1. Kiko Yehova a bisa ku lo pasa den nos tempu?

YEHOVA a profetisá tokante nos tempu: “Dies hòmber for di tur e nashonnan lo kohe bistí di un hudiu tene, bisando: ‘Laga nos bai ku boso, pasobra nos a tende ku Dios ta ku boso.’” (Zak. 8:23) Den e teksto ei, e “hudiu” ta representá e personanan ku Dios a ungi ku spiritu santu. Beibel ta yama nan tambe “e Israel di Dios.” (Gal. 6:16) I e “dies hòmber[nan]” ta representá tur hende ku tin e speransa di biba pa semper riba tera. Nan sa ku ta Yehova a skohe e kristiannan ungí, i nan ta haña ku ta un onor di por adorá Dios huntu ku e ungínan.

2. Den ki sentido e “dies hòmber[nan]” ta “bai ku” e ungínan?

² Aunke no ta posibel pa sa nòmber di kada un di e kristiannan ungí riba tera awe, * hende ku tin e speransa pa biba riba tera por “bai ku” e ungínan. Den ki sentido? Beibel ta bisa ku “dies hòmber” “lo kohe bistí di un hudiu tene, bisando: ‘Laga nos bai ku boso, pasobra nos a tende ku Dios ta ku boso.’” E versíkulo ei ta papia di un hudiu. Pero, e pronòmber “boso” ta referí na mas ku un persona. P’esei, e hudiu no ta referí na un persona so pero ta representá henter e grupo di kristian ungí. Pues, e “dies hòmber[nan],” esta, hende ku no ta ungí, ta “bai  ku” e ungínan ora nan ta sirbi Yehova huntu ku e kristiannan ungí. Pero, nan no ta mira e ungínan komo nan lider, pasobra nan sa ku Hesus ta nan Lider.—Mat. 23:10.

3. Ki pregunta e artíkulo akí lo kontestá?

³ Mirando ku ainda tin algun ungí entre e pueblo di Dios awe, algun hende kisas ta puntra nan mes: (1) Kon e ungínan mester mira nan mes? (2) Kon nos mester trata un hende ku ta kome di e pan i bebe di e biña? (3) Nos mester preokupá si e kantidat di hende ei oumentá? E artíkulo akí lo kontestá e preguntanan ei.

4. Ki spièrtamentu tin na 1 Korintionan 11:27-29, i dikon e ungínan mester tum’é na serio?

⁴ E ungínan mester tuma e spièrtamentu na 1 Korintionan 11:27-29 (les’é) na serio. Kon un ungí por kome di e pan i bebe di e biña na un manera “indigno”? Lo el a hasi esei si el a kome di e pan i bebe di e biña ma e no tabata biba di akuerdo ku Yehova su normanan moral hustu. (Heb. 6:4-6; 10:26-29) E ungínan ta realisá ku nan mester keda fiel si nan ke risibí “e premio di Dios su  yamada selestial pa medio di Kristu Hesus.”—Flp. 3:13-16.

5. Kon e ungínan mester mira nan mes?

⁵ E spiritu santu di Yehova ta yuda Su sirbidónan pa nan ta humilde, i no orguyoso. (Efe. 4:1-3; Kol. 3:10, 12) P’esei, e ungínan no ta pensa ku nan ta mihó ku otro sirbidó di Yehova. Nan sa ku Yehova no nesesariamente ta duna e ungínan mas spiritu santu ku su otro sirbidónan. Nan no ta pensa ku nan ta komprondé Beibel mihó ku otro hende. I hamas nan lo bisa un otro hende ku e tambe a ser ungí i ku e mester kuminsá kome di e pan i bebe di e biña. Mas bien, humildemente e ungínan ta rekonosé ku ta Yehova so por invitá un hende pa biba den shelu.

6. Segun 1 Korintionan 4:7 i 8, kon un ungí mester komportá su mes?

⁶ Un ungí ta haña ku ta un gran privilegio ku el a ser invitá pa biba den shelu, pero e no ta spera trato spesial di e rumannan. (Flp. 2:2, 3) E sa tambe ku ora el a ser ungí, Yehova no a laga niun persona mas sa di esei. P’esei, un ungí lo no keda strañá si un persona no ta kere mesora ku el a ser ungí. E sa ku Beibel ta siña nos pa no sea lihé pa kere un hende ku bisa ku Dios a dun’é un privilegio spesial. (Rev. 2:2) Un kristian ungí no ta spera di risibí hopi atenshon. P’esei, e no ta bisa un persona ku el a kaba di konosé ku e ta ungí. Ni e no ta kana broma ku e ta ungí.—Lesa 1 Korintionan 4:7, 8.

7. Kiko e ungínan lo no hasi, i dikon?

⁷ Kristian ungí no ta haña ku nan mester anda solamente ku otro ungí, komo si fuera nan ta pertenesé na un klup eksklusivo. Nan no ta purba di saka afó ken mas ta ungí djis pa papia ku nan tokante kon nan a ser ungí òf pa forma grupo privá pa studia Beibel. (Gal. 1:15-17) Si nan hasi esei, e kongregashon lo no keda uní. Nan lo ta trahando kontra spiritu santu, ku ta yuda e pueblo di Dios pa mantené pas i union.—Rom. 16:17, 18.

8. Dikon bo mester paga tinu kon bo ta trata e ungínan? (Wak tambe e nota.)

⁸ Kon nos mester trata e rumannan ku ta ungí? Lo ta robes pa duna demasiado atenshon i elogio na un ruman, asta  si e ta un ruman ungí di Kristu. (Mat. 23:8-12) Ora Beibel ta papia tokante e ansianonan, e ta animá nos pa “imitá nan fe,” pero e ta bisa tambe ku nos no mester mira niun hende komo nos lider. (Heb. 13:7) Ta bèrdat ku Beibel ta bisa ku algun ruman ta “digno di dòbel onor.” Pero, esei ta pasobra nan “ta dirigí na un manera ekselente” i “ta traha duru pa kumpli ku nan tarea di papia i duna siñansa,” i no pasobra nan ta ungí. (1 Tim. 5:17) Si nos duna e ungínan demasiado atenshon i elogio, nos por laga nan sinti nan inkómodo. * Òf pió ainda, nos por laga nan bira orguyoso. (Rom. 12:3) Sin duda, niun di nos lo no ke hasi algu ku por pone un ruman ungí di Kristu kometé un eror asina grave!—Luk. 17:2.

9. Kon nos por demostrá ku nos ta respetá e kristiannan ungí?

⁹ Kon nos por demostrá ku nos ta respetá e ungínan? Un manera ta di no puntra nan kon nan a bira ungí. Esei ta un asuntu personal, ku nos no tin derecho di sa. (1 Tes. 4:11; 2 Tes. 3:11) I nos no mester pensa ku nan kasá, nan mayornan òf otro miembro di famia tambe ta ungí. Un hende no ta heredá e speransa di biba den shelu for di su famia. E ta risibí esei for di Dios. (1 Tes. 2:12) Nos mester evitá di hasi pregunta ku por pone hende sinti nan malu. Por ehèmpel, nos no ta bai puntra kasá di un ruman hòmber ungí: “Kon bo ta sinti bo ora bo pensa ku lo bo biba pa semper riba tera sin bo esposo?” Al fin i al kabo, nos por tin sigur ku den mundu nobo Yehova lo “satisfasé e deseo di tur ser bibu.”—Sal. 145:16.

10. Kon nos por protehá nos mes si nos ta evitá di halsa hende?

¹⁰ Di otro banda, ora nos no trata e ungínan komo si fuera nan ta mas importante ku otro hende, nos ta protehá nos mes. Kon asina? Beibel ta bisa ku algun ungí kisas lo bira infiel. (Mat. 25:10-12; 2 Ped. 2:20, 21) Pero, si nos ta evitá di halsa hende, nos lo no sigui nan, aunke nan ta ungí, masha konosí òf tin hopi aña ta sirbi Yehova. (Hudas 16) Asina ei, si nan bira infiel òf sali for di e kongregashon, nos lo no pèrdè nos fe den Yehova òf stòp di sirbié.

11. Kiko ta pasando ku e kantidat di hende ku ta kome di e pan i bebe di e biña?

¹¹ Pa hopi aña, e kantidat di hende ku tabata kome di e pan i bebe di e biña tabata baha. Pero, den e último añanan, e kantidat ta oumentá tur aña. Nos mester preokupá pa esei? Nò. Laga nos wak dikon.

12. Dikon nos no mester preokupá tokante e kantidat di hende ku ta kome di e pan i bebe di e biña?

¹² “Yehova konosé esnan ku ta pertenesé na dje.” (2 Tim. 2:19) Yehova sí sa ken realmente ta ungí, pero e rumannan ku ta konta e kantidat di hende ku a kome di e pan i bebe di e biña no sa. Pues, e konteo ta inkluí hende ku ta kere ku nan ta ungí, pero ku realmente no ta. Por ehèmpel, algun tabatin kustumber di kome di e pan i bebe di e biña pero ku tempu a stòp. Tin otro kisas ta sufri di un problema mental òf emoshonal ku ta  pone nan kere ku nan lo goberná ku Kristu den shelu. Pues, nos no sa kuantu ungí tin eksaktamente ainda riba tera.

13. Beibel ta bisa kuantu ruman ungí lo tin riba tera ora tribulashon grandi kuminsá?

¹³ Lo tin ruman ungí na tur parti di tera ora Hesus bini pa hiba nan shelu. (Mat. 24:31) Beibel ta bisa ku, durante e último dianan, lo tin un kantidat chikitu di ungí riba tera. (Rev. 12:17) Pero, e no ta bisa kuantu lo t’ei ainda riba tera ora tribulashon grandi kuminsá.

14. Segun Romanonan 9:11 i 16, kiko nos tin ku komprondé tokante e manera ku Yehova ta skohe e ungínan?

¹⁴ Yehova ta disidí ki ora e ta skohe un hende pa ser ungí. (Rom. 8:28-30) Yehova a kuminsá skohe e ungínan despues ku el a resusitá Hesus. Ta parse ku, den promé siglo, tur kristian berdadero tabata ungí. Durante e siglonan ku a sigui, mayoria di hende ku a bisa ku nan tabata kristian realmente no a sigui Kristu. Apesar di esei, durante e añanan ei, Yehova a ungi e pokonan ku tabata kristian berdadero. Nan tabata manera e trigu ku Hesus a bisa lo krese meimei di mal yerba. (Mat. 13:24-30) Durante e último dianan, Yehova a sigui skohe hende ku lo forma parti di e 144.000. * Pues, si Dios disidí di ungi algun kristian djis promé ku e fin, ken nos ta pa kuestion’é? (Lesa Romanonan 9:11, 16.) * Nos mester tene kuidou pa nos  no reakshoná manera e trahadónan deskribí den un ilustrashon ku Hesus a konta. Nan a reklamá e desishon ku e doño di e kunuku di wendrùif a tuma enkuanto e trahadónan ku a kuminsá traha último.—Mat. 20:8-15.

15. Tur kristian ungí ta forma parti di “e esklabo fiel i prudente” menshoná na Mateo 24:45-47? Splika.

¹⁵ No ta tur kristian ku tin e speransa di biba den shelu ta forma parti di “e esklabo fiel i prudente.” (Lesa Mateo 24:45-47.) Den promé siglo, Yehova i Hesus a usa un par di kristian pa alimentá, òf siña, su pueblo. Por ehèmpel, ta un par di kristian ungí so Yehova a usa pa skirbi e Skritura Griego Kristian. Awe ta meskos. Ta djis un par di kristian ungí so tin e responsabilidat di duna e pueblo di Dios “kuminda na e debido tempu.”

16. Kiko bo a siña den e artíkulo akí?

¹⁶ Kiko e artíkulo akí a siña nos? Ku Yehova a disidí di duna bida eterno riba tera na gran parti di e personanan ku ta sirbié i bida den shelu pa e pokonan ku lo goberná ku Kristu. Yehova ta rekompensá tur su sirbidónan—tantu e “hudiu” komo e “dies hòmber[nan]”—i ta ferwagt pa nos obedesé e mes leinan i keda fiel. Nos tur mester keda humilde. Nos tur mester sirbi Yehova i ta uní. I nos tur mester hasi esfuerso pa den kongregashon tin pas. P’esei, segun ku nos ta yega mas serka di e fin, laga nos sigui sirbi Yehova i sigui Kristu komo “ún tou.”—Huan 10:16.