1. Kiko nos tur ke pa nos famia?

ABO tin famia * ku ainda no ta sirbi Yehova? Si esei ta e kaso, kisas bo ta sinti meskos ku un ruman ku yama Pauline. * El a bisa: “For di e momento ku mi a siña e bèrdat, mi tabata ke pa tur hende den mi famia ta huntu ku mi den Paradeis. Mi tabata ke pa spesialmente mi kasá, Wayne, i nos yu hòmber sirbi Yehova huntu ku mi.”

2. Kua ta algun pregunta ku nos lo kontestá den e artíkulo akí?

² Nos no por obligá nos famia aseptá e bèrdat, pero loke sí nos por hasi ta di yuda nan bira mas reseptivo pa e mensahe di Beibel. (2 Tim. 3:14, 15) Dikon nos mester prediká na nos famia? Dikon nos mester mustra empatia? Kiko nos por hasi pa nan tambe sirbi Yehova meskos ku nos? I kon tur ruman den kongregashon por yuda? Den e artíkulo akí, nos lo kontestá e preguntanan ei.

3. Segun 2 Pedro 3:9, dikon nos mester prediká na nos famia?

³ Pronto, Yehova lo kaba ku e mundu di Satanas. Solamente hende ku ta “dispuesto pa aseptá e bèrdat ku ta hiba na bida eterno” lo sobrebibí. (Echo. 13:48) Nos ta dediká hopi tempu i energia ta prediká na hende den nos komunidat, pues ta lógiko ku nos ke pa nos famia tambe  sirbi Yehova. Nos Tata amoroso, Yehova, “no ta deseá pa ningun hende ser destruí, ma e ta deseá pa tur haña chèns di arepentí.”—Lesa 2 Pedro 3:9.

4. Ki eror nos por kometé ora nos ta prediká na nos famia?

⁴ Nos mester kòrda ku tin un manera korekto i inkorekto pa kompartí e mensahe di salbashon. Kisas nos ta usa takto pa prediká na hende ku nos no konosé, pero ta keda sin hasi esei ora nos ta prediká na nos famia.

5. Kiko nos mester tene na mente promé ku nos prediká na nos famia?

⁵ Bo ta kòrda e promé biaha ku bo a purba di prediká na bo famia? Kisas bo ta sinti malu pa e manera ku bo a papia ku nan i bo ta deseá ku kos lo a bai diferente. Apòstel Pablo a konsehá e kristiannan: “Laga boso palabranan semper ta ku grasia, sasoná ku salu, pa boso por sa kon boso mester kontestá kada persona.” (Kol. 4:5, 6) Ta bon pa nos tene esei na mente ora nos ta papia ku nos famia. Sino, nos por alehá nan for di e bèrdat na lugá di atraé nan na dje.

6-7. Duna un ehèmpel ku ta ilustrá dikon ta importante pa mustra empatia na un kasá ku no ta Testigu.

⁶ Mustra empatia. Pauline, menshoná anteriormente, a bisa: “Na komienso, ta tokante Dios i Beibel so mi tabata papia ku mi kasá. Nos no tabata papia tokante e kosnan di tur dia.” Pero, Wayne, kasá di Pauline, no tabata sa muchu di Beibel i no tabata komprondé di kiko e tabata papia. Wayne a kuminsá sinti ku Pauline tabata pensa riba su religion so.  E tabatin miedu ku Pauline a djòin un sekta peligroso i ku nan tabata engañ’é.

⁷ Pauline a atmití ku e tabata pasa gran parti di su tempu ku e rumannan, tantu na reunion komo den sirbishi òf di bishita na nan kas. Pauline a bisa: “Tin biaha, ora Wayne a yega kas, no tabatin niun hende i e tabata sintié su so.” Ta di komprondé ku e tabata sinti falta di su esposa i yu. Wayne no tabata konosé e amigunan nobo di su kasá, i tabata parse ku Pauline tabata gusta mas di ta ku nan en bes di ta ku su propio kasá. Pues, Wayne a menasá Pauline di divorsi’é. Tin algun manera ku Pauline por a mustra mas empatia?

8. Segun 1 Pedro 3:1 i 2, kiko nos famia ta tuma nota di dje mas lihé?

⁸ Pone bon ehèmpel. Mayoria di biaha, nos famia ta tuma nota mas lihé di loke nos ta hasi ku loke nos ta bisa. (Lesa 1 Pedro 3:1, 2.) Pauline a bin realisá esei ku tempu. El a bisa: “Mi tabata sa ku Wayne tabata stima nos i ku en realidat e no tabata ke divorsiá. Pero su menasa a laga mi realisá ku mi mester a kuminsá hasi kos manera Yehova ke. Na lugá di keda papia den su kabes, mi mester a hasi esfuerso pa mi kondukta ta un bon ehèmpel p’e.” Pues, el a stòp di obligá Wayne pa papia di Beibel i a kuminsá papia tokante e kosnan di tur dia. Wayne a ripará ku su kasá a bira mas komprensivo, i el a mira ku su yu a bira mas obediente. (Pro. 31:18, 27, 28) Ora Wayne a mira e bon influensia ku Beibel tin riba su famia, e tabata mas dispuesto pa skucha su mensahe.—1 Kor. 7:12-14, 16.

9. Dikon nos tin ku sigui yuda nos famia?

 ⁹ Sigui yuda bo famia. Yehova ta pone bon ehèmpel pa nos. “Bes tras bes” e ta duna hende oportunidat pa nan skucha e bon notisia i haña bida. (2 Kró. 36:15) I apòstel Pablo a bisa Timoteo pa no keda sin yuda otro hende, pasobra hasiendo esei lo e salba su mes i esnan ku ta skuch’é. (1 Tim. 4:16) Nos ta stima nos famia, p’esei nos ke pa nan siña e bèrdatnan di Beibel. Den kaso di Pauline, loke el a bisa i hasi ku tempu tabatin bon efekto riba su famia. Awor e ta felis pasobra e ta sirbi Yehova huntu ku su kasá. Nan tur dos ta pionero, i Wayne ta un ansiano den kongregashon.

10. Dikon nos mester tene pasenshi?

¹⁰ Tene pasenshi. Ora nos kuminsá biba di akuerdo ku e normanan di Dios, kisas no ta fásil pa nos famia kustumbrá na nos kreensianan i moda di biba nobo. Mayoria di biaha, e promé kos ku nan ta ripará ta ku nos no ta selebrá fiesta religioso ku nan mas ni tampoko ta mete den polítika. Na kuminsamentu, algun di nan por asta rabia ku nos. (Mat. 10:35, 36) Pero, nos no mester pensa ku nunka nan lo kambia. Si nos stòp di purba di yuda nan komprondé nos kreensianan, ta manera nos a husga nan i a disidí ku nan no meresé bida eterno. Pero, Yehova a duna e tarea di husga na Hesus, no na nos. (Huan 5:22) Si nos tene pasenshi, ku tempu nos famia por ta dispuesto pa skucha e mensahe.—Wak e kuadro  “Hasi Bon Uso di Nos Website.”

11-13. Kiko bo ta siña for di e manera ku Alice a trata ku su mayornan?

¹¹ Sea firme pero usa takto. (Pro. 15:2) Wak e ehèmpel di Alice. El a siña di e bèrdat tempu e tabata biba na un otro pais leu for di su mayornan, kendenan tabata ateista i hopi aktivo den polítika. Alice a realisá ku e mester a konta su mayornan di e bon kosnan ku e tabata siña mas pronto posibel. El a bisa: “Si bo warda pa bo konta bo famia di bo kreensia- i kustumbernan nobo, nan lo haña mas rabia.” P’esei, e tabata skirbi su mayornan karta, i e tabata puntra nan opinion riba tópiko bíbliko ku e tabata spera lo a interesá nan, manera amor. (1 Kor. 13:1-13) El a gradisí nan pa tur loke nan a hasi p’e i tabata manda nan regalo. Ora e tabata bishitá nan, e tabata hasi tur loke e tabata por pa yuda su mama ku trabou di kas. Na prinsipio, su mayornan no a keda masha kontentu ora el a konta nan tokante su kreensianan nobo.

¹² Ora Alice tabata pasa algun dia na kas serka su mayornan, el a sigui lesa Beibel tur dia. El a bisa: “Esei a yuda mi mama mira kon importante Beibel ta pa mi.” Turesten, tata di Alice a disidí di investigá Beibel pa e por komprondé ta kiko su yu ta kere aden awor i pa buska eror den su kreensianan. Alice a bisa: “Mi a dun’é un Beibel i a skirbi algun palabra den dje ku lo a yega na su kurason.” Kiko tabata e resultado? Su tata no a haña niun eror; al kontrario, el a keda impreshoná di loke el a lesa.

¹³ Nos mester ta firme pero nos mester usa takto, asta bou di prueba. (1 Kor. 4:12b) Por ehèmpel, Alice mester a soportá oposishon di su mama. El a bisa: “Ora mi a batisá, mi mama a bisa mi ku mi ta un ‘mal yu.’” Kiko Alice a hasi? El a konta: “Na lugá di evitá e tema, ku  rèspèt mi a splik’é ku mi a disidí di bira un Testigu di Yehova i ku lo mi no kambia di desishon. Mi a purba di sigur’é ku mi ta stim’é masha hopi mes. Nos tur dos a yora, i mi a kushiná un dushi kuminda p’e. For di e dia ei, mi mama a kuminsá rekonosé ku Beibel a hasi mi un mihó hende.”

14. Dikon nunka nos no mester permití nos famia kambia nos desishon pa sirbi Yehova?

¹⁴ Kisas por tuma tempu promé ku nos famia komprondé kompletamente dikon pa nos ta importante pa sirbi Yehova. Por ehèmpel, ora Alice a disidí di traha pionero en bes di sigui e enseñansa superior ku su mayornan tabata ke, su mama a yora atrobe. Pero Alice a para firme. El a bisa: “Si bo permití bo famia kambia bo desishon tokante algu, probablemente nan lo purba di kambia bo desishon den otro kos. Ma si bo ta amabel pero firme ku bo famia, algun di nan por skucha bo.” Esei ta loke a pasa den kaso di Alice. Awor su mayornan ta pionero, i su tata ta un ansiano.

15. Segun Mateo 5:14-16 i 1 Pedro 2:12, kon e “obranan ekselente” di e rumannan por yuda nos famia?

¹⁵ Yehova ta usa e “obranan ekselente” di e rumannan den kongregashon pa atraé hende na e bèrdat. (Lesa Mateo 5:14-16; 1 Pedro 2:12.) Si bo kasá no ta un Testigu di Yehova, bo a lag’é sera konosí ku e rumannan di bo kongregashon?  Pauline, menshoná anteriormente, a invitá e rumannan na su kas pa asina Wayne por konosé nan. Wayne ta kòrda kon un ruman hòmber a yud’é kita e mal impreshon ku e tabatin di Testigunan: “El a tuma un dia liber di trabou pa djis bin wak un wega di bala ku mi. I mi a realisá ku e ta un hende masha normal!”

16. Dikon nos mester invitá nos famia na reunion?

¹⁶ Un bon manera pa yuda nos famia ta di invitá nan pa bini reunion ku nos. (1 Kor. 14:24, 25) E promé reunion ku Wayne a bai tabata Memorial, pasobra tabata despues di trabou i no a dura largu. El a bisa: “Mi no a komprondé tur kos ku nan a papia, pero mi ta kòrda kon nan a trata mi. Nan a aserká mi, yama mi bon biní i duna mi man. Mi por a sinti ku nan ta sinsero.” Wayne a ripará tambe ku un pareha den e kongregashon tabata masha amabel ku Pauline. Nan tabata yud’é ku su yu na reunion i den sirbishi. Pues, ora ku finalmente Wayne a disidí ku e ke sa mas tokante di e kreensianan nobo di Pauline, el a pidi e esposo pa studia Beibel kuné.

17. Di kiko nos no mester kulpa nos mes, pero dikon nunka nos no mester stòp di yuda nos famia?

¹⁷ Nos ta spera ku un dia tur nos famia lo sirbi Yehova huntu ku nos. Pero, apesar di tur nos esfuerso pa yuda nan, kisas nunka nan ta aseptá e bèrdat. Si esei ta e kaso, nos no mester kulpa nos mes pa nan desishon. Al fin i al kabo, nos no por obligá niun hende pa aseptá nos kreensianan. Pero, si nos famia mira kon felis nos ta pa motibu ku nos ta sirbi Yehova, esei por hasi un impakto grandi riba nan. P’esei, hasi orashon pa nan, usa takto pa papia ku nan i sigui yuda nan! (Echo. 20:20) Sea sigur ku Yehova lo bendishoná bo esfuerso. I si bo famia disidí di skucha bo, nan lo salba.