BO TIN gana di tin un asignashon den kongregashon ku na e momento akí ta fuera di bo alkanse? Kisas ta un asignashon ku un otro ruman tin. Òf kisas ta un privilegio ku bo tabatin den pasado, pero edat, salú, problema finansiero òf responsabilidat di famia ta limitá loke bo por hasi. Òf debí na kambio den organisashon, kisas bo mester a stòp ku un responsabilidat ku bo tabatin pa hopi tempu. Sea kual sea e motibu, kisas bo ta sinti ku bo no ta hasiendo mes tantu ku loke bo ke den Dios su sirbishi. Den tal sirkunstansia, ta normal ku tin biaha bo por sinti bo desapuntá, desanimá i frustrá. Pero kon bo por evitá ku e sintimentunan negativo ei ta saka rais den bo kurason? Kiko bo por hasi pa mantené bo goso?

Nos por siña hopi for di e ehèmpel di Huan Boutista. E tabatin privilegio ekstraordinario den Yehova su sirbishi. Pero, su bida a kue un rumbo ku nunka el a imaginá: lo el a pasa mas tantu tempu den prizòn ku den su asignashon. Ma tòg, el a mantené su goso durante henter su bida. Kiko a yud’é? I kon nos por mantené nos goso asta ora nos ta sinti nos desepshoná?

Den aprel di aña 29 di nos era, Huan a kuminsá su asignashon di prepará e hendenan pa e binida di e Mesías. El a bisa: “Arepentí, pasobra e Reino di shelu a yega serka.” (Mat. 3:2; Luk. 1:12-17) Hopi hende a reakshoná positivo. De echo, hende a bini for di tur skina pa skucha e mensahe i un kantidat di nan a arepentí i a batisá. Ku kurashi Huan a atvertí e lidernan religioso hudiu, kendenan tabata hustu den nan mes bista, di e kastigu ku tabata spera nan si nan no a kambia nan aktitut. (Mat. 3:5-12) E momento mas importante di su asignashon a tuma lugá na òktober di aña 29, ora el a batisá Hesus. For di e momento ei, Huan a animá hende pa sigui Hesus, e Mesías primintí.—Huan 1:32-37.

En bista di e papel partikular ku Huan tabatin, Hesus a bisa: “Di tur hende ku a nase di muhé, no a lanta ningun mas grandi ku  Huan Boutista.” (Mat. 11:11) Sin duda, Huan a sintié kontentu ku e bendishonnan ku el a risibí. Esei tambe tabata e kaso di Terry, kende tin mas ku 50 aña den sirbishi di tempu kompleto huntu ku su kasá, Sandra. Terry a bisa: “Mi tabatin hopi bunita privilegio. Mi tabata pionero, bètelita, pionero spesial, superintendente di sirkuito i di distrito i awor pionero spesial atrobe.” Ta bèrdat ku risibí asignashon spesial den e organisashon ta duna nos goso. Pero, manera nos lo bai siña for di Huan su ehèmpel, goso no ta dependé di e asignashon ku nos tin, i ta eksigí esfuerso pa nos mantené nos goso ora nos sirkunstansia kambia.

Un motibu dikon Huan Boutista no a pèrdè su goso tabata ku e tabata gradisidu pa e privilegio ku e tabatin. Por ehèmpel, despues ku Hesus a batisá, Huan su disipelnan a kuminsá bira ménos miéntras ku Hesus kada bes tabatin mas. Esei a preokupá e disipelnan di Huan i nan a bis’é: “Rabi, e hòmber ku tabata huntu ku bo na otro banda di Riu Hordan, . . . at’é ta batisá hende i tur hende ta bai serka dje.” (Huan 3:26) Huan a kontestá: “E brùit ta pertenesé na e brùidehòm. Ma e amigu di e brùidehòm ta bira masha kontentu ora e para banda di e brùidehòm i tend’é papia. P’esei, mi goso ta kompleto.” (Huan 3:29) Huan no a mira Hesus komo un rival ni a pensa ku su trabou a pèrdè balor pasobra esun di Hesus tabata mas importante. Al kontrario, Huan a mantené su goso pasobra el a balorá e onor di ta “amigu di e brùidehòm.”

Huan su aktitut a yud’é keda kontentu apesar ku su asignashon no tabata fásil. Por ehèmpel, Huan tabata nazareo for di nasementu, p’esei e no tabatin mag di bebe biña. (Luk. 1:15) Refiriendo na Huan su bida simpel, Hesus a bisa: “Huan a bini i no a kome ni bebe.” Pero, Hesus i su disipelnan no tabatin e restrikshonnan di nazareo i tabatin un bida mas normal. (Mat. 11:18, 19) Ademas, aunke Huan nunka a hasi milager, e tabata sa ku e disipelnan di Hesus, asta algun ku ántes tabata sigui Huan, sí por a hasi milager. (Mat. 10:1; Huan 10:41) Huan no a enfoká riba e diferensianan ei. Fielmente el a keda okupá den e asignashon ku Yehova a dun’é.

Esei ta siña nos un lès: si nos tambe ta balorá loke aktualmente nos ta hasi den Yehova su sirbishi, nos lo protehá nos goso. Terry, menshoná anteriormente, a bisa: “Mi a enfoká riba kada un di e asignashonnan ku mi a risibí.” Pensando riba su bida den sirbishi di tempu kompleto, el a bisa: “Mi no ta lamentá nada; mi tin grato rekuerdo so.”

Loke ku tambe lo oumentá nos goso ta si nos meditá riba loke ta hasi nos asignashon òf responsabilidat balioso: e onor di ta “kompañero di trabou di Dios.” (1 Kor. 3:9) Pa ilustrá: Meskos ku un opheto di metal balioso ta mantené su brio ora ku semper ta pòlish e, nos lo mantené nos goso si nos keda meditá riba e gran onor ku nos tin pa sirbi Dios. Nos lo no bai kompará nos sakrifisionan ku esnan di otro ruman. Ni pensa ku nos privilegionan ta di ménos balor na komparashon ku esnan ku otro ruman a risibí.—Gal. 6:4.

Kisas Huan tabata sa ku su sirbishi lo no dura pa hopi tempu, pero nunka el a imagin’é ku lo el a terminá asina abrupto. (Huan 3:30) Den aña 30, mas o ménos seis luna despues ku Huan a batisá Hesus, Rei Heródes a laga sera Huan den prizòn. Asina mes, Huan a hasi tur loke e tabata por pa sigui ta aktivo. (Mar. 6:17-20) Kiko lo a yud’é pa no pèrdè su goso apesar di e kambionan ei? El a keda enfoká riba e kosnan spiritual.

Den prizòn, Huan a risibí notisia di tur loke Hesus tabata hasi den su sirbishi. (Mat. 11:2; Luk. 7:18) Huan tabata konvensí ku Hesus tabata e Mesías, pero kisas el a puntra su mes si Hesus lo a bai kumpli ku tur loke  e Skritura a bisa ku e Mesías lo a hasi. Mirando ku e Mesías lo a bira rei, akaso lo e kuminsá goberná pronto? Hesus lo a libr’é for di prizòn? Komo ku Huan kier a komprondé mihó loke Hesus lo a hasi, el a manda dos di su disipelnan pa puntr’é: “Ta abo ta Esun Ku Ta Bini, òf nos tin ku spera un otro?” (Luk. 7:19) E ora ei Hesus a manda nan bèk serka Huan pa kont’é: “Siegu ta mira, koho ta kana bon, leproso ta kura, surdu ta tende, morto ta lanta i hende pober ta tende e bon notisia.” (Luk. 7:20-22) Huan tabata skucha ku atenshon na tur loke nan tabata kont’é tokante e milagernan ku Hesus tabata hasi.

E notisia ei sin duda a animá Huan mashá. Esei a konfirmá ku Hesus tabata kumpliendo ku e profesianan tokante e Mesías. Maske Hesus lo no a libra Huan for di prizòn, Huan tabata sa ku su sirbishi no tabata enbano. Apesar di e sirkunstansia, e tabatin motibu pa ta gososo.

Si nos hasi meskos ku Huan i enfoká riba e kosnan spiritual, nos lo soportá ku goso i pasenshi. (Kol. 1:9-11) Lesa Beibel i meditá riba loke nos lesa lo yuda nos logra esei, ya ku e ta kòrda nos ku nos sirbishi na Dios nunka ta enbano. (1 Kor. 15:58) Sandra a bisa: “Tur dia, mi ta lesa un kapítulo di Beibel. Esei ta hala mi mas serka Yehova. Esei ta yuda mi enfoká riba Yehova i no riba mi mes.” Tambe nos por enfoká riba e bon resultadonan di e trabou di prediká rònt mundu. Esei lo yuda nos pa stòp di pensa solamente riba nos sirkunstansia i enfoká riba tur loke Yehova ta hasiendo. Sandra a agregá: “E programa mensual di JW Broadcasting^® ta yuda nos sinti nos mas uní ku e organisashon i ta yuda nos mantené nos goso den nos asignashon.”

Huan Boutista a kumpli ku su karera breve ku yudansa di “e spiritu i poder di Elías.” I meskos ku Elías, e tabata un hende “ku e mesun sintimentunan ku nos.” (Luk. 1:17; Sant. 5:17) Si nos ta gradisidu i ta enfoká riba e kosnan spiritual meskos ku Huan, nos tambe lo sigui mantené nos goso den nos sirbishi na Dios, pase loke pase.