1. Kiko ta pone ku hopi ruman no tin gana di studia?

AWENDIA, hopi hende mester traha duru pa gana nan pan di kada dia. Hopi di nos rumannan ta traha henter dia pa perkurá pa e nesesidatnan di nan famia. Algun tin ku biaha oranan largu tur dia pa bai trabou i pa bini kas bèk. Ademas, hopi tin ku hasi trabou pisá. Na final di dia e rumannan ei ta morto kansá! Pues, ta di komprondé ku e último kos ku nan tin gana di hasi ta studia.

2. Ki ora abo ta studia?

² Echo ta ku nos mester traha tempu pa studia—ègt studia—Beibel i nos publikashonnan. Esei ta masha importante si nos ke tin un bon amistat ku Yehova i ke biba pa semper. (1 Tim. 4:15) Tin ruman ta lanta mainta trempan pa studia i meditá ora kas ta ketu i nan mente ta mas relahá. Otronan ta preferá di hasi esei na final di dia, ora ta mas trankil.

3-4. Ki kambio Kuerpo Gobernante a hasi na e kantidat di publikashon, i dikon?

³ Sin duda, bo ta di akuerdo ku ta importante pa traha tempu pa studia. Pero kiko nos mester studia? Kisas bo ta pensa: ‘Tin asina tantu kos pa lesa; mi no ta logra lesa tur.’ Algun ruman ta logra lesa tur publikashon i wak tur vidio ku sali, pero mayoria di nos rumannan no ta logra. Kuerpo Gobernante ta na altura di esei. P’esei, nan a disidí pa redusí e kantidat di publikashon, sea den forma imprimí òf digital.

⁴ Por ehèmpel, nos no ta publiká e Anuario di Testigunan di Yehova mas. Esei ta debí ku nos ta haña hopi eksperensia animante riba nos website jw.org^® i den e programanan  mensual di JW Broadcasting^®. Awor E Toren di Vigilansia (edishon pa públiko) i Spièrta! ta sali tres biaha pa aña so. Kuerpo Gobernante no a hasi e kambionan ei pa nos tin mas tempu pa hasi yen di otro kos. Mas bien, e kambionan ei ta duna nos mas tempu pa enfoká riba “e kosnan mas importante.” (Flp. 1:10) Laga nos wak kon nos por pone prioridat i kon nos por saka mas tantu benefisio for di nos estudio personal di Beibel.

5-6. Kiko ta importante pa nos studia?

⁵ Kiko ta un di e promé kosnan ku nos mester studia? Sin duda, nos mester traha tempu pa studia e Palabra di Dios tur dia. Kuerpo Gobernante a redusí e kantidat di versíkulo di nos lesamentu semanal di Beibel pa nos por tin mas tempu pa meditá i hasi investigashon. Nos meta no mester ta pa djis lesa e kantidat di versíkulo pa e siman ei, mas bien nos mester permití e mensahe di Beibel yega na nos kurason i oumentá nos amor pa Yehova.—Sal. 19:14.

⁶ Kiko mas ta importante pa nos studia? Nos tin ku prepará e material pa Estudio di Toren di Vigilansia i pa Estudio di Beibel di Kongregashon i tambe e otro materialnan pa e reunion di den siman. Nos mester lesa tambe tur edishon di Spièrta! i E Toren di Vigilansia, tantu esun pa públiko komo pa estudio.

7. Akaso nos mester desanimá si nos no ta logra lesa tur artíkulo òf wak tur vidio riba nos website i riba JW Broadcasting?

⁷ Kisas bo ta pensa: ‘Kiko awor di tur e artíkulo- i vidionan ku tin riba nos website jw.org i riba JW Broadcasting? Nan ta masha hopi!’ Si bo ta pensa asina, imaginá e siguiente ilustrashon: Un restorant ku tin bufèt tin un variedat grandi di kuminda. E klientenan no por purba delaster un di e kumindanan ei. Pues, nan ta kome loke nan por. Di mes manera, si bo no ta logra lesa tur artíkulo òf wak tur vidio, no desanimá. Lesa òf wak loke bo por. Awor, laga nos analisá kiko studia ta nifiká i kiko nos por hasi pa saka mas benefisio di nos estudio.

8. Kon bo tin ku prepará E Toren di Vigilansia, i dikon e método ei lo benefisiá bo?

⁸ Studia ta nifiká lesa ku hopi konsentrashon ku e meta pa siña algu importante. Esei ta enserá mas ku djis lesa e material ariba ariba i marka e kontestanan. Por ehèmpel, ora bo ta prepará e Estudio di Toren di Vigilansia, lesa promé e resúmen ku tin den “Un Bista Adelantá.” Despues, wak ki relashon e tema tin ku e suptemanan i e preguntanan di repaso. E ora ei, tuma bo tempu pa lesa kada paragraf. Presta atenshon na e promé frase di kada paragraf. Generalmente, e frase ei ta yuda bo haña sa loke e paragraf ta splika. Segun ku bo ta lesa e artíkulo, pensa kon kada paragraf ta konektá ku e suptema i e tema di e artíkulo. Si bo haña palabra difísil òf punto ku bo no a komprondé, marka nan pa bo investigá despues.

9. (a) Dikon nos tin ku presta bon atenshon na e tekstonan bíbliko ora nos ta studia E Toren di Vigilansia i kon nos por hasi esei? (b) Segun Hosue 1:8, kiko nos tin ku hasi fuera di lesa e tekstonan?

⁹ Bon mirá, nos Estudio di Toren di Vigilansia ta un estudio di Beibel. P’esei, presta bon atenshon na e tekstonan bíbliko, spesialmente esnan ku lo lesa durante reunion. Segun ku bo ta lesa nan,  pensa kon e palabranan òf frasenan klave ta apoyá e idea prinsipal di e paragraf. Ademas, tuma tempu pa meditá riba e tekstonan ku bo a lesa, i pensa kon abo por apliká nan den bo bida.—Lesa Hosue 1:8.

10. Di akuerdo ku Hebreonan 5:14, dikon tur mayor mester traha tempu durante adorashon komo famia pa siña nan yunan kon pa studia i hasi investigashon?

¹⁰ Ta normal ku tur mayor ke pa nan yunan disfrutá di nan Adorashon Komo Famia tur siman. Pero, aunke e mayornan semper mester tin algu na mente pa trata riba e dia ei, nan no mester sinti nan obligá pa plania un aktividat spesial òf proyekto interesante tur siman. Nan por usa algun seshon di nan Adorashon Komo Famia pa wak e programa mensual di JW Broadcasting òf de bes en kuando nan por hasi algu spesial, manera traha un réplika chikitu di e arka di Noe. Pero, ta importante tambe pa nan siña nan yunan kon pa studia. Por ehèmpel, e yunan tin ku siña kon pa prepará pa e reunionnan di kongregashon òf kon pa hasi investigashon riba un pregunta ku a presentá na skol. (Lesa Hebreonan 5:14.) Si e yunan ya tin e kustumber pa studia un tema bíbliko na kas, lo ta mas fásil pa nan presta atenshon na e material ku ta ser presentá na reunion, asamblea i kongreso, sea ku tin vidio òf nò. Di mes, ta dependé di e edat i personalidat di kada yu kon largu e mayornan ta disidí di tene e adorashon komo famia.

11. Dikon ta importante pa nos siña nos studiantenan di Beibel kon pa hasi estudio personal?

¹¹ Nos studiantenan di Beibel tambe tin ku siña kon pa studia. Na komienso, nos ta keda kontentu si nos studiantenan djis prepará i marka e kontestanan den nan buki di estudio i e material pa reunion. Pero, nos mester siña nan tambe kon nan mes por hasi investigashon i estudio personal. Di e manera ei, ora ku nan haña nan ku problema, nan no mester akudí na otronan den kongregashon pa sa kiko nan tin ku hasi. Nan mes lo sa kon pa hasi investigashon i haña konseho práktiko den nos publikashonnan.

12. Kiko mester ta nos meta ora di studia?

¹² Si bo no gusta studia, kisas bo ta sinti ku nunka lo bo disfrutá di studiamentu. Pero, bo por! Kuminsá ku periodo kòrtiku di estudio. Despues, tiki tiki  oumentá e kantidat di tempu ku bo ta studia. Pensa riba e motibu dikon bo ta studia. Kòrda, nos meta prinsipal ta pa sigui hala serka Yehova. Pero, bo por pone meta di término kòrtiku tambe. Nos por studia pa haña kontesta pa un pregunta ku un hende a hasi bo òf pa investigá un problema ku bo tin.

13. (a) Kiko un hóben por hasi pa splika su kreensianan na su kompañeronan di klas? (b) Kon bo por apliká e konseho ku nos ta haña na Kolosensenan 4:6?

¹³ Por ehèmpel, bo ta un hóben ku ta bai skol? Kisas tur mucha den bo klas ta kere den e teoria di evolushon. Lo bo tin gana di defendé loke Beibel ta bisa, pero kisas bo ta sinti ku lo bo no por. Pues, ta tempu pa un proyekto di estudio. Bo tin dos motibu pa hasi esei: (1) pa bira mas konvensí ku ta Dios ta esun ku a krea tur kos i (2) pa siña kon pa splika bo kreensianan mas mihó. (Rom. 1:20; 1 Ped. 3:15) Puntra bo mes: ‘Dikon mi kompañeronan di klas ta kere den evolushon?’ Despues, usa nos publikashonnan pa hasi bon investigashon. Lo bo ripará ku ta mas fásil ku bo ta kere pa splika bo kreensianan. Mayoria di hende ta kere den evolushon djis pasobra un hende ku nan ta respetá a bisa nan ku e teoria ei ta bèrdat. Si bo haña un òf dos punto pa kompartí ku nan, kisas bo por yuda un hende sinsero haña kontesta pa su preguntanan.—Lesa Kolosensenan 4:6.

14-16. (a) Kiko bo por hasi pa haña sa mas tokante un buki di Beibel ku bo no sa hopi di dje? (b) Usando e tekstonan menshoná, splika kon bo por komprondé e buki di Ámos mas mihó. (Wak tambe e kuadro “ Duna Bo Lesamentu di Beibel Bida!”)

¹⁴ Imaginá bo ku na un reunion di kongregashon nos mester lesa i analisá un buki di Beibel ku un di e profetanan menor a skirbi. Kisas bo no sa hopi tokante e buki ei. E promé kos ku bo por hasi ta di oumentá bo deseo pa haña sa mas tokante e buki ei. Kon bo por hasi esei?

¹⁵ Promé, puntra bo mes: ‘Kiko mi sa tokante e eskritor di e buki? Ken e tabata? Unda el a biba? Ki profeshon e tabatin?’ Mas bo sa tokante e eskritor, mas mihó lo bo komprondé dikon el a usa sierto palabra òf ilustrashon. Segun ku bo ta lesa, purba di imaginá ki tipo di hende e eskritor tabata.

¹⁶ Otro kos ku por yuda bo ta di haña sa na ki tempu a skirbi e buki. Bo por haña e informashon ei den e “Lista di e Bukinan di Beibel” ku ta aparesé patras den e Tradukshon di Mundu Nobo di e Santu Skritura, na ingles. Ademas di esei, bo por wak e tabèl di profeta- i reinan den e foyeto Yudansa pa Studia e Palabra di Dios, página 14-17. Si ta un profeta a skirbi e buki di Beibel, lo ta bon pa haña sa kon bida tabata tempu ku el a skirbié. Ken tabata biba den mesun tempu ku e profeta? Ki mal pensamentu òf komportashon e mester a korigí? Pa bo por komprondé e situashon mas mihó, kisas bo mester konsultá otro buki di Beibel. Por ehèmpel, pa bo komprondé kompletamente kiko tabata pasando den tempu di profeta Ámos, lo ta bon pa lesa e versíkulonan di 2 Reinan i 2 Krónikanan ku bo ta haña den e referensia den márgen di Ámos 1:1 den e Tradukshon di Mundu Nobo di e Santu Skritura, na ingles. Bo por wak tambe den e buki di Oséas, kende kisas a biba den mesun tempu ku Ámos. Tur e fuentenan ei lo yuda bo komprondé mas mihó kon bida tabata den tempu di  Ámos.—2 Rei. 14:25-28; 2 Kró. 26:1-15; Osé. 1:1-11; Ámos 1:1.

17-18. Usa e ehèmpelnan den e paragrafnan òf bo mes ehèmpel pa mustra kon detaye ku kisas no ta parse importante por yuda bo disfrutá mas di bo lesamentu di Beibel.

¹⁷ Ta bon pa ora bo ta lesa Beibel bo tin un grado di kuriosidat. Por ehèmpel, imaginá ku bo ta lesa Zakarías kapítulo 12 ku ta menshoná profesia tokante morto di e Mesías. (Zak. 12:10) Na versíkulo 12 bo ta lesa ku “e famia di e kas di Natan” lo yora amargamente ora e Mesías muri. En bes di pasa lihé lihé riba e detaye ei, para i puntra bo mes: ‘Kiko e kas di Natan tin di haber ku e Mesías? Unda mi por haña mas informashon tokante esei?’ Bo por hasi un tiki trabou di ditèktif. E referensia den márgen den e Tradukshon di Mundu Nobo di e Santu Skritura, na ingles, ta hiba bo na 2 Samuel 5:13 i 14. Einan bo ta haña sa ku Natan tabata yu di Rei David. E di dos referensia ta Lukas 3:23 i 31. E versíkulonan ei ta mustra ku Maria, mama di Hesus, tabata desendiente di Natan. (Wak E Toren di Vigilansia, ougùstùs 2017, pág. 32 par. 4) Esei sí ta interesante! Bo tabata sa kaba ku profesia a bisa ku Hesus lo a bini for di e famia di David. (Mat. 22:42) Pero, David tabatin mas ku 20 yu hòmber. Bo no ta haña ku ta interesante ku Zakarías a identifiká e kas di Natan komo esun ku lo lamentá e morto di Hesus?

¹⁸ Laga nos wak un otro ehèmpel. Na Lukas kapítulo 1 nos ta lesa ku angel Gabriel a bishitá Maria i a bis’é lo siguiente tokante e yu ku e tabata bai haña: “Lo e ta grandi i lo ser yamá Yu di e Haltísimo,  i Yehova Dios lo dun’é e trono di su tata David, i lo e reina komo Rei pa semper riba e kas di Yakòb, i lo no tin fin na su Reino.” (Luk. 1:32, 33) Kisas nos ta konsentrá mas riba e promé parti di e palabranan di Gabriel, esta, ku Hesus lo ser yamá “Yu di e Haltísimo.” Pero, Gabriel a profetisá tambe ku Hesus lo “reina komo Rei.” Pues, kiko Maria a pensa di loke Gabriel a bisa? Akaso el a pensa ku Gabriel tabata ke men ku Hesus lo bira rei di Israel na lugá di Heródes òf di un di su susesornan? Si Hesus a bira rei, Maria lo a bira reina mama i e ku su famia lo a biba den e palasio real. Pero, niun kaminda den Beibel nos no ta lesa ku Maria a bisa angel Gabriel algu den e direkshon ei. Nos no ta lesa tampoko ku Maria a pidi pa un posishon importante den e Reino, manera e dos disipelnan di Hesus a hasi. (Mat. 20:20-23) E detaye ei ta konvensé nos di algu ku ya nos sa kaba di Maria; e tabata un hende masha humilde.

19-20. Segun Santiago 1:22-25 i 4:8, kiko ta nos meta pa studia?

¹⁹ Laga nos kòrda ku nos meta prinsipal pa studia Beibel i nos publikashonnan ta pa hala mas serka Yehova. Ademas di esei, nos ke haña un mihó bista di e “sorto di hende” ku nos ta i ki kambio nos mester hasi pa agradá Dios. (Lesa Santiago 1:22-25; 4:8.) P’esei, kada biaha ku bo ta bai studia, pidi Yehova pa su spiritu santu. Pidié di kurason pa yuda bo benefisiá mas tantu posibel di e informashon i yuda bo mira klaramente kiko bo mester hasi pa ta un mihó persona.

²⁰ Si nos manera di studia ta bon, nos por sinti meskos ku e sirbidó di Dios ku e salmista a deskribí: “Su delisia ta den e lei di SEÑOR, i den Su lei e ta meditá di dia i anochi. . . . Tur loke ku e hasi ta prosperá.”—Sal. 1:2, 3.