1-2. Di akuerdo ku Salmo 40:5, ki regalo Yehova a duna nos, i dikon nos lo analisá e regalonan ei?

YEHOVA ta un Dios masha generoso. Pensa riba algun di e regalonan ku el a duna nos: un planeta bunita i perfekto, un selebro ku ta maraviosamente diseñá i su Palabra balioso, Beibel. Ku e tres kosnan ei, Yehova a duna nos un lugá pa biba, e kapasidat di pensa i komuniká i kontesta pa e preguntanan di mas importante di bida.—Lesa Salmo 40:5.

² Den e artíkulo akí, nos lo analisá e tres regalonan ei di Yehova. Mas nos meditá riba nan, mas nos lo balorá nan i mas deseo nos lo tin pa agradá Yehova, nos Kreador ku ta stima nos masha hopi mes. (Rev. 4:11) Ademas, nos lo ta mas mihó prepará pa yuda hende ku a ser engañá ku e doktrina falsu di evolushon.

3. Kon bini tera ta úniko?

³ Dios su sabiduria ta bisto den e manera ku el a krea tera. (Rom. 1:20; Heb. 3:4) Nos planeta no ta e úniko ku ta drei rònt di solo, pero tera ta úniko pasobra e tin tur kos nesesario pa sostené bida.

4. Dikon tera ta mihó ku kualke barku ku hende a traha?

⁴ Den sierto sentido, nos por kompará nos planeta den espasio ku un barku riba laman. Pero, tin diferensia grandi entre un barku ku hende a traha ku ta yen di pasahero i nos planeta. Por ehèmpel, imaginá ku e pasaheronan di un barku tin ku produsí nan mes oksígeno, kuminda i awa, ma nan no por deshasí di tur e sushi ku nan ta  produsí. Pa kuantu tempu nan lo keda bibu? No pa hopi tempu. Na kontraste, tin míles di miónes di kriatura bibu riba tera. Nos planeta ta produsí tur e oksígeno, kuminda i awa ku nos mester, i e kantidat semper ta sufisiente. Tera no ta deshasí di sushi den espasio, pero tòg e ta keda un bunita lugá pa biba. Kon esei ta posibel? Yehova a diseñá tera pa resiklá sushi den algu ku por ser usá atrobe. Laga nos analisá dos di e sistemanan maravioso di resiklá ei: siklo di oksígeno i siklo di awa.

5. Kiko siklo di oksígeno ta, i kiko e ta konfirmá?

⁵ Oksígeno ta un gas ku ni hende ni animal no por biba sin dje. Tur aña, tur kriatura bibu riba tera ta inhalá un kantidat inmenso di oksígeno. Nan ta produsí un gas ku yama dióksido di karbon. Pero, oksígeno no ta kaba nunka, i atmósfera no ta yena ku demasiado dióksido di karbon. Kon esei ta posibel? Pasobra Yehova a krea un variedat di mata di diferente tamaño ku ta apsorbá dióksido di karbon i ku ta produsí oksígeno. Siklo di oksígeno ta konfirmá loke Echonan 17:24 i 25 ta bisa: “Dios . . . ta duna tur hende bida [i] rosea.”

6. Kiko siklo di awa ta, i kiko esei ta demostrá? (Wak tambe e kuadro “Siklo di Awa Ta un Regalo di Yehova.”)

⁶ Awa riba tera por ta den forma líkido pasobra nos planeta ta na un distansia perfekto for di solo. Si e tabata djis un tiki mas serka di solo, tur awa lo a evaporá, i nos planeta lo tabata simplemente un baranka kayente i sin bida riba dje. Pero, si e tabata djis un tiki mas leu for di solo, awa lo a fris i tera lo tabata tapá ku sneu i eis. Debí ku Yehova a pone tera na un distansia ideal, siklo di awa por sostené bida. Kon e siklo ei ta funshoná? Kalor di solo ta evaporá awa di laman i awa ku ta riba superfisie di tera, i asina nubia ta forma. Tur aña, e kantidat di awa ku ta evaporá por yena 500.000 tanki di awa; kada tanki ta di 1 kilometer largu, hanchu i haltu. Nubia ta keda mas o ménos dies dia den atmósfera, i despues ta kai den forma di áwaseru òf sneu. Ku tempu, e awa ei ta bai bèk laman òf otro lugá ku tin awa. Asina siklo di awa ta ripití. Yehova a diseñá e siklo ei pa nos planeta semper tin awa. Esei ta demostrá ku Yehova ta tantu sabí komo poderoso.—Yòb 36:27, 28; Ekl. 1:7.

7. Kon ta algun manera ku nos por demostrá ku nos ta gradisidu pa e regalo deskribí na Salmo 115:16?

⁷ Kon nos por kultivá apresio pa nos planeta maravioso i tur e bon kosnan ku tin riba dje? (Lesa Salmo 115:16.) Un manera ta di meditá riba e kosnan ku Yehova a krea. Esei lo motivá nos pa gradisié tur dia pa e bon kosnan ku e ta duna nos. I nos ta demostrá ku nos ta gradisidu pa nos planeta ora nos ta tene e área kaminda nos ta biba mas limpi posibel.

8. Dikon nos por bisa ku nos selebro ta diseñá na un manera maravioso?

⁸ Nos selebro ta diseñá na un manera masha maravioso. Ora bo tabata den barika di bo mama, bo selebro a desaroyá segun e manera ku el a ser diseñá. I kada minüt míles di sèl di selebro nobo a ser formá! Algun sientífiko a kalkulá ku mente di un adulto ta kontené kasi 100 mil mion di sèl spesial ku yama neuron. E sèlnan ei ta forma nos selebro ku  ta pisa apénas 1,5 kilogram. Laga nos wak djis algun kos maravioso ku e selebro por hasi.

9. Kiko ta konvensé bo ku nos kapasidat di papia ta un regalo di Dios?

⁹ Nos kapasidat di papia ta un milager. Pensa un ratu riba tur loke ta pasa ora bo ta papia. Pa kada palabra ku bo ta bisa, bo selebro tin ku koordiná moveshon di mas o ménos 100 múskulo den bo lenga, garganta, lep, kakumbein i pechu. Tur e múskulonan ei tin ku move den un órden spesífiko pa e palabranan por ta komprendibel. Tokante nos kapasidat di papia un idioma, un estudio publiká na 2019 a mustra ku bebi resien nasí por rekonosé i reakshoná na palabra. E estudio ei ta apoyá loke hopi eksperto ta kere—ku nos ta nase ku e kapasidat di rekonosé i siña idioma. Sin duda, nos kapasidat di papia ta un regalo di Dios.—Éks. 4:11.

10. Kon nos por demostrá ku nos ta gradisidu pa nos kapasidat di papia?

¹⁰ Un manera ku nos por demostrá ku nos ta gradisidu pa nos kapasidat di papia ta di splika hende ku ta kere den evolushon dikon nos ta kere ku Dios a krea tur kos. (Sal. 9:1; 1 Ped. 3:15) Hende ku ta defendé e doktrina ei ke pa nos kere ku tera i bida a eksistí djis pa kasualidat. Nos por usa Beibel i algun di e puntonan ku nos a analisá den e artíkulo akí pa defendé nos Tata selestial na hende ku ke skucha i pa splika nan dikon nos ta konvensí ku Yehova ta Kreador di shelu i tera.—Sal. 102:25; Isa. 40:25, 26.

11. Ki otro motibu nos tin pa bisa ku nos selebro ta maravioso?

¹¹ Nos kapasidat di kòrda ta masha asombroso. Den pasado, un eskritor a yega na e konklushon ku e selebro humano tin e kapasidat pa kòrda informashon ku ta ekivalente na 20 mion buki. Pero awe, hende ta kere ku nos por kòrda muchu mas informashon ku esei. Ki kapasidat spesial nos tin debí na nos memoria?

12. Kon nos kapasidat di siña loke ta bon i loke ta malu ta distinguí nos for di animal?

¹² Di tur kriatura bibu riba tera, hende so tin e kapasidat di siña loke ta bon i loke ta malu debí ku nos por kòrda loke a pasa nos den pasado i analisá esei. Komo resultado, nos por mehorá nos norma- i balornan i kambia nos manera di pensa i biba. (1 Kor. 6:9-11; Kol. 3:9, 10) De echo, nos por entrená nos konsenshi pa distinguí loke ta bon for di loke ta malu. (Heb. 5:14) Nos por siña kon pa demostrá amor, kompashon i miserikòrdia. I nos por desaroyá un sentido di hustisia meskos ku esun di Yehova.

13. Di akuerdo ku Salmo 77:11 i 12, kon nos mester usa nos memoria?

¹³ Un manera ku nos por demostrá  ku nos ta gradisidu pa e regalo di nos memoria ta di hasi esfuerso pa kòrda tur e biahanan ku Yehova a yuda i konsolá nos. Esei lo fortalesé nos konfiansa ku lo e bolbe yuda nos den futuro. (Lesa Salmo 77:11, 12; 78:4, 7) Un otro manera ta di kòrda tur e bon kosnan ku otro hende a hasi pa nos i gradisí nan pa esei. Algun investigadó a deskubrí ku hende gradisidu ta mas felis. Pero aunke Yehova tin un memoria perfekto, tin sierto kos ku e ta skohe pa lubidá. Por ehèmpel, ora nos arepentí di algu ku nos a hasi, Yehova ta skohe pa pordoná nos i lubidá nos eror. (Sal. 25:7; 130:3, 4) Ta bon pa nos imitá su ehèmpel. Ora hende kometé eror ku ta hasi nos doló, Yehova ke pa nos pordoná nan i lubidá.—Mat. 6:14; Luk. 17:3, 4.

14. Kon nos por demostrá ku nos ta gradisidu pa nos maravioso selebro?

¹⁴ Sin duda, nos selebro ta un regalo masha maravioso. Nos por demostrá ku nos ta gradisidu ora nos us’é pa onra Esun ku a duna nos e regalo ei. Tin hende ta preferá di usa nan selebro pa meta egoista—nan mes ke disidí loke ta bon i loke ta malu. Pero debí ku ta Yehova a krea nos, ta lógiko ku su normanan ta mas mihó ku esnan di nos. (Rom. 12:1, 2) Ora nos biba segun su normanan, nos lo tin pas. (Isa. 48:17, 18) I nos bida lo tin propósito: onra nos Kreador i Tata i hasi su kurason kontentu.—Pro. 27:11.

15. Dikon nos por bisa ku Beibel ta un regalo ku ta demostrá e amor ku Yehova tin pa nos?

¹⁵ Beibel ta un regalo ku ta demostrá e amor ku Dios tin pa nos. Nos Tata selestial a duna nos Beibel pasobra e ta stima nos masha hopi mes. Pa medio di Beibel, Yehova ta kontestá e preguntanan di mas importante ku nos tin, manera: Di unda nos a bini? Kiko e propósito di bida ta? Kiko lo pasa den futuro? Yehova ke pa  nos tur haña kontesta pa e preguntanan ei, p’esei el a motivá hende pa tradusí Beibel na hopi idioma. Awe, Beibel ta disponibel sea kompleto òf en parte na mas ku 3.000 idioma! De echo, Beibel ta e buki di mas tradusí i distribuí den historia. Sin importá unda hende ta biba òf ki idioma nan ta papia, mayoria di nan tin e oportunidat pa lesa Beibel na nan mes idioma.—Wak e kuadro “ Tradukshon di Beibel na Idioma Afrikano.”

16. Segun Mateo 28:19 i 20 i e informashon den e paragraf, kon nos por demostrá ku nos ta gradisidu ku nos tin Beibel?

¹⁶ Nos ta demostrá ku nos ta gradisidu ku nos tin Beibel ora nos ta les’é tur dia, meditá riba loke e ta siña nos i hasi nos esfuerso pa apliká loke nos a siña. Ademas, nos ta demostrá nos gratitut na Dios ora nos ta hasi tur nos posibel pa kompartí e mensahe di Beibel ku mas tantu hende posibel.—Sal. 1:1-3; Mat. 24:14; lesa Mateo 28:19, 20.

17. Ki regalo nos a analisá den e artíkulo akí, i kiko nos lo analisá den e siguiente artíkulo?

¹⁷ Den e artíkulo akí, nos a analisá algun regalo di Yehova manera tera, e selebro i Su Palabra. Pero, tin algun otro regalo ku Yehova a duna nos ku nos no por mira ku nos wowo. E siguiente artíkulo lo analisá e regalonan ei ku hende no ta mira.