1-2. Ki situashon hopi sirbidó di Yehova ta haña nan kuné, i kon nan ta sinti nan mes?

PENSA riba e tres situashonnan akí: Un ruman hòmber yòn ta tende di su dòkter ku e tin un malesa grave. Un ruman hòmber di 50 i piku aña ku ta traha duru ta pèrdè trabou i, apesar di tur su esfuerso, e no ta logra haña un otro. Un ruman muhé di edat kada bes ta bira mas limitá den loke e por hasi den sirbishi di Yehova.

² Si bo ta pasando den un problema meskos ku esnan ku nos a menshoná, kisas bo ta sinti ku bo no ta sirbi pa nada mas. E tipo di problemanan ei por kita bo goso, destruí bo rèspèt propio i perhudiká bo amistat ku otro hende.

3. Ki punto di bista Satanas i esnan ku ta meskos kuné tin tokante bida humano?

³ E mundu akí ta mira bida di ser humano meskos ku Satanas. Semper el a trata hende komo si fuera nan ta di poko balor. Sin pone man na su kurason, el a bisa Eva ku lo e ta liber si e desobedesé Dios, maske e tabata sa bon bon ku Eva lo muri si el a hasi esei. Satanas semper a kontrolá komèrsio, polítika i religion di e mundu akí. P’esei, no ta un sorpresa ku hopi empresario, polítiko i lider religioso ta meskos kuné; nan no tin niun rèspèt pa bida i dignidat di hende.

4. Kiko nos lo analisá den e artíkulo akí?

⁴ Di otro banda, Yehova ke pa nos tin un punto di bista balansá. E ke pa nos sa ku nos tin balor p’e. I ora nos  haña nos den situashon ku por laga nos sinti ku nos no tin balor, e ta yuda nos. (Sal. 136:23; Rom. 12:3) E artíkulo akí lo analisá kon Yehova ta yuda nos den tres situashon spesífiko: (1) Ora nos ta malu, (2) ora nos ta pasa den difikultat finansiero i (3) ora edat avansá ta laga nos sinti ku nos no ta útil mas pa Yehova. Pero promé ku esei, laga nos wak dikon nos por tin sigur ku kada un di nos ta balioso pa Yehova.

5. Kiko ta proba bo ku nos ta balioso pa Yehova?

⁵ Aunke nos ta trahá di stòf, nos ta masha balioso pa Yehova; nos ta mas ku djis tera. (Gén. 2:7) Kon nos sa esei? Wèl, Yehova a krea hende ku e abilidat i kapasidat di imitá e kualidatnan ku e tin. (Gén. 1:27) Di e manera ei, el a pone nos ariba di tur otro kos ku el a krea riba tera. El a asta duna nos e responsabilidat di kuida e tera i e bestianan.—Sal. 8:4-8.

6. Ki otro prueba nos tin ku hende imperfekto ta balioso pa Yehova?

⁶ Asta despues ku Adam a peka, Yehova a sigui konsiderá hende balioso. Nos ta asina balioso p’e ku el a duna su Yu stimá, Hesus, komo reskate pa nos piká. (1 Huan 4:9, 10) Debí na e reskate ei, Yehova lo resusitá hende ku a muri pa motibu ku Adam a peka, “tantu hende hustu komo inhustu.” (Echo. 24:15) E Palabra di Dios ta mustra ku nos ta presioso pa Yehova, sin importá nos salú, situashon finansiero òf edat.—Echo. 10:34, 35.

7. Ki prueba mas nos tin ku ta mustra ku nos ta masha balioso pa Yehova?

⁷ Nos tin mas prueba ku ta mustra ku nos ta masha balioso pa Yehova. El a hala nos serka dje i a tuma nota kon nos a reakshoná na e bon notisia. (Huan 6:44) Segun ku nos a hala serka Yehova, el a hala mas serka nos. (Sant. 4:8) Pa Yehova demostrá kon presioso nos ta p’e, e ta invertí tempu i energia pa eduká nos. E sa ken nos ta awor i ken nos por bira. I e ta disipliná nos pasobra e ta stima nos. (Pro. 3:11, 12) Sin duda, nos ta masha balioso pa Yehova!

8. Kon Salmo 18:27-29 por yuda nos ora nos haña nos ku desafio?

⁸ Algun persona a mira Rei David komo un hende ku no ta sirbi pa nada. Pero David tabatin sigur ku Yehova tabata stim’é i tabata yud’é. E siguransa ei, a yuda David perseverá den su situashon ku un bon aktitut. (2 Sam. 16:5-7) Asina tambe, ora nos ta sinti nos desanimá òf nos ta trata ku problema, Yehova por yuda nos mira kos for di un otro ángulo, i lo e yuda nos pasa over di kualke opstákulo ku ta den nos kaminda. (Lesa Salmo 18:27-29.) Ora nos tin apoyo di Yehova, nada no por stòp nos di sirbié ku goso. (Rom. 8:31) Awor, laga nos analisá e tres situashonnan spesífiko den kua nos mester kòrda ku Yehova ta stima nos i ta konsiderá nos balioso.

9. Kon malesa por afektá e manera ku nos ta sinti?

⁹ Malesa por afektá nos emoshonnan mashá i kisas e por laga nos sinti ku nos no ta útil pa niun hende. Hopi biaha nos ta sinti nos tristu ora nos bira malu òf ora nos mester dependé riba otro hende pa yuda nos debí na nos limitashonnan. Asta ora niun hende no sa ku nos ta malu, kisas nos por sinti nos kibrá ora  nos mira ku nos no por logra hasi algun kos ku ántes nos tabata hasi. Aunke e situashon ei por ta masha difísil, Yehova ta lanta nos ánimo. Kon?

10. Segun Proverbionan 12:25, kiko por yuda nos ora nos ta malu?

¹⁰ Ora nos ta malu, “un bon palabra” por lanta nos ánimo. (Lesa Proverbionan 12:25.) Ta p’esei den Beibel Yehova a hinka bon palabra ku ta rekordá nos ku nos ta balioso p’e, asta ora nos ta malu. (Sal. 31:19; 41:3) Si nos lesa i asta bolbe lesa e palabranan inspirá ei, Yehova lo yuda nos trata ku e sintimentunan negativo ku malesa ta trese kuné.

11. Kon un ruman a logra sinti Yehova su yudansa?

¹¹ Wak loke a pasa ku Jorge. Na yòn, el a haña un malesa debilitante ku a progresá rápidamente. Esei a laga Jorge sinti ku e no tabata sirbi pa nada. El a bisa: “Mi no tabata prepará pa trata ku e manera ku e malesa a laga mi sinti ni ku e bèrgwensa ku otro hende lo mira mi den e situashon ei. Segun ku mi malesa a bira pió, mi tabata keda pensa kon mi bida lo kambia. Esei a kibrá mi, i mi a roga Yehova pa yuda mi.” Kon Yehova a yuda Jorge? El a sigui konta: “Konstantemente mi tabata pensa riba mi malesa. Pues, mi a haña e animashon pa lesa e partinan kòrtiku di Salmonan ku ta mustra ku Yehova ta interesá den su sirbidónan. Tur dia mi tabata bolbe lesa e par di versíkulonan ei, esei a yuda mi sinti mi mihó i mas sigur. Ku tempu, otro hende a ripará ku mi tabata smail mas. Nan a asta bisa mi ku mi aktitut positivo a animá nan. Ta e ora ei numa, mi a realisá ku Yehova a kontestá mi orashonnan! El a yuda mi kambia e manera ku mi tabata  mira mi mes. Mi a kuminsá enfoká riba loke Beibel ta bisa tokante kon Dios ta mira mi apesar di mi malesa.”

12. Ora bo ta malu, kiko bo por hasi pa bo sinti Yehova su yudansa?

¹² Si bo ta malu, bo por tin e siguransa ku Yehova sa loke bo ta pasando aden. Rog’é yuda bo tin un punto di bista balansá di bo situashon. Djei, lesa e bon palabranan ku el a skirbi pa bo den Beibel. Enfoká riba e versíkulonan ku ta mustra kon Yehova ta balorá kada un di su sirbidónan. Segun ku bo ta hasi esei, lo bo realisá ku Yehova ta bon ku tur hende ku ta sirbié fielmente.—Sal. 84:11.

13. Kon un kabes di famia por sintié ora e pèrdè trabou?

¹³ Tur kabes di famia ke perkurá bon pa e nesesidatnan di su famia. Pero imaginá un ruman ku, sin ku el a hasi nada robes, ta pèrdè su trabou. E ta hasi tur su esfuerso pa haña un trabou, pero nada. E situashon ei por laga e ruman sinti ku e no ta sirbi. Pero, si e enfoká riba e promesanan di Yehova, esei por ta di gran yudansa p’e. Kon asina?

14. Dikon Yehova semper ta kumpli ku su palabra?

¹⁴ Yehova semper ta kumpli ku su palabra. (Hos. 21:45; 23:14) Dikon? Wèl, promé, su nòmber, òf reputashon, ta den wega. Yehova a duna su palabra ku lo e perkurá pa su fiel sirbidónan, i e ta sinti e obligashon di kumpli ku e promesa ei. (Sal. 31:1-3) Ademas di esei, Yehova sa ku nos, komo parti di su famia, lo bira tristu i desapuntá si e no perkurá pa nos. Yehova a primintí di duna nos loke nos tin mester tantu den sentido material komo spiritual, i nada no por  strob’é di kumpli ku loke el a bisa!—Mat. 6:30-33; 24:45.

15. (a) Ki difikultat e kristiannan di promé siglo a haña nan kuné? (b) Ki konfiansa Salmo 37:18 i 19 ta duna nos?

¹⁵ Ora nos kòrda ku Yehova semper ta kumpli ku su palabra, esei lo yuda nos konfia den dje apesar di difikultat finansiero. Pensa riba e ehèmpel di e kristiannan di promé siglo. Ora un persekushon grandi a lanta kontra e kristiannan na Herúsalèm, “tur e disipelnan ku eksepshon di e apòstelnan, a plama.” (Echo. 8:1) Kiko esei a trese kuné? Difikultat finansiero! Probablemente e kristiannan a pèrdè nan kas, trabou òf negoshi. Pero, Yehova no a bandoná nan; ni nan no a pèrdè nan goso. (Echo. 8:4; Heb. 13:5, 6; Sant. 1:2, 3) Yehova a yuda e kristiannan fiel ei, i lo e hasi meskos pa nos.—Lesa Salmo 37:18, 19.

16. Kiko por pone nos sinti ku nos adorashon no ta bal mashá pa Yehova?

¹⁶ Segun ku nos edat ta subi, nos por kuminsá sinti ku no tin masha kos ku nos por hasi pa Yehova. Kisas Rei David tabatin e mes preokupashon segun ku su edat tabata subi. (Sal. 71:9) Kon Yehova por yuda nos?

17. Kiko nos ta siña for di e eksperensia di Jheri?

¹⁷ Wak e eksperensia di un ruman muhé ku yama Jheri. El a haña invitashon pa asistí na un reunion di entrenamentu na Salòn di Reino tokante kon pa mantené edifisio ku nan ta usa pa sirbi Yehova. Pero, e no tabata kier a bai. El a bisa: “Mi ta grandi kaba, biuda i no tin niun abilidat òf kapasidat ku Yehova por usa. Mi ta sinti mi inútil.” E anochi promé  ku e reunion di entrenamentu, Jheri a deshogá su mes na Yehova den orashon. E dia siguiente, ora el a yega Salòn, ainda e tabata puntra su mes kiko e ta hasi einan. Durante e reunion, un di e oradónan a resaltá ku e abilidat i kapasidat di mas importante ta ku di buena gana nos ta laga Yehova siña nos. Jheri a konta: “Mi di: ‘Esei sí mi tin!’ Mi a kuminsá yora, pasobra mi a realisá ku Yehova a kontestá mi orashon. E tabata sigurá mi ku mi tin algu balioso pa dun’é i ku e tabata dispuesto pa siña mi!” Kòrdando riba e dia ei, Jheri a bisa: “Mi a yega e reunion nèrvioso, desanimá i inútil. Pero mi a sali ta sinti mi sigur, animá i útil!”

18. Kon Beibel ta mustra ku Yehova ta balorá nos adorashon, asta ora nos edat subi?

¹⁸ Yehova por sigui usa nos den su sirbishi, asta ora nos edat subi. (Sal. 92:12-15) Kisas bo ta haña ku bo ta hasi masha tiki pa Yehova. Pero Hesus a siña nos ku, pa Yehova, tur loke nos ta hasi den su sirbishi ta balioso p’e. (Luk. 21:2-4) Pues, enfoká riba loke bo por hasi. Por ehèmpel, bo por papia ku otro hende tokante Yehova, hasi orashon pa bo rumannan i animá nan pa keda fiel. Yehova ta mira bo komo su kompañero di trabou, no debí na loke bo por logra, sino pasobra di buena gana bo ta obedes’é.—1 Kor. 3:5-9.

19. Ki siguransa Romanonan 8:38 i 39 ta duna nos?

¹⁹ Esta bon ta pa adorá Yehova, un Dios ku ta konsiderá kada un di su sirbidónan balioso! Yehova a krea nos pa hasi su boluntat, i ta adorashon berdadero ta duna nos bida sentido. (Rev. 4:11) Aunke mundu ta mira nos komo inútil, Yehova no tin bèrgwensa di nos. (Heb. 11:16, 38) No ta importá ku nos tin ku trata ku malesa, difikultat finansiero òf edat avansá, nos por tin sigur ku nada no por separá nos for di e amor ku nos Tata den shelu tin pa nos.—Lesa Romanonan 8:38, 39.