Yehova realmente a fortalesé e predikadónan zeloso ei. Durante 1920, e kantidat di kòlportùr (pionero) a oumentá di 225 pa 350. I pa promé biaha, mas ku 8.000 trahadó di klas (publikadó) a manda nan rapòrt pa sede mundial. Yehova a bendishoná e rumannan ei ku resultado impreshonante.

Riba 21 di mart 1920, Joseph F. Rutherford, kende e tempu ei tabata organisá e trabou di Studiantenan di Beibel, lo a duna un diskurso na New York City ku e tema: “Miónes di Hende na Bida Awor Lo No Muri Nunka.” Studiantenan di Beibel a move shelu i tera pa invitá hende interesá. Nan a hür un di e teaternan di mas grandi na New York City i a parti mas ku 320.000 invitashon.

E kantidat di hende ku a bini tabata mas tantu ku Studiantenan di Beibel a ferwagt. Tabatin mas ku 5.000 hende presente i un 7.000 no por a drenta. E Toren di Vigilansia a bisa ku e tabata “un di e reunionnan di mas eksitoso ku Studiantenan di Beibel Internashonal a tene.”

Studiantenan di Beibel a bira bon konosí pa proklamá e mensahe: “Miónes di hende na bida awor lo no muri nunka.” E tempu ei, nan no a komprondé ku ainda tabatin hopi mas di hasi den e trabou di prediká e mensahe di Reino. Asina mes, nan zelo tabata impreshonante. Ida Olmstead, kende a kuminsá asistí na reunion na 1902, a bisa: “Nos tabata sa ku humanidat lo a risibí hopi bendishon. P’esei, semper nos tabata konta e bon notisianan ei na tur esnan ku nos a topa den sirbishi.”

Pa hasi sigur ku e rumannan lo sigui haña kuminda spiritual, e rumannan na Bètel mes a kuminsá imprimí nos publikashonnan. Nan a kumpra e mashin nesesario i a instal’é den un edifisio ku nan a hür na 35 Myrtle Avenue, Brooklyn, New York, un par di blòk for di Bètel.

Na yanüari 1920, Leo Pelle i Walter Kessler a kuminsá nan sirbishi na Bètel. Walter a bisa: “Ora nos a yega, e superintendente di imprenta a wak nos i bisa: ‘Boso tin un ora i mei promé ku kuminda di mèrdia.’ El a pidi nos trese algun kaha di buki for di bodega.”

Leo ta kòrda loke a pasa e siguiente dia: “Nos mester a laba e murayanan di e piso  abou di e edifisio. Esei tabata e trabou di mas fis ku m’a yega di hasi. Pero e tabata bale la pena pasobra e tabata pa Señor.”

Denter di un par di siman, vários ruman hòmber yen di zelo a kuminsá imprimí E Toren di Vigilansia. Mas o ménos sesenta mil edishon di E Toren di Vigilansia di 1 di febrüari 1920 a kuminsá ser imprimí na e promé piso. Mientrastantu, den bodega e rumannan tabata arma un mashin di imprenta ku nan a yama Bapor di Guera. Kuminsando ku e edishon di 14 di aprel 1920, E Époka di Oro tambe a ser imprimí einan. Sin duda, Yehova a bendishoná e esfuersonan di e trahadónan dispuesto ei.

E pueblo leal di Yehova tabata uní atrobe i a kuminsá prediká ku zelo. Pero durante e periodo turbulento di 1917 pa 1919, algun Studiante di Beibel a bandoná e organisashon. Kiko por a hasi pa yuda nan?

Den E Toren di Vigilansia di 1 di aprel 1920 tabatin un artíkulo titulá: “Laga Nos Biba na Pas.” E artíkulo ei a kontené un mensahe amoroso: “Nos tin sigur ku tur esnan ku ke obedesé Yehova lo lubidá e erornan ku nan a hasi den pasado i lo uni ku e pueblo di Dios pa hasi Su trabou.”

Hopi tabata esnan ku a reakshoná bon na e palabranan amabel ei. Un pareha kasá a skirbi: “Nos ta rekonosé ku sinta man krusa pa mas ku un aña, miéntras otro tabata hasi e trabou [di prediká], tabata un eror. . . . Nos ta spera ku nunka mas nos ta desviá atrobe.” E rumannan ei ku a bolbe na e organisashon tabatin hopi trabou nan dilanti.

Riba 21 di yüni 1920, Studiantenan di Beibel a kuminsá un kampaña grandi pa parti “ZG,” un edishon kaft moli di e buki E Misterio Terminá. * Ora e buki a ser prohibí na 1918, e rumannan a warda un gran kantidat di e buki ei.

 Tur trahadó di klas, no djis kòlportùr, a haña invitashon pa partisipá den e kampaña ei. Bulletin * di yüni 1920 a bisa: “Den kada klas kada hende konsagrá [batisá] mester partisipá di buena gana den e kampaña. Laga esaki ta e lema di kada un di nos: ‘Un kos ta sigur’—lo mi parti ZG.” Edmund Hooper a konta ku, den e kampaña ei, hopi ruman a traha di kas pa kas pa promé biaha. I el a agregá: “Pa promé biaha nos a sera konosí ku e trabou ku, pa loke ta trata su alkanse, lo a surpasá tur nos ekspektativanan.”

Durante Promé Guera Mundial komunikashon ku Studiantenan di Beibel na otro pais tabata difísil. P’esei, Ruman Rutherford tabata ke animá e rumannan ei i reorganisá e trabou di prediká. Pues na 12 di ougùstùs 1920, é huntu ku kuater ruman hòmber a bai riba un biahe largu na algun pais na Europa i Medio Oriente.

Ora Ruman Rutherford a bishitá Gran Bretaña, Studiantenan di Beibel a tene tres kongreso i 12 reunion públiko. E asistensia total tabata mas o ménos 50.000 hende. E Toren di Vigilansia a resumí e bishita bisando: “E rumannan a ser animá mashá. Nan a asosiá ku otro i a traha huntu ku otro, i esei a hasi nan masha felis.” Na Paris, Ruman Rutherford a bolbe duna e diskurso “Miónes di Hende na Bida Awor Lo No Muri Nunka.” Ora e diskurso a kuminsá, e ouditorio tabata yenyen. Despues, 300 hende a pidi mas informashon.

Den e simannan ku a sigui, Ruman Rutherford i e ruman hòmbernan a bishitá Aténas, Kairo i Herúsalèm. Komo ku tabatin hende ku a mustra interes den e bèrdat, Ruman Rutherford a habri un sukursal na e stat di Ramallah ku ta keda serka di Herúsalèm. Despues, el a bai Europa bèk i a habri Ofisina di Sukursal di Europa Sentral na Suisa, kaminda lo a imprimí publikashon tambe.

Na sèptèmber di 1920, Studiantenan di Beibel a publiká edishon Num. 27 di E Époka di Oro. E edishon spesial ei a denunsiá persekushon di Studiantenan di Beibel durante 1918. E mashin di imprenta Bapor di Guera, menshoná anteriormente, a traha di dia  i anochi pa imprimí mas ku kuater mion ehemplar di e revista ei.

E lektornan di e revista ei a haña sa di e kaso straño di Ruman Emma Martin. Ruman Martin tabata kòlportùr na San Bernardino, California. Riba 17 di mart 1918, é huntu ku tres ruman, Edward Hamm, Edward J. Sonnenburg i Ernest A. Stevens, a bai un reunion chikitu di Studiantenan di Beibel.

Pero un hòmber ku a asistí na e reunion no tabata einan pa siña tokante Beibel. Mas despues e mes a atmití: “M’a bai e reunion ei . . . riba òrdu di Ministerio Públiko. Mi meta tabata pa kompilá prueba.” I el a haña e “prueba” ku e tabata buska: un ehemplar di E Misterio Terminá. Un par di dia despues, Ruman Martin i e tres ruman hòmbernan a ser arestá i akusá di a violá Lei di Spionahe ora nan a distribuí e buki prohibí.

Korte a deklará nan tur kuater kulpabel i a sentensiá nan na tres aña di prizòn. Riba 17 di mei 1920, despues ku nan a usa tur nan oportunidatnan pa apelá, nan a kuminsá sinta nan sentensia. Pero pronto nan situashon lo a kambia.

Riba 20 di yüni 1920, na un kongreso na San Francisco, Ruman Rutherford a papia tokante nan kaso. E presentenan a keda di shòk pa e manera ku e rumannan a ser tratá, i nan a manda un telegram pa presidente di Merka. Nan a skirbi: “Nos ta haña ku e sentensia . . . di Sra. Martin . . . relashoná ku Lei di Spionahe tabata inhustu . . . E ámtenarnan a usa nan poder pa . . . atrapá . . . Sra. Martin . . . i pa despues trama un kaso kontra dje pa hink’é den prizòn. Pa nos, e aktitut ei ta . . . inaseptabel.”

E siguiente dia, Presidente Woodrow Wilson mesora a kambia e sentensia di e rumannan Martin, Hamm, Sonnenburg i Stevens. Nan enkarselashon inhustu a yega na su fin.

Na final di 1920, Studiantenan di Beibel tabatin hopi motibu pa alegrá. Nan trabou na sede mundial a sigui oumentá. I mas ku nunka e kristiannan berdadero tabata aktivo den proklamá e Reino di Dios komo e úniko solushon pa e problemanan di humanidat. (Mat. 24:14) E siguiente aña, 1921, lo tabata un aña aun mas mihó pa anunsiá e mensahe di Reino.