ARTÍKULO DI ESTUDIO 38
“Bini Serka Mi, . . . i Lo Mi Refreská Boso”
“Bini serka mi, boso tur ku ta traha duru i ku ta kargá, i lo mi refreská boso.”—MAT. 11:28.
KANTIKA 17 ‘Mi Ke, Sí’
UN BISTA ADELANTÁ *
1. Segun Mateo 11:28-30, ki promesa Hesus a hasi?
HESUS a hasi un maravioso promesa na un multitut di hende ku tabata skuch’é. El a bisa: “Bini serka mi, . . . i lo mi refreská boso.” (Lesa Mateo 11:28-30.) Esei no tabata un promesa sin base. Por ehèmpel, pensa riba loke el a hasi pa un señora ku tabata sufri di un malesa teribel.
2. Kiko Hesus a hasi pa un señora ku tabata malu?
2 E señora tabata desesperá pa haña yudansa. E tabata sufri pa 12 aña kaba i a bai serka hopi dòkter sperando di haña kura. Pero, niun no por a kur’é. I segun Lei, e tabata impuru. (Lev. 15:25) Pero un dia, el a tende ku Hesus tabata kura hende ku tabata malu, pues el a sali bai busk’é. Ora el a haña Hesus, e señora a mishi ku zòm di su paña, i mesora el a kura! Pero, Hesus no a djis kur’é; el a dun’é su dignidat bèk. Por ehèmpel, Hesus a yam’é “mi yu,” un palabra ku ta indiká amor i rèspèt. Bo por imaginá bo kon aliviá i animá e señora lo a sintié?—Luk. 8:43-48.
3. Ki ta algun pregunta ku nos lo kontestá?
3 Ripará ku ta e señora a tuma inisiativa di bai serka Hesus. Meskos ta konta pa nos awe—ta nos mester hasi esfuerso pa bai serka Hesus. Ta bèrdat ku awe Hesus no ta kura hende malu ku ta “bini serka” dje. Pero, ainda su invitashon di “bini serka mi, . . . i lo mi refreská boso” ta konta. Den e artíkulo akí, nos lo kontestá sinku pregunta:
Kiko nos mester hasi pa bai serka Hesus? Kiko Hesus tabata ke men ora el a bisa: “Tuma mi yugo riba boso”? Kiko nos por siña for di Hesus? Dikon e trabou ku el a duna nos ta refreskante? I kon nos por sigui haña alivio bou di su yugo?“BINI SERKA MI”
4-5. Den ki manera nos por bai serka Hesus?
4 Un manera pa bai serka Hesus ta di siña mas tantu ku nos por tokante loke el a bisa i hasi. (Luk. 1:1-4) Niun hende no por hasi esei pa nos—ta nos mes mester studia e relatonan tokante e bida di Hesus. Un otro kos ku nos por hasi ta di tuma e desishon pa batisá i bira disipel di Hesus.
5 Un otro manera ku nos ta bai serka Hesus ta di pidi e ansianonan yudansa ora ta nesesario. Hesus ta usa “regalo den forma di hende” pa kuida su karnénan. (Efe. 4:7, 8, 11; Huan 21:16; 1 Ped. 5:1-3) Pues, tuma inisiativa i pidi yudansa. Nos no por ferwagt ku nan por lesa nos mente i sa kiko nos tin mester. Un ruman ku yama Julian a konta: “Mi mester a stòp di sirbi na Bètel pa motibu di salú. Un amigu di mi a konsehá mi pa pidi un pastoreo. Na promé instante, mi no a haña ku esei tabata nesesario. Pero, despues mi a pidi yudansa. I e pastoreo ei tabata un di e mihó regalonan ku mi a yega di haña.” Ansiano leal, manera e dos rumannan ku a bishitá Julian, por yuda nos konosé “e mente di Kristu,” esta, komprondé i imitá Hesus su pensamentu i aktitut. (1 Kor. 2:16; 1 Ped. 2:21) Esei ta un di e mihó regalonan ku nan por duna nos!
“TUMA MI YUGO RIBA BOSO”
6. Kiko Hesus kier a bisa ku “tuma mi yugo riba boso”?
6 E palabranan di Hesus “tuma mi yugo riba boso,” kisas ta nifiká “obedesé mi.” Pero, e por a nifiká tambe: “Bini bou di e yugo huntu ku mi, i huntu nos lo traha pa Yehova.” Sea kual sea e kaso, tuma e yugo di Hesus tin di haber ku trabou.
7. Segun Mateo 28:18-20, ki trabou nos a haña, i di kiko nos por tin sigur?
7 Nos ta aseptá Hesus su invitashon ora nos dediká nos bida na Yehova i batisá. Nos tur por hasi esei—Hesus hamas lo rechasá un hende ku realmente ke sirbi Dios. (Huan 6:37, 38) Tur siguidó di Kristu a haña e privilegio di traha huntu ku Hesus den e trabou ku Yehova a dun’é. I nos por tin sigur ku semper Hesus lo ta huntu ku nos pa yuda nos den e trabou.—Lesa Mateo 28:18-20.
“SIÑA DI MI”
Refreská otro hende meskos ku Hesus (Wak paragraf 8-11) *
8-9. Dikon hende humilde tabata gusta di ta rònt di Hesus, i ki pregunta nos mester hasi nos mes?
8 Hende humilde tabata gusta di ta rònt di Hesus. (Mat. 19:13, 14; Luk. 7:37, 38) Dikon? Pensa riba e kontraste entre Hesus i e fariseonan. E lidernan religioso ei tabata sin amor i arogante. (Mat. 12:9-14) Hesus tabata amoroso i humilde. E fariseonan tabata ke haña rekonosementu i a sinti nan orguyoso di ta hende importante. Hesus a siña su disipelnan pa nan ta humilde i pa sirbi otronan. (Mat. 23:2, 6-11) E fariseonan tabata intimidá i hinka miedu den otro hende pa asina dominá nan. (Huan 9:13, 22) Hesus a refreská otro hende ku palabra bondadoso i trato amoroso.
9 Eseinan ta lès balioso ku nos por siña
for di Hesus. Puntra bo mes: ‘Mi ta konosí komo un hende suave i humilde? Mi ta dispuesto pa hasi trabou humilde pa sirbi otro hende? Mi ta trata otro hende bon?10. Ki ambiente Hesus a krea pa su kompañeronan di trabou?
10 Hesus a krea un ambiente pasífiko pa su kompañeronan di trabou, i e tabata gusta entrená nan. (Luk. 10:1, 19-21) El a animá su disipelnan pa hasi pregunta i e tabata ke sa nan opinion. (Mat. 16:13-16) Meskos ku mata ta bona ora e ta plantá den fresku i ta haña protekshon for di solo kayente i bientu fuerte, asina tambe Hesus su disipelnan tabata bona den e ambiente ku el a krea pa nan. Sí, nan a apsorbá e lèsnan ku Hesus tabata siña nan. Komo resultado, nan a produsí fruta, esta, bon obra.
Sea aserkabel i bondadoso
Sea aktivo i zeloso
Sea humilde i trahadó *
11. Ki pregunta nos tin ku hasi nos mes?
11 Si abo tin un sierto grado di outoridat riba otro hende, puntra bo mes: ‘Ki tipo di ambiente mi ta krea na trabou òf na kas? Mi ta un hende ku ta promové pas? Mi ta animá otro hende pa hasi pregunta? Mi ta dispuesto pa skucha nan opinion?’ Hamas nos lo ke ta manera e fariseonan, ku tabata sinti nan ofendí ora otro hende hasi nan pregunta i ku tabata persiguí esnan ku tabatin opinion diferente for di nan.—Mar. 3:1-6; Huan 9:29-34.
BOSO “LO KEDA REFRESKÁ”
12-14. Dikon e trabou ku Hesus a duna nos ta refreskante?
12 Dikon nos por bisa ku e trabou ku Hesus a duna nos ta refreská nos? Tin hopi motibu, pero ban wak djis algun.
13 Nos tin e mihó superintendentenan. Yehova, nos Superintendente Supremo, no ta un doño malagradesí i kruel. E ta balorá e trabou ku nos ta hasi. (Heb. 6:10) I e ta duna nos e forsa ku nos tin mester pa karga nos propio karga di responsabilidat. (2 Kor. 4:7; Gal. 6:5) Hesus, nos Rei, a pone un bon ehèmpel pa nos por sa kon pa trata hende. (Huan 13:15) I e ansianonan ku ta pastoriá nos mester imitá Hesus, “e gran wardadó.” (Heb. 13:20; 1 Ped. 5:2) Segun ku nan ta guia i protehá nos, nan ta hasi esfuerso pa trata nos bon, animá nos i mustra kurashi.
14 Nos tin e mihó koleganan. Niun otro hende no tin mihó kolega i trabou manera nos. Pensa riba esaki: Nos tin e privilegio di traha ku hende ku tin e normanan moral di mas haltu, pero ku no ta pensa ku nan ta mas ku otro hende. Nan tin hopi talento, ma nan ta modesto i ta mira otro hende superior na nan. Nan no ta mira nos solamente komo kolega, sino tambe komo amigu. I e amistat ei ta asina fuerte ku nan ta dispuesto pa duna nan propio bida pa nos!
15. Kiko nos ta pensa di e trabou ku nos ta hasiendo?
15 Nos tin e mihó trabou. Nos ta siña hende e bèrdat tokante Yehova i ta saka na kla e mentiranan di Diabel. (Huan 8:44) Satanas su yugo ta asina pisá ku niun hende no por karg’é, i esei ta laga hende sinti nan mes sin speransa. Por ehèmpel, e ke pa nos kere ku Yehova lo no pordoná nos pikánan i ku niun persona no por stima nos. E mentiranan ei ta horibel i ta kibra hende. E bèrdat ta ku ora nos bai serka Kristu, esta, aseptá su yugo, nos pikánan ta pordoná. I un otro bèrdat ta ku Yehova stima nos masha tantu mes. (Rom. 8:32, 38, 39) P’esei, ta un goso pa yuda otro hende konfia den Yehova i mehorá nan bida!
SIGUI HAÑA ALIVIO BOU DI HESUS SU YUGO
16. Ki diferensia tin entre e karga ku Hesus ta pidi nos karga i e otro karganan ku nos tin?
16 E karga ku Hesus ta pidi nos pa karga ta diferente for di e otro karganan ku nos tin. Hopi hende, despues di un dia di trabou, ta sinti nan kansá, i nan no ta kontentu kon nan dia a bai. Na kontraste, despues di traha un dia pa Yehova i Hesus, nos ta sinti berdadero satisfakshon. Kisas despues di un dia di trabou, nos ta hopi kansá i mester fòrsa nos mes pa bai reunion e anochi ei. Pero, hopi biaha nos ta yega kas bèk animá, refreská i yen di energia. Meskos ta pasa ora nos ta hasi esfuerso pa prediká i hasi estudio personal. E benefisionan ku nos ta risibí ta hopi mas grandi ku e energia ku nos a gasta!
17. Dikon nos mester ta realístiko, i kiko nos mester pensa bon?
17 Nos mester ta realístiko. Kada un di nos mester rekonosé ku nos energia tin límite. Pues, nos mester pensa bon kon nos ta us’é. Por ehèmpel, nos por usa nos energia purbando di akumulá propiedat òf kos material. Un biaha, un hòmber riku a puntra Hesus: “Kiko mi tin ku hasi pa mi haña bida eterno?” E hòmber tabata obedesé Lei kaba. I probablemente e tabata un bon hende pasobra e Evangelio di Marko ta bisa spesífikamente ku Hesus ‘a sinti amor p’e.’ Anto, Hesus a bisa e hòmber: “Bai, bende loke bo tin, . . . i bin sigui mi.” E hòmber riku no tabata sa kiko pa hasi. E kier a sigui Hesus, pero e no tabata kier a bira lomba pa su ‘hopi propiedatnan.’ (Mar. 10:17-22) Komo resultado, e no a aseptá e yugo ku Hesus a ofres’é i el a sigui ta esklabo “di Rikesa.” (Mat. 6:24) Kiko abo lo a hasi?
18. Kiko ta bon pa nos hasi tempu tempu, i dikon?
18 Tempu tempu, ta bon pa nos analisá nos prioridatnan den bida. Dikon? Pasobra asina nos por mira si nos ta usando nos energia na un manera sabí. Un yònkuman ku yama Mark a bisa: “Pa hopi aña mi tabata pensa ku mi estilo di bida tabata simpel. Mi tabata pionero, pero mi tabata gasta hopi tempu i energia purbando di gana plaka pa mi tin un bida mas kómodo. Mi tabata puntra mi mes dikon mi no tabata satisfecho. E ora ei, mi a realisá ku mi tabata enfoká demasiado riba mi propio interes i dunando Yehova djis e tiki tempu i energia ku a sobra.” Mark a kambia su manera di pensa i estilo di bida pa e por a hasi mas den sirbishi di Yehova. Mark a bisa: “Tin biaha, mi ta preokupá tokante plaka, ma ku yudansa di Yehova i apoyo di Hesus, mi ta vense mi desafionan.”
19. Dikon ta importante pa nos mantené e punto di bista korekto?
19 Si nos ke sigui haña alivio bou di Hesus su yugo, nos tin ku hasi tres kos. Promé, mantené e punto di bista korekto. E trabou ku nos ta hasi ta di Yehova, pues nos mester hasié na su manera. Nos ta e trahadónan, i Yehova ta e Doño. (Luk. 17:10) Si nos purba di hasi su trabou na nos manera, esei lo ta meskos ku lucha kontra su yugo. Asta un toro fuerte lo kansa su kurpa i hasi su mes daño si konstantemente e ta purba di bai kaminda e ke i lucha kontra e yugo ku su doño ta kontrolá. Di otro banda, ora nos hasi Yehova su trabou na su manera, e resultadonan lo ta inkreibel. Kòrda: ora Yehova ke pa algu sosodé, niun hende no por strob’é.—Rom. 8:31; 1 Huan 4:4.
20. Kiko mester motivá nos pa karga Hesus su yugo?
20 Di dos, traha ku e motivashon korekto. Nos motivashon mester ta pa duna gloria na nos Tata amoroso, Yehova. E hendenan den tempu di Hesus ku a laga golosidat òf deseo egoista motivá nan, despues a bira infelis i a bandoná Hesus su yugo. (Huan 6:25-27, 51, 60, 66; Flp. 3:18, 19) Na kontraste, esnan ku a laga amor inegoista pa Dios i pa próhimo motivá nan, gustosamente a karga e yugo di Hesus durante henter nan bida riba tera, i nan a haña e speransa pa sirbi huntu ku Kristu den shelu. Nos tambe lo traha ku goso ora nos ta karga e yugo di Hesus ku e motivashon korekto.
21. Segun Mateo 6:31-33, kiko nos sa ku Yehova lo hasi?
21 Di tres, sa ku Yehova t’ei pa nos. Nos a skohe pa hiba un bida di sakrifisio propio i trabou duru. Hesus a asta bisa ku hende lo persiguí nos. Ma, nos sa ku Yehova lo duna nos e forsa nesesario pa perseverá, sin importá e difikultat. Mas nos perseverá, mas nos lo kultivá e kualidatnan ku ta yuda nos trata ku difikultat. (Sant. 1:2-4) Nos sa tambe ku Yehova lo perkurá pa nos nesesidatnan, ku Hesus lo pastoriá nos i ku nos rumannan lo animá nos. (Lesa Mateo 6:31-33; Huan 10:14; 1 Tes. 5:11) Sin duda, nos tin tur loke nos mester pa perseverá!
22. Di kiko nos por ta kontentu?
22 E señora ku Hesus a kura a haña alivio riba e mesun dia. Pero, lo el a haña un alivio permanente solamente si el a bira un disipel leal di Kristu. Ki desishon bo ta kere el a tuma? Si el a skohe pa bai bou di e yugo di Hesus, imaginá e rekompensa ku lo el a haña: sirbi huntu ku Hesus den shelu! Kualke sakrifisio ku e señora ei lo a hasi pa sigui Kristu no ta di kompará ku e bendishon ei. Sea kual sea nos speransa—biba pa semper den shelu òf riba tera—nos por ta masha kontentu ku nos a aseptá e invitashon ku Hesus a hasi: “Bini serka mi!”
KANTIKA 13 Kristu, Nos Ehèmpel
^ par. 5 Hesus ta invitá nos pa bini serka dje. Kiko nos tin ku hasi pa mustra ku nos ta aseptá su invitashon? E artíkulo akí lo kontestá e pregunta ei i lo yuda nos kòrda ku si nos traha huntu ku Kristu, nos lo ser refreská.