1-2. (a) Dikon Armagedon ta bon notisia pa humanidat? (b) Ki pregunta nos lo kontestá den e artíkulo akí?

“ARMAGEDON.” Ora algun hende tende e palabra ei, nan ta pensa riba un guera nuklear òf un desaster natural. Pero, loke Beibel ta bisa tokante Armagedon en realidat ta bon notisia; algu ku ta hasi nos felis! (Rev. 1:3) Durante e guera di Armagedon, Dios lo no destruí humanidat; al kontrario, lo e salba humanidat. Kon asina?

² Beibel ta mustra ku e guera di Armagedon lo kaba ku gobièrnu humano, destruí hende malbado i protehá bida di hende hustu i lo evitá ku hende lo kaba ku e tera. (Rev. 11:18) Pa komprondé e puntonan ei mihó, nos lo kontestá kuater pregunta: Kiko Armagedon ta? Ki suseso lo hiba na dje? Kiko nos tin ku hasi pa sobrebibí? I kon nos por keda fiel segun ku e ta yega serka?

3. (a) Kiko e palabra “Armagedon” ta nifiká? (b) Segun Revelashon 16:14 i 16, dikon nos por bisa ku Armagedon no ta un lugá literal?

³ Lesa Revelashon 16:14, 16. E palabra “Armagedon” ta aparesé un biaha so den Beibel. E ta bini di un palabra hebreo ku ta nifiká “Seru di Megido.” (Rev. 16:16; nota) Megido, òf Meguido, tabata un stat den antiguo Israel. (Hos. 17:11) Pero, Armagedon no ta referí na niun lugá literal riba tera. Bon mirá, e ta referí na e situashon unda “e reinan di henter e tera habitá” ta reuní kontra Yehova. (Rev. 16:14) Pero, den e artíkulo akí, lo usa e palabra “Armagedon” tambe pa referí na e guera ku ta bini mesora despues di e reunimentu di e reinan di e tera. Kon nos por sa ku Armagedon ta referí na un lugá simbóliko? Pa di promé, no ta eksistí un seru ku yama Megido. Di dos, e área Megido ta muchu chikitu pa karga “e reinan di henter  e tera habitá” i nan ehérsito- i armanan. Di tres, manera nos lo mira den e artíkulo akí, e guera di Armagedon lo kuminsá ora “e reinan” di mundu ataká e pueblo di Dios ku lo ta plamá rònt mundu.

4. Dikon Dios a konektá e gran guera final ku Megido?

⁴ Dikon Yehova a konektá e gran guera final ku Megido? Den tempu di Beibel, tantu Megido komo e área serka di e Vaye di Jezreel tabata esenario di hopi bataya. Tin biaha, Yehova a intervení direktamente den nan. Por ehèmpel, “banda di e awanan di Meguido,” Dios a yuda e hues israelita Barak derotá un ehérsito kananeo dirigí pa e komandante Sísara. Barak i e profeta Débora a gradisí Yehova pa nan viktoria milagroso. Nan a kanta: “For di shelu e streanan tabata bringa . . . kontra Sísara. Riu Kison a lastra nan bai kuné.”—Hues. 5:19-21.

5. Ki diferensia grandi tin entre e guera di Armagedon i e bataya ku Barak a bringa?

⁵ Barak i Débora a terminá nan kantika ku e palabranan: “Asina tur bo enemigunan lo keda destruí, SEÑOR, pero esnan ku stima Bo lo bria manera solo ku ta subi den tur su splendor.” (Hues. 5:31, BPK) Na Armagedon, e enemigunan di Dios tambe lo muri i esnan ku ta stima Dios lo salba. Pero, tin un diferensia grandi entre Armagedon i e bataya ku Barak a bringa. Na Armagedon, Dios su pueblo lo no tin ku bringa. Ni arma nan lo no tin! Nan “forsa ta sintá den keda kalmu i konfia den” Yehova i su ehérsito selestial.—Isa. 30:15, BPK; Rev. 19:11-15.

6. Ki método Yehova por usa pa destruí su enemigunan na Armagedon?

⁶ Kon Dios lo destruí su enemigunan na Armagedon? E por usa diferente método. Por ehèmpel, e por usa temblor, hagel i werlek. (Yòb 38:22, 23; Eze. 38:19-22) E por pone su enemigunan bringa kontra otro. (2 Kró. 20:17, 22, 23) I e por usa su angelnan pa mata e malbadonan. (Isa. 37:36) No ta importá ki método Dios usa, su viktoria lo ta sigur. Tur su enemigunan lo ser destruí, pero tur hende hustu lo salba.—Pro. 3:25, 26.

7-8. (a) Segun 1 Tesalonisensenan 5:1-6, ki proklamashon straño e lidernan polítiko lo hasi? (b) Dikon esei lo ta un mentira peligroso?

⁷ E proklamashon di “pas i siguridat” lo tuma lugá promé ku “e dia di Yehova.” (Lesa 1 Tesalonisensenan 5:1-6.) Na 1 Tesalonisensenan 5:2, “e dia di Yehova” ta referí na “e tribulashon grandi.” (Rev. 7:14) Kon nos por haña sa ki ora e tribulashon lo kuminsá? Beibel ta bisa ku lo bai tin un proklamashon masha straño ku lo indiká esei.

⁸ E lidernan polítiko lo bisa ku tin “pas i siguridat.” Dikon nan lo bisa esei? Nos no sa. E lidernan religioso tambe lo djòin nan? Kisas. No opstante, e proklamashon ei lo ta un otro mentira inspirá pa demoño. Pero, e mentira ei ta sumamente peligroso pasobra lo e duna hende un sentido falsu di siguridat djis promé ku e tribulashon di mas grandi den historia humano kuminsá. Sí, “diripiente destrukshon lo bini riba nan instantáneamente, meskos ku doló di parto di un muhé na estado.” I kiko lo pasa ku Yehova su sirbidónan leal? Debí ku nan no sa eksaktamente na ki momento e tribulashon grandi lo kuminsá, nan lo por keda  sorprendí ora esei pasa, pero lo e no kohe nan for di base.

9. Den ki dos fase Yehova lo destruí e mundu di Satanas?

⁹ Den tempu di Noe, Yehova a kaba ku e mundu malbado ei den un tiru. Pero, ku e mundu di Satanas, lo e hasi algu diferente: lo e destruyé den dos fase. Promé, lo e destruí Babilonia e Grandi, esta, tur religion falsu. Despues, na Armagedon, lo e destruí e sobrá di Satanas su mundu, inkluso e sistema polítiko, militar i komersial. Laga nos analisá e dos fasenan ei mas djaserka.

10. Segun Revelashon 17:1 i 6 i 18:24, dikon Yehova lo destruí religion falsu?

¹⁰ “E huisio riba e gran prostituta.” (Lesa Revelashon 17:1, 6; 18:24.) Religion falsu a daña Dios su reputashon, siñando hende mentira tokante Dios. Meskos ku un prostituta, religion falsu tabata infiel na Yehova apoyando gobièrnu humano. Religion falsu a oprimí su mes miembronan pa kita nan plaka for di nan i a drama hopi sanger, inkluso sanger di algun sirbidó di Dios. (Rev. 19:2) Kon Yehova lo destruí Babilonia e Grandi?

11. Kiko e “bestia salbahe koló kòrá bibu” ta, i kon Dios lo us’é kontra Babilonia e Grandi?

¹¹ Pa destruí “e gran prostituta,” Yehova lo usa “e dies kachunan” di “un bestia salbahe koló kòrá bibu.” E bestia salbahe ei ta representá Nashonnan Uní. E dies kachunan ta representá e gobièrnunan ku ta apoyá Nashonnan Uní. Na Dios su tempu stipulá, gobièrnu humano i Nashonnan Uní lo ataká Babilonia e Grandi. “Nan lo kita tur kos for di dje [i] kit’é sunú,” nan lo plùnder su rikesa i saka tur su maldat na kla. (Rev. 17:3, 16) E destrukshon lihé ei di Babilonia e Grandi lo tuma lugá, komo si fuera den un dia, i lo bini manera baño di awa friu riba hende ku ta apoy’é. Al fin i al kabo, Babilonia  tin hopi tempu ta broma: “Mi ta sintá manera un reina riba un trono, i mi no ta biuda i hamas lo mi mira tristesa.”—Rev. 18:7, 8. 

12. Kiko Yehova lo no permití e nashonnan hasi, i dikon nò?

¹² Dios lo no permití e nashonnan destruí su pueblo. Ku orguyo su pueblo ta karga su nòmber i a obedesé su mandamentu pa hui for di Babilonia e Grandi. (Echo. 15:16, 17; Rev. 18:4) Ademas, nan a traha duru pa yuda otro hende hui for di dje. Pues, Yehova su sirbidónan lo no ‘risibí parti di e plaganan’ ku lo bini riba Babilonia e Grandi. Pero, nan fe lo ser poné na prueba.

13. (a) Ken Gòg ta? (b) Segun Ezekiel 38:2, 8 i 9, na ki momento Gòg lo yega na e lugá simbóliko ku yama Armagedon?

¹³ E atake di Gòg. (Lesa Ezekiel 38:2, 8, 9.) Despues ku destruí religion falsu, lo tin solamente un religion riba tera; e pueblo di Dios lo ta manera un palu ku a sobrebibí un tempestat teribel. Lo ta di imaginá ku Satanas lo ta masha furioso. Lo e manifestá su rabia usando “palabra inspirá impuru,” esta, informashon falsu for di demoño. Pa motibu di e informashon ei, un grupo di nashon lo ataká e pueblo di Dios. (Rev. 16:13, 14) E grupo di nashon ei yama “Gòg di tera di Magòg.” Na momento ku e nashonnan ataká e pueblo di Dios, nan lo yega na e lugá simbóliko ku yama Armagedon.—Rev. 16:16.

14. Kiko Gòg lo realisá?

¹⁴ Gòg lo konfia den su “brasa di karni,” esta, su forsa militar. (2 Kró. 32:8) Nos lo konfia den Yehova, nos Dios. Esei lo parse algu bobo den bista di e nashonnan. Al fin i al kabo, e diosnan di Babilonia e Grandi, ku tabata asina poderoso, no por a salb’é for di “e bestia salbahe” i su “dies kachunan”! (Rev. 17:16) Pues, Gòg lo pensa ku lo ta fásil pa destruí nos.  “Manera un nubia ku ta tapa tera,” lo e ataká Yehova su pueblo. (Eze. 38:16) Pero, lo no tarda hopi ku Gòg lo realisá ku el a kai den un trampa. Meskos ku a pasa ku Fárao na Laman Kòrá, Gòg lo bin realisá ku ta kontra Yehova e ta bringa.—Éks. 14:1-4; Eze. 38:3, 4, 18, 21-23.

15. Kiko Kristu lo hasi na e guera di Armagedon?

¹⁵ Kristu i su ehérsito selestial lo defendé e pueblo di Dios i plècha Gòg i su ehérsito. (Rev. 19:11, 14, 15) Pero awor, kiko lo pasa ku Yehova su enemigu prinsipal, Satanas, kende su informashon falsu a hiba e nashonnan na Armagedon? Hesus lo benta Satanas i su demoñonan den un abismo, unda nan lo keda será pa mil aña.—Rev. 20:1-3.

16. (a) Kon nos por demostrá ku nos “konosé Dios”? (b) Kiko lo pasa na Armagedon ku hende ku konosé Yehova?

¹⁶ Sea ku nos ta resien den e bèrdat òf nò, pa nos sobrebibí Armagedon, nos mester demostrá ku nos “konosé Dios” i ku nos “ta obedesé e bon notisia tokante nos Señor Hesus.” (2 Tes. 1:7-9) Nos “konosé Dios” ora nos sa kiko e ta gusta, kiko e no ta gusta i kiko ta su normanan. Nos ta mustra tambe ku nos konos’é ora nos ta stim’é i ta obedes’é i ta adorá e so. (1 Huan 2:3-5; 5:3) Ora un hende demostrá ku e konosé Dios, e tin e privilegio ku Dios tambe konos’é i pa e motibu ei lo e ser salbá na Armagedon. (1 Kor. 8:3) Dikon? Pasobra ora Dios konosé bo ta nifiká ku bo tin su aprobashon.

17. Kiko ta nifiká “obedesé e bon notisia tokante nos Señor Hesus”?

¹⁷ “E bon notisia tokante nos Señor Hesus” ta inkluí tur e bèrdatnan ku el a siña hende i ku nos ta haña den Beibel. Nos ta obedesé e bon notisia ora nos ta aplik’é den nos bida. Esei ta nifiká ku nos ta pone Yehova su sirbishi na promé lugá den nos bida, obedesé Dios su normanan hustu i prediká e Reino di Dios. (Mat.  6:33; 24:14) Ademas, e ta nifiká ku nos ta apoyá Kristu su rumannan ungí segun ku nan ta hasi e trabou importante di prediká e bon notisia i hasi disipel.—Mat. 25:31-40.

18. Den ki manera Kristu su rumannan ungí lo rekompensá e ‘otro karnénan’?

¹⁸ Pronto, Dios su sirbidónan ungí lo rekompensá e ‘otro karnénan’ pa tur e yudansa ku nan a duna nan. (Huan 10:16) Kon nan lo hasi esei? Promé ku e guera di Armagedon kuminsá, tur e 144.000 personanan ungí lo a haña bida den shelu komo spiritu inmortal. Nan lo forma parti di e ehérsito selestial ku lo plècha Gòg i lo protehá e “multitut grandi” ku lo ta mansu manera karné. (Rev. 2:26, 27; 7:9, 10) Ki un privilegio e multitut grandi lo tin di a apoyá e sirbidónan ungí di Yehova miéntras nan tabata riba tera ainda!

19-20. Apesar di nos pruebanan, kon nos por keda fiel segun ku Armagedon ta yega serka?

¹⁹ Durante e último dianan difísil akí, hopi di nos ta enfrentá prueba. Pero, nos por perseverá ku goso. (Sant. 1:2-4) Algu ku por yuda nos sigui perseverá ta di deshogá nos kurason tur ora bai den orashon. (Luk. 21:36) Ademas, nos mester studia Beibel tur dia i meditá riba loke nos ta siña, inkluso profesia ku pronto lo kumpli. (Sal. 77:12) Na mes momento, nos mester partisipá mas tantu posibel den sirbishi. E kosnan ei lo fortalesé nos fe i mantené nos speransa bibu.

²⁰ Imaginá kon emoshonante lo ta ora Babilonia e Grandi no t’ei mas i Armagedon terminá! Mas importante ainda, imaginá kon dushi lo ta ora Dios su nòmber i soberania ser vindiká! (Eze. 38:23) Sí, Armagedon ta bon notisia pa hende ku konosé Dios, ta obedesé su Yu i ta perseverá te na fin.—Mat. 24:13.