UN METEORÓLOGO ta analisá su radar. E ta mira un tormenta peligroso ta aserkando un área hopi poblá. E ta preokupá pa siguridat di e hendenan. P’esei, e ta hasi tur loke e por pa atvertí nan promé ku ta lat.

Di mes manera, Yehova ta alertando hende awor di un “tormenta” ku ta aserkando, un ku ta mas peligroso ku kualke fenómeno natural ku meteorólogo a yega di pronostiká. Kon Yehova ta atvertí hende? I dikon nos por tin sigur ku e ta duna nan sufisiente tempu pa hasi kaso di su atvertensia? Promé ku nos kontestá e preguntanan ei, laga nos analisá algun atvertensia ku Yehova a duna den pasado.

Den tempu bíbliko, na vários okashon Yehova a atvertí ku lo el a trese huisio riba hende ku boluntariamente a desobedesé su mandamentunan. (Pro. 10:25; Yer. 30:23) Den kada kaso, el a atvertí nan hopi tempu adelantá i a bisa nan klaramente ki kambio nan mester a hasi pa obedes’é. (2 Rei. 17:12-15; Neh. 9:29, 30) Pa motivá nan pa hasi e kambio nesesario, hopi biaha Yehova a usa su sirbidónan fiel aki riba tera pa anunsiá su huisionan i pa motivá hende tuma akshon mesora.—Ámos 3:7.

Un di e sirbidónan fiel ei tabata Noe. Pa hopi aña, ku kurashi el a atvertí hende inmoral i violento tokante e Diluvio ku tabata na kaminda. (Gén. 6:9-13, 17) El a bisa nan tambe kiko nan mester a hasi pa sobrebibí. Noe tabata prediká asina tantu te ku despues el a bira konosí komo “un predikadó di hustisia.”—2 Ped. 2:5.

Aunke Noe a hasi hopi esfuerso, e hendenan no a mustra niun tiki fe i no a hasi kaso di e mensahe di Dios. Komo resultado, nan a muri “ora e Diluvio a bini i lastra nan tur bai kuné.” (Mat. 24:39; Heb. 11:7) Nan no por a bisa ku Dios no a atvertí nan.

Na un otro okashon, Yehova a atvertí hende un poko promé ku su huisio a kuminsá. Asina mes, el a duna nan sufisiente tempu pa hasi kaso. Ora el a manda Dies Plaga riba e hendenan di Egipto di antigwedat, el a atvertí nan na tempu. Por ehèmpel, el a manda Moises i Aron bai atvertí Fárao i su sirbidónan ku e di shete plaga, un yobida di hagel, lo a bini e siguiente dia i lo a kousa hopi daño. Un dia so lo tabata sufisiente pa nan buska un lugá di skonde i skapa di e tormenta ei? Beibel ta bisa: “Esun entre Fárao su sirbidónan ku tabata teme e palabra di SEÑOR a manda su sirbidónan pura hiba su bestianan di kria paden; ma esun ku no a hasi kaso di e palabra di SEÑOR a laga su sirbidónan i su bestianan di kria keda den kunuku.” (Éks. 9:18-21) Ta bisto ku Yehova a duna e sirbidónan di Fárao sufisiente tempu pa prepará. Esnan ku a hasi kaso mesora a skapa e daño ku e plaga ei a kousa.

Dios tambe a atvertí Fárao i su sirbidónan promé ku el a manda e di dies plaga. Pero, nan a kometé e bobedat di no hasi kaso di e atvertensia. (Éks. 4:22, 23) Komo resultado, nan a mira nan primogénito muri. Esta tristu! (Éks. 11:4-10; 12:29) Nan por a hasi kaso di e atvertensia na tempu? Sí! Moises a atvertí e israelitanan mesora tokante e di dies plaga i a instruí nan kon pa salba nan famia. (Éks. 12:21-28) Kuantu hende a hasi kaso di Moises su instrukshonnan? Segun  algun kálkulo, tres mion òf mas. Esei a inkluí israelita, “un multitut di tur klase di hende” ku no tabata israelita i tambe algun egipsio. Nan tur a skapa Dios su huisio i a bandoná Egipto.—Éks. 12:38.

E ehèmpelnan ei ta mustra ku semper Yehova a hasi sigur di duna hende sufisiente tempu pa hasi kaso di su atvertensia. (Deu. 32:4) Dikon el a hasi esei? Apòstel Pedro a splika ku Yehova “no ta deseá pa ningun hende ser destruí, ma e ta deseá pa tur haña chèns di arepentí.” (2 Ped. 3:9) Sí, Yehova semper tabata interesá den hende. E ke pa nan arepentí i hasi kambio nesesario promé ku su huisio bini.—Isa. 48:17, 18; Rom. 2:4.

Awe tambe, hende rònt mundu ta skuchando un mensahe urgente, i nan mester hasi kaso di dje. Tempu Hesus tabata riba tera, el a atvertí ku e sistema di kosnan aktual lo ser destruí durante un “tribulashon grandi.” (Mat. 24:21) Tokante e futuro huisio ei, el a duna un profesia ku a deskribí klaramente kiko su siguidónan lo a mira i eksperensiá segun ku e tempu ta yegando serka. Pues, Hesus a deskribí suseso importante ku ta pasando aworakí rònt mundu.—Mat. 24:3-12; Luk. 21:10-13.

Na armonia ku e profesia ei, Yehova ta urgi tur hende awor pa sirbié i obedes’é. E ta deseá pa tur hende obediente disfrutá di un mihó bida awor i risibí bendishon den su hustu mundu nobo. (2 Ped. 3:13) Pa nan haña fe den Yehova su promesanan, el a duna nan ‘e bon notisia di Reino,’ un mensahe ku por salba nan bida. Hesus a profetisá ku lo prediká e mensahe ei “den henter e tera habitá, komo testimonio pa tur nashon.” (Mat. 24:14) Dios a organisá su fiel adoradónan pa duna e “testimonio” ei, òf prediká e mensahe di Dios ei, den mas o ménos 240 pais. Yehova ke pa mas tantu hende posibel hasi kaso di e atvertensia i skapa e “tormenta” di su huisio ku ta na kaminda.—Sof. 1:14, 15; 2:2, 3.

Pues, e kuestion no ta si Yehova ta duna hende sufisiente tempu pa hasi kaso di su atvertensianan. Manera nos a mira, semper e ta hasi esei. Pero, e berdadero pregunta ta: Hende lo hasi kaso di Dios su atvertensia miéntras ku tin tempu ainda? Yehova a duna nos e privilegio di hiba e mensahe na nan. P’esei, laga nos sigui hasi esfuerso pa yuda mas tantu hende posibel sobrebibí e fin di e sistema di kosnan akí!