1. Kon 2 Korintionan 3:1-3 ta yuda nos balorá e privilegio ku nos tin di yuda un studiante yega na boutismo? (Wak e plachi riba portada.)

KON bo ta sinti ora bo mira un studiante di bo kongregashon batisá? Sin duda, bo ta sinti bo masha kontentu. (Mat. 28:19) I si ta abo a studia kuné, lo bo ta mas kontentu ainda. (1 Tes. 2:19, 20) Kada studiante ku batisá ta un “bunita karta di rekomendashon,” no solamente pa e rumannan ku a studia kuné, pero tambe pa henter e kongregashon.—Lesa 2 Korintionan 3:1-3.

2. (a) Ki pregunta importante nos mester hasi nos mes, i dikon? (b) Kiko un estudio di Beibel ta? (Wak nota.)

² Ta dushi pa mira ku durante e último kuater añanan rònt mundu nos a dirigí tur luna mas o ménos 10.000.000 estudio di Beibel. * Durante e mesun periodo ei, tur aña mas o ménos 280.000 studiante a batisá. Kiko nos por hasi pa yuda e sobrá miónes di studiantenan batisá? Tanten ku Yehova ta duna hende oportunidat pa bira su  Testigu, nos ke hasi tur loke nos por pa yuda nan yega na boutismo mas lihé posibel. No a sobra masha tempu!—1 Kor. 7:29a; 1 Ped. 4:7.

3. Kiko nos lo analisá den e artíkulo akí?

³ Debí ku ta urgente pa nos hasi hende disipel, Kuerpo Gobernante a hasi un enkuesta na algun sukursal pa haña sa kiko nos por hasi pa yuda mas studiante yega na boutismo. Den e artíkulo akí i esun siguiente, nos lo mira kiko nos por siña for di pionero, misionero i superintendente di sirkuito ku eksperensia. * (Pro. 11:14; 15:22) Loke nan a bisa a enfatisá kiko tur maestro i studiante mester hasi di manera ku e estudio di Beibel por ta mas eksitoso. Den e artíkulo akí, nos lo analisá sinku kos ku kada studiante mester hasi pa yega na boutismo.

4. Kiko nos mester realisá ora ta trata dirigí estudio ku hende na porta?

⁴ Hopi ruman ta dirigí estudio ku hende na porta. Aunke esei ta un bon manera pa kuminsá kultivá interes di e hende, mayoria di biaha e kòmbersashonnan ei ta kòrtiku i no ta tuma lugá tur siman. Pa sigui kultivá interes di e hende, algun ruman ta duna nan nòmber i number di telefòn pa asina nan por kompartí algu tokante Beibel kuné. E kòmbersashonnan kòrtiku ei por sigui pa vários luna sin ku e bira un estudio produktivo. Awor puntra bo mes: ‘Un hende ku no ta dediká hopi tempu i energia na studia e Palabra di Dios lo yega na dedikashon i boutismo?’ E chèns ta hopi chikitu.

5. Kiko Hesus a bisa na Lukas 14:27-33 ku nos por usa pa yuda nos studiantenan di Beibel?

⁵ Na un okashon, Hesus a usa un ilustrashon pa splika loke un hende mester hasi si e ke bira su disipel. El a papia tokante un hende ku ke traha un toren i tokante un rei ku ta marcha bai guera. El a bisa ku pa e hende ku ke konstruí e toren por kab’é, e mester “sinta kalkulá e gastu promé.” I e rei mester “sinta konsultá ku otro hende promé” pa wak si su sòldánan por gana e guera. (Lesa Lukas 14:27-33.) Di mes manera, Hesus tabata sa ku si un hende ke bira su disipel e mester tuma tempu i analisá kiko e mester hasi pa sigui Hesus. P’esei, nos mester animá nos studiantenan pa studia tur siman. Kon nos por hasi esei?

6. Kiko nos por hasi pa dirigí estudio progresivo?

 ⁶ Promé, alargá durashon di e estudio ku bo ta hasi na porta. Purba di analisá mas ku un teksto di Beibel na kada bishita. Ora e hende ta sintié konfortabel ku un bishita mas largu, puntr’é: ‘Tin un kaminda ku nos por sinta pa kòmbersá un tiki mas?’ Su kontesta lo indiká si realmente e ta tuma e estudio na serio. Finalmente, pa yud’é progresá mas lihé, puntr’é: ‘Kiko bo ta pensa si nos studia dos biaha pa siman?’ Pero, tin mas kos ku e mester hasi ku djis studia un òf dos biaha pa siman.

7. Kon e maestro mester prepará pa kada estudio?

⁷ Komo maestro, bo mester prepará bon pa kada estudio. Bo por kuminsá na lesa e informashon i buska e tekstonan menshoná. Identifiká e puntonan prinsipal. Pensa riba e tema di e lès, suptema, pregunta, teksto, plachi i kualke vidio ku bo por usa pa splika e tópiko. Djei, pensa riba bo studiante. Meditá di antemano kon bo por presentá e informashon na un manera simpel i kla. Di e manera ei, bo studiante por komprondé e informashon i pon’é na práktika.—Neh 8:8; Pro. 15:28a.

8. Kiko Kolosensenan 1:9 i 10 ta siña nos tokante hasi orashon pa nos studiante?

⁸ Hasi orashon na Yehova tokante e studiante. Esei ta un parti importante di bo preparashon. Pidi Yehova yuda bo usa Beibel pa yega na kurason di e studiante. (Lesa Kolosensenan 1:9, 10.) Purba di antisipá ki punto kisas e studiante lo haña ta difísil pa komprondé òf aseptá. No lubidá ku bo meta ta pa yud’é yega na boutismo.

9. Kon e maestro por yuda e studiante prepará pa su estudio? Splika.

⁹ Ora nos ta studia Beibel regularmente ku un hende, ta natural ku nos ta spera ku e ta balorá tur loke Yehova i Hesus a hasi i ku e ke siña mas. (Mat. 5:3, 6) Pa e studiante saka lo máksimo for di e estudio, e mester konsentrá riba loke e ta siñando. Pa yud’é ku esei, splik’é kon importante ta p’e prepará pa kada estudio; e mester lesa e lès di antemano i pensa kon e informashon ta apliká den su bida. Kon e maestro por yud’é? Prepará un lès  huntu kuné i mustr’é kon pa haña e kontesta direkto pa e pregunta. * Siñ’é kon pa marka palabra òf ekspreshon ku lo yud’é kòrda e kontesta. Djei, pidié kontestá den su mes palabra. Ora e hasi esei, bo por haña sa si realmente el a komprondé e informashon. Pero, tin mas kos ku bo mester animá bo studiante pa hasi.

10. Dikon un studiante mester lesa Beibel tur dia, i kon e por benefisiá plenamente di su lesamentu di Beibel?

¹⁰ Aparte di studia tur siman ku un maestro, tin algun kos ku e studiante mester hasi tur dia riba su mes. E mester komuniká ku Yehova, esta, skucha loke Dios ta bis’é i papia kuné. Pa skucha Yehova, e studiante mester lesa Beibel tur dia. (Hos. 1:8; Sal. 1:1-3) Mustr’é kon pa usa e tabèl “Programa di Lesamentu di Beibel” ku tin riba jw.org. * Pa yud’é benefisiá plenamente di su lesamentu di Beibel, splik’é ku e mester meditá riba loke el a lesa. Bis’é ku durante su lesamentu e mester hasi su mes e siguiente preguntanan: Kiko esei ta siña mi di Yehova? Kon mi por apliká esei den mi bida?—Echo. 17:11; Sant. 1:25.

11. Kon un studiante por siña hasi orashon na e manera korekto, i dikon ta importante p’e hasi orashon na Yehova regularmente?

¹¹ Animá bo studiante p’e papia ku Yehova. P’e hasi esei, e mester hasi orashon tur dia. P’esei, promé i despues di kada estudio, hasi orashon di kurason i menshoná bo studiante den nan. Ora e studiante skucha bo orashon, lo e siña kon pa hasi orashon di kurason na Yehova Dios den nòmber di Hesukristu. (Mat. 6:9; Huan 15:16) Imaginá kon lesamentu di Beibel tur dia (skucha Yehova) i hasimentu di orashon (papia ku Yehova) lo yuda bo studiante hala mas serka Dios! (Sant. 4:8) Si bo studiante hasi e kosnan ei tur dia, esei lo yud’é yega na dedikashon i boutismo.

12. Kon un maestro por yuda un studiante bira amigu di Yehova?

¹² Tur loke un studiante ta siña for di Beibel no mester djis yega na su mente; e mester yega na su kurason. Dikon? Pasobra nos kurason—ku ta inkluí nos deseo,  emoshon i sintimentu—ta loke ta motivá nos pa dal paso. Hesus a siña hende hopi kos, i nan a gusta su manera lógiko di rasoná. Pero, hende a siguié pasobra e tabata sa kon pa yega na nan kurason. (Luk. 24:15, 27, 32) Bo studiante mester mira Yehova komo un Persona real, esta, un Persona ku e por tin un amistat kuné. E mester mira Yehova komo su Tata, Dios i Amigu. (Sal. 25:4, 5) Durante estudio, resaltá e bunita kualidatnan di nos Dios. (Éks. 34:5, 6; 1 Ped. 5:6, 7) Sin importá e tema ku bo ta trata, laga bo studiante mira e tipo di Persona ku Yehova ta. Yud’é balorá Yehova su bunita kualidatnan manera su amor, amabilidat i kompashon. Hesus a bisa ku “e mandamentu di mas grandi i esun di promé” ta pa “stima Yehova bo Dios.” (Mat. 22:37, 38) Purba di yuda bo studiante stima Yehova ku henter su kurason.

13. Kon bo por yuda bo studiante konosé e personalidat di Yehova? Duna un ehèmpel.

¹³ Ora bo ta kòmbersá ku bo studiante, lag’é sa kuantu bo ta stima Yehova. Esei por yuda bo studiante komprondé ku e tambe mester bira amigu di Yehova i siña stim’é. (Sal. 73:28) Por ehèmpel, kisas e publikashon di estudio òf un teksto di Beibel tin un frase ku ta revelá algu tokante Yehova—tokante su amor, sabiduria, hustisia òf poder. Kon e frase ei ta laga bo sinti? El a yega na bo kurason? Awèl, bisa bo studiante esei. Bis’é ku e kualidat ei ta un di e motibunan ku bo ta stima bo Tata selestial. Pero, tin otro kos ku tur studiante mester hasi pa por yega na boutismo.

14. Di akuerdo ku Hebreonan 10:24 i 25, kon e reunionnan por yuda un studiante progresá?

¹⁴ Nos tur ke pa nos studiantenan yega na boutismo. Pa yuda nan logra esei, nos mester motivá nan pa asistí na nos reunionnan. Maestro ku eksperensia a bisa ku studiante ku kuminsá asistí na e reunionnan mesora ta progresá mas lihé. (Sal. 111:1) Algun maestro a splika nan studiante ku e estudio na kas ta solamente mitar di e programa total di estudio di Beibel. Pa nan benefisiá di e otro mitar, nan mester asistí na reunion. Lesa Hebreonan 10:24 i 25 ku bo studiante i splik’é dikon ta importante p’e asistí na e reunionnan. Lag’é wak e vidio Kiko Ta Sosodé na un Salòn di Reino? *  Yud’é komprondé ku asistí na e reunionnan tur siman mester bira un parti importante di su bida.

15. Kiko nos por hasi pa motivá un studiante pa asistí na reunion regularmente?

¹⁵ Kiko bo por hasi si te ainda bo studiante no a asistí na niun reunion òf si e ta asistí de bes en kuando? Kont’é ku entusiasmo di algu ku bo a siña resientemente na un reunion. Esei lo motiv’é mas ku si bo djis invit’é. Dun’é e Toren di Vigilansia i Material i Tarea pa Reunion ku nos ta usando. Mustr’é e informashon ku nos lo trata den e siguiente reunion i puntr’é kiko e ta haña ta mas interesante. Loke bo studiante lo mira i tende na su promé reunion lo superá kualke eksperensia ku e tabatin na otro reunion religioso. (1 Kor. 14:24, 25) Lo e sera konosí ku hende ku e por imitá nan bon ehèmpel i ku lo yud’é yega na boutismo.

16. (a) Kon bo por yuda un studiante yega na boutismo? (b) Kiko nos lo haña sa den e siguiente artíkulo?

¹⁶ A base di tur loke nos a trata te asina leu, kon bo por yuda un studiante yega na boutismo? Anim’é pa tuma e estudio na serio, pa studia tur siman i pa prepará pa kada estudio. Ademas, anim’é pa komuniká ku Yehova tur dia i pa bira su amigu. Finalmente, motiv’é p’e asistí na reunion regularmente. (Wak e kuadro “ Un Studiante Mester . . . ”.) Pero, tin sinku kos mas ku tur maestro mester hasi pa yuda studiante yega na boutismo. Kiko nan ta? Den e siguiente artíkulo, nos lo haña sa.