1-3. (a) Dikon Yehova tabata stima Sálomon, i ki bendishon Sálomon a haña? (b) Ki ta e preguntanan ku nos lo kontestá den e artíkulo akí?

SÁLOMON tabata hopi yòn ora el a bira rei. Na komienso di Sálomon su reinado, Yehova a aparesé na dje den un soño i a bis’é: “Pidi loke bo ke pa mi duna bo.” Sálomon a kontestá: “Mi ta un mucha chikitu; mi no sa kon pa sali ni kon pa drenta. . . . Asina, duna bo sirbidó un kurason di komprondementu pa husga bo pueblo.” (1 Rei. 3:5-10) Sálomon a pidi pa “un kurason di komprondementu.” Esei tabata un petishon masha humilde! Nos por komprondé dikon Yehova tabata stima Sálomon! (2 Sam. 12:24) E kontesta ei a hasi Yehova asina kontentu ku el a duna Sálomon “un kurason sabí i ku disernimentu.”​—1 Rei. 3:12.

² Tanten ku Sálomon a keda fiel na Yehova, el a disfrutá di hopi bendishon. Por ehèmpel, e tabatin e onor di konstruí e tèmpel “pa e nòmber di SEÑOR.” (1 Rei. 8:20) E sabiduria ku Dios a dun’é a pone ku el a bira famoso. I bou di inspirashon di Dios, el a skirbí tres buki di Beibel, entre otro, e buki di Proverbionan.

³ E buki di Proverbionan ta menshoná e palabra “kurason” mas o ménos ochenta biaha. Por ehèmpel, Proverbionan 4:23 ta bisa: “Warda [òf, “protehá,” NW] bo kurason riba tur kos.” Kiko e palabra “kurason” ta referí na dje den e versíkulo akí? Nos lo haña kontesta pa e pregunta ei den e artíkulo akí. Ademas, nos lo kontestá dos otro pregunta importante: Kon Satanas ta purba di korumpí nos kurason? I kiko nos tin ku hasi pa protehá nos kurason? E preguntanan akí  ta masha importante. Pa nos por keda fiel na Yehova, nos tin ku komprondé e kontestanan.

4-5. (a) Kiko e palabra “kurason” na Proverbionan 4:23 ta referí na dje? (b) Kon e ehèmpel di nos salú físiko por yuda nos komprondé kon importante e persona ku nos ta di paden ta?

⁴ Na Proverbionan 4:23, e palabra “kurason” ta referí na e persona ku nos ta di paden. Ku otro palabra, “kurason” ta referí na nos pensamentu, sintimentu, motivashon i deseo. Pues, e ta referí na ken nos realmente ta di paden i no solamente na ken nos ta parse di ta di pafó.

⁵ Kuida e persona ku nos ta di paden ta similar na kuida nos salú físiko. Por ehèmpel, si nos ke ta saludabel, nos tin ku kome kuminda saludabel i hasi ehersisio regularmente. Di mes manera, si nos ke ta saludabel den sentido spiritual, nos mester tin un dieta spiritual, esta, lesa Beibel i publikashon basá riba Beibel regularmente. Ademas, nos tin ku hasi ehersisio spiritual, esta, demostrá ku nos tin fe den Yehova. Nos ta demostrá nos fe den Yehova ora nos ta apliká loke nos ta siña i papia tokante nos fe. (Rom. 10:8-10; Sant. 2:26) Di otro banda, si nos konsentrá solamente riba nos aparensia, òf e persona ku nos ta di pafó, nos por pensa ku nos ta saludabel aunke ku nos por ta malu di paden. Asina tambe, si nos enfoká solamente riba nos aktividatnan teokrátiko, nos por pensa ku nos fe ta fuerte, pero kisas nos tin mal deseo ta krese den nos kurason. (1 Kor. 10:12; Sant. 1:14, 15) Nos tin ku kòrda ku Satanas ke pa nos pensa manera e ta pensa. Kon Satanas ta purba di hasi esei? I kon nos por protehá nos mes?

6. Kiko ta Satanas su meta, i kon e ta purba di logr’é?

⁶ Satanas ta un rebelde egoista ku ta desobedesé e norma- i prinsipionan di Yehova, i e ke pa nos pensa i hasi meskos kuné. Awor, komo ku Satanas no por obligá nos hasi esei, e ta purba di logra su meta na otro manera. Por ehèmpel, e ta rondoná nos ku hende ku el a logra korumpí kaba. (1 Huan 5:19) E ke pa nos skohe pa pasa  tempu ku nan, aunke nos sa ku mal kompania ta “daña” òf korumpí nos pensamentu- i echonan. (1 Kor. 15:33) E strategia ei a funshoná ku Rei Sálomon. Sálomon a kasa ku hopi hende muhé ku no tabata sirbi Yehova. Sálomon su esposanan tabatin hopi influensia riba dje i poko poko nan “a hasi su kurason desviá” for di Yehova.​—1 Rei. 11:3.

7. Kiko mas Satanas ta usa pa influensiá hende su manera di pensa, i dikon nos mester tene kuidou ku e strategia ei?

⁷ Satanas ta usa pelíkula i programa di televishon pa purba di pone hende pensa meskos kuné. Satanas sa ku e historianan ku pelíkula i programa di televishon ta presentá ta hasi hopi mas ku djis entretené nos; nan ta influensiá nos manera di pensa, sinti i komportá nos mes. Hesus mes a usa e método di konta historia pa siña hende. Por ehèmpel, el a siña hende usando e ilustrashon di e bon samaritano i di e hóben ku a bai for di kas i malgastá tur su herensia. (Mat. 13:34; Luk. 10:29-37; 15:11-32) Sinembargo, Satanas a logra korumpí e manera di pensa di vários hende i nan tambe por usa e método akí pa korumpí nos manera di pensa. Pues, nos mester tene kuidou. Klaru, tin pelíkula i programa di televishon ku por entretené i eduká nos sin kontaminá nos manera di pensa. P’esei, nos mester ta rasonabel. Ora nos ta bai skohe kiko pa wak, nos mester puntra nos mes: ‘E pelíkula òf programa akí ta siña mi ku no tin nada malu den satisfasé mi deseonan karnal?’ (Gal. 5:19-21; Efe. 2:1-3) Kiko nos tin ku hasi si nos ripará ku un programa di televishon ta promové Satanas su manera di pensa? Nos tin ku evit’é meskos ku nos lo ke evitá di pega ku un malesa kontagioso!

8. Kon mayornan por yuda nan yunan protehá nan kurason?

⁸ Mayornan, boso tin un responsabilidat grandi pa protehá boso yunan kontra Satanas su intentonan pa korumpí nan kurason.  Sin duda, boso lo hasi tur loke boso por pa evitá ku boso yunan ta pega ku kualke malesa. P’esei, boso ta tene boso kas limpi i boso ta benta tur kos afó ku por hasi boso yunan malu. Di mes manera, boso mester protehá boso yunan kontra pelíkula, programa di televishon, wega elektróniko i website ku lo por kontaminá nan ku Satanas su manera di pensa. Yehova a duna boso e outoridat pa protehá e salú spiritual di boso yunan. (Pro. 1:8; Efe. 6:1, 4) Pues, no tene miedu di pone regla basá riba Beibel pa bo famia. Bisa boso yunan chikitu loke nan por i loke nan no por wak, i yuda nan komprondé e motibunan tras di boso desishonnan. (Mat. 5:37) Segun ku boso yunan ta krese, siña nan diserní pa nan mes, a base di Yehova su prinsipio- i normanan, loke ta bon i loke ta malu. (Heb. 5:14) I kòrda ku boso yunan lo siña hopi for di loke boso ta bisa, pero nan lo siña mas ainda for di loke boso ta hasi.​—Deu. 6:6, 7; Rom. 2:21.

9. Kiko ta un idea ku Satanas ta promové i dikon e ta peligroso?

⁹ Un otro manera ku Satanas ta purba di korumpí nos kurason ta di purba di pone nos konfia den sabiduria humano en bes di konfia den Yehova su manera di pensa. (Kol. 2:8) Laga nos analisá un idea ku Satanas ta promové. Satanas ke pa nos pensa ku bira riku mester ta nos meta prinsipal den bida. Hende ku ta pensa asina kisas ta bira riku, pero nan por keda sin bira riku tambe. Sea ku nan bira riku òf nò, hende ku ta pensa asina ta den peliger. Dikon? Pasobra nan ta enfoká asina tantu riba plaka ku nan ta dispuesto di sakrifiká nan salú, relashon ku famia i asta nan amistat ku Dios pa nan por logra nan meta. (1 Tim. 6:10) Nos mester ta gradisidu ku nos Tata selestial ta yuda nos tin un punto di bista balansá tokante plaka.​—Ekl. 7:12; Luk. 12:15.

10-11. (a) Kiko nos mester por hasi pa protehá nos mes? (b) Kiko un vigilante tabata hasi den antigwedat, i kon nos konsenshi por fungi manera un vigilante?

¹⁰ Pa nos por protehá nos kurason, nos mester por identifiká peliger i reakshoná mesora pa protehá nos mes. E palabranan di Proverbionan 4:23 ta kòrda nos di e trabou di un vigilante den tempu di Rei Sálomon. E vigilantenan akí tabata para riba muraya di e stat i si nan a mira señal di peliger, nan mester a bati alarma. E ehèmpel akí ta yuda nos komprondé kiko nos tin ku hasi pa stòp Satanas di korumpí nos pensamentunan.

¹¹ Den antigwedat, un vigilante tabata traha huntu ku e pòrtir di e stat. (2 Sam. 18:24-26) Huntu nan tabata protehá e stat; nan mester a hasi sigur ku e portanan tabata será ora un enemigu tabata aserkando. (Neh. 7:1-3) Di mes manera, si nos konsenshi * ta bíblikamente entrená, lo e fungi komo un vigilante i bati alarma ora Satanas purba di invadí nos kurason, esta, ora e purba di influensiá nos pensamentu, sintimentu, motivashon òf deseo. Pues, ora nos konsenshi bati alarma, na moda di papia, nos tin ku skucha i sera e porta.

12-13. Ki tentashon nos por haña nos kuné, pero kiko nos tin ku hasi?

¹² Laga nos trata un ehèmpel ku ta mustra kon nos por protehá nos mes kontra influensia di Satanas. Yehova a siña nos ku  nos no mester menshoná fornikashon ni ningun sorto di impuresa meimei di nos. (Efe. 5:3) Pero, kiko nos lo hasi si mucha na skol òf kolega di trabou kuminsá papia di un tópiko inmoral ku nos? Nos sa ku nos mester “rechasá tur loke ta kontra boluntat di Dios i tambe deseonan mundano.” (Tito 2:12) Kisas, e vigilante, nos konsenshi, ta bati alarma. (Rom. 2:15) Kiko nos lo hasi? Nos lo hasi kaso di nos konsenshi? Kisas nos ta haña gana di skucha e kòmbersashon òf wak e potrètnan ku nan ta mustrando. Pero, ta e ora ei ta momento pa, na moda di papia, sera e portanan di e stat, esta, kambia e kòmbersashon òf kana bai.

¹³ Nos mester tin kurashi pa resistí preshon ku nos pareunan ta pone riba nos pa pensa òf hasi loke ta robes. Nos por tin sigur ku Yehova ta mira tur esfuerso ku nos ta hasi pa resistí Satanas su manera di pensa i ku lo e duna nos e forsa i sabiduria nesesario pa hasi esei. (2 Kró. 16:9; Isa. 40:29; Sant. 1:5) Pero, kiko mas nos por hasi pa protehá nos kurason?

14-15. (a) Kiko nos tin ku laga influensiá nos, i kon nos por hasi esei? (b) Kon Proverbionan 4:20-22 por yuda nos benefisiá mas di nos lesamentu di Beibel? (Wak tambe e kuadro “ Kon Bo Por Meditá?”)

¹⁴ Pa protehá nos kurason, nos no por djis rechasá mal influensia; nos tin ku aseptá influensia positivo tambe. Pensa atrobe riba e trabou di pòrtir den antigwedat. Ora un enemigu tabata ke invadí e stat, e pòrtir mester a sera e portanan di e stat pa evitá ku nan ta drenta. Pero, tabatin okashon kaminda nan mester a habri e portanan pa kuminda i otro provishonnan por a drenta sino e habitantenan lo a muri di hamber. Na un manera similar, nos tin ku habri nos kurason regularmente pa laga Yehova su manera di pensa influensiá nos.

¹⁵ Den Beibel nos ta haña Yehova su pensamentunan. Pues, kada bes ku nos lesa Beibel, nos ta permití Yehova su pensamentunan influensiá loke nos ta pensa, sinti i hasi. Kon nos por benefisiá mas di nos lesamentu di Beibel? Orashon ta masha importante. Un ruman muhé a bisa: “Promé ku mi lesa Beibel, mi ta hasi orashon i mi ta pidi Yehova yuda mi mira e ‘kosnan maraviyoso’ ku tin den su Palabra.” (Sal. 119:18) Ademas, nos tin ku meditá riba loke nos ta lesa. Ora nos ta hasi orashon, lesa i meditá, Yehova su Palabra lo yega na “[nos] kurason,” i nos ta kuminsá stima Yehova su manera di pensa.​—Lesa Proverbionan 4:20-22; Sal. 119:97.

16. Menshoná kon algun ruman a benefisiá di JW Broadcasting.

¹⁶ Un otro manera ku nos por laga Yehova su manera di pensa influensiá nos ta di wak tur loke tin disponibel riba JW Broadcasting^®. Un pareha kasá a bisa: “E programanan mensual ta un kontesta pa nos orashonnan! Ora nos ta tristu òf nos ta sinti nos so, e programanan akí ta animá nos. Hopi biaha nos ta skucha e kantikanan na kas. Nos ta laga nan toka ora nos ta kushiná, hasi limpi òf bebe te.” E programanan akí ta yuda nos protehá nos kurason. Nan ta siña nos pensa manera Yehova ta pensa i resistí e preshon pa pensa manera Satanas.

17-18. (a) Segun 1 Reinan 8:61, kiko ta pasa ora nos hasi loke ta bon? (b) Kiko nos por siña for di e ehèmpel di Rei Ezekías? (c) Segun David su orashon na Salmo 139:23 i 24, kiko nos por pidi den orashon?

¹⁷ Kada bes ku nos mira e benefisio di hasi loke ta bon, nos fe ta bira mas fuerte. (Sant. 1:2, 3) Nos ta sinti nos bon pasobra  nos por laga Yehova sintié orguyoso di por yama nos su yunan. Komo resultado, nos deseo pa agradá Yehova ta bira mas fuerte. (Pro. 27:11) Kada prueba ku nos ta enfrentá ta duna nos oportunidat pa demostrá ku nos kurason no ta dividí. (Sal. 119:113) Al kontrario, nos ta demostrá ku nos ta stima Yehova ku henter nos kurason, i ku nos ta determiná pa obedesé su mandamentunan i hasi su boluntat.​—Lesa 1 Reinan 8:61.

¹⁸ Ta klaru, nos tur ta kometé eror, pasobra nos ta imperfekto. Ora nos kometé un eror, kòrda riba e ehèmpel di Rei Ezekías. E tambe a kometé eror, pero el a arepentí, drecha su relashon ku Yehova i sigui sirbi Yehova ku “henter [su] kurason.” (Isa. 38:3-6; 2 Kró. 29:1, 2; 32:25, 26) Pues, laga nos rechasá Satanas su intentonan pa korumpí nos mente. Nos tin ku pidi Yehova yuda nos kultivá “un kurason di komprondementu.” (1 Rei. 3:9; lesa Salmo 139:23, 24.) Nos lo por keda fiel na Yehova, si riba tur kos, nos protehá nos kurason.