproche riba e bon reputashon di e kongregashon keda forma parti di e kongregashon.

⁷ Un piká kontra gobièrnu. Tur kristian mester “ta sumiso na outoridatnan superior.” (Rom. 13:1) Nos ta mustra ku nos ta sumiso na gobièrnu ora nos ta respetá i obedesé e leinan di e pais. Si un hende den kongregashon kibra un lei penal, por ehèmpel, abusá seksualmente di mucha, e ta peka kontra gobièrnu. (Kompará ku Echonan 25:8.) Aunke e ansianonan no tin outoridat pa ehekutá e leinan di e pais, nan no ta protehá un hende ku a abusá seksualmente di mucha for di e kastigu penal di gobièrnu. (Rom. 13:4) E pekadó lo kosechá loke el a sembra.—Gal. 6:7.

8. Kiko Yehova ta pensa ora un hende peka kontra un otro hende?

⁸ Un piká prinsipalmente kontra Dios. (Gen. 39:9) Ora un hende peka kontra un otro hende, e ta peka tambe kontra Yehova. Por ehèmpel, wak e Lei ku Dios a duna e nashon di Israel. E Lei a bisa ku un hende ku a hòrta òf estafá un otro hende tabata aktua kontra Yehova. (Lev. 6:2-4) Pues anto, ora un hende ku ta parti di e kongregashon abusá seksualmente di mucha—hòrtando e mucha su sentido di siguridat—e no ta fiel na Dios. Un hende ku ta konosí komo adoradó di Yehova i ta abusá seksualmente di mucha ta daña Yehova su reputashon. P’esei, nos mester rekonosé ku abusu seksual di mucha ta un piká repugnante kontra Dios i nos ta kondená e akto ei.

9. Atraves di aña, ki informashon basá riba Beibel Kuerpo Gobernante a publiká, i dikon?

 ⁹ Atraves di aña, Kuerpo Gobernante a publiká hopi informashon basá riba Beibel tokante e tópiko di abusu seksual di mucha. Por ehèmpel, algun artíkulo den E Toren di Vigilansia i Spièrta! a trata kiko e víktimanan por hasi pa trata ku sikatris emoshonal, kon otro persona por yuda i animá nan i kon tur mayor por protehá nan yunan. Kuerpo Gobernante a duna e ansianonan instrukshon detayá basá riba Beibel tokante kiko pa hasi ora un hende abusá seksualmente di mucha. Kuerpo Gobernante kontinuamente ta analisá e manera ku e ansianonan ta atendé ku e tipo di piká ei. Dikon? Pa hasi sigur ku ta trata kaso di abusu seksual di mucha di akuerdo ku lei di Kristu.

10-12. (a) Ora e ansianonan ta trata kualke kaso di piká serio, kiko nan ta tene na mente, i kiko ta nan meta? (b) Segun Santiago 5:14 i 15, kiko e ansianonan ta purba di hasi?

¹⁰ Ora e ansianonan ta trata kualke kaso di piká serio, nan ta tene na mente ku lei di Kristu ta bisa nan pa trata e tou ku amor i pa hasi loke Dios ta bisa ta hustu i rekto. Komo resultado, tin diferente punto ku nan ta tene kuenta kuné ora nan haña sa ku un hende a kometé un piká serio. Nan meta di mas importante ta pa onra Yehova i protehá su reputashon. (Lev. 22:31, 32; Mat. 6:9) Un otro meta importante ku nan tin ta pa yuda nan rumannan den kongregashon keda serka Yehova i pa duna konsuelo i yudansa na e víktima di piká serio.

¹¹ Ademas, e ansianonan ta purba di saka afó si esun ku a kometé e piká serio ta arepentí. Si esei ta e kaso, nan lo yud’é drecha su relashon ku Yehova. (Lesa Santiago 5:14, 15.) Un kristian ku kometé un piká serio pa satisfasé su mal deseonan ta manera un hende enfermo. Esei ke men ku e no tin un bon relashon ku Yehova mas. * Nos por kompará e ansianonan ku dòkter. Nan ta purba di “kura esun ku ta malu,” den e kaso akí, esun ku a kometé e piká serio. Nan konseho basá riba Beibel por yud’é drecha su relashon ku Dios, pero esei ta posibel solamente si e ta arepentí di kurason.—Echo. 3:19; 2 Kor. 2:5-10.

¹² Pues, sin duda e ansianonan tin un responsabilidat pisá. Nan ta stima e tou pasobra Dios a duna nan e responsabilidat di kuida su pueblo i trata nan ku amor i hustisia. (1 Ped. 5:1-3) Nan ke pa nan rumannan sinti nan safe den kongregashon. P’esei, nan no ta tarda ora nan haña informashon di un piká serio, inkluso den kaso di abusu seksual di mucha. Kiko nan ta hasi? Laga nos analisá e preguntanan na komienso di  paragraf 13,  15, i  17.

13-14. E ansianonan mester obedesé e leinan di e pais i hasi denunsia di abusu seksual di mucha? Splika.

 ¹³ E ansianonan mester obedesé e leinan di e pais i hasi denunsia di abusu seksual di mucha na instansia di gobièrnu? Sí. Algun pais tin lei ku ta rekerí pa un persona ku tende di un kaso di abusu seksual di mucha, hasi denunsia di esei na instansia di gobièrnu. E ansianonan den e paisnan ei ta obedesé tal lei. (Rom. 13:1) E leinan ei no ta bai kontra lei di Dios. (Echo. 5:28, 29) Pues, ora e ansianonan haña sa ku un mucha a ser abusá seksualmente, mesora nan ta yama e ofisina di sukursal pa puntra ki paso nan mester tuma pa obedesé  lei tokante hasimentu di denunsia di un asuntu asina.

¹⁴ E ansianonan mester splika e víktima i su mayornan i kualke persona ku sa di e kaso ku nan tin derecho di hasi denunsia na instansia di gobièrnu. Pero kiko si e denunsia ta kontra un hende ku ta parti di e kongregashon i despues e asuntu bira konosí den komunidat? Akaso e kristian ku a hasi e denunsia mester sinti ku el a trese reproche riba Dios su nòmber? Nò. Ta esun ku a abusá seksualmente di e mucha a trese reproche riba Dios su nòmber.

15-16. (a) Segun 1 Timoteo 5:19, dikon e ansianonan mester di por lo ménos dos testigu pa forma un komité hudisial? (b) Kiko e ansianonan ta hasi ora nan haña sa ku un hende den kongregashon a ser akusá di abusu seksual di mucha?

 ¹⁵ Dikon e ansianonan den kongregashon mester di por lo ménos dos testigu pa proba ku un hende a kometé un piká serio? Pasobra Beibel ta bisa ku esei ta hustu. Ora akusá un hende di un piká serio, pero e no ta atmití esei, e ansianonan mester di dos testigu pa nan por forma un komité hudisial. (Deu. 19:15; Mat. 18:16; lesa 1 Timoteo 5:19.) Akaso esei ke men ku mester di dos testigu promé ku hasi denunsia di abusu seksual di mucha na instansia di gobièrnu? Nò. Dos testigu no ta nesesario pa un ansiano òf kualke otro persona hasi denunsia di un krímen.

¹⁶ Ora e ansianonan haña sa ku un hende den kongregashon a ser akusá di abusu seksual di mucha, nan ta hasi esfuerso pa kumpli ku kualke lei ku gobièrnu tin tokante denunsiá e asuntu, i nan ta investigá pa haña sa loke realmente a pasa. Despues di esei, basá riba loke Beibel ta bisa, nan ta determiná si mester forma un komité hudisial. Nan ta puntra e hende ku a ser akusá si el a kometé e piká. Si e nenga, nan ta skucha e testigunan. Si e persona ku a hasi e akusashon i por lo ménos un otro persona mas konfirmá ku e hende a abusá di e mucha akí, òf di un otro mucha na kualke otro momento, e ora ei e ansianonan tin sufisiente prueba pa forma un komité hudisial. * Si no tin un di dos testigu, no ke men ku e akusashon ta falsu. Asta ora no tin dos testigu pa konfirmá ku e hende a abusá di mucha, e ansianonan ta konsiente ku e hende akusá kisas a hasi algu hopi malu ku a kousa hopi doló na otronan. E ansianonan lo sigui konsolá i yuda esnan ku ta sufri. Ademas, nan lo keda alerta pa protehá e kongregashon kontra posibel daño di e hende akusá di a abusá seksualmente di un mucha.—Echo. 20:28.

17-18. Splika kiko un komité hudisial ta hasi.

 ¹⁷ Kiko e komité hudisial ta hasi? Nan ta disidí si e hende ku a kometé un piká serio por keda den kongregashon òf nò. Nan no ta disidí si e hende ku a abusá seksualmente di un mucha mester haña kastigu debí ku el a kibra un lei penal. Nan ta laga gobièrnu disidí kon pa kastigá hende ku kibra e leinan ei.—Rom. 13:2-4; Tito 3:1.

¹⁸ Ora e ansianonan ta den un komité hudisial, nan ta husga solamente asuntu ku ta enbolbé un persona su relashon ku Dios i su relashon ku su rumannan den kongregashon. Nan ta usa Beibel pa yuda nan disidí si e hende ku a abusá seksualmente di un mucha ta arepentí òf nò. Si esei no ta e kaso, nan ta bis’é ku lo e ser ekspulsá, i nan ta anunsiá na e kongregashon ku e hende ei no ta un Testigu di  Yehova mas. (1 Kor. 5:11-13) Si e ta arepentí, e por keda den kongregashon. Pero, e ansianonan lo bis’é ku kisas nunka lo e kualifiká pa haña kualke privilegio òf responsabilidat den kongregashon. E ansianonan ta masha interesá den bienestar di e muchanan den kongregashon. P’esei, den privá nan lo papia ku e mayornan den kongregashon i spièrta nan ku nan mester wak bon ora nan yunan ta den serkania di e hende ei. Pero, nan ta tene kuidou pa no revelá identidat di e víktimanan.

19-22. Kiko mayornan por hasi pa protehá nan yunan? (Wak e plachi riba portada.)

¹⁹ Ken prinsipalmente ta responsabel pa protehá nan yunan di daño? Mayornan. * Boso yunan ta un regalo di Dios, “un herensia di SEÑOR.” (Sal. 127:3) Yehova a duna boso e responsabilidat pa protehá boso yunan. Kiko boso por hasi pa protehá boso yunan di abusu seksual?

²⁰ Promé, informá bo mes di abusu seksual. Buska pa sa ki tipo di hende ta abusá seksualmente di mucha i ki táktika nan ta usa pa haña mucha den nan gara òf manipulá nan. Sea atento na situashon òf hende ku por ta peligroso. (Pro. 22:3; 24:3) Kòrda ku den mayoria di kaso, hende ku ta abusá seksualmente di mucha ta hende ku e mucha konosé i ta konfia.

²¹ Di dos, mantené bon komunikashon ku boso yunan. (Deu. 6:6, 7) Esei ke men ku boso mester tuma tempu pa skucha boso yunan. (Sant. 1:19) Kòrda ku mucha ku ser abusá seksualmente hopi biaha tin miedu di konta otro persona loke a pasa. Nan tin miedu ku lo no kere nan, òf nan tin miedu pasobra esun ku a abusá di nan a menasá nan. Si bo ta sospechá ku algu malu a pasa bo yu, na un manera amabel hasi bo yu pregunta i skuch’é ku pasenshi.

²² Di tres, siña boso yunan. Siña nan tur loke nan mester sa tokante sèks di akuerdo ku nan edat i loke nan por komprondé. Siña nan kiko pa bisa i hasi si un hende purba di mishi ku nan na un manera inapropiá. Kuerpo Gobernante a duna boso hopi informashon ku boso por usa pa protehá boso yunan.—Wak e kuadro “ Informá Bo Mes i Siña Bo Yunan.”

23. Kon nos ta mira abusu seksual di mucha, i ki pregunta e siguiente artíkulo lo kontestá?

²³ Komo Testigunan di Yehova, nos ta mira abusu seksual di mucha komo un piká repugnante i un krímen horibel. Nos ta laga lei di Kristu guia nos, i nos no ta protehá niun hende ku ta abusá seksualmente di mucha di e konsekuensianan di nan piká. Pero, kon nos por yuda nos rumannan ku a bira víktima? E siguiente artíkulo lo kontestá e pregunta ei.