1. Kiko David a bisa tokante Yehova su humildat?

NOS por tin sigur ku Yehova ta humilde! Dikon? Wak loke David a bisa un biaha: “Bo a duna mi e eskudo di bo salbashon, i bo gentilesa [“humildat,” NW] ta hasi mi grandi.” (2 Sam. 22:36) Ora David a skirbi e palabranan ei, kisas e tabata kòrda dia Samuel a bini na kas di su tata pa ungi e siguiente rei di Israel. Yehova a demostrá humildat ora el a skohe David, kende tabata esun di mas chikitu di ocho ruman, pa remplasá Rei Saul.—1 Sam. 16:1, 10-13.

2. Kiko nos lo analisá den e artíkulo akí?

² Sin duda David lo tabata di akuerdo ku e sintimentunan di e eskritor di Salmo 113. E salmista ei a bisa ku Yehova ta baha abou pa mira e kosnan den shelu i riba tera i ku “e ta lanta hende pober for di stòf, i ta lanta esnan den nesesidat . . . pa pone nan sinta huntu ku prensnan.” (Sal. 113:6-8) Den e artíkulo akí, nos lo analisá algun situashon den kua Yehova a demostrá humildat i loke nos por siña for di su ehèmpel. Despues, nos lo siña mas tokante humildat for di e ehèmpelnan di Rei Saul, Profeta Daniel i Hesus.

3. Kon Yehova ta trata nos, i kiko esei ta proba?

³ Nos por siña hopi ora nos opservá e manera ku Yehova ta trata su adoradónan imperfekto. E no ta aseptá nos komo adoradó so, pero e ta mira nos komo su amigu  tambe. (Sant. 2:23) I pa hasi nos amistat kuné posibel, el a proveé e sakrifisio di su Yu pa libra nos di nos pikánan. Sin duda, Yehova a demostrá hopi kompashon i miserikòrdia na nos! Tur esei ta proba ku e ta un Dios humilde.

4. Kiko Yehova a duna nos, i dikon?

⁴ Laga nos wak un otro prueba ku ta demostrá ku Yehova ta humilde. Komo Kreador, e por a opta di krea nos sin e kapasidat di skohe kiko nos ta hasi ku nos bida. Pero e no a hasi esei. El a traha nos den su imágen i a duna nos boluntat liber. Aunke ku na komparashon kuné nos ta insignifikante, e ke pa nos sirbié debí ku nos ta stim’é i nos ta rekonosé ku obedensia na dje ta pa nos mes bon. (Deu. 10:12; Isa. 48:17, 18) Nos ta masha gradisidu ku Yehova ta asina humilde!

5. Kon Yehova ta siña nos kiko ke men sea humilde? (Wak e plachi riba portada.)

⁵ E manera ku Yehova ta trata nos tambe ta siña nos kiko ke men sea humilde. No tin ningun Persona den universo ku ta mas sabí ku Yehova. Asina mes, e ta dispuesto pa aseptá sugerensia di otro persona. Por ehèmpel, Yehova a permití su Yu yud’é krea tur kos. (Pro. 8:27-30; Kol. 1:15, 16) I apesar ku Yehova ta todopoderoso, e ta delegá outoridat na otro persona. Por ehèmpel, el a nombra Hesus komo Rei di e Reino, i lo E duna e 144.000 personanan ku lo goberná ku Hesus un sierto grado di outoridat. (Luk. 12:32) Ta klaru ku Yehova a entrená Hesus pa bira Rei i Sumo Saserdote. (Heb. 5:8, 9) E ta entrená tambe esnan ku lo goberná ku Hesus. Pero, lo e no purba di kontrolá delaster un detaye  di e manera ku nan lo kumpli ku nan trabou. Al kontrario, e ta konfia ku nan lo hasi su boluntat.—Rev. 5:10.

6-7. Kon kabes di famia, ansiano i mayornan por imitá Yehova?

⁶ Si Yehova, kende no mester di yudansa di niun persona, ta delegá outoridat na otro persona, kuantu mas nos mester hasi meskos! Por ehèmpel, kon abo komo kabes di famia òf ansiano den kongregashon por imitá Yehova? Esei ta di delegá tarea na otro hende, i no purba di kontrolá delaster un detaye di e manera ku nan ta hasi e trabou. Si bo imitá Yehova, no solamente lo bo tin goso di mira e trabou keda kla, sino tambe lo bo yuda otronan haña mas konfiansa ku nan por tin éksito ku yudansa di Yehova. (Isa. 41:10) Pero, kiko mas hende ku tin un grado di outoridat por siña for di Yehova?

⁷ Beibel ta mustra ku Yehova ta interesá den opinion di e angelnan. (1 Rei. 22:19-22) Mayornan, kon boso por imitá Yehova den esei? Ora ta apropiá, puntra boso yunan kon nan lo hasi sierto tarea. I si nan sugerensia ta bon, laga nan hasié asina.

8. Kon Yehova a tene pasenshi ku Abraham ku Sara?

⁸ Un otro manera ku Yehova ta demostrá humildat ta di tene pasenshi. Por ehèmpel, Yehova ta tene pasenshi ora su sirbidónan, na un manera respetuoso, ta kuestioná su desishon. Kòrda kon el a skucha ora Abraham a ekspresá su duda enkuanto destrukshon di Sódoma i Gomora. (Gén. 18:22-33) I no lubidá kon Yehova a reakshoná ora Sara, esposa di Abraham, a hari ora el a skucha ku lo el a sali na estado siendo di edat avansá. En bes di bira ofendí òf rabiá, el a trata Sara ku dignidat.—Gén. 18:10-14.

9. Kon mayor i ansiano por imitá ehèmpel di Yehova?

⁹ Si bo ta un mayor òf un ansiano, kiko bo por siña for di ehèmpel di Yehova? Pensa riba kon bo ta reakshoná ora bo yunan òf algun ruman den kongregashon kuestioná bo desishonnan. Bo ta kla pa korigí nan? Òf bo ta purba di komprondé nan punto di bista? Ora ruman ku tin outoridat ta humilde meskos ku Yehova, nan famia i kongregashon ta benefisiá. Te asina leu, nos a analisá loke nos por siña tokante humildat for di ehèmpel di Yehova. Awor laga nos analisá kiko nos por siña tokante humildat for di e ehèmpelnan ku tin den Beibel.

10. Kon Yehova ta siña nos?

¹⁰ Yehova ta nos Magnífiko Instruktor, i el a perkurá algun ehèmpel den Beibel pa nos siña for di dje. (Isa. 30:20, 21) Den Beibel, nos ta haña relato di hende ku tabatin hopi kualidat ku a agradá Dios. Pero, tambe tin relato di hende ku no a demostrá e kualidatnan ei. Ora nos meditá riba e relatonan ei, nos ta siña hopi.—Sal. 37:37; 1 Kor. 10:11.

11. Kiko nos ta siña for di ehèmpel di Saul?

¹¹ Pensa riba loke a pasa ku Rei Saul. Ora e tabata hóben, e tabata konsiente di su limitashonnan. El a asta vasilá pa aseptá mas responsabilidat. (1 Sam. 9:21; 10:20-22) Pero djis despues ku el a bira rei, el a bira arogante i a hasi kos ku e no tabatin derecho di hasi. Na un okashon, el a pèrdè pasenshi segun ku e tabata  warda riba Profeta Samuel. En bes di konfia ku Yehova lo a yuda Su pueblo, Saul a ofresé un ofrenda kimá aunke e no tabata esun outorisá pa hasi esei. Komo resultado, el a pèrdè Yehova su aprobashon i mas despues Yehova a rechas’é komo rei. (1 Sam. 13:8-14) Ta bon pa nos siña for di ehèmpel ei i evitá di hasi kos ku nos no tin derecho di hasi.

12. Dikon Daniel tabata un bon ehèmpel?

¹² Na kontraste ku Saul, Profeta Daniel sí a laga un bon ehèmpel pa nos. Durante henter su bida, el a keda humilde i semper a pidi Yehova pa guia. Por ehèmpel, ora Yehova a us’é pa splika e soño di Nabukodonosor, e no a tuma e krédito pa su mes. Mas bien, el a duna tur gloria i krédito na Yehova. (Dan. 2:26-28) Kiko nos ta siña for di esei? Si e rumannan ta gusta skucha nos diskursonan òf si nos tin éksito den sirbishi, nos mester kòrda duna tur gloria na Yehova. Nos mester rekonosé ku nos no por a hasi niun di e kosnan ei sin yudansa di Yehova. (Flp. 4:13) Ora nos tin un aktitut asina, nos ta imitando Hesus su bon ehèmpel tambe. Kon asina?

13. Kiko nos ta siña for di Hesus di akuerdo ku Huan 5:19 i 30?

¹³ Aunke Hesus tabata e Yu perfekto di Dios, e tabata sa ku e tabatin mester di Yehova. (Lesa Huan 5:19, 30.) Nunka el a purba di kita outoridat di su Tata selestial. Filipensenan 2:6 ta bisa nos ku Hesus “no a pensa mes ku e mester a gara un puesto, esta, ku lo e mester tabata igual ku Dios.” Komo un Yu sumiso, Hesus a komprondé te na unda su limitashonnan a yega i a respetá outoridat di su Tata.

14. Kon Hesus a reakshoná ora el a ser pidí pa hasi algu ku e no tabata outorisá pa hasi?

¹⁴ Pensa riba kon Hesus a reakshoná ora e disipelnan Santiago i Huan huntu ku nan mama a pidié pa un privilegio ku e no tabata outorisá pa duna. Mesora Hesus a bisa ku ta solamente su Tata Selestial por disidí ken lo sinta na Hesus su man drechi i na su man robes den e Reino. (Mat. 20:20-23) Hesus a demostrá ku e ta respetá su limitashonnan. Nunka  el a hasi algu ku Yehova no a outoris’é pa hasi. (Huan 12:49) Kon nos por imitá e bon ehèmpel di Hesus?

15-16. Kon nos por apliká e konseho na 1 Korintionan 4:6?

¹⁵ Nos por imitá ehèmpel di Hesus ora nos ta obedesé e konseho na 1 Korintionan 4:6: “No bai mas leu di loke ta pará skirbí.” Pues, ora un hende pidi nos konseho, nunka nos lo no ke duna nos mes opinion ni sea muchu lihé pa duna konseho. Mas bien, nos mester dirigí atenshon na e konsehonan ku tin den Beibel i den nos publikashonnan. Di e manera ei, nos ta rekonosé ku nos no sa tur kos. Ora nos hasi esei nos ta humilde pasobra nos ta rekonosé ku Yehova su konseho semper ta mihó ku esun di nos.—Rev. 15:3, 4.

¹⁶ Ora nos ta humilde, nos ta onra Yehova. Pero tin mas bon motibu pa demostrá e kualidat ei. Laga nos wak awor kon humildat por hasi nos felis i yuda nos bai bon ku otro hende.

17. Dikon hende humilde ta felis?

¹⁷ Si nos ta humilde, nos lo ta mas felis. Dikon? Pasobra ora nos ta konsiente di nos limitashonnan, nos lo ta gradisidu pa kualke yudansa ku nos ta haña di otro persona. Pensa riba e dies leprosonan ku Hesus a kura. Ta un di nan so a bolbe pa gradisí Hesus pa kur’é di e malesa teribel ei. E hòmber humilde ei tabata sa ku nunka e por a kura sin yudansa di Hesus, pues e tabata masha gradisidu i a duna gloria na Dios.—Luk. 17:11-19.

18. Kon humildat por yuda nos bai bon ku otro hende? (Romanonan 12:10)

¹⁸ Por lo general, hende humilde ta bai  bon ku otro hende i nan ta será ku nan amigunan. Dikon? Pasobra nan ta rekonosé ku otro hende tin bon kualidat, i nan ta konfia nan. Ademas, hende humilde ta kontentu ora otro hende tin éksito den nan asignashon i ta lihé pa elogiá i onra nan.—Lesa Romanonan 12:10.

19. Dikon nos mester evitá di ta orguyoso?

¹⁹ Pero, hende orguyoso ta totalmente diferente. Pa nan, ta difísil elogiá otro hende; nan ta preferá di risibí elogio. Nan tin tendensia di kompará nan mes ku otro hende i ta purba di ta mihó ku otro hende. En bes di entrená otronan i delegá outoridat, nan ta pensa: ‘Si bo ke pa un kos sali bon’—manera nan ke—‘ta bo mes mester hasié.’ Ademas, hopi biaha nan ke ta mas importante ku otronan i ta yalurs ora otro hende hasi algu mihó ku nan. (Gal. 5:26) Hende asina kasi nunka tin amistat duradero. Pues, si nos ripará ku nos ta orguyoso, nos mester roga Yehova pa yuda nos ‘renobá nos mente’ pa asina e mal kualidat ei no bira parti di nos personalidat.—Rom. 12:2.

20. Dikon nos mester ta humilde?

²⁰ Nos ta masha gradisidu pa Yehova su ehèmpel di humildat. Nos ta mira su humildat den e manera ku e ta trata su sirbidónan, i nos ke imit’é. Ademas, nos ke imitá e bon ehèmpelnan den Beibel di hende ku a sirbi Yehova humildemente. Laga nos semper duna Yehova e onor i gloria ku e meresé. (Rev. 4:11) Si nos hasi tur esei, pa semper nos por ta su amigu, pasobra e ta stima hende humilde.