1-2. (a) Kiko Yehova ta mira ora miónes di hende rònt mundu ta reuní pa e Sena di Señor? (Wak e plachi riba portada.) (b) Kiko nos ta bai analisá den e artíkulo akí?

KIKO Yehova ta mira ora miónes di hende rònt mundu reuní pa selebrá e Sena di Señor? E ta mira mas ku djis un grupo grandi di hende; e ta tuma nota di kada persona ku ta presente. Por ehèmpel, e ta mira e personanan ku ta asistí tur aña fielmente. Algun di nan ta bini apesar di persekushon severo. Tin hende tambe ku no ta asistí regularmente na nos reunionnan, pero ku ta haña ku ta masha importante pa asistí na Memorial. Yehova ta asta tuma nota di esnan ku ta asistí na Memorial pa promé biaha, kisas djis pa kuriosidat.

² Ta klaru ku Yehova ta keda kontentu ora e mira asina tantu hende asistí na Memorial. (Luk. 22:19) Pero loke ta mas importante pa Yehova no ta e kantidat di hende ku ta asistí, sino e motibu pakiko nan ta bini. Den e artíkulo akí nos lo analisá un pregunta masha importante: Dikon nos no ta asistí solamente na Memorial sino tambe na e reunionnan ku Yehova ta prepará tur siman pa esnan ku ta stim’é?

3-4. (a) Dikon nos ta asistí na nos reunionnan? (b) Ki kualidat nos ta desplegá ora nos ta asistí na nos reunionnan? (c) Segun 1 Korintionan 11:23-26, dikon nos no mester keda sin bai Memorial?

³ E motibu prinsipal pakiko nos ta asistí na nos reunionnan di kongregashon ta pasobra e ta parti di nos adorashon na Dios. Ademas, nos ta asistí na nos reunionnan pasobra  einan Yehova ta siña nos. Hende orguyoso ta pensa ku nan no tin mester di hende pa siña nan. (3 Huan 9) Pero, kontrali na nan, nos ta ansioso pa risibí instrukshon for di Yehova i su organisashon.​—Isa. 30:20; Huan 6:45.

⁴ Nos asistensia na e reunionnan ta mustra ku nos ta humilde i ku nos ke pa Yehova siña nos. Nos ta asistí na e Konmemorashon di e Morto di Hesus pasobra nos sa ku ta importante pa hasi esei, i no djis komo obligashon. Nos ta asistí tambe pasobra humildemente nos ke obedesé e mandamentu di Hesus, kende a bisa: “Sigui hasi esaki na mi memoria.” (Lesa 1 Korintionan 11:23-26.) E reunion ei ta fortalesé nos speransa pa futuro i ta kòrda nos kuantu Yehova ta stima nos. Sinembargo, Yehova sa ku no ta sufisiente pa nos risibí animashon i konsuelo un bes pa aña so. P’esei, el a perkurá pa tur siman tin reunion, i e ta urgi nos pa asistí na nan. Humildat ta motivá nos pa obedesé e mandamentu akí. Nos ta dediká hopi ora tur siman pa prepará i asistí na nos reunionnan.

5. Kon hende humilde ta reakshoná na Yehova su invitashon?

⁵ Tur aña hopi hende humilde ta aseptá Yehova su invitashon pa bin risibí instrukshon for di dje. (Isa. 50:4) Generalmente, nan ta asistí na Memorial promé i despues nan ta kuminsá asistí na e otro reunionnan. (Zak. 8:20-23) Tantu nos komo esnan nobo ta gusta risibí instrukshon di Yehova, kende “ta yuda [nos] i ta libra [nos].” (Sal. 40:17) Sin duda, no tin nada mihó i mas importante ku aseptá e invitashon pa asistí na nos reunionnan i laga Yehova i Hesus, e Yu ku e ta stima asina tantu, siña nos.​—Mat. 17:5; 18:20; 28:20.

6. Kon un hòmber su humildat a yud’é asistí na Memorial?

⁶ Tur aña nos ta hasi hopi esfuerso pa invitá mas tantu hende posibel pa asistí na Memorial. Hopi hende humilde a benefisiá debí ku nan a aseptá e invitashon akí. Laga nos wak un ehèmpel. Un par di aña pasá, un ruman a duna un hòmber un invitashon pa Memorial, pero e hòmber a bisa e ruman ku e no por asistí. Sinembargo, riba e anochi di Memorial, pa e ruman su sorpresa, e hòmber a kana drenta Salòn di Reino. E hòmber a keda asina impreshoná ku e kaluroso bon biní ku el a risibí ku el a kuminsá asistí na nos reunionnan semanal. De echo, e siguiente aña el a falta solamente tres reunion. Kiko a yuda e hòmber akí kambia di opinion i reakshoná asina bon? Algun tempu despues, e ruman ku a invit’é a bisa: “E ta un persona masha humilde.” Sin duda, ta Yehova a atraé e hòmber akí pa forma parti di su pueblo. Awe, e hòmber akí ta nos ruman.​—2 Sam. 22:28; Huan 6:44.

7. Kon loke nos ta siña na reunion i loke nos ta lesa den Beibel por yuda nos ta humilde?

⁷ Loke nos ta siña na nos reunionnan i loke nos ta lesa den Beibel por yuda nos bira humilde. Den e simannan promé ku Memorial, hopi biaha nos reunionnan ta enfoká riba Hesus su ehèmpel i e humildat ku el a demostrá ora el a sakrifiká su bida pa nos. I durante e dianan promé ku Memorial, nos ta ser animá pa lesa e relatonan bíbliko di e susesonan relashoná ku e morto i resurekshon di Hesus. Loke nos ta siña na e reunionnan ei i loke nos ta lesa den e relatonan bíbliko ei ta duna nos mas apresio pa e sakrifisio ku Hesus a hasi pa nos. Komo resultado, nos ta sinti nos motivá pa imitá su humildat i pa hasi Yehova su boluntat, asta ora ta difísil.​—Luk. 22:41, 42.

8. Kon Hesus a demostrá ku e tabatin kurashi?

⁸ Nos tambe ta purba di imitá Hesus i demostrá kurashi. Pensa kon el a demostrá kurashi algun dia promé ku su morto. E tabata sa ku su enemigunan lo a humi’é, batié i mat’é. (Mat. 20:17-19) Asina mes, e tabata dispuesto pa enfrentá morto. Ora e momento ei a yega, el a bisa su fiel apòstelnan ku tabata huntu kuné na Getsémani: “Lanta ariba; laga nos ban. Esun ku ta traishoná mi a yega!” (Mat. 26:36, 46) I ora un grupo di hende ku arma a bini pa arestá Hesus, el a bini dilanti, identifiká su mes i ordená nan pa laga su apòstelnan bai. (Huan 18:3-8) Sin duda, Hesus a demostrá kurashi ekstraordinario! Awe, tantu e rumannan ungí komo esnan ku ta forma parti di e otro karnénan ta hasi nan bèst pa imitá Hesus i demostrá kurashi. Kon nan ta hasi esei?

9. (a) Dikon algun ruman tin mester di kurashi pa asistí ku regularidat na nan reunionnan? (b) Ki efekto nos ehèmpel por tin riba nos rumannan ku ta den prizòn pa motibu di nan fe?

⁹ Kisas, nos tin ku konfrontá situashon difísil pa nos por asistí na nos reunionnan ku regularidat. Si esei ta e kaso, nos tin mester di kurashi. Por ehèmpel, algun di nos rumannan ta asistí na nan reunionnan apesar ku nan tin ku lucha ku tristesa, desanimashon, òf problema di salú. Otronan ta demostrá kurashi i ta asistí na nan reunionnan apesar di oposishon severo di nan famia òf di gobièrnu. Pensa un ratu riba e efekto ku nos ehèmpel tin riba e rumannan ku ta den prizòn pa motibu di nan fe. (Heb. 13:3) Ora nan skucha ku nos ta sigui sirbi Yehova apesar di e pruebanan ku nos ta enfrentá, nan ta haña e forsa nesesario pa mantené nan fe, kurashi i integridat. Apòstel Pablo a eksperensiá algu similar. Ora Pablo tabata den prizòn na Roma, e tabata bira masha kontentu ora e tende ku su rumannan tabata sirbi Dios fielmente. (Flp. 1:3-5, 12-14) Poko promé ku Pablo a sali for di prizòn, Pablo a skirbi su karta na e hebreonan. Den e karta ei, el a urgí e kristiannan fiel pa “sigui stima otro manera ruman” i pa nunka keda sin bai e reunionnan.​—Heb. 10:24, 25; 13:1.

10-11. (a) Ken nos mester invitá na Memorial? (b) Ki motibu Efesionan 1:7 ta duna nos pa hasi esei?

¹⁰ Nos ta demostrá kurashi ora nos invitá nos famia, kolega di trabou i bisiña pa asistí na Memorial. Dikon nos ta invitá nan? Pasobra nos ta masha gradisidu pa loke Yehova i Hesus a hasi pa nos. Ademas, nos ke pa nan tambe siña kon nan por benefisiá di Yehova su “bondat inmeresí” mediante e reskate.​—Lesa Efesionan 1:7; Rev. 22:17.

¹¹ Ora nos bai nos reunionnan nos ta demostrá kurashi, pero nos ta desplegá un otro bunita kualidat tambe. Tantu Yehova komo Hesus ta desplegá e kualidat akí na un manera sobresaliente.

12. (a) Kon nos reunionnan ta yuda nos stima Yehova i su Yu mas? (b) Segun 2 Korintionan 5:14 i 15, kon nos por imitá Hesus?

¹² Amor pa Yehova i Hesus ta motivá nos pa asistí na nos reunionnan, i e reunionnan ta fortalesé nos amor pa nan. Kon asina? Wèl, ora nos asistí na nos reunionnan, konstantemente nos ta haña informashon ku ta yuda nos kòrda loke nan a hasi pa nos. (Rom. 5:8) Memorial spesialmente ta kòrda nos kuantu Yehova i Hesus ta stima hende, asta esnan ku ainda no ta komprondé e importansia di e reskate. Ku un kurason yen di gratitut, nos ta purba di imitá Hesus tur dia. (Lesa 2 Korintionan 5:14, 15.) Ademas, komo ku Yehova a perkurá e reskate, nos ta sinti nos motivá pa alab’é. Un manera ku nos por alabá Yehova ta di duna komentario sinsero na nos reunionnan.

13. Kon nos por mustra Yehova i Hesus kuantu nos ta stima nan? Splika.

¹³ Nos por mustra Yehova i Hesus kuantu nos ta stima nan, ora nos ta dispuesto pa hasi sakrifisio pa nan. Hopi biaha, nos tin ku hasi diferente sakrifisio pa asistí na nos reunionnan. Por ehèmpel, mayoria di kongregashon ta tene nan reunion di den siman na final di un dia di trabou, ora ku probablemente nos ta kansá. I e otro reunion ta den wikènt ora otro hende ta deskansá. Bo no ta kere ku Yehova ta tuma nota di e esfuerso ku nos ta hasi pa bai reunion, aunke nos ta kansá? Klaru ku sí! De echo, mas grandi nos sakrifisio ta, mas Yehova ta apresiá e amor ku nos ta demostrá p’e.​—Mar. 12:41-44.

14. Ki ehèmpel perfekto Hesus a pone pa nos?

¹⁴ Hesus a pone un ehèmpel perfekto pa nos; el a mustra amor pa hende mediante sakrifisio propio. I no solamente pasobra e tabata dispuesto pa muri pa su disipelnan, sino tambe pasobra e tabatin e kustumber di pone nan interesnan promé ku esnan di su mes. Por ehèmpel, asta ora Hesus tabata físikamente i emoshonalmente kansá, el a tuma tempu pa papia ku su disipelnan i siña nan un lès importante. (Luk. 22:39-46) Ademas, el a enfoká riba loke e por a duna hende, i no riba loke e por a risibí for di nan. (Mat. 20:28) Si nos tin e mesun tipo di amor ei pa Yehova i pa nos rumannan, nos lo hasi tur loke nos por pa asistí  na e Sena di Señor i tambe na tur nos otro reunionnan.

15. Ken spesialmente nos ke yuda?

¹⁵ Nos ta forma parti di e úniko berdadero hermandat kristian, i nos ta gusta dediká mayoria di nos tempu invitando hende pa bin forma parti di e hermandat ei. Sinembargo, e personanan ku nos ke yuda spesialmente ta “nos rumannan den fe” ku a bira inaktivo. (Gal. 6:10) Nos ta demostrá nos amor pa nan ora nos animá nan pa asistí na nos reunionnan, spesialmente Memorial. Meskos ku Yehova i Hesus, nos tambe ta bira masha kontentu ora nos rumannan inaktivo bolbe na Yehova, nos Tata i Wardador amoroso.—Mat. 18:14.

16. (a) Kon nos por animá otro, i kiko nos reunionnan lo yuda nos kuné? (b) Dikon e temporada akí ta un bon momento pa nos kòrda riba Hesus su palabranan na Huan 3:16?

¹⁶ Durante e siguiente simannan, invitá mas tantu hende posibel pa asistí na e Konmemorashon di e Morto di Hesus ku lo tuma lugá riba djabièrnè 19 di aprel 2019. (Wak e kuadro “ Lo Bo Invitá Nan?”) Durante e aña akí, laga nos asistí regularmente na tur reunion ku Yehova ta perkurá pa nos i asina animá otro. Segun ku e fin di e sistema akí ta yega serka, nos tin mester di nos reunionnan pa yuda nos demostrá humildat, kurashi i amor. (1 Tes. 5:8-11) Pues, laga nos mustra Yehova i Hesus kon gradisidu nos ta pa e amor ku tantu e komo su Yu tin pa nos.​—Lesa Huan 3:16.