1. Ki gran onor nos tin?

TA UN gran onor pa nos ta parti di Yehova su kongregashon! Nos ta disfrutá di pas i felisidat segun ku nos ta adorá Yehova huntu ku nos rumannan den kongregashon. Pero, ki lugá nos tin den kongregashon?

2. Ki ilustrashon Apòstel Pablo a usa den vários di su kartanan?

² Pa nos haña sa ki lugá nos tin den kongregashon, laga nos wak un ilustrashon ku Apòstel Pablo a usa den vários di su kartanan. Den kada un di e kartanan inspirá ei, el a kompará e kongregashon ku kurpa humano. El a kompará tambe kada hende den kongregashon ku diferente parti di kurpa.—Rom. 12:4-8; 1 Kor. 12:12-27; Efe. 4:16.

3. Ki tres lès nos lo analisá den e artíkulo akí?

³ Den e artíkulo akí, nos lo analisá tres lès importante ku nos por siña for di e ilustrashon ku Pablo a usa. Promé, nos lo siña ku kada un di nos tin un lugá * den Yehova su kongregashon. Di dos, nos lo analisá kiko nos por hasi si nos ta sinti ku nos no ta balioso pa nos kongregashon. I di tres, nos lo analisá dikon nos mester keda okupá den e trabou ku Yehova a duna kada un di nos den kongregashon.

4. Kiko Romanonan 12:4 i 5 ta siña nos?

⁴ E promé lès ku nos ta siña for di e ilustrashon di Pablo ta ku kada un di nos tin un lugá importante den e famia di Yehova. Pablo a kuminsá su ilustrashon bisando: “Meskos ku un kurpa ta konsistí di hopi parti, pero nan tur no tin e mesun funshon, asina tambe, aunke nos ta hopi, nos ta ún kurpa den union ku Kristu, i komo miembro nos ta uní ku otro.” (Rom. 12:4, 5) Pablo tabata ke men ku kada un di nos tin diferente funshon den kongregashon, pero kada un di nos ta balioso.

5. Kiko Yehova a duna e kongregashon?

⁵ Nos tur tin un lugá den Yehova su organisashon. Laga nos kuminsá papia tokante e rumannan ku ta dirigí. (1 Tes. 5:12; Heb. 13:17) Ta bèrdat ku mediante Kristu, Yehova a duna Su kongregashon “regalo den forma di hende.” (Efe. 4:8) E “regalo den forma di hende” ta inkluí miembro di Kuerpo Gobernante i nan ayudantenan, miembro di Komité di Sukursal, superintendente di sirkuito, instruktor di skol bíbliko, ansiano di kongregashon i sirbidó ministerial. Tur e ruman hòmbernan ei a ser nombrá pa spiritu santu pa kuida Yehova su karnénan presioso i fortalesé e kongregashon.—1 Ped. 5:2, 3.

6. Di akuerdo ku 1 Tesalonisensenan 2:6-8, kiko ruman hòmber ku a ser nombrá pa spiritu santu ta hasi esfuerso pa hasi?

⁶ Ruman hòmber ta ser nombrá pa spiritu santu pa atendé vários responsabilidat. Meskos ku man, pia i otro parti di kurpa ta traha pa benefisiá henter e kurpa, asina tambe e rumannan ei ta traha duru pa benefisiá henter e kongregashon. Nan no ta buska nan mes gloria, ma nan ta hasi esfuerso pa fortalesé nan rumannan. (Lesa 1 Tesalonisensenan 2:6-8.) Nos ta gradisí Yehova pa e rumannan kualifiká ei ku ta pone nesesidat di otro hende promé ku di nan!

7. Ki bendishon hopi misionero òf pionero tin?

⁷ Kisas den nos kongregashon tin misionero, pionero spesial òf pionero regular. De echo, rònt mundu tin ruman hòmber i muhé ku a dediká nan mes fultaim pa prediká i hasi hende disipel. Asina ei, nan ta yuda hopi hende bira disipel di Kristu Hesus. Aunke generalmente e rumannan ei no tin hopi den sentido material, Yehova a duna nan un bida yen di bendishon. (Mar. 10:29, 30) Nos ta stima e rumannan ei masha hopi mes, i nos ta masha gradisidu ku nan ta parti di nos kongregashon!

8. Dikon kada publikadó di e bon notisia ta presioso pa Yehova?

⁸ Pero, ta ruman hòmber nombrá i ruman den sirbishi di tempu kompleto so ta e únikonan ku tin un lugá den kongregashon? Klaru ku nò! Kada publikadó di e bon notisia ta importante pa Dios i pa e kongregashon. (Rom. 10:15; 1 Kor. 3:6-9) Esei ta asina pasobra un di e metanan di mas importante di e kongregashon ta di hasi hende disipel di nos Señor Hesukristu. (Mat. 28:19, 20; 1 Tim. 2:4) Tur publikadó, sea batisá òf nò, ta hasi esfuerso pa e trabou ei ta esun di mas importante den nan bida.—Mat. 24:14.

9. Dikon nos ta balorá nos ruman muhénan?

⁹ Yehova ta duna ruman muhé un lugá importante den kongregashon. E ta  balorá esposa, mama, biuda i ruman muhé soltero ku ta sirbié fielmente. Beibel ta resaltá e bon ehèmpel di hopi hende muhé ku a agradá Dios debí na nan sabiduria, fe, zelo, kurashi, generosidat i bon obra. (Luk. 8:2, 3; Echo. 16:14, 15; Rom. 16:3, 6; Flp. 4:3; Heb. 11:11, 31, 35) Nos ta masha gradisidu na Yehova ku nos tin ruman muhé den nos kongregashon ku ta demostrá e mesun bunita kualidatnan ei!

10. Dikon nos ta balorá nos rumannan di edat avansá?

¹⁰ Ademas, nos ta kontentu ku nos tin hopi ruman di edat avansá den nos kongregashon. Algun di nan a dediká henter nan bida sirbiendo Yehova. Tin otro ku a siña e bèrdat resientemente. Sea kual sea e kaso, hopi di nan ta luchando ku vários krekeché ku edat avansá ta trese kuné. E situashonnan ei ta pone ku nan no por hasi hopi den kongregashon i den trabou di prediká. Pero asina mes, nan ta duna tur di nan den sirbishi i ta usa nan energia pa animá i entrená otro. Nos ta siña bastante for di nan eksperensianan. Sin duda, nan ta bunita pa Yehova i pa nos!—Pro. 16:31.

11-12. Kon e hóbennan den bo kongregashon ta animá bo?

¹¹ Kiko awor di nos hóbennan? Bida no ta fásil pa nan debí ku nan ta krese den un mundu dominá pa Satanas i influensiá pa su ideanan malbado. (1 Huan 5:19) Pero, esta kontentu nos ta ora nos tende nan duna komentario, sali den sirbishi i defendé loke nan ta kere aden. Hóbennan, boso tin un lugá importante den Yehova su kongregashon!—Sal. 8:2.

¹² Pero, ta difísil pa algun di nos rumannan sinti ku nan ta balioso pa nan kongregashon. Kiko por yuda nos sinti ku nos kada un tin un lugá den kongregashon? Laga nos wak.

13-14. Dikon algun ruman ta sinti ku nan no ta balioso pa nan kongregashon?

¹³ Laga nos wak kiko ta e di dos lès ku nos por siña for di e ilustrashon di Pablo. Pablo a hala atenshon na un sintimentu ku hopi ruman tin awe: nan no ta sinti ku nan ta balioso pa nan kongregashon. El a skirbi: “Si pia mester bisa: ‘Komo ku mi no ta man, mi no ta parti di e kurpa,’ ta p’esei e no ta parti di e kurpa? I si orea mester bisa: ‘Komo ku mi no ta wowo, mi no ta parti di e kurpa,’ ta p’esei e no ta parti di e kurpa?” (1 Kor. 12:15, 16) Kiko Pablo tabata ke pa nos komprondé?

¹⁴ Si bo kompará bo mes ku otro ruman den kongregashon, bo por kuminsá sinti ku bo no ta balioso pa e kongregashon. Algun ruman kisas ta maestro ábil, ekselente organisadó òf bon ansiano. Kisas bo ta sinti ku bo no ta dje bon ei manera nan. Wèl, esei ta demostrá ku bo ta humilde i modesto. (Flp. 2:3) Pero tene kuidou! Si konstantemente bo ta kompará bo mes ku e rumannan ku ta sobresalí pa nan abilidat, bo por desanimá. Bo por te asta sinti ku bo no tin un lugá den bo kongregashon mes. Kiko por yuda bo lucha kontra e sintimentunan ei?

15. Di akuerdo ku 1 Korintionan 12:4-11, kiko nos tin ku rekonosé tokante kualke kapasidat ku nos tin?

¹⁵ Pensa riba esaki: den promé siglo, Yehova a duna algun ruman don milagroso di spiritu santu, pero no ta tur a haña e mesun don. (Lesa 1 Korintionan 12:4-11.) Yehova a duna nan diferente don, òf kapasidat, pero kada un di e rumannan ei tabata balioso. Den nos tempu, nos no ta haña don milagroso di spiritu santu mas. Pero e prinsipio ta keda meskos: no ta nos tur tin mesun kapasidat, pero nos tur ta balioso pa Yehova.

16. Ki konseho di Pablo nos mester apliká?

 ¹⁶ Na lugá di kompará nos mes ku otro ruman, nos mester apliká e konseho akí di Pablo: “Laga kada un di boso analisá su mes akshonnan, anto e ora ei lo e tin motibu pa ta masha kontentu ku su mes, sin kompará su mes ku otro hende.”—Gal. 6:4.

17. Kiko ta e benefisio di sigui e konseho di Pablo?

¹⁷ Si nos sigui e konseho ei di Pablo i analisá nos mes akshonnan, nos lo deskubrí ku nos tin kapasidat ku otro ruman no tin. Por ehèmpel, kisas un ansiano no ta un gran oradó, pero kisas e ta un bon maestro den e trabou di hasi hende disipel. Òf kisas e no ta masha organisá meskos ku otro ansiano den su kongregashon, pero kisas e ta konosí pa ta un ansiano amabel ku ta demostrá amor i ta fásil pa aserka pa pidi konseho bíbliko. Òf kisas e ta masha hospitalario. (Heb. 13:2, 16) Ora nos ta konsiente di nos mes puntonan fuerte i di nos mes kapasidat, nos lo tin motibu pa sinti nos bon ku loke nos por aportá na nos kongregashon. I e chèns ta hopi chikitu ku nos lo envidiá nos rumannan ku tin diferente kapasidat for di nos.

18. Kon nos por bira mihó maestro?

¹⁸ Sin importá e lugá ku nos tin den kongregashon, nos tur mester tin e deseo di mehorá nos kalidat di sirbishi i bira mihó maestro. Pa yuda nos ku esei, Yehova ta usa su organisashon pa duna nos entrenamentu ekstraordinario. Por ehèmpel, na nos reunion di den siman, nos ta haña instrukshon kon nos por ta mas ábil den nos sirbishi. Bo ta purba di apliká e instrukshonnan ei?

19. Kon bo por logra e meta di bai Skol pa Predikadó di Reino?

¹⁹ Un otro programa di entrenamentu ta Skol pa Predikadó di Reino. Ruman ku ta den sirbishi di tempu kompleto i ku tin entre 23 i 65 aña por asistí na e skol ei. Kisas bo ta pensa ku nunka bo por logra e meta ei. Pero en bes di traha un lista di tur e motibunan ku bo no por bai e skol ei, traha un lista di tur e motibunan ku bo ke bai e skol. Kaba, traha un plan ku lo yuda bo kumpli ku e rekisitonan. Ku yudansa di Yehova i ku bo esfuerso, lo bo logra algu ku nunka bo a kere lo ta posibel.

20. Kiko nos por siña for di Romanonan 12:6-8?

²⁰ E di tres lès ku e ilustrashon di Pablo ta siña nos ta den Romanonan 12:6-8. (Les’é.) Ei, Pablo ta bolbe bisa ku e rumannan den kongregashon tin diferente don. Pero, awor e ta enfatisá ku nos mester usa kualke kapasidat ku nos tin pa animá i fortalesé nos kongregashon.

21-22. Kiko nos ta siña for di loke a pasa ku Robert i Felice?

²¹ Wak loke a pasa un ruman ku nos lo yama Robert. Despues di sirbi na un pais estranhero, el a haña asignashon pa sirbi na Bètel di su pais. Aunke e rumannan a splik’é ku e kambio di asignashon no tabata debí ku el a hasi algu malu, el a bisa: “Pa hopi luna mi tabata tristu pasobra m’a sinti ku m’a frakasá den mi asignashon. Tabatin momento ku mi tabata ke te asta stòp di sirbi na Bètel.” Kon Robert a haña su goso bèk? Un otro ansiano a kòrd’é ku kada asignashon ku Yehova a duna nos den pasado a prepará nos  pa e asignashon ku nos tin aworakí. Robert a komprondé ku e mester stòp di wak pasado i enfoká riba loke e por hasi aworakí.

²² Algu paresido a pasa ku Ruman Felice Episcopo. E ku su esposa a gradua di Galaad na 1956 i a sirbi komo sirkuito na Bolivia. Na 1964 nan a haña yu. Felice a bisa: “Tabata duru pa laga nos asignashon presioso. Mi tin ku bisa ku pa henter un aña m’a sinti mi desanimá. Pero ku yudansa di Yehova, m’a kambia mi aktitut i a enfoká riba mi responsabilidat di tata.” Bo ta sinti bo manera Robert i Felice? Bo ta desanimá debí ku bo no tin e mesun privilegio ku bo tabatin ántes? Si esei ta e kaso, lo bo ta mas felis si bo enfoká riba loke bo por hasi aworakí pa Yehova i bo rumannan. Keda okupá, usa bo kapasidat pa yuda otro hende i lo bo tin mas goso segun ku bo ta fortalesé bo kongregashon.

23. (a) Kiko nos mester saka tempu pa hasi? (b) Kiko nos lo analisá den e siguiente artíkulo?

²³ Kada un di nos ta presioso pa Yehova. E ke pa nos sinti ku nos ta parti di su famia. Nos mester saka tempu pa meditá riba loke nos por hasi pa fortalesé nos rumannan i hasi nos máksimo esfuerso pa kumpli ku e meta ei. Asina ei, nos lo tin ménos chèns ku nos ta sinti ku nos no ta forma parti di nos kongregashon. Pero, kiko di e otro rumannan den nos kongregashon? Kon nos por demostrá nan ku nos ta stima i respetá nan? Den e siguiente artíkulo, nos lo analisá esei.