1. Dikon Yehova a krea bida?

NA PRINSIPIO Yehova tabata su so, pero nunka el a sintié solitario. Al fin i al kabo, e no tabatin mester di nada den ningun sentido. Sinembargo, e tabata ke pa otro kriatura haña bida i pa nan ta felis. Pues, amor a motiv’é p’e kuminsá krea.—Sal. 36:9; 1 Huan 4:19.

2. Kon Hesus i e angelnan a sinti ora Yehova a krea otro kos?

² Promé, Yehova a krea su Yu, Hesus. Despues huntu ku su Yu, el a krea “tur otro kos,” inkluso miónes di angel. (Kol. 1:16) Hesus a sintié masha felis di por traha ku su Tata. (Pro. 8:30) I e angelnan tambe tabata felis. Nan tabata presente ora Yehova i su Trahadó Eksperto, Hesus, a krea shelu i tera. Kiko e angelnan a hasi? Nan a “grita di alegria” ora tera a ser formá, i sin duda nan a sigui alegrá ku kada obra ku Yehova a krea, inkluso su obra maestro, hende. (Yòb 38:7; Pro. 8:31) Den kada un di e kreashonnan ei Yehova a demostrá su amor i sabiduria.—Sal. 104:24; Rom. 1:20.

3. Di akuerdo ku 1 Korintionan 15:21 i 22, kiko e sakrifisio di reskate di Hesus a hasi posibel?

³ Yehova tabata ke pa hende biba pa semper riba e bunita planeta ku el a krea. Pero ora Adam ku Eva a rebeldiá kontra nan Tata amoroso, piká i morto a kubri henter  humanidat. (Rom. 5:12) Kiko Yehova a hasi? Mesora el a bisa kon lo el a reskatá humanidat. (Gén. 3:15) Lo el a duna su Yu, Hesus, komo sakrifisio di reskate, i esei a permití ku tur e yunan di Adam ku Eva por ser librá di piká i morto. Di e manera ei, lo el a duna kada hende e oportunidat di skohe si nan ke sirbiÉ i biba pa semper.—Huan 3:16; Rom. 6:23; lesa 1 Korintionan 15:21, 22.

4. Kiko nos lo analisá den e artíkulo akí?

⁴ Dios su promesa pa resusitá e mortonan ta lanta hopi pregunta. Por ehèmpel, kon e resurekshon lo tuma lugá? Nos lo rekonosé nos sernan kerí ora nan resusitá? Den ki manera e resurekshon lo duna nos goso? I kiko e resurekshon ta siña nos tokante Yehova su amor, sabiduria i pasenshi? Laga nos analisá kada un di e preguntanan ei.

5. Dikon nos no por ferwagt ku tur hende lo resusitá den un tiru ?

⁵ Den Paradeis, Yehova lo usa su Yu pa resusitá míles di miónes di hende. Pero, nos no por ferwagt ku lo e resusitá nan tur den un tiru. Dikon nò? Pasobra si diripiente tin hopi hende riba tera, esei lo krea káos. I Yehova nunka ta hasi nada na un manera desorganisá, òf kaótiko. E sa ku tur kos mester ta organisá pa asina hende por biba na pas. (1 Kor. 14:33) Yehova Dios a demostrá sabiduria i pasenshi ora el a traha huntu ku Hesus pa prepará e tera pa hende biba riba dje. I Hesus na su turno, tambe lo demostrá sabiduria i pasenshi durante Reinado di Mil Aña ora e traha huntu ku e sobrebibientenan di Armagedon segun ku nan  ta prepará e tera pa risibí e hendenan ku lo resusitá.

6. Di akuerdo ku Echonan 24:15, ken tambe lo haña resurekshon?

⁶ Tin algu aun mas importante ku e sobrebibientenan di Armagedon lo tin ku hasi: siña hende ku resusitá tokante e Reino di Dios i tokante e normanan di Yehova. Dikon esei ta nesesario? Pasobra mayoria di esnan ku resusitá ta forma parti di e inhustunan. (Lesa Echonan 24:15.) Nan lo tin ku hasi hopi kambio pa nan por risibí e bendishonnan di Kristu su sakrifisio di reskate i biba pa semper. Djis pensa riba kuantu trabou lo ta pa siña e bèrdat na e miónes di hendenan ei ku no konosé Yehova. Kon esei lo bai? Kisas nos lo siña kada hende individualmente manera nos ta dirigí estudio di Beibel awe? Podisé esnan ku resusitá lo ser asigná na un kongregashon i haña entrenamentu pa siña otronan ku resusitá despues di nan? Wèl, nos lo tin ku warda pa haña sa. Pero, loke sí nos sa ta ku pa final di Reinado di Mil Aña di Kristu “tera lo ta yen di e konosementu di” Yehova. (Isa. 11:9) Nos lo tin hopi trabou pa hasi durante e mil aña ei, pero e trabounan ei lo ta satisfaktorio!

7. Dikon Dios su pueblo lo demostrá komprenshon segun ku nan ta siña esnan resusitá?

⁷ Durante e mil añanan, nos komo sirbidó di Yehova lo sigui traha riba nos personalidat pa nos por agrad’é. P’esei, nos lo tin komprenshon pa hende ku a resusitá segun ku nos ta yuda nan hasi kambio i lucha kontra tendensia pekaminoso i biba segun Yehova su normanan. (1 Ped. 3:8) Sin duda, esnan ku a resusitá lo mira ku Yehova su pueblo ta humilde i ta hasiendo kambio ainda pa agrad’é, i nan lo ke adorá Yehova huntu ku Su pueblo.—Flp. 2:12.

8. Dikon nos por ferwagt ku nos lo rekonosé nos amigu- i famianan ku resusitá?

⁸ Tin vários motibu dikon nos por ferwagt ku nos lo rekonosé nos amigu-i famianan ku resusitá. Por ehèmpel, a base di e resurekshonnan ku a tuma lugá den pasado, ta parse ku Yehova lo bolbe krea hende eksaktamente manera nan tabata djis promé ku nan a muri, esta, ku e mesun aparensia, mesun forma di papia i pensa. Kòrda ku Hesus a kompará morto ku soño i resurekshon ku lanta for di soño. (Mat. 9:18, 24; Huan 11:11-13) Ora hende lanta for di soño, nan ta eksaktamente meskos ku promé ku nan a drumi. Nan tin e mesun aparensia i memoria. Pensa riba ehèmpel di Lázaro. E tabata morto pa kuater dia, pues su kurpa ya a kuminsá deskomponé. Pero ora Hesus a resusit’é, Maria i Marta a rekonos’é mesora, i ta opvio ku el a kòrda nan.—Huan 11:38-44; 12:1, 2.

9. Dikon hende ku resusitá lo no bini bèk ku kurpa i mente perfekto?

⁹ Yehova ta primintí ku, den Paradeis, ningun hende lo no bisa: “Mi ta malu.” (Isa. 33:24; Rom. 6:7) Pues ora Dios bolbe krea hende ku a muri, lo e duna nan kurpa saludabel. Pero, nan lo no ta perfekto mesora. Sino, nan famia- i amigunan kisas lo no rekonosé nan. Ta parse ku humanidat gradualmente lo bira perfekto durante Reinado di Mil Aña di Kristu. I na fin di e mil aña ei, Hesus lo duna su Tata e Reino bèk. E ora ei, e Reino lo a logra su meta kompletamente, inkluso  hasi humanidat perfekto.—1 Kor. 15:24-28; Rev. 20:1-3.

10. Kon e resurekshon lo laga bo sinti?

¹⁰ Imaginá kon lo ta pa mira bo sernan kerí atrobe. Lo bo hari òf yora di alegria? Lo bo ta asina kontentu ku lo bo kanta kantika di alabansa na Yehova? Un kos ta sigur: e resurekshon lo oumentá bo amor pa Yehova i pa Hesus. Si no ta pa nan kariño i bondat, nunka nos lo a risibí un regalo asina maravioso!

11. Di akuerdo ku e palabranan di Hesus skirbí na Huan 5:28 i 29, kiko lo pasa ku hende ku ta obedesé Dios?

¹¹ Imaginá e alegria ku hende ku resusitá lo sinti segun ku nan ta kita nan personalidat bieu i ta obedesé Dios. Si nan ta dispuesto pa hasi kambio, nan lo tin un resurekshon di bida. Di otro banda, Yehova lo no permití hende ku ta nenga di kambia pa sigui biba den Paradeis i kita e pas ku ta reina.—Isa. 65:20; lesa Huan 5:28, 29.

12. Kon Yehova lo bendishoná tur hende riba tera?

¹² Ora e Reino ta goberná, henter Dios su pueblo lo mira ku e palabranan na Proverbionan 10:22 ta bèrdat: “Ta e bendishon di SEÑOR ta hasi riku, i E no ta agregá tristesa na dje.” Ku yudansa di Yehova su spiritu, nan lo bira riku den sentido spiritual, esta, nan lo ta kapas pa imitá Hesus su kualidatnan mihó i ku tempu bira perfekto. (Huan 13:15-17; Efe. 4:23, 24) Ademas, kada dia nan kurpa lo bira mas saludabel i nan lo ta mihó hende. Esta dushi bida lo ta! (Yòb 33:25) Pero, kon e echo ku nos ta meditá riba e resurekshon por yuda nos awe?

13. Di akuerdo ku Salmo 139:1-4, kon e resurekshon lo demostrá ku Yehova konosé nos hopi bon?

¹³ Manera nos a mira, ora Yehova resusitá hende, nan lo tin e mesun memoria i personalidat ku nan tabatin promé ku nan a muri. Djis pensa riba kiko esei ta nifiká. Yehova ta stima bo asina tantu ku e ta na altura di tur loke bo ta pensa, sinti, bisa i hasi. Pues si e mester resusitá bo, fásilmente lo e por restorá bo memoria, aktitut i personalidat. Rei David tabata sa ku Yehova ta masha interesá den kada un di nos. (Lesa Salmo 139:1-4.) Kon bo ta sinti bo awor ku bo a komprondé kon bon Yehova konosé bo?

14. Dikon ta bon pa meditá riba e echo ku Yehova konosé bo hopi bon?

¹⁴ Ora bo meditá riba e echo di kon bon Yehova konosé bo, semper bo mester keda kòrda ku e ta stima bo masha hopi mes. Den su bista, kada un di nos ta presioso. Ademas, e sa delaster un kos ku bo a pasa aden i ku a hasi bo e hende ku bo ta. Esta un trankilidat! P’esei, nunka no sinti ku bo ta bo so. Kada minüt di bo bida, Yehova ta banda di bo pendiente pa yuda bo.—2 Kró. 16:9.

15. Kon e speransa di resurekshon ta demostrá Yehova su sabiduria?

¹⁵ Miedu di muri ta un arma poderoso. Hende ku ta bou di kontrol di Satanas ta usa e miedu ei pa menasá i fòrsa hende traishoná nan amigunan òf hasi algu ku nan sa ku ta robes. Pero e menasa ei no ta funshoná serka nos. Nos sa ku si nos enemigunan mata nos, Yehova lo resusitá nos. (Rev. 2:10) Nos ta konvensí  ku nada ku nan hasi no por kibra nos amistat ku Yehova. (Rom. 8:35-39) Sí, e speransa di resurekshon ku Yehova a duna nos ta demostrá su sabiduria. Debí na e speransa ei, nos no tin miedu si Satanas su kompinchinan menasá nos ku morto si nos no hasi loke nan ke. A la bes e speransa ei ta duna nos kurashi pa keda leal na Yehova.

16. Kiko bo mester puntra bo mes, i kiko bo kontesta lo proba?

¹⁶ Si e enemigunan di Yehova menasá bo ku morto, lo bo tin konfiansa ku Yehova lo resusitá bo? Kon bo por sa si lo bo konfia Yehova na e momento ei? Un manera ta di puntra bo mes: ‘E desishonnan chikitu ku mi ta tuma diariamente ta proba ku mi ta konfia den Yehova?’ (Luk. 16:10) Un otro pregunta ku bo por hasi bo mes ta: ‘E manera ku mi ta usa mi tempu i plaka ta demostrá ku mi ta konfia den Yehova su promesa di perkurá pa mi nesesidatnan material si mi buska e Reino promé?’ (Mat. 6:31-33) Si bo kontesta ta sí, e ora ei bo ta proba ku bo ta konfia den Yehova, i lo bo ta prepará pa kualke prueba ku bini den bo kaminda.—Pro. 3:5, 6.

17. (a) Dikon resurekshon ta un prueba di Yehova su pasenshi? (b) Kon nos por demostrá ku nos ta gradisidu pa Yehova su pasenshi?

¹⁷ Yehova ya tin un dia i ora stipulá pa destruí e mundu malbado akí. (Mat. 24:36) Aunke e ta anhelá pa resusitá hende ku a muri, lo e no pèrdè pasenshi i trese fin promé ku ora. (Yòb 14:14, 15) E ta wardando e momento perfekto pa resusitá nan. (Huan 5:28) Nos tin bon motibu pa nos ta gradisidu pa Yehova su pasenshi. Pensa riba esaki: Debí na Yehova su pasenshi, hopi hende, inkluso nos, a haña tempu pa “arepentí.” (2 Ped. 3:9) Yehova ke pa mas tantu hende posibel haña oportunidat pa haña bida eterno. Pues, laga nos demostrá ku nos ta gradisidu pa su pasenshi. Kon? Esei ta di hasi esfuerso pa buska hende ku ta “dispuesto pa aseptá e bèrdat ku ta hiba na bida eterno” i yuda nan stima Yehova i sirbié. (Echo. 13:48) Di e manera ei, nan tambe por benefisiá di Yehova su pasenshi.

18. Dikon nos mester tin pasenshi ku otro hende?

¹⁸ Yehova sa ku ta te na fin di e mil añanan  nos lo bira perfekto. Te na e momento ei, lo e tin pasenshi ku nos i lo e ta dispuesto pa pordoná nos pikánan. P’esei nos mester imitá su ehèmpel i enfoká riba e bon kualidatnan di otro hende i tene pasenshi ku nan. Wak ehèmpel di un ruman. Su esposo a kuminsá haña atake di ansiedat severo i a stòp di bai reunion. E ruman a konta: “Esei tabata masha duru pa mi. Tur nos plannan ku nos tabatin komo un famia a kai na awa.” Pero apesar di tur esei, e ruman ei a sigui trata su esposo ku amor i pasenshi. El a konfia den Yehova i nunka a entregá. Meskos ku Yehova, el a enfoká riba e bon kosnan di su esposo. El a bisa: “Mi esposo tin bunita kualidat, i e ta hasiendo esfuerso pa pokopoko e para bèk riba pia.” Ta masha importante pa nos tin pasenshi ku hende den nos famia òf kongregashon ku ta lucha ku difikultat.

19. Kiko bo mester ta determiná pa hasi?

¹⁹ Hesus i e angelnan a alegrá ora tera a ser kreá. Pero imaginá kon kontentu nan lo ta pa mira tera yen di hende perfekto ku ta stima i sirbi Yehova. Imaginá kon kontentu e ungínan den shelu lo ta pa mira humanidat benefisiá di nan trabou. (Rev. 4:4, 9-11; 5:9, 10) Imaginá tambe ora lágrima di goso ta remplasá lágrima di doló, ora malesa, tristesa i morto lo no eksistí mas. (Rev. 21:4) Te na e dia ei, sea determiná pa imitá bo Tata su amor, sabiduria i pasenshi. Si bo hasi esei, lo bo mantené bo goso sin importá ki prueba bini den bo kaminda. (Sant. 1:2-4) Bo por ta masha gradisidu ku Yehova a primintí ku “lo bai tin un resurekshon”!—Echo. 24:15.