Yehova Ta Bendishoná Ruman Ku Regresá Nan Pais Natal
HOPI ruman ku den pasado a emigrá pa otro pais mas riku a regresá nan pais natal. Nan amor pa Yehova i nan próhimo a motivá nan pa muda na lugá ku mester di mas publikadó di Reino. (Mat. 22:37-39) Ki sakrifisio nan a hasi, i kon Yehova a bendishoná nan? Ban wak kon a bai ku algun ruman ku a regresá nan pais natal, Kamerun.
“E MIHÓ LUGÁ PA ‘PISKA’”
Na 1998, un ruman ku yama Onésime a bandoná su kas na Kamerun i a bai biba 14 aña den eksterior. Un dia, na reunion, un ruman a duna un ilustrashon tokante e trabou di prediká: “Imaginá dos amigu ta piska na diferente lugá. Un ta kohe mas piská ku e otro. Bo no ta kere ku esun ku ta kohe ménos piská lo bai kaminda su amigu ta?”
Ora Onésime a skucha e ilustrashon ei, el a kuminsá pensa pa regresá Kamerun pa asina yuda e rumannan einan. Pero, e tabata puntra su mes si lo e por a adaptá atrobe na e bida di Kamerun, despues di tin tantu aña asina ta biba afó. Pa haña sa, el a disidí di bai Kamerun pa seis luna, i na 2012, el a bai biba einan.
Onésime a konta: “Mi mester a kustumbrá ku e kalor, e bida na Kamerun i e bankinan duru den Salòn di Reino.” Pero, ku un smail riba su kara el a sigui bisa: “Mas mi a konsentrá riba loke mi tabata skucha na reunion, ménos falta mi tabata sinti di e stulnan furá.”
Na 2013, Onésime a kasa ku Géraldine, kende a regresá Kamerun despues di a biba nuebe aña na Fransia. Kon Yehova a bendishoná nan debí ku nan a enfoká nan bida riba aktividat kristian? Onésime a bisa: “Huntu nos a bai Skol pa Predikadó di Reino, i despues nos a kuminsá sirbi na Bètel. De echo, den djis un aña, 20 studiante di nos kongregashon a batisá. Awor mi ta sinti ku mi ta na e mihó lugá pa ‘piska.’” (Mar. 1:17, 18) Géraldine a agregá: “Mi a risibí mas bendishon ku mi por a imaginá.”
E GOSO DI YUDA HENDE BATISÁ
Judith ku Sam-Castel
Judith a bai biba na Merka, pero e tabatin deseo di hasi mas den sirbishi. El a konta: “Tur biaha ku mi bai Kamerun pa bishitá famia, mi tabata regresá [Merka] ku awa na wowo pasobra mi mester a laga tur e hendenan ku mi a kuminsá studia Beibel kuné.” Apesar di esei, Judith tabata vasilá pa regresá Kamerun. E tabatin un bon trabou ku a permitié paga e tratamentu médiko ku su tata na Kamerun tabatin mester. Ma, Judith a konfia den Yehova i a muda. E ta atmití ku el a sinti falta di algun komodidat ku e tabatin
na Merka. El a pidi Yehova yud’é adaptá, i el a haña e animashon ku e tabatin mester serka un superintendente di sirkuito ku su esposa.Judith a bisa: “Denter di tres aña, mi tabatin e goso di a yuda kuater hende batisá.” Ora el a kasa ku Sam-Castel, el a kuminsá traha komo pionero spesial i awor nan ta sirkuito. Pero, kon a para ku Judith su tata? Judith ku su famia a logra haña un hospital den eksterior ku tabata dispuesto pa operá e tata i kubri e gastunan. E operashon a bai bon.
SIÑA KONFIA DEN YEHOVA
Caroline ku Victor
Un ruman ku yama Victor a muda pa Canada. Despues di a lesa un artíkulo den E Toren di Vigilansia tokante enseñansa superior, el a pensa riba su estudio na universidat. El a disidí di stòp ku su estudio i kuminsá un kurso kòrtiku pa siña un fishi. El a bisa: “Esei a yuda mi haña un trabou mas lihé i mi por a bira loke semper mi tabata kier a bira—pionero.” Despues, Victor a kasa ku Caroline, i nan dos a bai Kamerun. Ora nan a bishitá e sukursal einan, algun ruman a animá nan pa pensa riba e posibilidat di bin sirbi na Kamerun. Victor a bisa: “No tabatin niun motibu pa bisa nò. Komo nos tabatin un bida simpel nos por a aseptá e invitashon.” Aunke Caroline tabatin algun problema di salú, nan a disidí di sigui ku nan plan.
Victor ku Caroline a kuminsá traha pionero regular pa yuda tur e hendenan interesá den Beibel ku nan a topa. Pa un tempu, nan a biba for di loke nan tabatin na banko. Despues nan a bai Canada pa traha un par di luna i a regresá Kamerun pa sigui ku pionero. Kon Yehova a bendishoná nan? Nan a bai Skol pa Predikadó di Reino, a sirbi komo pionero spesial i awor nan ta sirbidó di konstrukshon. Victor a bisa: “Debí ku nos a laga nos bida konfortabel atras, nos mester a siña konfia den Yehova, i el a perkurá pa nos.”
E GOSO DI YUDA HENDE DEDIKÁ NAN BIDA NA YEHOVA
Stéphanie ku Alain
Na 2002, un ruman ku yama Alain, ku tabata studia na universidat na Alemania, a lesa e tratado Hóben—Kiko Lo Bo Hasi ku Bo Bida? E tratado ei a yud’é pone meta nobo. Na 2006, el a bai Skol di Entrenamentu Ministerial i a ser asigná na Kamerun, su pais natal.
Na Kamerun, el a haña un trabou partaim. Despues, el a haña un otro trabou ku tabata paga mihó. Pero, e tabata preokupá ya ku e trabou ei tabata pon’é baha man den su sirbishi. P’esei, ora el a haña invitashon pa bira pionero spesial, el a aseptá mesora. Alain su doño di trabou a ofres’é un salario mas haltu, pero el a nenga. Mas despues, el a kasa ku Stéphanie, kende a biba na Fransia pa hopi aña. Ki difikultat Stéphanie a hañ’é kuné ora el a regresá Kamerun?
Stéphanie a bisa: “Mi a haña algun problema di salú i alergia, pero mi a logra haña tratamentu nesesario i mi ta sinti mi mihó.” Yehova a bendishoná e pareha ei pa nan perseveransia. Alain a bisa: “Ora nos a bai prediká na Katé, un pueblito isolá, nos a haña vários hende ku kier a studia Beibel. Nos a sigui studia ku nan via telefòn. Dos di nan a batisá i un grupo di publikadó a ser formá.” Stéphanie a agregá: “No tin un goso mas grandi ku yuda hende konosé Yehova i dediká nan bida na dje. Bes tras
bes, nos a sinti e goso ei aki na Kamerun.” Aktualmente, Alain ku Stéphanie ta den sirkuito.“NOS A HASI PRESIS LOKE NOS MESTER A HASI”
Léonce ku Gisèle
Gisèle a batisá tempu e tabata bai skol na Italia pa bira dòkter. El a studia Beibel ku un pareha pionero. E manera simpel ku nan tabata hiba nan bida, a impreshon’é mashá. Nan ehèmpel a anim’é pa hasi mas den sirbishi. Pues, Gisèle a kuminsá traha pionero regular miéntras ku e tabata kaba su skol.
Gisèle tabata ke regresá Kamerun pa hasi mas den Yehova su sirbishi. Pero, tabatin algun kos ku tabata preokup’é. El a bisa: “Lo mi mester a entregá mi permiso di estadia i bai laga e amigu- i famianan ku mi tabatin na Italia.” Apesar di esei, na mei 2016, Gisèle a regresá Kamerun. Un par di tempu despues, el a kasa ku Léonce, i sukursal na Kamerun a rekomendá nan pa muda pa Ayos, un stat ku tabatin mester di mas publikadó.
Kon bida ta na Ayos? Gisèle a bisa: “Tabata normal pa koriente bai pa vários siman, i nos no por a karga nos telefonnan. Pues, nan tabata mas pagá ku nan tabata sendé. Mi a siña kushiná riba palu. Anto anochi, nos tabata kohe nos krenwá i flashlight i bai buska awa na e fuente, ya ku lo tabatin ménos hende e ora ei.” Kon nan por a trata ku tur esei? Gisèle a bisa: “Yehova su spiritu santu, un bon kasá, animashon i de bes en kuando yudansa finansiero di nos famia- i amigunan a yuda nos keda ku nos kabes riba awa.”
Gisèle ta kontentu di a regresá su pais natal? El a kontestá: “Sí! No tin duda den esei. Na komienso tabatin algun difikultat i nos a sinti nos desanimá. Ma nos a konfia den Yehova, i nos a sinti nos mas serka dje. I unabes nos a pasa e desafionan ei, tantu ami komo mi kasá a sinti ku nos a hasi presis loke nos mester a hasi.” Léonce ku Gisèle a bai Skol pa Predikadó di Reino i nan ta sirbi awor komo pionero spesial temporal.
Piskadó ku kurashi ta enfrentá kualke kondishon difísil pa kohe mas piská. Asina tambe, e rumannan ku regresá nan pais natal ta dispuesto pa hasi sakrifisio pa “piska” hende ku ta interesá den e mensahe di Reino. Sin duda, Yehova nunka lo lubidá tur e esfuerso i amor ku e rumannan ei a demostrá pa su nòmber. (Neh. 5:19; Heb. 6:10) Si bo ta biba den eksterior i na bo pais natal tin nesesidat di publikadó, lo bo ta dispuesto pa regresá? Si esei ta e kaso, bo por tin sigur ku Yehova lo bendishoná bo rikamente.—Pro. 10:22.