E versíkulo interesante ei ta bisa: “Si bo mira opreshon di pobernan i pervershon di hustisia i rektitut den un provinsia, no laga loke bo mira straña bo; pasobra un ofisial ta vigilá otro ofisial, i tin ofisialnan mas haltu riba nan.”—Ekl. 5:8.

For di punto di bista humano, e versíkulo ei ta deskribí hende ku tin outoridat den gobièrnu. Pero, e versíkulo ei tambe ta siña nos un bèrdat tokante Yehova ku por konsolá i sigurá nos.

Eklesiástes 5:8 ta referí na un gobernante ku ta oprimí hende pober i ku ta inhustu. E gobernante ei mester kòrda ku probablemente tin un persona ku un funshon mas haltu òf ku mas outoridat kuné ku ta vigil’é. I por tin otro persona ku tin posishon aun mas haltu. Lamentablemente, tur gobernante humano por ta korupto, i e pueblo ta sufri debí na tur e korupshon ei.

Pero sin importá kon malu e situashon por parse, ta un konsuelo pa sa ku Yehova ta ‘vigilá asta e ofisialnan haltu’ den gobièrnu humano. Nos por roga Yehova pa yudansa i tira nos karga riba dje. (Sal. 55:22; Flp. 4:6, 7) Nos sa ku “wowo di SEÑOR ta move bai bini dor di henter tera, pa e por sostené fuertemente esnan ku nan kurason ta kompletamente di dje.”—2 Kró. 16:9.

Pues Eklesiástes 5:8, ta laga nos pensa riba e mundu den kua nos ta biba; semper tin un persona ku mas outoridat. Pero mas importante ainda, e versíkulo ei ta kòrda nos ku Yehova tin e outoridat di mas haltu, sí, Outoridat Supremo. Aktualmente, e ta gobernando mediante su Yu, Hesukristu, ku ta Rei di e Reino. E Todopoderoso, ku ta wak tur kos, ta kompletamente hustu, i su Yu tambe.